Uman

◼ Australie: John, muntu mwin kwilej nakash, wayanga ku egliz padingay mwan mukemp pakwez washikena ku kwikal “muntu wakad kumwitiyij Nzamb ap pakemp.” Chibol umwing wamushila broshir La vie a-t-elle été créée ? ni kupwa kwa kumuchirikin kand kakwau ndiy wamwikinsha broshir L’origine de la vie. Chibol wadandamena kukudish musangar wend kusutil ku kumwinkish magazet masu ni mikand yikwau yikweta mitu ya milong yivud yisambidina pa yitangil ap uprofet wa Bibil. Pamanay anch John wading tayad, ndiy wamwinkisha buku La Bible : Parole de Dieu ou des hommes ? Kupwa kwa kumutang, John wasambisha kwilondin amwinend anch: “nikwetap ritiy mudiay Nzamb.” Kupwa, chibol wasambisha kapamp kamwing nich buku Chifundishinay Bibil, ni wamuleja John paragraf 8 pa paj 20 ni paragraf 13-16 pa paj 23-24. Mifund yijimbwilau mu mukand yamusangaresha nakash John chawiy chalonday anch, “Pamwing ap niswiridin kwilej kand Bibil.”

◼ Mexique: Ikundj umwing wamuleja mwin kulejan anch kitiyijiningap anch Bibil amupepila kudi Nzamb. Mwin kulejan wamuleja uman umekeshina anch Bibil amupepila. Kupwa kwa misambu kanang, muchim wa ikundj winou wasambisha kuswimp nich yom yilejay mu Bibil. Ndiy waswimpa kapamp kamwing chisu chileja yany ya Nzamb. Ndiy wamuleja mwin kulejan anch: “Pa chisu chakusambish twatangakal Bibil pamwing, chamekan kal mudi chiyul chidiokila mu buku mwin mwawonsu ni chidiap nich chibachikin padi am. Pakwez, chisu nitangina katat mu Bibil, pakampwil chiyul piur pa mwikadil wa mashakamin, muchim wam ukat kusansan.”

◼ États-Unis: Payangau mu mudimu wa kulejan wa pakampwil mu misumb yijim, ambay a uruw asankanijana ni mband wadiokila ku Taïwan witiyijanga mudiay Nzamb pakwez ndiy wamananga Bibil mudi buku wa in Kwimputu. Mband winou pashikay ndiy washika pa ndond yadingau adil mikand, chikalap nchik dipit diend diadingay nich, ndiy wamana anch wadinga ubureding yom yivud. Ndiy wikala nich ruchingej anch Bibil ukutwish kumukwash chakwel atana kurumburik kwa rutong ra mwom. Ambay a uruw asambisha kwilej pamwing nend ni kusadin buku Chifundishinay Bibil nich broshir La paix et le bonheur durables : comment les trouver. Pa ndond pa kwilej shapitre 2 wa buku wisambinau, awiy isambina chikunku cha mu broshir chikweta mutu wa mulong ulondi la anch: «Un guide bénéfique pour tous les humains.» Kupwa kwa kushinshikin paragraf wa musamban wa chikunku chin chang, mband winou walonda nich dizu dia kushimwok anch Bibil udi wa pakampwil ni ushalijadin nich yifundinau kudi marelijon makwau. Kupwa kwa kushinshikin mauprofet ma mu Bibil ni mutapu mawanyina, mband winou walonda anch: “Kwikil buku mukwau nikutwisha kutongin anch udi kamu salal mudi Bibil!”

◼ Japon: Ap anch mwin chikumbu wamuleja mwin kulejan anch ndiy kachingejinap mudi Nzamb, mwin kulejan wadandamena kumuvurish mu wiswimp, pamwing ni kusadil mitu ya milong ya Réveillez-vous ! yilondila anch «Hasard ou Conception ?» Pakemp pakemp, muntu winou waswimpa chitongijok chend ni wasambisha kwitiyij anch Sakatang ukutwish kwikalaku. Katat ndiy witiyijin anch Nzamb udingaku, ni mwin kulejan wilejining pamwing nend broshir Rusangu Ruwamp Ridiokila Kudi Nzamb!

◼ Canada: Nambaz wamwinkisha mband umwing magazet masu padingay mu mwotak ni kuyang ku chikumbu chend. Chisu chachirikay nambaz, mband winou wamuleja nambaz kapamp kamwing anch ndiy kasangaredininap magazet minam ni kitiyijiningap mudiay Nzamb. Nambaz kalikap kapamp kamwing, pakwez ndiy wamwinkisha broshir ukweta mutu wa mulong ulondina anch: Une vie pleinement satisfaisante : Comment ? Chisu nambaz chamutanay mband winou ku chikumbu, ni pamulejay anch kitiyijiningap mudiay Nzamb, nambaz watonga anch chidi mulong mband winou wading nvaj ulidina an amwinend. Ndiy wamuleja mband winou paragraf 6 udia pa paj wa 4 wa broshir, wisambidina ndond yilejena chiyul chiwamp pa mulong winou. Kupwa, ndiy wamukasikesha chakwel atanga yiyul yidia mu dilejan dia 2 disambidina mutapu wa kulil an. Mband winou wasangara nakash kutambul broshir.