Nfalang Jaad Jikweta Usey Ukemp

Mutapu umwing wa usey wa kukasikesh yisakin ya Want udi kusutil ku kupan ukwash ku milambu ya nfalang ya mudimu wa kulejan wa pa mangand mawonsu. Ov, chom ik tukusal anch tukwetap nfalang jivud?

Yisu yimwing Yesu wamumana mwadiamufu kazwendj utekina nfalang jaad ja usey ukemp mu chipau chadinga ku tempel. Rukat mulong wa Yehova rawiy ramubachika ndiy kupan “yawonsu yikwetay, . . . ni yawonsu yend yimulamina.” (Mar. 12:41-44, TMK) Uyakin wajimbulay Yesu, umekeshin anch kulambul kwend kwading kwa usey nakash ku mes ma Nzamb. Chilik chimwing kand, in Kristu a mu mivu chitot ya kusambish kamanap chisend cha kupan ukwash wa nfalang mulong wa mudimu wa kulejan kwikal chisend cha in Kristu adia kusu ampich. Kambuy Paul wajimbula chilakej cha in Masedon, ap anch ading “atuzwendj nakash . . . ikala in kupan chipandakena . . . chad awejaku kand kupan ku rusot rau ayinau.”—2 Kor. 8:1-4.

Chawiy lel, anch tukutwish kulambul kusu ‘nfalang jaad jikweta usey ukemp,’ tufanyidin kuvurik anch milambu yikemp yikutwish kuwejinaku uvud upandiken. Kupan kwetu kudiokila ku muchim kukez kumusangaresh Tatukwetu mwin kupan wa mwiur, mulong “Nzamb ukatil mwin kupan ukat kupan ni musangar.”—2 Kor. 9:7.