Buku wa Kujingunik Urumburikin ik Piur pa Machuku Mey ma Kurutu?

1. Mupak ik wa usey nakash uyitina antu awonsu kukwat?

ANTU akwet mupak wa usey nakash uyitina kukwat nlel. Ov, akwikal ku mutambu wa Yehova Nzamb uwanyidina kuyikel mangand mawonsu, anch akwikal ku mutambu wa mukankuny nend muyimp nakash, Satan Djabul? Chimwitin muntu ni muntu kutond mutambu ukukwashay, kwikil ukushala cha pakach. Mupak wawonsu ukukwatau antu ukwikal ni chibachikin piur pa machuku mau ma kurutu. (Mat. 25:31-33, 46) Pa chisu cha ‘mar makash,’ akuyitek chijingidij mulong wa kumekesh anch akupand ap akusheshik.​—Kuj. 7:14; 14:9-11; Ezek. 9:4, 6.

2. (a) Hebereu 10:35-39 utukasikeshin kusal yom ik? (b) Buku wa Kujingunik ukutwish kutukwash mutapu ik?

² Tang Hebereu 10:35-39. Anch watondin kal kukwash ku winyikel wa Yehova, ijik anch wakwatin kal mupak wa manangu. Katat ukwet chisend cha kuyikwash antu akwau kukwat mupak uwamp. Pa chinech, ukutwish kusadin yom yilejenau mu buku wa Kujingunik mulong wa kuyikwash nich. Buku winou muwamp nakash ulejen yom yikuyishikena antu akata kumubwambwil Yehova, pakwez ulejen kand patok yiyukish yiyichingedina antu akata kukwash winyikel wend nich kushinshaman. Chid chiwamp kushinshikin uyakin winou wa usey nakash. Kusal mwamu kukukasikesh mupak wetu wa kudandamen kumusadin Yehova. Chikwau kand, chikutukwash kusadin yom tukwileja mulong wa kuyikwash nich antu akwau kukwat mupak uwamp ni kulamat ku mupak winou.

3. Yom ik tukwisambina mu mutu wa mulong winou?

³ Mu mutu wa mulong winou, tukwisambin yipul yiney: Yom ik yikuyishikena antu awonsu akata kunung chikas ku winyikel wa Nzamb? Ku mutambu ukwau, yom ik yikuyishikena antu awonsu akata kunung chikas kud nnam wa chidiany musuz ujimbwilau mu buku wa Kujingunik?

YOM YIKUYISHIKENA ANTU ASHINSHAMENA

4. Chisak ik chamanay kambuy Yohan chading ni Yesu mwiur?

⁴ Mu chishimushimu, kambuy Yohan wamana yisak yaad ya antu anungina chikas ku winyikel wa Yehova ni kutambul yiyukish ya mwom wa chikupu. Chisak cha kusambish chikwet uvud wa antu 144 000. (Kuj. 7:4) Ayitondin pa divu mulong wa kusal guvernema, ap anch Want, pamwing ni Yesu. Akuyikel nend pamwing pa divu diakabuj. (Kuj. 5:9, 10; 14:3, 4) Yohan wayimana mu chishimushimu iminy pamwing ni Yesu mwiur pa Mukandu wa Sion.​—Kuj. 14:1.

5. Piswimp ap, yom ik yikuyishikena antu achidia pa divu a mu chisak cha antu 144 000?

⁵ Mu kusut kwa yitot ya mivu, atondin kal tunan twa antu mulong wa kwikal mu chisak cha antu 144 000. (Luka 12:32; Rom 8:17) Pakwez, amuleja Yohan anch kamuzamu kusu kakemp ka antu a mu chisak chinech, awiy akwikala aom pa divu pa chisu cha machuku ma nsudien. ‘Atushal’ inay, charumburik anch antu a mu chisak chinech achidia pa divu, akutambul “chijingidij” cha nsudiel cha dilau dia Yehova kurutu mar makash masambisha. (Kuj. 7:2, 3; 12:17) Kupwa, chisu chikemp pa chirung cha mar makash, atushal inay akuyisend mwiur mulong wa kutanijan ni antu akwau adia mu chisak cha antu 144000, asambela kufa nich kushinshaman kwau. Kwinikwa akuyikel pamwing ni Yesu mu Want wa Nzamb.​—Mat. 24:31; Kuj. 5:9, 10.

