Tambulany Chilik cha Aprofet—Mike
1. Ov, chipul ik chasotay Mike kwiyipul ni mulong wak mudimu wend wa kulejan kiwadingap wa chamwamu?
1 ‘Ov, chisu ik chikeza kushiken kamu nsudiel ya ditenchik dined diyimp dia yom?’ Profet Mike wiyipula chilik chimwing chipul chinech chisu chalejanangay uruu wa dirumburish dia Yehova pantaliken ni mant ma in Isarel ni Yuda. Chikwau kand, mudimu wend wa kulejan wadingap wa chamwamu. Mu muvu wa 740 K.C.C., padingay Mike nich mwom, mazu ma Yehova pantaliken ni Samaria mawanyina. (Mike 1:6, 7) Kupwa, Yerusalem amushesha mu muvu wa 607 K.C.C. (Mike 3:12) Ov, mutapu tukutwisha kumwimburij Mike pituchingejina dirumburish dia Yehova pa chirung chetu?
2. Ov, mutapu ik ni mulong wak tufanyidina kumekesh kushimpish muchim pituchingedina dichuku dia Yehova?
2 Ikal Mwin Kushimpish Muchim: Mike wafunda anch: “Am, nimuchingedil [Yehova]. Nimuchingejin Nzamb, ndiy ukez kwimpandish.” (Mike 7:7) Chakin kamu, Mike kwovap wom padingay ni kuchingel kwez kwa disudiel. Padingay profet wa Yehova ndiy wading ukwatiken nich yom yivud. Pituchingedina dichuku dia Yehova, tufanyidin kand kwipan mu “yom yiwamp ni yom yawonsu yitumbila.” (2 Pita 3:11, 12, TMK) Kushimpish muchim kwa Yehova kuyinkishin antu in awonsu chisu cha kukarumuk. (2 Pita 3:9) Chawiy lel, tufanyidin kuta matu ku dibabesh dia Nzamb dia kuyimburij aprofet mu kumekesh kushimpish kwa muchim.—Jak. 5:10.
3. Ov, mulong wak tufanyidin kumwit Yehova spiritu wend utumbila?
3 Chingejin pa Usu wa Yehova: Ap anch Mike wading nich chisend chikash, pakwez ndiy wachingejina pa usu wa Yehova chakwel achiwanyisha. (Mike 3:8) Chidiap chamwamu anch Dizu dia Yehova ditukasikeshining kuchingejin pa usu wa Nzamb. Ndiy upanining usu wend pakad choy kudi antu aziyininga chakwel atwisha kuwanyish yisend yau ya uteokras. (Kus. 84:5, 7; Isay 40:28-31) Ov, wimenap kal amwiney chom chinech mu mudimu utumbila mu mwom wey? Ov, umwitining Yehova pakad kujing mu malembil mulong akukwash nich usu wa spiritu wend utumbila?—Luka 11:13.
4. Ov, mashakamin ma Mike matwinkishin chilakej ik chipandakena kuwap nlel unou?
4 Mu mwom wend wawonsu, Mike wasala rusot ra Nzamb kwikal chom cha usey nakash. Ndiy wakwata mupak wa kushal ushinshamena chikalap nchik kwijond kwa mangand mamunyingumuka. Chilik chimwing kand, kushinshamen kwetu kuding mu choziu dichuku ni dichuku. Chawiy lel, el amboku tukwatan mupak ukash wa “kwendil mu dijin dia Yehova Nzamb wetu chikupu ni chikupu.”—Mike 4:5, NW.