Yikwashany Antu Akad Kutan Mutapu wa Kutang Buku Chifundishinay Bibil
1. Ov, buku Chifundishinay Bibil amusangaredining kudiay muntu mwin mwawonsu kapamp ka kusambish? Rumburil.
1 Chakwel muntu kanang ikala mwin kwifukwil wa Yehova, ndiy ufanyidin kwilej chifundishinay Bibil. Pakwez, antu amwing adia mu marelijon makad kwikal ma Ukristu ni kameningap Bibil mudi Dizu dia Nzamb. Akwau kitiyijiningap mudiay Nzamb ni katambwilingap Bibil nich usey. Ov, yom ik ya mudimu yimekena anch yidi ya ukwash kudi antu akad kwitiyij kapamp ka kusambish buku Chifundishinay Bibil? Yiyul yidia kwishin oku yidiokidil kudi in kulejan a mu jingand kushalijan 20.
2. Anch muntu kanang watulej anch kitiyiningap mudiay Nzamb, ov, chom ik tufanyidina kushinshikin mudiay ni mulong wak?
2 Antu Akad Kwitiyij Mudiay Nzamb: Anch muntu kanang walond anch ndiy kitiyijiningap mudiay Nzamb, chidi cha usey kujingunin mulong wak ulondinay mwamu. Ov, chidi mulong ndiy witiyijining mu dikarumun? Ov, ndiy washadishin kal ritiy rend mudiay Nzamb mulong wa kuburen kutentam kudia mu mangand ap rubabek ridia mu marelijon? Ov, ndiy wadiokil mwingand yilikishiniongau kwitiyij mudiay Nzamb? Pamwing ap ndiy kalikinap kwikalaku kwa Nzamb, pakwez kaswiridinap ap pakemp kwitiyij Mudiay. In kulejan avud akat kwipulang anch, “Ov mwamu wiyovininga ni yey?” chakwel amushikija muntu ku kulond kapamp kamwing. Tesh yikulonday pakwez kangal wamukaturij. Chisu tukutesha mulong wak muntu winou kitiyijinap mudiay Nzamb, tukwijik mutapu wa kumwakul ni kutond kand mukand tukutwisha kumwinkish.—Jinsw. 18:13.
3. Ov, mutapu ik tukutwisha kumumekesh kalimish kudiay muntu pamwing ni yitiyij yend?
3 Chisu wakwila, ipuk kumekesh kudiay muntu winou anch usangaredinap chitongijok chend. Chiyul chinech cha kusadil chidiokidil ku États-Unis ni chilondin anch: “Chidi cha usey nakash kulimish want ipau wa muntu ni muntu wa kukwat mupak pa chom chitijinay. Pa ndond pa kumekesh mu kulond kwetu anch yetu twija, chidi cha usey nakash kwipul yipul yikumubachika muntu chakwel atongijoka ni ashika ku kumekesh chitongijok chend cha nsudiel.” Kupwa kwa kutesh chitongijok cha mwin chikumbu, kalam wa munyingumuku umwing wasangera kumwipul yisu yivud anch: “Ov, kand kal utonginap anch chitwishikin kwikal mwamu?”
