En Ansand​—Dandamenany Kuya Kurutu Kupwa kwa Dibatish

1. Yom ik yimwing yiwamp yasadinau kal ansand avud?

MUVU ni muvu, akat kubatish tunan ni tunan twa ansand in Kristu. Ov, niyey wawanyishin kal rizau riner? Anch mwawiy, ijik anch akadivar nau anambaz ney mu spiritu akusangaredin nakash, ni Yehova niyend ukwovidin musangar nakash! (Jnsw. 27:11) Mu kachisu kakemp, tongin bil pa yom yiwamp wasadina kal. Wilejin Bibil nich mushiku, pamwing ap mu mivu yivud. Dilejan diey dia Bibil diakwinkisha kashinsh anch Bibil did Dizu dia Nzamb. Pakwez cha usey kupandakan, washikena kumwijik ni kumukat Yehova udia Musul wa buku winou utumbila. Rukat rey mudiay Yehova rakula mu chilik cha kwikal katat pakach pa atushalapol end ipanina kal kud ndiy ni abatishinau kal. Chom chiwamp nakash mud ik!

2. Yom ik tukwisambina mu mutu wa mulong winou?

² Chid chakin anch warisha ni yikokujol yivud yapaka ritiy rey chisu wading uyila kurutu mulong wa kushiken ku dibatish. Pakwez piuyila kupam, ritiy rey akuripak kand mu mutapu ukwau. Satan ukupakish kuziyish rukat rey mudiay Yehova ni kukupumbul kulemp ni ndiy. (Efes 4:14) Ufanyidinap kulikidil chom mud chinech chikushiken. Yom ik yikutwisha kukukwash kushal ushinshamena kud Yehova ni kuwanyish machip ma kwipan kud ndiy wasala? Ufanyidin kudandamen kuya kurutu mulong wa kwikal mwin Kristu uswila. (Heb. 6:1) Chad, mutapu ik ukutwisha kusal mwamu?

YOM IK UFANYIDINA KUSAL MULONG WA KWIKAL MWIN KRISTU USWILA?

3. Yom ik yifanyidinay kusal mwin Kristu mwawonsu kupwa kwa kutambul dibatish?

³ Kupwa kwa dibatish, etu awonsu tufanyidin kulondul kubabesh kwa Paul kud in Kristu a ku Efes. Wayikasikesha kwikal “amakurump mu ritiy.” (Efes 4:13) Winou ud mutapu ukwau wa kulond urumburishina ‘kudandamen kuya kurutu.’ Tukutwish kwov kurumburik kwa yom yakimbay kulond Paul anch twafanakesh kupam kwa mu spiritu ni mutapu ukatay kupam mwan. Anvaj akat kwov kuwap ni musangar nakash anch aval mwan. Pakwez kakudandamenap kushal mwan chikupu. Mu kusut kwa chisu, chikumwit kulikap “yaku ya wanikanch.” (1 Kor. 13:11) Chid mutapu umwing kud in Kristu. Kupwa kwa dibatish, tufanyidin kudandamen kuya kurutu. El tumanany yitongijok yimwing yikutwisha kutukwash kusal mwamu.

4. Mwikadil ik ukutwisha kutukwash kukul mu spiritu? Rumburil. (Filip 1:9)

⁴ Kul mu rukat rey mulong wa Yehova. Wamukatin kal chakin kamu Yehova nakash. Pakwez rukat rey mudiay ndiy rikutwish kukul nakash kupandakan. Mutapu ik? Kambuy Paul wajimbulaku mutapu umwing mu Filip 1:9. (Tang.) Paul walembila piur pa rukat ra in Filip anch “rujimba kamu kakwau ni kakwau.” Chawiy, komb rukat retu rikutwish kukul. Tukutwish kusal mwamu kusutin kwikal ni ‘ronganyin rakin ni kujingunin kuwanyidina.’ Anch twadandamen kusal usu wa kumwijik Yehova nawamp kupandakan, rukat retu mudiay ndiy rikukul kupandakan ni tukukwat nich usey wuntu wend ni mutapu wend wa kusal yom. Impu yetu ya kumusangaresh yikupam, ni tukukatap ap pakemp kusal chom chikutwisha kumunenganesh. Tukusal usu wa kujingunin rusot rend ni mutapu tukutwisha kuriwanyish.

5-6. Mutapu ik ukutwisha kukul rukat retu mudiay Yehova? Rumburil.

