Ov, Wadingaku Chibol wa Rawonsu Chisu Chimwing?
1. Ov, chisend ik chifanyidina kwikal nich antu avud, ni chom ik cha usey chifanyidina kushinshikin antu amwing?
1 Pasutin mivu, tunan twa in kulejan twasangera chisend cha “kulejan ni kurumburil Rusangu Ruwamp” mudi atushapol a rawonsu. (Mid. 5:42) Pakwez, antu amwing, imika kusal mudimu wa uchibol mulong wa yiyingish kushalijan. Anch wadingaku chibol wa rawonsu chisu chimwing, ov, washinshikidinap kand mashakamin mey ma katat chakwel utal anch ukutwish kwiyandjik mu mujikit winou?
2. Ov, mulong wak ufanyidina antu asalaku uchibol pasak kushinshikin mashakamin mau ma katat?
2 Anch Waswimpin Mashakamin: Pamwingap mashakamin masala chakwel ulik kusal mudimu wa uchibol chisu chilemp. Chilakej, anch wimika mudimu wa uchibol mulong kiwawanyishangap asaa 90 itangau pa ngond, ov, ukutwish wasal kand katat chakwel uyiwanyish mudi mwayikepishinau 70? Ov, wadingaku ni yisend yivud ya mu dijuku chisu chiwimika mudimu wa uchibol? Nambaz umwing wimika mudimu wa uchibol mulong wa yikokujol ya ukash wend wa mujimbu wasambishin kand kuusal ni pawanyishinay mivu ya chivadik 89. Ndiy wasutisha muvu umwing pakad kwandam mu rupital, wiyova anch ukash wend wa mujimbu ukumutwishish kusal kand uchibol!
3. Ov, mutapu ik yidi ya mu majuku yikutwisha kusal pamwing chakwel yimukwasha muntu kanang udia chibol mu majuku mau?
3 Pamwingap kiwadingap chibol pasak, pakwez muntu kanang mu dijuku dien wimika kusal mudimu wa uchibol mulong wa kubangin yidi ya mu dijuku, mudi nvaj wakudila kal. (1 Tim. 5:4, 8) Anch chidi mwamu, ov, ey ap antu akwau a mu dijuku ufanyidinany kuyikwash chakwel asal uchibol? Ov, mulong wak ufanyidinanyap kwisambin pamwing pa mulong winou? (Jinsw. 15:22) Anch yidi ya mu dijuku yisadil pamwing chakwel umwing wa mukach mwau ikal chibol, yidi yiney yawonsu yifanyidin kwijik anch ndiy usadil mujikit wa usey.
4. Ov, chom ik chikusadila katat chakwel ulik kusal ni yey mudimu wa uchibol?
4 Pikil waziy anch mashakamin mey ma katat kimadiap mapipela chakwel usambish kand mudimu wey wa uchibol. Chirungil chey cha kusal mwamu nich muchim uwamp chimusangareshin Yehova. (2 Kor. 8:12) Sadil ukaliweny wey ukweta mudi chibol mu mudimu wey wa kulejan wa katat. Uswiridin kwikal ni rusot ra kutek mulong winou mu malembil, ni kwikal tayad chakwel utenchik mashakamin mey. (1 Yoh. 5:14) Pamwingap, yisu yikwau, Yehova ukez kukwinkish chisu “cha kusal mudimu ujim” ukeza kukuletin kand musangar mu mudimu wa uchibol wa rawonsu!—1 Kor. 16:9.