4. Ov, mutapu ik tukutwisha kuyikwash in Buda?
4 Chitongijok piur pa Nzamb chijikenap kudi in Buda. In kulejan amwing a mu Grande-Bretagne asangaredining kusadin broshir La paix et le bonheur durable : comment les trouver chisu chipaniningau uman kudi antu inay. Kupwa kwa kushinshikin mazu ma nsambishil, isambidining chikunku chikweta mutu wa mulong ulondina anch: «Existe-t-il vraiment un Créateur Très-Haut ?» ni kupwa, chikunku chikwau chilondina kand anch: «Un guide bénéfique pour tous les humains.» Kupwa, akutwish kwisambin kapamp kamwing buku Chifundishinay Bibil ni kumulej mwin chikumbu anch: “Ap anch ey umwitiyijinap Nzamb, pakwez kwilej Bibil kudi kwa usey mulong ukwet umutakel wa usey nakash.” Chibol umwing udia mu États-Unis usadininga mudimu wa chingand mu rudim ra Chinois walonda anch: “Antu avud adia mu teritwar wetu asangaredining kutang. Chawiy lel, yisu yivud awiy atangining mukand wawonsu kurutu etu tuyichirikina. Pakwez katwishiningap kutesh kurumburik kwa chitongijok cha kwilej Bibil. Chawiy, nisotining kupan broshir ukweta mutu wa mulong ulondina anch Rusangu Ruwamp kapamp ka kusambish ka kumanijan ni muntu mulong amufundin mu mutapu wa kukasikesh misambu.” Kalam wa munyingumuku umwing usadininga mudimu mu munyingumuku wa rudim ra Chinois mu États-Unis ulondin anch chiswapel kusambish kwisambin kapamp ka kusambish ka kumanijan ni muntu buku Chifundishinay Bibil. Pakwez, chikwikal chipandakena kuwap kusambish dilejan mu shapitre 2, wisambidina kapamp kamwing pa Bibil, pa ndond pa kusambish nich shapitre 1 wisambidina piur pa Nzamb.
5. Ov, mulong wak kushimpish muchim kudi kwa usey?
5 Chitining chisu chakwel muntu kanang atunga ritiy mudiay Nzamb, chawiy kushimpish muchim kudi kwa usey. Minsamb yetu ya kusambish yikutwishap kumubachik muntu chakwel itiyija anch kuding Sakatang. Pakwez, pamwing ap ndiy ukez kwikal nich ronganyin anch chitwishikin, ap ukez kulond anch ndiy watesh kal mulong wak muntu kanang ushikedin ku kulond mwamu.
6. Ov, mulong wak antu amwing kasangarediningap Bibil?
6 Antu Akad Kusanger ap Kuchingejin mu Bibil: Yisu yivud, muntu kanang ukutwish wijik anch Nzamb ukutwish kwikalaku, pakwez, kasangarediningap chifundishinay Bibil mulong ndiy kitiyijinap anch didi Dizu dia Nzamb. Pamwing ap ushiching mwingand yakad in Kristu ni ubombakeshining Bibil nich Kristendom. Ap ukutwish kwikal mwingand yimekena mudi ya in Kristu yidia midimu ya kumujimbu yivud, ni ukutwish kushik ku kutong anch Bibil kadiap wa usey kudiay. Ov, mutapu ik tukutwisha kuyikwash antu mudi inay chakwel akudisha musangar mu Bibil ni ashikena mu kwitiy kwilej buku Chifundishinay Bibil?
7. Ov, mutapu ik uwamp wa kumubachik muntu chakwel asangera Bibil?
7 Biro wa mutiy wa mu Grek wafunda anch: “Mutapu umwing upandakena kuwap wa kuyikwash antu akad kusanger Bibil udi kusu wakuburil Bibil ni kuyilej yom yidiamu. In kulejan avud ashikena ku kujingunin anch chibachikin cha uruu wa mu Bibil chikwet usu ukash mu muchim wa muntu kupandakanamu chom chin chawonsu chikutwishau kulond ayinau. (Heb. 4:12) Pakwez, kujingunin dijin dia Nzamb mu Bibil kuyikwashining antu avud chakwel akudisha maswir makukimbijol mu Bibil.” Biro wa mutiy wa mu Inde wafunda anch: “Uyakin piur pa mwom ni rufu uyipwitining in Hindu avud—chawiy, Bibil ukanin mangand makad kwikal nich mitapu kanang ya kasolikany.” Kujimbul milong ya pol pen yisambidiningau yisu yivud kud in kulejan chiding chisu chiwanyidina chakumekesh chilondinay Bibil piur pa Want wa Nzamb ukeza kupwish milong yiney.
