Tambulany Chilik cha Aprofet—Jowel
1. Ov, mutapu ik tukutwisha kwimburij kwikepish kwa Jowel chisu tudia mu mudimu wa kulejan?
1 Ov, muprofet Jowel wading nany? Ndiy wimekeshin kusu anch wading “mwan ikundj wa Petuwel.” (Jow. 1:1) Muprofet winou mwin kwikepish wakasikeshina piur pa uruu wa Yehova, kakasikeshinap pa chisend chend cha kwikal mudi muruu. Chilik chimwing kand niyetu, pa ndond pa kukimb katumb ka antu ap kwikal wijiken kudi antu, tukupwitin nkeu jetu padiay Yehova ni pa Bibil chisu tudia mu mudimu wa kulejan. (1 Kor. 9:16; 2 Kor. 3:5) Chikwau kand, tutanining usu mu uruu utulejeninga. Ov, mikadil ik ya muprofet Jowel yikutwisha kutwinkish mushiku ni ruchingej nlel unou?
2. Ov, kushej piswimp nakash kwa dijuku dia Yehova kufanyidin kutubachik chakwel tusal ik?
2 “Dichuku dia [Yehova] Diasej Kal Piswimp.” (Jow. 1:15): Ap anch mazu minam amafundin pasutin kal tunan twa mivu, pakwez tudi mu chisu cha kuwanyin kwa kapamp kansudiel ka mazu minam. Mikadil yiyimp ya mangand, kulik kutesh ni kutupipej tutanininga mu teritwar wetu yidi yijingidij yakin yimekeshina anch tushich mu machuku ma kwisudiel ma ditenchik dined diyimp dia yom diezina. (2 Tim. 3:1-5; 2 Pita 3:3, 4) Pitushinshikidina kushej piswimp nakash kwa nsudiel, chawiy tukwet kamu diyingish dikash dia kutek mudimu wa kulejan pa ndond ya kusambish mu mwom wetu.—2 Pita 3:11, 12.
3. Ov, mulong wak mudimu wa kulejan ukwet usey wa pakampwil pitushejina piswimp ni mar makash?
3 ‘Yehova Ukez Kwikal Ndond ya Kwikangil ya Antu End.’ (Jow. 3:16, NW): Kunyikesh kujimbwilau mu verse winou akutwish kukusadil ching kusu pa chisu cha dirumburish dia Yehova pa chirung cha mar makash. Tukwet rongoj pakwijik anch Yehova ukez kayipandish atushalapol end ashinshamena pa chirung chinech. (Kuj. 7:9, 14) Pitwipanina mu mudimu wa kulejan ni pitumena mutapu Yehova utulaminay ni kutwinkish usu, tukasikeshin ritiy retu ni kujijaman kwetu kwawiy kukeza kutukwash pa chirung cha mar makash.
4. Ov, mulong wak tukutwisha kusangar ni kuchingel nich ruchingej machuku ma kurutu?
4 Ap anch uruu wa Jowel aujimbula kudi antu amwing mudi uruu wa mididim, pakwez uyinkishin antu a Nzamb ruchingej ramushena ra dipandish. (Jow. 2:32) El, amboku tuchingelany nich ruchingej machuku ma kurutu ni tulejan nich mushiku rusangu ruwamp ra Want wa Nzamb pituteshina mazu ma Jowel 2:23 malondina anch: ‘Zangamany mulong wa yom yakusadidilanyau kudi [Yehova] Nzamb wen.’