Ov, Nany Ukutwisha Kumasanger?

1. Chisu tutangina kopi wetu wa Chinong cha Kalam ap Réveillez-vous !, ov, chom ik tufanyidina kushinshikin ni mulong wak?

¹ Magazet Chinong cha Kalam ni Réveillez-vous ! ayirijeka mu manangu kwambatan nich mudimu wa chingand wa pa mangand mawonsu. Chawiy lel, mitu ya milong yisambidin mitu yijim kushalijan. Pitutangininga mutu ni mutu wa mulong udia mu kopi wetu ayinetu, tufanyidin kushinshikin nany ukutwisha kusanger gazet winou, ni kupwa tukukwat mupak wa kumwinkishay.

2. Ov, mitu ik ya milong yidia mu magazet metu yikutwisha kuyisangaresh pakampwil antu akwau?

² Ov, Chinong cha Kalam ik cha katat chisambidina mutu wa mulong wa Bibil wasambela kulond nend mbay ney wa ku mudimu? Ov, kudi mutu wa mulong wisambidina pa mwom wa dijuku ukutwisha kumukwash mwanamakwey? Ov, udiaku ni muntu wijikijadina nend wirijekininga kuya mu weny mwingand yalejanau mu Réveillez-vous ! ? Ov, kukutwish kwikal gazet umwing wisambidina midimu yimwing ya kwisak ap yitenchik ya pol pen ya guvernema yidia mu teritwar wen? Chilakej, gazet umwing wisambidina yikokujol yirishiningau nich amapal ukutwisha kuyisangaresh ku chikumbu cha kuyilamin. Yitenchik yikasikeshina milong ya yijil yikutwish kusanger gazet ukweta mutu wa mulong wisambidin chisum.

3. Lejan uman umwing umekeshina usey wa kupan manimero ma pakampwil ma magazet kudi antu tutongina anch amekeshina musangar mu yom yidiamu.

³ Yibudikin: Kupwa kwa kutambul Réveillez-vous ! wa pa Mwinkind 2011 ukweta mutu wa mulong ulondina anch «Faites de vos enfants des adultes responsables», ambay a uruw a mu Afrique du Sud ipula ku telefon mashikol 25 madia mu teritwar wau. Mashikol ni yikumbu 22 yatambula makopi ni kuyangen anau a shikol. Ambay a uruw akwau a mwingand yiney asala mutapu umwing ni apana makopi ku mashikol mu teritwar wau. Alej shikol yimwing akwata mupak wa kusadil gazet winou mu umutakel ni program wau wa pa rubing. Ambay a uruw inay amuleja kalam wa munyingumuku uman wau. Kupwa kalam niyend wakasikesha yikumangen yidia mu munyingumuku wend chakwel yishejina mashikol ma mu materitwar mau. Biro wa mutiy watambula kwit kuvud kwa magazet chakwel achapa kand nimero winou wa Réveillez-vous !

4. Ov, mulong wak tusotining kupan magazet kudi antu avud anch chitwishikin?

⁴ Magazet metu misambidining kurumburik kwakin kwa yinship yikata kushiken ni kupwitin manangu pa Bibil ni pa Want wa Nzamb. Kudi ching kusu magazet pa divu ‘misambidininga piur pa dipandish.’ (Isay 52:7) Chawiy, tusotining kumapan kudi antu avud anch chitwishikin. Mutapu uwamp wa kumasadil udi wa kwiyipul amwiney anch: ‘Ov, nany ukutwisha kumasanger?’