Tusadilany Kapend Ketu ka Web mu Mudimu wa Kulejan​—“Yakul ku Yipul ya Bibil”

“La Bible et Vous” chidi chikunku chidia pa jw.org chikweta mutu wa mulong ulondina anch: “Questions bibliques.” Anch twijikijan nawamp nich yipul yipwilingau chisu ni chisu, tukutwish kapamp kamwing kuyilej in chikumbu chakwel atalanga pa kapend ketu ka Web mulong wa kutan yakul ya mu Bibil. Yipul yiney akutwish kuyisadil kand mulong wa kusambish nich minsamb mu mudimu wa kulejan. Tukutwish kutond chipul chimwing chikutwisha kuyisangaresh antu adia mu teritwar wetu, kumwipul mwin chikumbu piur pa chitongijok chend ni kumulej yom yilejenay Bibil kusutil ku kusadil yom yidia pa jw.org. Kupwa, tukutwish kurumburil ap kumulej ndond yitukutwisha kutan jinsangu jetu. Mutapu ukwau udi wa kumulej atanga kapamp kamwing chakul chidia pa kapend ka Web. Mukajend a kalam umwing mwin kwendangan wapandakana mu kusadil walonda anch: “Antu avud iyipwiling anch ‘Ov, Nzamb ndiy ukata kutupup nich mar metu?’ Ov, ey usotin wijika kamu chakul mu asekond 51?” Kupwa ndiy wamekesha video wa kutesh wa chipul chinech wakwatinay kal pa kapend ka telefon wend wa ku makas. Wapwisha nich mazu ma kusambish nich shapitre 11 wa buku Chifundishinay Bibil.