⁵ Tukutwish kukul mu rukat retu mulong wa Yehova kusutin kumwijik nawamp Mwanend wimburija mu mutapu uwanyidina wuntu wa Tatukwend. (Heb. 1:3) Mutapu uwamp wa kumwijik Yesu ud kusutin kwilej nsangu jidia mu ma Evanjil manying. Anch kandikal wikal ni chaku chiwamp cha kutang Bibil dichuku diawonsu, chid cha usey kusal mwamu kusambish katat. Piutangina nsangu piur pa Yesu, fund mikadil yend ukujingunina. Wading muntu uswapela kusejin; nich rukat wayisendang an akemp mu makas mend. (Mar. 10:13-16) In kwilejend iyovang pee anch ad nend, ni chayiswapelang kumulej yom yikwetau ku muchim. (Mat. 16:22) Pa mulong winou, Yesu wamwimburija Tatukwend wa mwiur. Yehova niyend uding uswapela kusejin. Tukutwish kumusejin mu malembil. Chisu tulembila, tukutwish kumufungwil muchim wetu wawonsu nich kashinsh anch kakutufishap nich. Utukatin ni ukat kutubangin.​—1 Pita 5:7.

⁶ Yesu wayanakenang antu. Kambuy Mateu wafunda anch: “Chamanay yisak ya antu, ndiy wayovila riy, mulong awiy ading aziyin ni kujilijil mudi amikoku akad kafung.” (Mat. 9:36) Ni mutapu ik wiyovay Yehova? Yesu walonda anch: “Tatukwen udia mwiur kasotilap umwing wa anikanch inay kushadik.” (Mat. 18:14) Chisangareshin nakash mud ik! Anch twamwijik Yesu nawamp, rukat retu mulong wa Yehova rikukul.

7. Kusutish chisu ni in Kristu aswila mu spiritu kukutwish kukukwash mutapu ik?

⁷ Ukutwish kand kwilej kukudish rukat nakash ni kukul mu spiritu kusutin kuyijik nawamp akadivar nau anambaz aswila mu spiritu mu chikumangen chen. Man mutapu ukwetau musangar. Kakatap kwinan mulong wa mupak wau wakwatau wa kumusadin Yehova. Yipula chakwel akulej yom yimwing yamanau kal mu mudimu wa Yehova. Chisu ukweta mupak wa usey ufanyidina kukwat, yita chiyul. Vurik anch mu “kuvul kwa in chiyul mudi dipandish.”​—Jnsw. 11:14.

8. Yom ik ukutwisha kusal anch wasambish kwidjidjek piur pa yom yimwing yilondinay Bibil?

⁸ Pandakan kwidjidjek ukweta. Mud mwalejanangau mu paragraf wa 2, Satan ukupakish kukukangesh kusal usu wa kukul mu spiritu. Mutapu umwing ukutwishay kusal mwamu ud kusutin kukubachik kwidjidjek mu manangu mey piur pa mafundish mamwing ma Bibil. Chilakej, dichuku dimwing ukutwish kutan mafundish ma dikarumuk mamupipejina Nzamb. Pamwing ap piwading mwanikanch, watesha ap bwat nsangu ja palemp palemp piur pa mafundish minam, pakwez katat piwapama kal, pamwing ap umilejin ku shikol. Yom yikatau kulond alej ey mulong wa kukasikesh mafundish ma dikarumuk yikutwish kumekan mud yakin ni yovikena. Pakwez, kandikal ishilangap chisu mulong wa kushinshikin uman umekeshina kwikalaku kwa Sakatang. Vurik mbil yiney yidia mu Jinswir 18:17: “Mwawonsu ukata kulond pakusambish akat kumuman mudi uyingil, ching mukwau wez ni kumushinshik.” Pa ndond pa kwitiyij kwau mafundish uteshina ku shikol mud mputames, shinshikin nawamp uyakin udia mu Dizu dia Nzamb, Bibil. Kimbijol mu mikand yetu. Isamba ni akadivar nau anambaz ading niyau itiyijina mafundish ma dikarumuk pasak. Yipula chakwel akulej yom yayinkisha kashinsh anch kud Sakatang utukatina nakash. Mambamb mud minam makasikeshina makutwish kukukwash kushinshikin pa uman wakin.

9. Chilakej cha Melissa chikufundishin ik?

⁹ Nambaz Melissa wataninamu nakash mu kukimbijol kwasalay piur pa mafundish malejena anch yom ayitanga.b Ulondin anch: “Ku shikol, mafundish ma dikarumuk amarumburiling mu mutapu umekeshina anch mad makin. Kwinsambishin, nakatap kukimbijol, mulong nova wom anch nafanyina kujingunin anch mafundish ma dikarumuk mad makin. Pakwez, natongijoka anch Yehova katwitinap kumusadin mud ambubu. Chawiy, nasambisha kukimbijol. Natanga buku Y a-t-il un Créateur qui se soucie de vous ? ni Broshir La vie a-t-elle été créée ? ni mukwau ulondina anch Cinq questions à se poser sur l’origine de la vie. Chinech chawiy kamu chom nading niswirikedina. Natonga anch nafanyina kusal mwamu kurutu kwa chisu.”

