Tambulany Chilik cha Aprofet—Sofoniy
1. Ov, mu mwikadil ik mwasadinay Sofoniy mudi profet, ni mutapu ik udiay chilakej chiwamp kudi etu nlel unou?
1 Chadinga mukach mwa chitot cha mivu sambwad K.C.C., chisu difukwil dia Bal diasambisha kusadik mu Yuda. Mwant muyimp Amon amujipa ni amuswinkana kudi Mwant nsand Yosias. (2 Jnsg. 33:21–34:1) Pa chisu chinicha, Yehova wamulangwisha Sofoniy chakwel alejana uruu wa dirumburish Diend. Ap anch Sofoniy wadinga chid cha dijuku dia want wa Yuda, ndiy kaziyap kulejan uruu wa Yehova wa kufish nich want wa Yuda. (Sof. 1:1; 3:1-4) Chilik chimwing kand, tufanyidin kusal usu wa kwimburij kutakaman kwa Sofoniy ni kwipuk kulikidil yid ya dijuku yikangesha difukwil dietu ditumwifukwidilinga Yehova. (Mat. 10:34-37) Ov, uruu ik walejanay Sofoniy ni wading nich chibudikin ik?
2. Ov, chom ik tufanyidina kusal chakwel tupanda pa dichuku dia ujim wa Yehova?
2 Kimbany Yehova: Yehova ndiy kusu ukumupandisha muntu ni muntu pa dichuku dia ujim wend. Chawiy Sofoniy wayibabesha antu in Yuda chakwel amukimba Yehova, akimba kutentam ni kwikepish pa chizu chiwanyidina. (Sof. 2:2, 3) Dibabesh dined didi diakin kand pa chirung chetu. Mudi mwasalay Sofoniy, tukat kuyikasikesh antu akwau chakwel amukimba Yehova, pakwez tufanyidin niyetu kusal chom kanang, mu kukwat mupak wa kulik ‘kuchirik kwinyim mu kumulondul Yehova.’ (Sof. 1:6) Chawiy, tukumukimb Yehova kusutil ku kwilej nawamp Dizu diend ni kusutil ku kwit umutakel wend mu malembil. Tukukimb kutentam kwend kusutil ku kushakam kwambatan nich mikadil ya mwom yishitwila. Tukukimb kand kwikepish kusutil ku kukudish mwikadil wa kuziyil ni wa kwikal tayad kwitiy umutakel udiokila ku dirijek dia Yehova.
3. Ov, mulong wak tufanyidina kulam mwikadil uwamp mu mudimu wa kulejan?
3 Yibudikin Yiwamp: Uruu wa dirumburish dia Sofoniy wadinga nich chibachikin chikash pa antu amwing a in Yuda pakampwil mudi nsand Yosias wasambisha kumukimb Yehova padingay mwan ikundj. Kupwa, Yosias wasala usu wa kushesh akish adinga mwi ngand yiniya. (2 Jnsg. 34:2-5) Nlel, ap anch mbut kanang ja Want jawil mwi njil, pa mayal ap mwi ndond yikweta yifukis ya miy, jikwau jikuwil kand pa divu difukina ni jikusong mabuj. (Mat. 13:18-23) Tukwet kashinsh anch Yehova ukez kudandamen kuyukish usu wetu pitushadina akwatikena mu kukus mbut ja Want.—Kus. 126:6.
4. Ov, mulong wak tufanyidina kudandamen ‘kumuchingel Yehova’?
4 In Yuda amwing atonga anch Yehova kelap kusal chom ap chimwing. Pakwez, Yehova wayileja nich kashinsh antu awonsu anch dichuku diend dijim diadinga piswimp kamu ni kushik. (Sof. 1:12, 14) Dipandish diela kushiken ching kusu padi antu ela kwikingin mudiay. (Sof. 3:12, 17) Pitudandamedina ‘kumuchingel Yehova,’ el amboku tutanany musangar wa kumusadil Nzamb wetu mujim mu uumwing pamwing ni ambay netu in kwifukwil!—Sof. 3:8, 9.