1921—Kwasut Kal Mivu Chitot

MU NIMERO wa Chinong cha Kalam cha 1 Ngond wa 1, 1921 mwading chipul chiyitadina in Kwilej a Bibil anch: “Mudimu ik wa pakampwil utuchingedina muvu winou?” Chinong chinech chaleta chakul chidia mu Isay 61:1, 2, wayivurisha chisend chau cha kulejan rusangu ruwamp. ‘Yehova wantonda kal am chakwel kurumburil rusangu ruwamp kud antu in kwikepish . . . , mulong wa kulejan muvu wa ranaken ra Yehova, ni dichuku dikufundakeshay Nzamb wetu.’

IN KULEJAN ATAKAMENA

Mulong wa kuwanyish chisend chau, in Kwilej a Bibil ading afanyidin kwikal atakamena. Afanyina kulejan ‘rusangu ruwamp’ kud in kwikepish ni kulejan kand ‘dichuku dia kuyifundakeshin’ antu ayimp.

Mukadivar John Henry Hoskin ushicha mu Kanada wapana uman nich kutakaman chikalap nchik rupompat. Kwinsambishin kwa muvu wa 1921, watanijana ni mwin Mishon umwing. Mukadivar Hoskin wamuleja anch: “Tukimbin kwisamb ney piur pa Bibil. Pakwez ap anch twalik kutanijan ney piur pa yom yimwing, tukutwish kupwish mu chisambu ni kulam urund wetu.” Pakwez yom yiney yasadikap mwamu. Mukadivar Hoskin urumburil anch: “Twambamba kwetu mu kachisu kakemp, ni [mwin mishon] winou wapata chis nich ujim, ni natonga anch dikalash dijim diading pa chis diafanyina kubarik.”

Wamuswejena mukadivar Hoskin anch: “Mulong wak uyilap kuyikimb apagan mulong wa kuyilej awiy?” Mukadivar Hoskin kakulap dizu, pakwez pading payilay, wasambisha kutong anch, ‘mwikadil wend wamekesh kal kamu anch nading nambambin ni mupagan!’

Dichuku dialondulaku, pading pafundishinay mwin mishon winou mu egliz wend, walonda yom yiyimp piur pa mukadivar Hoskin. Mukadivar Hoskin ulondin anch: “Wayileja antu a mu egliz wend anch nading mukamakasu nakash ni kandikal kwikalangap mukamakasu mukwau mud am mu musumb winiwa, ni anch chading chifanyidin kwinjip.” Yom yiney yamuziyishap mukadivar Hoskin, wadandamena kulejan ni watana yibudikin yiwamp. Ulondin anch: “Nasangera nakash kulejan ndond yiney. Antu amwing anlejang anch: ‘Twij nawamp anch ud muntu wa Nzamb!’ ni angipulang anch akutwish kwinkwash kuwanyish maswir mam.”

KWILEJ PAKAMPWIL NI MU DIJUKU

Mulong wa kuyikwash antu ading akatina uyakin kuya kurutu mu spiritu, in Kwilej a Bibil abudishang program wa kwilej nich Bibil mu gazet wa L’Âge d’Or.a Mwading yipul ya Bibil yiyitadina ansand yikutwishau kwisamb pamwing nau anvajau. Anvaj ading afanyidin “kuyipul anau yipul yiney ni kuyikwash kutan yakul mu Bibil.” Mwading yipul mud: “Bibil ukwet mikand yinch?,” mulong wa kuyifundish an yom ya pa dishin piur pa Bibil. Mwading yipul yikwau mud: “Ov, mwin Kristu wakin mwawonsu ufanyidin kuchingej anch akumupompat mu mutapu kanang?,” mulong wa kuyikwash ansand kwikal atakamena mu mudimu wa kulejan.

Kwading kand yipul ya Bibil ni yakul yabudishangau mulong wa antu ading akina kal ronganyin rijim ra Bibil. Yakul afanyina kuyitan mu volim wa kusambish wa buku Études des Écritures. Tunan twa in kutang ataninamu mu program winou, pakwez gazet wa L’Âge d’Or wa 21 Ngond wa 12, 1921, walejana anch maprogram mawonsu ma kwilej nich Bibil kakumabudishap kand. Mulong wak kwading kuswimp kwa chikashimwish mwam?

