Mutapu wa Kutakel Nawamp Malejan ma Bibil
1. Ov, chisend ik chikwetau in kulejan akata kutakel malejan ma Bibil?
1 Kwikil muntu ap umwing ukutwisha kumusadil Nzamb pakad Yehova ‘kumulet’ amwinend. (Yoh. 6:44) Chawiy lel, in kulejan akata kutakel malejan ma Bibil afanyidin kusal usu wau wawonsu chakwel ayikwasha antu amushejina tatukwau wa Mwiur. (Jak. 4:8) Chinech chitining kwirijek. Kutang kusu kwa paragraf ni paragraf ap kwakul ku yipul yafundau kuwanyidinap kwau mulong wa kuyikwash in kwilej etu atesha kurumburik kwa rusangu ruwamp ni chakwel aya kurutu.
2. Ov, dilejan diwamp dia Bibil dikweting chiburikin ik?
2 Mulong wa kutakel nawamp malejan ma Bibil, in kulejan afanyidin kuyikwash in kwilej (1) atesha kurumburik kwa yom yilejenay Bibil, (2) itiya yom yilejenay Bibil ni (3) asadina yom yilejenay Bibil. (Yoh. 3:16; 17:3; Jak. 2:26) Chitining kusutish angond avud mulong wa kumukwash muntu awanyisha jinzau jinej. Chikwau kand rizau ni rizau rawiy rikumukwasha muntu chakwel akudisha urund wend wa piswimp ni Yehova ni ipana kudi ndiy.
3. Ov, mulong wak alej ija kufundish nawamp afanyidin kwipul yipul yitina chakwel muntu amekesha manangu mend?
3 Ov, Chom Ik Chitongijokinay Mwin Kwilej Bibil? Chakwel tujingunina anch in kwilej etu a Bibil ij kurumburik kwa yom yilejinau ni itiyin, tufanyidin kwipuk kulond yom yivud ni tufanyidin kand kuyikasikesh in kwilej alonda yom yikwetau. (Jak. 1:19) Ov, mwin kwilej winou uteshin kurumburik kwa yom yilejenay Bibil pa mutu wa mulong ushinshikidinay? Ov, ukutwish kurumburil mutu wa mulong wilejinay mu mazu mend? Ov, ndiy umen nchik yom yilejinay? Ov, witiyijin anch yom yilejinay Bibil yidi yakin? (1 Tes. 2:13) Ov, wij anch yom yilejinay yifanyidin kukarumun mashakamin ma mwom wend? (Kol. 3:10) Mulong wa kwakul ku yipul yiney, tufanyidin kwipul yipul nich manangu piur pa yitongijok yend, kupwa tukumutesh.—Mat. 16:13-16.
4. Ov, chom ik tufanyidina kusal anch chimukasikedin mwin kwilej kutesh kurumburik ap kusadil yom yilejinay mu Bibil?
4 Yisu yivud yaku ni yitongijok kanang yatekina kal mij mu muchim wa muntu chikasikening kuyidiosh. (2 Kor. 10:5) Ov, chom ik tufanyidina kusal anch in kwilej etu kiyitinap ap kasadidinap yom yitwilejina nau? Tufanyidin kushimpish muchim ni kuyinkish chisu chakwel Dizu dia Nzamb ni mwiku utumbila yisala mu michim yau. (1 Kor. 3:6, 7; Heb. 4:12) Pa ndond pa kumushindil, yisu yivud chiwapining kuswimp mutu wa mulong ukwau anch chimukasikedin mwin kwilej kutesh kurumburik ap kusadil yom yilejinay mu Bibil. Pitudandamedina kwilej nend nich kushimpish muchim ni pakatinay Bibil, pamwing ap ukutwish kuswimp anch chitwishikin.