10-11. Yom ik yikutwisha kukukwash kulam mwikadil wishitwila? (1 Tesalonik 4:3, 4)

¹⁰ Lik mwikadil uyimp. Anch muntu wabarik usand ap wangadim, ukutwish kwikal ni yovil yikash ya kulalijan, ni yisu yimwing akutwish kumubachik kud antu akwau kwiyandjik mu yisal ya masandj. Satan ukatin anch uziyin ku maku minam. Yom ik yikutwisha kukukwash kulam mwikadil wishitwila? (Tang 1 Tesalonik 4:3, 4.) Mu malembil mey ma pakampwil, muleja Yehova yovil yey. Muleja kamu mutapu wiyovila, ni mwita chakwel akwinkish usu wa kujijaman. (Mat. 6:13) Vurik anch Yehova ukatin kukukwash, kadiap kukufish nich. (Kus. 103:13, 14) Ukutwish kand kukimb ukwash mu Dizu dia Nzamb. Chamukasikena Melissa wajimbulangau kwiur oku kurish ni yitongijok yijondila. Ulondin anch: “Kutang Bibil dichuku diawonsu kwankwasha kurishikish yitongijok yam yiyimp. Kusal mwamu kwanvurisha anch nipanin kal kud Yehova ni anch nading nimuswirikedin mu mwom wam.”​—Kus. 119:9.

¹¹ Kangal wapakish kupwish milong yey amwiney. Yirumburila anvajey milong urishina nich. Chakin kamu, chiswapelap kwisamb nau piur pa milong yey ya pakampwil, pakwez chid cha usey kusal mwamu. Melissa ulondin anch: “Nalembila mulong wa kwit kutakaman, ni kupwa namurumburila tatuku milong yam. Kupwa kwa kusal mwamu, niyova nawamp nakash. Namana anch Yehova wading winsangaredin.”

12. Mutapu ik ukutwisha kukwat mipak yiwamp?

¹² El mbil ja Bibil jikutakel. Ukuya pakemp pakemp kwikal ni want ipey wa kwikwatin mipak. Pakwez pinap kandikal wikal ni ronganyin rijim mu mwom wey. Mutapu ik ukutwisha kwipuk kurumbok kukutwisha kuyipish urund wey ni Yehova? (Jnsw. 22:3) Nambaz Kari urumburil yom yamukwasha kukwat mipak yiwamp. Wajingunina anch in Kristu aswila kakwetap kuswir kwa yijil pa mulong win wawonsu mulong wa kukwat mupak. Ulondin anch: “Nading nifanyidin kutesh nawamp mbil ja Bibil pa ndond pa kukimb yijil.” Chisu utangina Bibil, iyipula anch: ‘Mufund winou winfundishin yom ik piur pa chitongijok cha Yehova? Ov, ukwet mbil yikutwisha kwintakel mu mwikadil wam? Anch mwawiy, mutapu ik nikutaninamu anch nayisadin?’ (Kus. 19:7; Isay 48:17, 18) Kusutin kutang Bibil ni kutongijokin pa mbil jend, chikukuswapel kukwat mipak yimusangareshina Yehova. Piudandamedina kukul mu spiritu, ukujingunin anch uswirikedinap yijil pa mulong win wawonsu mulong wa kwijik rusot ra Yehova pa mulong kampand.

13. Yibachikin ik yikutwishau kwikal nich arund awamp pad ey? (Jinswir 13:20)

¹³ Tond arund amukatina Yehova. Mud mutapu twamanang kwiur oku, kutond kwey kwa arund kukutwish kwikal ni yibachikin pa kukul kwey kwa mu spiritu. (Tang Jinswir 13:20.) Nambaz Sara washadisha musangar wend. Pakwez kwasadika chom chamukwasha kutaniril kand musangar. Urumburil anch: “Natana arund awamp pa chisu chiwanyidina. Am ni nambaz mukwau changadim, twasambisha kurijek pamwing Chinong cha Kalam rubing ni rubing. Murund mukwau wankwasha kupan yakul ku yikumangan. Mulong wa yibachikin yiwamp ya arund nam, nikala ni chaku chiwamp cha kusal dilejan dia pakampwil ni kulembil nakash. Nasambisha kukasikesh urund wam ni Yehova, ni nasambisha kand kuchirish musangar wam.”