8. Ov, chom ik tukutwisha kulond kudi antu akweta chitongijok chiyimp piur pa Bibil mulong wa Kristendom?
8 Anch muntu kanang ukwet chitongijok chiyimp piur pa Bibil mulong wa Kristendom, muleja anch Kristendom umekeshining Bibil mu mutapu wakad kuwanyin pamwing ni malejan mend. Biro wa mutiy wa mu Inde wafunda anch: “Yisu yimwing, tuswiridining kumukwash muntu ni muntu chakwel ashika ku kujingunin anch maegliz malondwilingap kwau yifundishinay Bibil.” Awiy alonda anch a Hindu asangera chikunku cha 4 cha broshir ukweta mutu wa mulong ulondina anch Quel est le but de la vie? Comment le découvrir ?, urumburila mutapu maegliz makasikeshina yisal ya masandj ni marumbangeshina Dizu dia Nzamb. Chibol umwing wa mu Brezil wayileja antu anch: “Ov, mulong wak usotinanyap kwijik jinsangu jivud jidia mu Bibil? Antu avud asandining mwamu nich chitongijok anch kayishididinap kwikal mu marelijon kanang. Ukutwishany kushimok piur pa yom yiukeza kwilej.”
9. Ov, mulong wak tufanyidinap kuziy ap anch muntu kanang kamekeshinap musangar ku malejan mafundishinay Bibil kapamp ka kusambish ka kumanijan nend?
9 Yehova ukat kushinshikin muchim wa muntu ni muntu. (1 Sam. 16:7; Jinsw. 21:2) Ndiy uyipwitininga antu akweta michim yitentamina kudifukwil diakin. (Yoh. 6:44) Antu avud mudi inay kadikal ayifundishap malejan piur pa Nzamb ap kadikal ayitanginap Bibil ap pakemp. Mudimu wetu wa kulejan uyitapidining dilau chakwel “ apanda ni kwijik uyakin.” (1 Tim. 2:4) Chawiy lel, anch muntu kanang kasangaredinap malejan ma Bibil kwinsambishil, kangal waziy! Sadil chom cha mudimu chikwau chiwanyidina mu rudim rey chakwel ulangwisha musangar wau. Kupwa, ukutwish kuswimp minsamb kapamp kamwing mu chom chetu cha mudimu cha kusambish mulong wa kutakel malejan ma Bibil, nich buku Ov, Chom ik Chakin Kamu Chifundishinay Bibil?
[Kamushet kadia pa paj wa 4]
Anch mwin chikumbu walond anch kitiyijiningap mudiay Nzamb, pakish kusal mwamu:
• Mwipula anch: “Ov mwamu utongininga machuku mawonsu?” katat ukujingunin mulong wak.
• Anch ndiy udi mwin Buddha, sadil broshir La paix et le bonheur durable—comment les trouver, pa paj wa 9-12.
• Anch ndiy witiyijining mu dikarumuk, mareferans minam makutwish kukwash nakash:
Ma nimero ma Réveillez-vous ! makweta mutu wa mulong ulondina anch: “Hasard ou conception”? Band video Les merveilles de la création révèlent la gloire de Dieu
Maroshir Une vie pleinement satisfaisante : Comment ? chikunku cha 4; La vie a-t-elle été créée ? ni Cinq questions à se poser sur l’origine de la vie.
• Anch ndiy washadisha kal ritiy mudiay Nzamb mulong wa kuburen kutentam ni mar, mareferans minam makutwish kwikal ma ukwash nakash:
Buku Y a-t-il un Créateur qui se soucie de vous ?, shapitre 10
Mabroshir Dieu se soucie-t-il vraiment de nous ? chikunku cha 6, ni Quel est le but de la vie ? chikunku cha 6
• Yang kapamp kamwing mu buku Chifundishinay Bibil pamwing ap ukutwish kumekesh kudi mwin chikumbu chitongijok cha kwikalaku kwa Nzamb. Chikutwish kwikal chiwamp kusambish nich shapitre 2 ap mutu wa mulong ukwau wambatena nich chitongijok chend.
[Kamushet kadia pa paj wa 5]
Sal kand mwamu anch mwin chikumbu kitiyijiningap Bibil:
• Shinshikin ma shapitre 17 ni 18 ma buku La vie : comment est-elle apparue ? Évolution ou création ?
• Anch adi in Hindu, sadil broshir Pourquoi adorer Dieu en amour et en vérité ?
