“Sejany piswimp kudi Nzamb, chad niyend ukusej piswimp ni yenen.”—Jakobu 4:8
Ov, Nzamb Ukat Kuteshang Malembil Metu?
Ov, wiyipwilap kal anch Nzamb ukat kuteshang malembil mey? Anch mwawiy, ijik anch udiap amwiney. Antu avud akat kumulembil Nzamb mulong wa milong kanang, pakwez milong yau yidandamedin. Ov, chinech chirumburikin anch Nzamb uduwiling kwend malembil metu? Bwat! Bibil utwinkishin kashinsh anch Nzamb ukat kututeshang anch twamulembil mu mutapu uwamp. Tushinshikinany yom yilondinay Bibil.
NZAMB UKAT KUTESHANG.
“Ey ukat kwakul kulembil kwetu. Antu awonsu akat kwez kudi ey.”—Kuseng 65:3.
Antu amwing alondining anch akat kulembilang kwau mulong iyoviling nawamp anch alembil, pakwez kitiyijinap anch kud muntu uteshina kamu chakin. Pakwez, tukatap kulembil mulong kwau wa kwiyov nawamp chakwel tutwish kujijamen milong yetu. Bibil utwinkishin kashinsh anch “[Yehova]a udi piswimp kudi awonsu akata kumutazuk ndiy, awiy kamu akata kumutazuk ndiy nich win yakin. . . . Ukat kwov kudil kwau.”—Kuseng 145:18, 19.
Chawiy, tufanyidin kwikal nich kashinsh anch Yehova Nzamb ukat kuteshang malembil ma atushalapol end. Utulejin nich rukat anch: “Ukez kantazukany ni kwinlembil, chad am nikez kakwakulany.”—Jeremiy 29:12.
NZAMB UKATIN ANCH UMULEMBIL.
“Lembilany yisu yawonsu.”—Rom 12:12.
Bibil utukasikeshin anch “lembilany kwakad kulik” ni anch “lembilany yisu yawonsu.” Chakin kamu, Yehova Nzamb ukatin anch tumulembil.—1 Tesalonik 5:17; Efes 6:18.
Mulong wak Nzamb ukatin anch tumulembil? Tong bil: Nvaj ik ukutwisha kukis anch mwanend mukemp wamwel anch “tatuku, nkwashaku amboku”? Chakin kamu, tatuku ukutwish kwijik maswir ma mwanend ap mutapu wiyovilay, pakwez anch watesh mwan wamwit ukwash, ukat kuman anch mwan umuchingejidin ni ud nend mu urund wa piswimp. Chilik chimwing, anch twamulembil Yehova Nzamb, tumekeshin anch tumuchingejidin ni tukatin kwikal nend mu urund wa piswimp.—Jinswir 15:8; Jakobu 4:8.
NZAMB UKAT KUKUBANGIN NAKASH.
“Letany yakamish yen yawonsu kudi ndiy, mulong ukat kukulamany.”—1 Pita 5:7.
Nzamb usotil anch tumulembil mulong utukatin ni utubangidin. Wij nawamp milong tukweta ni yom yitwakamishina, ni ukatin kutukwash.
Mu mwom wend wawonsu, Mwant David wamulembila Yehova Nzamb chakwel amukwash ni wamulejang yom yitonginay ni mutapu wiyovilay. (Kuseng 23:1-6) Mutapu ik wiyovay Nzamb piur pa David? Nzamb wamukata David ni watesha malembil mend. (Midimu 13:22) Chilik chimwing, Nzamb ukat kutesh malembil metu mulong utubangidin.
“NIMUKATIL [YEHOVA] MULONG UTESHIL DIZU DIA KWILEMB KWAM”
Minam mad mazu ma nfund a kuseng umwing. Wading nich kashinsh anch Nzamb ukat kutesh malembil mend, ni kwijik mwamu kwamukwasha nakash. Wiyova anch ud piswimp ni Nzamb ni watwisha kujijamen yakamish ya mwom wend.—Kuseng 116:1-9.
Anch tukwet kashinsh anch Nzamb ukat kututeshang, tukudandamen kumulembil. Shinshikin yom yamushikena Pedro, ushicha kwiyand kwa ngand ya Espany. Wafisha mwanend ikundj ukweta mivu 19 ku aksida. Pedro wanenganana nakash, ni wamuleja Nzamb mutapu wading wiyovilay, wamulembila tupamp tuvud mulong wa kumwit ukwash ni rongoj. Yom ik yashikena? Pedro ulondin anch: “Yehova wakula malembil mam kusutil ambay netu in Kristu ankwasha am ni mukajam.”
Yisu yivud Nzamb ukat kwakul malembil metu kusutil arund atukatila akata kutwongoj ni kutukwash
Ap anch malembil mamuvumbulap mwan a Pedro, pakwez mamukwasha nakash pamwing ni dijuku diend. Mukajend, María Carmen uvurikin anch: “Malembil mankwasha kurish ni ushon wam. Nading nij anch Yehova Nzamb winteshin, mulong chisu namulembilang niyovang nawamp ni nikalang mu chisambu.”
Yom yilejenay Bibil ni yamenau kal antu avud yimekeshin patok anch Nzamb ukat kuteshang malembil. Pakwez, chid chakin anch Nzamb kakatap kwakul malembil mamwing. Chad, mulong wak Nzamb ukat kwakul malembil mamwing pakwez makwau bwat?
a Yehova diawiy dijin dia pakampwil dia Nzamb.—Kuseng 83:18, NWT.