MUTAPU WA KUKANGESH RUKIS KUDANDAMEN KUVULIJAN

1 | Ipuk Kasolikany

Bibil Ulondin Anch:

“Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.”—MIDIMU 10:34, 35.

Chirumburikina Mazu Minam:

Yehovaa Nzamb kakatap kuturumburish kukwatijan ni ngand, muchid, ulombu wa chikit, ap yishankur yetu. Pakwez, ukat kushinshikinang pa chom chidia cha usey, charumburik anch wuntu wetu wa mukach. Bibil ulondin kand anch “muntu ukat kutal yimenay nich mes mend, pakwez [Yehova] ukat kutal ku muchim.”—1 Samwel 16:7.

Yom Ukutwisha Kusal:

Ap anch tukutwishap kwijik yidia mu muchim wa muntu, tukutwish kwikasikesh kumwimburij Nzamb ni kulik kwikal ni kasolikany. Sal usu wa kuman chidiay muntu pakampwil pa ndond pa kuman muchid wau. Anch wajingunin anch wasambish kal kwikal ni yitongijok yiyimp piur pa antu a muchid ap a ngand yindj, mulembila Yehova ni mwita chakwel akukwash kudiosh yitongijok yiney mu muchim wey. (Kuseng 139:23, 24) Anch wamwit Yehova nich kashinsh kawonsu chakwel akwinkish usu wa kwipuk kasolikany, ukutwish kwikal nich kashinsh anch ukwakul ku malembil mey.—1 Pita 3:12.

a Yehova did dijin dia pakampwil dia Nzamb.—Kuseng 83:18, NWT.

“Kwinsambishin nading kandikal nishakamangap pamwing ni chindel mu chisambu . . . Katat nid mu dijuku diakin dia akadivar nau anambaz akatijadina dia pa mangand mawonsu.”—TITUS

Rusangu Rakin—TITUS

Wakangesha Rukis Kudandamen mu Muchim Wend

Titus wading mu chisak cha ampopol in chisum ading arishikishina yijil ya kasolikany pantaliken ni antu ajal. Ulondin anch: “Twayangang mu musumb ku jindond kwading kuyikangeshinau antu ajal kuya, mud ku ma otel ni ku ma bar, mulong wa kusarumun matend.” Titus ulondin anch rukis rading rizwila mu muchim wend rawiy ramubachikang kusal mwamu. Ulondin kand anch: “Anch twakulijan ni muntu, ikala ikundj ap mband, nikalang wa kusambish kudjibul dikof.”

Titus wasambisha kuswimp chisu chasambishay kwilej Bibil ni Atuman a Yehova. Kutang Bibil kwamukwasha kuswimp nakash mwom wend. Kushilamu kwa ngand yisu ya mu machuku ma kurutu kulondina anch “kukez kikalap kand rufu, ap madil, ap kwishikokin, ap kusansan” kwawiy kwamupukuna nakash kupandakan.—Kujingunik 21:3, 4.

Kwinsambishin, chading chimukasikedin nakash Titus kudiosh rukis mu muchim wend. Ulondin anch: “Chading chinkasikedin nakash kuswimp mutapu wam wa kutong ap yisal yam.” Pakwez yom yamukwasha yid yom yilejay mu Midimu 10:34, 35, ulondina anch Nzamb kakwetap kasolikany.

Yibudikin ik yikalaku? Titus urumburil anch: “Nikala nich kashinsh anch relijon wa Atuman a Yehova ud wakin pinamana mutapu wading umekeshijadidinau rukat chikalap nchik kushalijan kwa ulombu wa chikit. Nashimoka pa kuman anch ap kurutu kwa kwimbatish mud Kaman wa Yehova, chindel umwing wading mu chikumangen wantazuka kwol kwend mulong wa kudia nend pamwing. Namana mud chilat. Kwinsambishin nading kandikal nishakamangap pamwing ni chindel mu chisambu, pakwez pa chisu chinicha nasala mwamu ni kudia kwol kwend. Katat nid mu dijuku diakin dia akadivar nau anambaz akatijadina dia pa mangand mawonsu.”