Ov, Nisadiling Yiwanyidinaku?

1. Ov, chom ik chikwatijadina nich kushinshaman kwa in Kristu?

¹ Ov, ukat kwiyipulap amwiney chipul chinech? Pamwingap kiusadilingap kand mudimu wa kulejan mudi mutapu wasalanga pasak mulong wa mivu ya chivadik yiyila ni kuvul, yikokujol ya ukash wa mujimbu, ap yisend ya mu dijuku ni yawiy yiyil ni kwiwejinaku, yom mudi yiney yikuletidining kuziy. Nambaz umwing ukweta an asatu wafunda anch yisu yimwing wiyoviling mudi mulong winou umutadil mulong uswiridin chisu ni usu chakwel atenchika mipak ya kubangin dijuku diend ni kuman chom chifanyidinay kusal mu mudimu wa kulejan. Ov, chom ik cheza kumukwash chakwel atala mulong winou mu mutapu wisikena?

2. Yehova witin tusal ik?

² Chitwitinay Yehova Kusal: Pakad ntad, antu awonsu a mukach mwetu asotil kusal nakash mu mudimu wa kulejan. Pakwez kuding chisu chivud kushalijan pakach pa yom tusadilinga ni yom yakinakin kamu tukutwisha kusal. Chawiy lel, tufanyidin kusal nakash mu kumekeshang anch kituburedinap musangar. Tufanyidin kwijik anch Yehova wij nawamp mipak yetu ni kitiningap yom yitupandakedina chipim pakwez witining yitukutwishsa kusal mu mutapu uwamp. (Kus. 103:13, 14) Ov, Ndiy witin tusal ik? Yehova witin tumusadila ni muchim umwing, twipana kudiay mu mutapu upandakena kuwap.—Kol. 3:23.

3. Ov, mutapu ik tukutwisha kushinshikin mausu metu matusadilinga mu mudimu wa kulejan?

³ Chom ik chikeza kutukwash chakwel tujingunin chom chidia chakinakin mulong wetwetu?Tukutwish kumwit Yehova chakwel atukwasha kuman mwikadil wetu wakin. (Kus. 26:2) Chawiy, murund mwin Kristu utwija nawamp ni wakad wom wa kutulej pa chisu chitudia mu maswir ukutwish kand pamwingap kwikal ni ukwash. (Jinsw. 27:9) Twijikany kand anch mashakamin makat kuswimp, chidi cha usey kushinshikin mwikadil wetu chisu chawonsu.—Efes 5:10.

4. Ov, mutapu ik tukutwisha kuman yivurish yengamidina mu Bibil piur pa mudimu wakulejan?

⁴ Mutapu tumeninga Mudimu Wa Kulejan: Antu asotininga kuyikasikesh in kukink mau ayitazukining chisu chivud mulong wa kuyikasikesh. Rutong ridi ra kuyikwash in kukink mau chakwel awanyish rutong rau, pakad kuyizish. Chawiy chimwing, dikasikesh diengamidina mu Bibil ni yivurish yituvurishiningau mu yikumangan yetu ni mu mikand yetu chakwel ‘tulejan dizu swa’ yidiaku mulong wa ukwash wetu ni kiyirumburilap anch mausu metu madi mu mitapu yivud makad kuwanyin. (2 Tim. 4:2) Tukutwish kwikal nich ruchingej anch mudi mutwiyijidishinga kusal yom mu mutapu uwamp, Yehova ukez kuvurik ‘rukat retu ni midimu yetu’ pamwing ni kutuyukish.—Heb. 6:10.