Yakul Ku Yipul Yen

◼ Ov, Chifanyidin Atuman a Yehova Kwangan malejan makwatau kal mu kaset ap madiskur mafundau kal?

Atukasikeshining nich mazu madiokilinga mu Bibil. (Mid. 15:32) Chawiy, chidi cha usey kukasikeshijan nich rusangu pamwing ni antu akad kwikalaku ku yikumangan. Chikudia yam kushalijan ya kukwatin mazu katat, akutwish kuchap mapaper mavud ma diskur ni kumangan kudi antu akwau kapamp kamwing. Antu amwing alamining madiskur makwatau kal, ni madiskur masalau kal kwasuta kal mivu yivud, nich rutong ruwamp akat kupan madiskur minam ap kumachap mavud mulong wa arund nau. Akwau kand afungula kal kapend ka Web ni atekamu kal madiskur chakwel amakwata kudi antu akwau.

Choviken, kudiap mulong anch twakwat madiskur pa kaset mulong wa kumateshang ayinetu ap mulong wa yid ya mu majuku metu. Chikwau kand, amakurump akutwish kutenchik chakwel akwatang madiskur mulong wa yid ya chikumangen yidia yibid yiburedina mutapu wa kuya ku yikummangan. Pakwez, kudi yiyingish yivud kudi etu chakwel tulikang kupan madiskur mafundau kal ni kumakwat pa kaset.

Mulong asadiling ma diskur kukwatijan nich maswir ma pol pen, chikutwish kutukasiken kutesh nawamp kurumburik kwa manans ma mazu makwatinau, ni tukutwishap kujingunin mu mwikadil ik mwamasalau. Chikwau kand, chikutwish kutukasiken chakwel twijik nany wasadila diskur ni kwisu kwadisadidilay, chawiy tufanyidin kwikal nich ruchingej anch rusangu ritulejenau ridi ra machuku minam ni rakin. (Luka 1:1-4) Chawiy, kwangan mapaper ma madiskur ap mazu makwatinau kukutwish kuyibachik antu amwing chakwel ata matu ap itiyija nich kalimish .—1 Kor. 3:5-7.

Kashalapol ushishamena ni kubabal ukwet mudimu wa “kwangan” yakudia ya muspiritu pa “chisu chiwanyidina” (Luka 12:42) Kuwejinaku kand kutenchik kwa madiskur makezau kusal mu chikumangen cha pol pen cha Atuman a Yehova ni mazu makwatau kal makutwish kubudikin pa kapend ka Web kijikena ka jw.org. Tukutwish kwikal nich ruchingej anch kashalapol ushishamena ni kubabal pamwing ni Chisak chend Chitakedila akutukwash nich yom yituswiridina chakwel twikal iminya dang mu ritify.—Mid. 16:4, 5.