KUBUDIK KWA BUKU MUSU!

Buku *La Harpe de Dieu*

Dipaper palejenau chikunku chifanyidinay mwin kwilej kutang

Dipaper dia yipul

Amakundj ading atakedina amana anch in kwilej a Bibil asu ading afanyidin kwilej uyakin wa pa dishin mu mutapu utenchikinau nawamp. Mulong wa chinech, mwi Ngond wa 11, 1921, abudisha buku La Harpe de Dieu. Antu asangarelang uyakin ni itiyang kutambul buku winou ayilejang kand mulad wa kwilej Bibil ayinau pakampwil. Dilejan dined dia pakampwil diayikwashang antu kwilej yom yitonginay Nzamb kusal mulong wa kuyinkish antu mwom wa chikupu. Diasadikang mutapu ik?

Muntu mwawonsu witiyang kutambul buku, amwinkishang kand dipaper dichapinau ku mashiny pamulejinau ndond yifanyidinay kutang mu buku. Rubing ralondulangaku, amwinkishang kand dipaper padia yipul kushalijan yifanyidinay kwakul kukwatijan ni chikunku chamulejau kutang. Kwinshin kwa dipaper dined ading alejenaku kand ndond yikwau yifanyidinay kwilej mulong wa rubing rilondwilaku.

Mwi mbing 12, mwin kwilej amwinkishang rubing ni rubing dipaper dined ku chikumangen chading piswimp. Yisu yivud antu amapal ap ading akad mutapu wa kulejan ku chis ni chis ading mu chikumangen awiy atumang mapaper minam. Chilakej, Anna Katherine Gardner wa mu États-Unis, walonda anch: “Pabudishau buku La Harpe de Dieu, Thayle, yayam mband wading wakad mutapu wa kulejan ku chis ni chis, wikala ni mudimu ujim wa kuyituminang in kwilej mapaper makweta yipul rubing ni rubing.” Anch dilejan diapwa, ayangang kumutal mwin kwilej mulong wa kumukasikesh kudandamen kwilej Bibil.

Thayle Gardner ushich mu kaking ka ayilim

MUDIMU WADING UFANYIDINAU KUSAL MU MACHUKU MA KURUTU

Kwinsudien kwa muvu, Mukadivar Joseph Rutherford watuma mikand ku yikumangen yin yawonsu. Walonda anch “twapanin uman ujim nakash ni mu mutapu uwamp piur pa Want kupandikanamu mivu ya kwinyim.” Kupwa wawejinaku anch: “Kuchid mudimu ujim nakash tufanyidina kusal. Wayikasikesha antu akwau kwipan mu mudimu winou upandakena kuwap.” Chimeken patok anch in kwilej a Bibil asala kamu kukwatijan ni mazu mend. Mu muvu wa 1922, apana nich kutakaman uman wa Want mu mutapu ukwamushena.

Arund Atakamena

In kwilej a Bibil amekesha rukat ra ukadivar kusutin kukwashijan umwing ni mukwau. Ading arund atakamena “[avadika] mulong wa kukwash mu yom yikash,” mud mulejena rusangu rilondwilaku er.—Jnsw. 17:17.

Diakasatu 31 Ngond wa 5, 1921, amuteka ikundj umwing wading muntu mujal mu rukan anch wading umurishikishin mband chindel mu musumb wa Tulsa, mwi ngand ya Oklahoma, mu États-Unis. Kupwa, chisak cha ayindel 1 000 ni kusut charishikisha kachisak ka antu ajal. Njit jaya djat ni mu mukal wading ushichau antu ajal avud utazukinau anch Greenwood. Abuwa yom mu yikumbu 1 400 ni kusut yading yishichau antu ni yakulandishin, kupwa ayosha. Rapor walejana anch kwafa antu 36, pakwez mu kulond uyakin kwafanyina kwikal yitot ya antu afa. Chinship chinech chawiy chatazukau anch Le massacre de Tulsa.

