Tambulany Chilik cha Aprofet—Yona
1. Ov, ngikadil ik yiwamp yadingay nich Yona?
1 Ov, chom ik chikata kwez mu manangu anch watong piur pa profet Yona? Antu amwing akutwish kumuman mudi muntu chisup ap mwin muchim ukash. Pakwez, ndiy wamekesha patok kwikepish, kutakaman ni mwiku wa kwipan amwinend. Ov, mutapu ik tukutwisha ‘kutambul chilik’ cha ngikadil yisangareshina ya Yona?—Jak. 5:10.
2. Ov, mutapu ik tukutwisha kwimburij kwikepish kwenday Yona?
2 Kwikepish: Chakusambish, Yona wachinina ku mutambu windjing wa teritwar wamwinkishau. Yiney yikutwishap kutukashimwish mulong in Asiria ading antu in chisum nakash ni Ninive awupilanga anch “musumb wizwila nich kujipan.” (Nah. 3:1-3) Pakwez, Yehova wamupupa Yona, ndiy wamekesha kwikepish kwend kusutil ku kwitiy chisend cha kaad chamwinkishau. (Jinsw. 24:32; Yona 3:1-3) Chikalap kulik kwend kwa kusambish, ndiy wasala rusot ra Yehova. (Mat. 21:28-31) Ov, niyetu tudi chilik chimwing akwatin mupak wa kulejan rusangu ruwamp, anch tudi apupinau ap atambwila chisend cha kuswimp teritwar?
3. Ov, milad ik ya mudimu wey wa kulejan yitina kwikal nich kutakaman ni kwipan?
3 Kutakaman ni Mwiku wa Kwipan Amwiney: Chisu chajinguninay Yona anch mupak wend uyimp wakatay wayiteka mu ubaj antu adinga nend mu waat, ndiy wasota kupan mwom wend. (Yona 1:3, 4, 12) Kupwa, pawanyishangay chisend chend mu musumb wa Ninive, ndiy wenda mukach ni mukach mwa musumb, pamwing ap mulong wa kukimb ndond yiwanyidina chakwel alejana dirumburil dia Yehova. Yiney kiyandingap yisal ya chisup, pakwez yading ya profet utakamena wa Yehova! (Yona 3:3, 4) Chikwikal nchik kudi etu nlel unou? Chiswiridin kwikal nich kutakaman kudiokila kudi Nzamb chakwel upana uman pakad wom chikalap nchik rupompat. (Mid. 4:29, 31) Kwipan kwitin kusutish chisu ni kusadil mapit mu mudimu wa kulejan.—Mid. 20:24.
4. Ov, mulong wak tufanyidina kwitekin chisu cha kutongin pa chilakej chiwamp chashau kudi aprofet a Yehova?
4 Chisu chawonsu chiukutanga rusangu piur pa umwing wa aprofet a Yehova, ukez kutaninamu anch watongijokin pa mashakamin minam. Iyipula amwiney anch: Mutapu ik nikutwisha kwakul? Ov, mutapu ik nikutwisha kwimburij ngikadil yend yiwamp mu mwom wam? (Heb. 6:11, 12) Mitu ya milong yidia mu Mudimu Wetu wa Want yikeza kushinshikin malejan makwau ma usey tukutwisha kwilej kudi aprofet akwau ashinshamena a Yehova.