6-7. (a) Chisak ik chikwau chamanay kand Yohan, ni yom ik twilejina piur pa chisak chinech? (b) Mulong wak yisak yawonsu yaad, cha atushal ni cha “runtu ruvud,” afanyidin kushinshikin yom yilejenau mu Kujingunik shapitre wa 7?

⁶ Kupwa kwa kuman chisak cha mwiur, Yohan wamana kand “runtu ruvud.” Chinyim ni chisak cha antu 144 000, chikasiken kwijik uvud wa antu adia mu chisak chinech. (Kuj. 7:9, 10) Yom ik twilejina piur pau? Yohan walond anch: “Adi antu adiokila mu mar makash mapandakena. Awiy atutin kal ankandj au ni kuyitokish mu mash ma Mwan a Mukoku.” (Kuj. 7:14) Kupwa kwa kupand ku mar makash, “runtu ruvud” rikushakam pa divu ni kusanger yiyukish yikwamushena.​—Kus. 37:9-11, 27-29; Jnsw. 2:21, 22; Kuj. 7:16, 17.

⁷ Twikal ni ruchingej ra kuya mwiur ap kushakam pansh, ov, twimen ayinetu pa chipich cha mazu mafundinau mu Kujingunik shapitre wa 7? Chakin, twimen kamu. Chikwikal chisu cha musangar mud ik ku yisak yawonsu yaad ya atushalapol a Nzamb! Tukwov musangar nakash pa kuman anch twakwata mupak uwamp wa kunung chikas ku winyikel wa Yehova. Yom ik yikwau yitulejinay buku wa Kujingunik piur pa mar makash?​—Mat. 24:21.

YOM YIKUYISHIKENA AKANKUNY A NZAMB

8. Mutapu ik ukusambisha mar makash, ni mutapu ik ukusalau antu avud?

⁸ Mud mwalejanangau mu mutu wa mulong wasambelang, piswimp ap maguvernema ma mangand minam makumukarumukin ni kumushesh Babilon Mujim, ap anch marelijon mawonsu ma makasu. (Kuj. 17:16, 17) Chinship chinech chikwikal nsambishil ya mar makash. Ov, chom chinech chikuyishikij antu kukwat mupak wa kumwifukwil Yehova? Bwat. Chinyim ni chinech, Kujingunik shapitre wa 6 umekeshin anch pa chirung chinicha chikash, antu akad kumwifukwil Yehova akukimb diking mu ditenchik dia politik ni dia yom ya kwisak dia mangand minam, yifanakeshinau nich mikandu. Mulong kakunungap chikas ku Want wa Nzamb, Yehova ukuyikwat mud akankuny nend.​—Luka 11:23; Kuj. 6:15-17.

9. Mutapu ik ukushalijanau atushalapol a Yehova ni antu akwau pa chirung cha mar makash, ni chinech chikwikal ni chibudikin ik?

⁹ Chakin kamu, atushalapol a Yehova ashinshamena akumekan anch ashalijangen kamu ni antu akwau pa chirung chinicha cha mar makash. Awiy kusu akwikala chisak cha antu pa divu amwifukwidila Yehova Nzamb ni alikina kumukwash ‘nnam wa chidiany.’ (Kuj. 13:14-17) Kushinshaman kwau kukulangwish ujim kud akankuny a Yehova. Mud chibudikin, michid yikubombakan mulong wa kuyirishikish atushalapol a Nzamb pa divu diawonsu. Kurishikish kwinoku akujimbwil mu mazu ma uprofet anch kurishikish kwa Gog wa Magog.​—Ezek. 38:14-16.

10. Mud mulejenau mu Kujingunik 19:19-21, mutapu ik ukusalay Yehova chisu chikuyirishikishau antu end?

¹⁰ Mutapu ik ukusalay Yehova pantaliken ni kurishikish kwinoku kwa chisum kwa Gog wa Magog? Utulejin anch: “Nikez kumujimen.” (Ezek. 38:18, 21-23) Kujingunik shapitre wa 19 ulejen yom yikusadika kupwa kwa yiney. Yehova ukumutum Mwanend mulong wa kuyiking atushalapol End ni kuyishesh akankuny nend. Yesu pamwing ni “amasalay a mwiur,” charumburik anch angel ashinshamena pamwing ni antu 144 000, akumurishikish Gog wa Magog. (Kuj. 17:14; 19:11-15) Yibudikin ik yikwikalaku kwi njit jinej? Akushesh chikupu antu ni yitenchik yawonsu yimubwambwidina Yehova!—Tang Kujingunik 19:19-21.

