Mutapu wa Kusadin Yitongijok Mulong wa Mambamb

Kudiosh Ngond wa 1, 2018, yitongijok mulong wa mambamb yasambisha kwikal pa chibur cha Mudimu ni Mashakamin ma in Kristu—Mukand wa Chikumangan. Mutapu ik tukutwisha kuyisadin?

Chisu Usadina Chikunku cha Ansand a Shikol: Ufanyidin kusadin chipul, mufund wa Bibil ni chipul cha kwambambin kapamp kakwau yidia mu yitongijok mulong wa mambamb. Pakwez, chinech chirumburikinap anch ufanyidin kamu kwimburij dizu ni dizu mudi mulejenau mu video wa yitongijok mulong wa mambamb. Ukutwish kusadin mitapu kushalijan, mutapu wa kusambish nich, mutapu wa kutongijok ni yom yikwau kand. Ukutwish kupan kand mukand udia mu Mushet wa Yom ya Kufundish Nich, ap anch kalejenap kusal mwamu mu chikunku cha kusal.

Chisu Udia mu Mudimu wa Kulejan: Yitongijok mulong wa mambamb ayisadin mulong wa kutukwash kwikal ni yitongijok ya ukwash. Anch muntu wasanger ni wakat kwijik yom yivud, ukutwish kudandamen kwambamb nend, pamwing ap ukutwish kusadin yitongijok mulong wa mambamb ya kumuchirikin muntu. Ukutwish kurijek yitongijok mulong wa mambamb ap kusadin yom yishalijadina. Ov, kudi mutu wa mulong wa ngond wasutina kal ap mufund wa Bibil windj usangaredinau antu nakash mu teritwar wey? Ov, antu adia ndond yiushicha asangaredin nakash chinship kampand ap nsangu jijikena ja katat? Chikalap nchik mutapu ukutonda kusadin yitongijok mulong wa mambamb, mupak wey ufanyidin kwikal wa ‘kusal yom yiney yawonsu mulong wa rusangu ruwamp chakwel urilejana kudi antu akwau.’​—1Ko 9:22, 23.