Mukadivar Richard Joseph Hill, Mwin Kwilej wa Bibil wadinga muntu mujal ni wading ushicha mu Greenwood, urumburil yom yasadika anch: “Uchuku wasadika matend, twading mu chikumangan mud mwading chaku chetu. Kupwa kwa yikumangan, twatesha akat kubul yidiang mukach mwa musumb wa Tulsa. Twalala pakwez oku tukat kutesh mutapu udjimina yidiang.” Pamanch pa Diakasatu 1 Ngond wa 6, yom yayipa nakash. “Antu amwing alonda anch ang tukimbin kupand, tufanyidin kuya mu Chot cha Yikumangan cha mburamatad.” Chawiy, Mukadivar Hill, mukajend, ni anau atan achinina mu Chot chinech. Mu Chot chinech mwading amakundj ni amband ajal piswimp 3 000 ading achidijinau kud Amasalay a Ngand, atazukau mulong wa kupwish njit.

Pa chisu chinicha, Mukadivar Arthur Claus wadinga chindel wakwata mupak umwing witina kutakaman nakash. Ulondin anch: “Pinatesha anch antu ading akat kubuw ni kwosh yikumbu mu Greenwood, nakwata mupak wa kuya kumutal murund nam mukatish Hill, mulong wa kuman anch kamusadinap uyimp.”

Mukadivar Arthur Claus wayikwasha an 14 kwilej yivud piur pa Bibil kusutin buku La Harpe de Dieu

Pashikay ku chikumbu cha Mukadivar Hill, wamana mutej nend chindel walamang kal wut ku makas. Ikundj winou wadinga kand murund wa Mukadivar Hill, wamana anch Arthur niyend wading pakach pa antu ading ayirishikishina antu ajal. Wamwipula nich dizu dia piur anch: “Mulong wak weza kal mu rupang ra ikundj winou?”

Arthur walonda anch: “Anch namwakula mu mutapu uyimp, wafanyina kwinloz. Namwinkisha kashinsh anch nading murund wa Mukadivar Hill ni nikat kwezang kal kwol kwend.” Arthur ni mutej winou akinga chikumbu ni yom ya Mukadivar Hill mu makas ma ij.

Pakad kulab, Arthur wajingunina anch Mukadivar Hill ni dijuku diend ading ku Chot cha Yikumangan cha mburamatad. Amuleja Arthur anch antu ajal kafanyinap kubudik pakad mbil ya Barrett wading mukurump wa amasalay wading uyilamina. Arthur warumburila anch: “Chading chikasiken nakash kwambamb ni mukurump wa amasalay. Pinamuleja anch nikimbin kusend dijuku dimwing diading mu Chot, wangipula anch: ‘Ov, ey ukudilam dijuku dined ni kudiwanyishin maswir mawonsu?’ Nakula nich kashinsh anch mwaning.”

Wasenda mukand wamwinkishau mulong wa kubudish dijuku dined ni wauya nich ku Chot cha mburamatad; ni wamwinkishau isalay umwing. Isalay winou washimwoka ni walonda anch: “Mam! Aufachik kal kud mukurump amwinend! Wij anch yey muntu wa kusambish kusend dijuku mwi ndond yiney?” Pakad kulab, amumana Mukadivar Hill pamwing ni dijuku diend. Awonsu andama mu motak wa mukadivar Arthur ni achirika ku chikumbu.

Mukadivar Claus washinshikina mulong wa kwikal nich kashinsh anch Mukadivar Hill ni dijuku diend ading mu diking. Chilakej chend cha kutakaman ni cha rukat ra ukadivar ramekeshay chayipukuna nakash antu akwau. Arthur warumburila anch: “Mutej nend wa Hill wakwasha kuking chikumbu ni yom yau wayilimisha nakash Atuman a Yehova kusutamu pakur. Ni antu avud asambisha kusanger uyakin, mulong amana anch antu a Nzamb kadingap aurikina mulong wa ulomb wa chikit ni kwikil wading utongina anch ud muwamp nakash kumusutamu mukwau.”

a Gazet L’Âge d’Or amutazuka anch Consolation mu muvu wa 1937 ni anch Réveillez-vous! mu muvu wa 1946.