KUPWA KWA NJIT, KUKWIKAL URUW

11. Chinship ik cha usey nakash chikusadika chilejenau mu buku wa Kujingunik?

¹¹ Tongin mutapu ukwiyovau antu ashinshamena pa divu pakupandau chisu chikuyisheshau chikupu akankuny a Nzamb! Chikwikal chisu chisangareshina mud ik! Ap anch kukwikal kutoy kwa musangar mwiur chisu chikumusheshau Babilon Mujim, pakwez kukwikal kand chom chikwau chikuleta musangar nakash. (Kuj. 19:1-3) Kukwikal chinship cha usey nakash chilejenau mu buku wa Kujingunik​—‘uruw wa mwan a mukoku.’​—Kuj. 19:6-9.

12. Mud mulejenau mu Kujingunik 21:1, 2, chisu ik chikusadika uruw wa Mwan a Mukoku?

¹² Chisu ik chikusadika uruw winou? Chisak chawonsu cha antu 144 000 chikwikal mwiur kurutu kwa njit ja Harmagedon kusambish. Pakwez, chawiyap chisu chikusadika uruw wa Mwan a Mukoku. (Tang Kujingunik 21:1, 2.) Uruw winou ukusadik kupwa kwa njit ja Harmagedon, ni kupwa kwa kuyishesh akankuny awonsu a Nzamb.​—Kus. 45:3, 4, 13-17.

13. Yom ik yikusadika pa chisu cha uruw wa Mwan a Mukoku?

¹³ Yom ik yikusadika pa chisu cha uruw wa Mwan a Mukoku? Chakin, mud mutapu ukata uruw kubombakesh mband ni ikundj pamwing, uruw winou wa chifanakesh ukumubombakesh Mwant, Yesu Kristu, pamwing ni chisak cha antu 144 000, adia “ngachik” wend. Chinship chinech cha usey chikusal guvernema musu ukuyikela pa divu mu mivu 1 000.​—Kuj. 20:6.

MUSUMB UPANDAKENA KUWAP NI MWOM WEY WA MACHUKU MA KURUTU

14-15. Kujingunik shapitre wa 21 ufanakeshin antu 144000 nich yom ik? (Tal chipich cha pa chibur.)

¹⁴ Kupwa kand, Kujingunik shapitre wa 21 ufanakeshin antu 144 000 nich musumb upandakena kuwap utazukinau anch “Yerusalem musu.” (Kuj. 21:2, 9) Musumb winou ukwet mufulandal ukweta mayal 12 pafundinau “majin ma atwimbuy dikum ni aad a Mwan a Mukoku.” Mulong wak Yohan washinshikina nakash pa chinship chinech? Mulong wamana dijin diend adifundin ku diyal dimwing pakach pa mayal minam. Did dilau dijim mud ik!​—Kuj. 21:10-14; Efes 2:20.

¹⁵ Kwikil musumb ukwau ufanakena ni musumb winou wa chifanakesh. Wading ni mukombil wa utad wa or wa zwang, yis 12 ya usang wa usey, mbumbu ni mifulandal yading ya mayal ma usey ukash, ni wading ni yilik yiwamp nakash ni yiwanyidina. (Kuj. 21:15-21) Pakwez, Yohan wamana anch kuburedin chom chimwing! Walonda anch: “Kinamanap Chikumbu cha Nzamb [tempel] mu musumb winou, mulong [Yehova] Nzamb Mwin Dikand Diawonsu ni Mwan a Mukoku awiy Chikumbu cha Nzamb cha musumb. Musumb kiukwetap kuswir kwa muten ap kwa ngond mulong wa kulet chimunyik, mulong uyaj wa Nzamb wawiy chimunyik chau, ni Mwan a Mukoku ndiy mwend wau wa kasu.” (Kuj. 21:22, 23) Antu afanakeshinau ni Yerusalem Musu akwikal pamwing ni Yehova. (Heb. 7:27; Kuj. 22:3, 4) Chawiy, Yehova ni Yesu awiy adia tempel wa musumb winou.

