Ov, Chom ik Chitubachikininga Kulejan?
1. Ov, kukwatijan ik kudia pakach pa rukat retu ni mudimu wetu wa kulejan?
1 Kulejan rusang ruwamp ra Want wa Nzamb udi mudimu upandakena usey tukutwisha kusal nlel unou. Chakin kamu, nich mujikit winou umwing, tumekeshining kuziyil kwetu ku yijil yijim nakash yaad ya kumukat Yehova ni kumukat mutej netu. (Mar. 12:29-31) Rukat ridi usu ukash utubachikininga kushiken ku kwikal in kulejan a mushiku.—1 Yoh. 5:3.
2. Ov, mutapu ik mudimu wetu wa kulejan umekeshininga anch tumukatin Yehova?
2 Kumukat Yehova: Kumukat Yehova mudi Murund netu mukatish kutubachikining kulond patok pa mulong wend. Pasutin kal mivu 6000 Satan ukat kumudimben. (2 Kor. 4:3, 4) Chawiy lel, antu itiyijining anch Nzamb ukat kuyimesh akayitil mar mu karung ka kasu, udi Usatu wa mayikiyik ni kayibangidiningap antu. Antu avud ashikedin ku kulond anch ndiy kadingakwap. Chisu mud ik tufanyidina kwijikish antu uyakin piur pa Tatukwetu wa mwiur! Usu wetu ukash tusadininga wa kwikal atuman a Nzamb umusangareshining nakash ni umwovishining Satan ujim.—Jinsw. 27:11; Heb. 13:15, 16.
3. Ov, mu mutapu ik mudimu wetu wa kulejan ukutwisha kumekesh rukat mulong wa mutej netu?
3 Kumukat Mutej Netu: Chisu chin chawonsu tupanininga uman kudi muntu kanang, tumekeshining anch tumukatin muntu winou. Antu aswiridin nakash kutesh rusangu ruwamp mu machuku minam makash. Antu avud adia mudi in Ninive a pa chirung cha Yona akad ‘kwijik awonsu kushalijan pakach pa chikas cha katatuku ni cha kamaku.’ (Yona 4:11) Mudimu wetu wa kulejan uyifundishishing antu mutapu wa kwikal nich mwom wa musangar ni uwamp nakash. (Isay 48:17-19) Chinech chiyinkishining ruchingej. (Rom 15:4) Anch atesh ni asadil yom yilejiningau, “akez kupand.”—Rom 10:13, 14.
4. Ov, Yehova kakezap kuvuramen chom ik?
4 An awamp kamekeshangap anch ayikatin anvaj au ching kusu pa yisu yitenchikinau. Asadining usu wa kuyikat yisu yawonsu. Chilik chimwing, kumukat nakash Nzamb ni mutej netu kukez kutubachik chakwel twikala tayad mulong wa kupan uman yisu yawonsu, pakad kulejan ching kusu pa yisu yitenchikinau. Tukez kulejan pakad kulik. (Mid. 5:42) Yehova kakezap kuvuramen rukat ra mutapu winou.—Heb. 6:10.