Tambulany Chilik cha Aprofet—Amos
1. Ov, mulong wak chilakej cha Amos chikutwish kwikal musul wa kutukasikesh?
1 Ov, niyey watonginap kal ach kiufanyidinap kulejan mulong wakwikal nich mwikadil wa kwikepish? Anch chidi mwamu, ukutwish kwikal nich mushiku kusutil ku chilakej cha Amos. Ndiy wading kafung wa amikoku ni ndim, chikwau kand Yehova wamwinkisha mbil ya kulejan uruu wa usey. (Amos 1:1; 7:14, 15) Chilik chimwing kand, Yehova uyitondining antu ikepishina ni itudishina a pa chirung chetu. (1 Kor. 1:27-29) Ov, malejan ik makwau tukutwisha kwilej piur pa profet Amos mulong wa mudimu wetu wa kulejan?
2. Ov, mulong wak tufanyidina kwikal ajijamena ku rupompat mu mudimu wa kulejan?
2 Shalany Ajijamena ku Rupompat: Chisu chateshay Amasia, mwin kupesh ni mwin kwifukwil a ngomb mu want wa kwiyand wa michid dikum ya Isarel uprofet wa Amos, ndiy wakula anch: ‘Yang! Tulika kwetu! Tukwet relijon wetu!’ (Amos 7:12, 13) Amasia kateshap mazu ma profet pamwipulay Mwant Jerobowam chakwel alikisha mudimu wa Amos. (Amos 7:7-11) Pakwez Amos kovap wom pa mulong winou. Nlel unou, antakel amwing a chirelijon akasikeshining milong ya chipolitik kusutil ku usu wau wa kuyizengol antu a Yehova. Pakwez, Yehova utukasikeshin anch ut wawonsu ukuchilau mulong wa kuturishish nich ukezap kupandakan.—Isay 54:17.
3. Ov, wisu uruu waad tulejena nlel unou?
3 Lejan Dirumburish dia Nzamb ni Yiyukish ya Machuku ma Kurutu: Ap anch Amos wabwaka dirumburish pantaliken nich michid dikum ya want wa Isarel, ndiy washikena ku kulond anch Bibil wawiy mukand ulejena dijin dia Yehova ni yakushilamu yend ya kuchirishiu ni yiyukish yivud nakash. (Amos 9:13-15) Niyetu kand twisambidining piur pa kwez kwa ‘dichiku dia dirumburish’ dia Nzamb, pakwez chinech chidi ching kusu chikunku cha “rusangu ruwamp ra want” chitufanyidina kulejan. (2 Pita 3:7; Mat. 24:14) Disheshik dia Yehova dikezay kuyishesh antu ayimp ku Harmagedon dikez kurijek njil ya paradis pa divu.—Kus. 37:34.
4. Ov, kashinsh ik tukweta anch tukutwish kuwanyish rusot ra Yehova?
4 Mudimu wa kulejan uruu wa Want mu mangand mudia in rupompat avud ukat chakin kamu kutek mu choziu mupak wetu wa kushakam kwambatan nich kwipan kwetu ni wa kusal rusot ra Yehova. (Yoh. 15:19) Pakwez, tukwet kashinsh anch Yehova ukez kudandamen kutukwash chakwel twikala ayifuvu mulong wa kuwanyish rusot rend, mudi mwamukwashay Amos.—2 Kor. 3:5.