16. Yom ik yikusangerau antu mu Mivu Kanan ya Winyikel wa Want wa Nzamb?

¹⁶ Chiyisangareshining nakash in Kristu azizidilau many kutongijokin pa musumb winou. Pakwez antu akweta ruchingej ra kushakam pa divu akwet niyau mayingishin ma kushinshikin musumb winou. Mu Mivu Kanan ya Winyikel wa Want wa Nzamb, Yerusalem Musu ukulet yiyukish yivud nakash pa divu. Yohan wamana yiyukish yiney yikat kupwek mud “wit wa mem ma mwom.” Ni ku mitambu yawonsu yad ya wit kud ‘mitond ya mwom’ yading yibudishina mayij ma “kuyok nich in michid.” (Kuj. 22:1, 2) Chawiy, antu awonsu akwikala aom pa divu pa chisu chinicha, akutaninamu yom yiney yiwamp. Antu awonsu aziyidina akuyikadish pakemp pakemp antu awanyidina. Kukwikalap kand mayej, kusansan, kwishikokin, ap ushon.​—Kuj. 21:3-5.

17. Mud mulejenau mu Kujingunik 20:11-13, anany akutaninamu mu Winyikel wa Mivu Kanan?

¹⁷ Nany ukutaninamu mu yom yiwamp yiney yawonsu? Chakusambish, rid runtu rikupanda ku Harmagedon, pamwing ni an akutwisha kuvadik mwi ngand yisu. Pakwez Kujingunik shapitre wa 20 niyend ukanin anch afu akuvumbuk. (Tang Kujingunik 20:11-13.) Antu ‘atentamina’ afa pakur, pamwing ni antu ‘akad kutentam,’ afa pakad mutapu wa kwilej piur pa Yehova, niyau akuyivumbul panap pa divu. (Mid. 24:15; Yoh. 5:28, 29) Ov, chinech chimekeshin anch antu awonsu akuyivumbul ni kushakam pa divu pa chirung cha Winyikel wa Mivu Kanan? Bwat. Antu ikala ni mutapu wa kumusadin Yehova kurutu afa pakwez alik kwau mulong wa muchim wau uyimp, kakuyivumbulap. Amekesha anch kawanyidinap kushakam mu Paradis panap pa divu, mulong kitiyap dilau diayinkishau dia kumusadin Nzamb.​—Mat. 25:46; 2 Tes. 1:9; Kuj. 17:8; 20:15.

KUPAK KWA NSUDIEN

18. Mutapu ik ukwikala mashakamin pa divu kwinsudien kwa mivu 1000?

¹⁸ Kupwa kwa mivu 1 000, antu awonsu pa divu akwikal awanyidina. Kukwikalap kand muntu ukwikala ni yibudikin yiyimp ya chitil chatuswanishau kud Adam. (Rom 5:12) Mashing madiokala ku chitil cha Adam akumadiosh chikupu. Chinech chirumburikin anch, antu akushakama pa divu ‘akwikal aom’ mulong akwikal antu awanyidina kwinsudien kwa mivu 1 000.​—Kuj. 20:5.

19. Mulong wak chitin anch kwikal kupak kwa nsudien?

¹⁹ Twij anch Yesu washala ushinshamena kud Nzamb chikalap nchik kupak kwa Satan. Pakwez, ov, antu awonsu akwikala awanyidina akuswakal kushal ashinshamena anch Satan wapakish kuyipak? Muntu ni muntu ukwiyakwilap amwinend ku chipul chinech chisu chikumulikijawaku Satan kupwa kwa mivu 1 000. (Kuj. 20:7) Antu akushala ashinshamena pa chirung cha kupak kwa nsudien akutambul mwom wa chikupu ni kusanger want ipau wakin. (Rom 8:21) Antu akubwabwila akuyishesh chikupu, pamwing ni Djabul ni ayilembil end.​—Kuj. 20:8-10.

20. Mutapu ik wiyovila piur pa uprofet usangareshina udia mu buku wa Kujingunik?

²⁰ Mutapu ik wiyova kal kupwa kwa kushinshikin yom yisambidinau mu buku wa Kujingunik? Ov, chikusangareshinap kwiman amwiney mu uprofet winou ushimokishena? Ov, chikwinkishinap impu ya kuyikwash antu akwau chakwel eza kwibomb netu mu difukwil diakin dia Nzamb wetu? (Kuj. 22:17) Katat twadiokala kal kwisambin yom yikusadika kurutu oku, tukwet musangar ni tukatin niyetu kulond mud mwalonday kambuy Yohan anch: “Amen. Ez, Nsalejetu Yesu!”​—Kuj. 22:20.