• Anch adi in Yuda, sadil broshir Connaîtrons-nous un jour un monde sans guerre ?, pa paj wa 3-11.
• Isambinany ukwash wa kulondul yany ya Bibil. Mikand ukutwisha kusadil chakwel umuleja muntu kanang usey wa Bibil:
Ma nimero ma Réveillez-vous ! makweta mutu wa mulong ulondina anch: «De l’aide pour les familles»
Band video La Bible : une force dans votre vie
Mabroshir Rusangu Ruwamp Ridiokila Kudi Nzamb!, dilejan 9 ni 11; Buku Un livre pour tous, pa paj wa 22-26; ni Une vie pleinement satisfaisante—comment ? chikunku 2
Anch adi in Buda, sadil broshir La voie qui mène à la paix et au bonheur, pa paj wa 3-7.
Anch adi Amizilima, sadil broshir La vraie foi : le chemin qui mène au bonheur, chikunku 3.
Anch ulejen mwindond mudia kand kasolikany ka Bibil, pamwingap chikwikalap cha usey kumekesh musul wa yitongijok wisambidina chisu wipanina mu mudimu wa kulejan wa ku chikumbu ni chikumbu.
• Rumburil mutapu ukeza kwikal mauprofet madia mu Bibil kwikal makin. Mikand ukutwisha kusadil:
Band video La Bible : un récit historique exact, des prophéties dignes de foi
Broshir Un livre pour tous, pa paj wa 27-29
• Yang kapamp kamwing mu buku Chifundishinay Bibil anch muntu wipul anch chom ik chifundishinay Bibil pa mitu ya milong kushalijan.
[Kamushet kadia pa paj wa 6]
Anch mwin chikumbu walond anch: “Am nimwitiyijiningap Nzamb,” ukutwish kulond anch:
• “Ov, nikutwish kukurumburil mu wiswimp chom chankwasha am chakwel nitiyija mudiay Sakatang?” Kupwa, muleja manans madia mu buku Comment raisonner, pa paj wa 72-74, ap tenchik chisu cha kwez kumwinkish mukand wasangera kutang.
• “Pakwez anch kwadinga Nzamb, ov, usotin ndiy ikala mutapu ik?” In yikumbu avud akwiling anch awiy asotin kumushejin Nzamb wa rukat, kutentam ni ranaken, wakad kasolikany. Muleja mu Bibil anch Nzamb ukwet ngikadil mudi jinej. (Chikutwish kwikal chiswapela kusadil shapitre 1 wa buku Chifundishinay Bibil, kusambishil pa paragraf 6.)
Anch mwin chikumbu walond anch: “Am kinitiyijiningap Bibil,” ukutwish kulond anch:
• “Chawiy chitongijokiningau antu avud. Antu amwing atongining anch Bibil kisambidiningap milong yasiyans ap anch yany yidiamu yidiap ya kusadil. Nleja bil amboku, ov, ey watanginap Bibil? [Mulika akula. Kupwa, muleja mazu ma nsambishil madia pa paj wa 3 wa broshir Un Livre pour tous, ni kupwa, mwinkishay.] Antu avud kitiyijiningap Bibil mulong relijon umekeshining malejan mu mutapu uyimp. Chisu chinikeza kwez, nikez kusanger kwisambin chilakej chimwing chidia pa paj wa 4 ni 5.”
• “Antu avud amekeshining chitongijok mudi cheyey. Ov, nikutwish kukulej chom kang chinsangareshina piur pa Bibil? [Tang Job 26:7 ap Isay 40:22, maverse malejana anch Bibil udi salal mu milong ya siyans.] Bibil ukwet kand yiyul ya manangu mulong wa kukwash majuku. Chisu chikwau, nikez kusanger kukulej chilakej chilakej chimwing.”
• “Nakujikitish mulong wa kwinlej mwamu. Anch Nzamb wafunda buku mulong wa antu, ov, ey utongin anch yom ik yidiamu?” Kupwa, muleja muntu chom kanang mu Bibil chambatena nich chakul chend chisambilay kal.