14. Mutapu ik wikalay nich Julien arund awamp?

¹⁴ Mutapu ik ukutwisha kuta urund ni antu akutwisha kwikal ni yibachikin yiwamp pad ey? Julien, udia katat mukurump wa chikumangen, ulondin anch: “Pinading nsand, nikalang ni arund awamp panipanang mu mudimu wa kulejan. Arund inay ading akwet mushiku, ni ankwasha kuman mutapu ukata mudimu wa kulejan kulet musangar. Nitekina mupak wa kwipan mu mudimu wa chisu chawonsu. Najingunina kand anch nading nikat kwishalap urund uwamp mulong nading nikat kwimen kwam pa kutond arund a mivu yam. Kupwa, nikala kand ni arund awamp ku Betel. Chilakej chau chankwasha kutond nawamp milad ya kwipuwangej, ni chinech chansejisha piswimp ni Yehova.”

15. Mutapu ik Paul wamubabeshay Timote piur pa arund? (2 Timote 2:20-22)

¹⁵ Chikwikal nchik anch wajingunin anch muntu kampand mu chikumangen kadiap murund muwamp? Paul wading wij anch antu amwing pakach pa in Kristu a mu chikumangen cha mu mivu chitot ya kusambish kadingap aswila mu spiritu, chawiy chamukasikeshay Timote kuyiyep palemp. (Tang 2 Timote 2:20-22.) Urund wetu ni Yehova ud wa usey nakash. Tufanyidinap kulikidil chakwel muntu kampand ajip urund twasala usu wa kukudish pamwing ni Tatukwetu wa mwiur.​—Kus. 26:4.

KWITEKIN MIPAK KUKUTWISH KUTUKWASH MUTAPU IK KUKUL MU SPIRITU?

16. Mipak ya mutapu ik ufanyidina kwitekin?

¹⁶ Itekina mipak ya usey. Itekina mipak yikukukasikesha ni kukukwash kuya kurutu. (Efes 3:16) Chilakej, ukutwish kukwat mupak wa kwikal ni chaku cha kusal dilejan dia pakampwil ni kutang Bibil. (Kus. 1:2, 3) Ap ukutwish kuman anch chikwitin kusambish kulembil nakash ni kuwapish mutapu wey wa kulembil. Pamwing ap chikwitin kushinshikin nawamp pa mutapu wey wa kwipuwangej ni wa kusadin chisu chey. (Efes 5:15, 16) Ukumusangaresh Yehova nakash anch wakuman ukat kusal usu wa kukul nakash mu spiritu.

17. Kuyikwash antu akwau kukutwish kukukwash mutapu ik?

¹⁷ Kuyikwash antu akwau kukukukwash kwikal mwin Kristu ukudila mu spiritu. Yesu walonda anch: “Chiyukish cha mwin kupan chipandakenamu cha mwin kutambul.” (Mid. 20:35) Ukutaninamu nakash anch wasadin chisu ni usu wey wa usand mulong wa kuyikwash antu akwau. Chilakej, ukutwish kwitekin mupak wa kuyikwash amapal ni ayilim adia mu chikumangen chen. Pamwing ap ukutwish kuyikwash kusutin kuya kuyilandin yom ap kuyilej mutapu wa kusadin nawamp yamu ya elektronik. Anch ud mukadivar, itekina mupak wa kwikal nkwash a mudimu, nich chitongijok cha kuyikwash akadivar nau anambaz ney. (Fil. 2:4) Ukutwish kand kuyimekeshin antu adia pol pa chikumangen rukat kusutin kuyirumburil rusangu ruwamp wa Want. (Mat. 9:36, 37) Anch chitwishikin, itekina mupak wa kwipan mu mudimu wa chisu chawonsu.

18. Kwipan mu mudimu wa chisu chawonsu kukutwish kukukwash mutapu ik kukul?

¹⁸ Mudimu wa chisu chawonsu ukutwish kukwinkish mitapu yivud nakash ya kukul mu spiritu. Kusal mud chibol kukutwish kukufungwil chis cha kuya ku Shikol ya in Kulejan a Want, kusadin ku Betel, ap mu mudimu wa kutung. Nambaz changadim Kaitlyn udia chibol ulondin anch: “Kusal mudimu wa kulejan pamwing ni akadivar ni anambaz aswila kal kwankwasha nakash niyam kukul mu spiritu kupwa kwa kwimbatish. Chilakej chau chankwasha kukudish ronganyin ram ra Bibil ni kuwapish ukaliweny wam wa kufundish.”

19. Yiyukish ik ukwikala nich piudandamedina kukul mu spiritu?

¹⁹ Yehova ukukuyukish nakash piudandamedina kukul mu spiritu. Ukwipuk kusadin nayimp usand wey mu kulondul kwau mipak yakad usey. (1 Yoh. 2:17) Ukwipuk runeng ridiokiling ku kukwat mipak yiyimp. Pakwez, ukutwish mu mwom wey ni ukutan musangar wakin. (Jnsw. 16:3) Chilakej chey chiwamp chikuyikasikesh ambay ney in Kristu ansand ni amapal. (1 Tim. 4:12) Ni cha usey kupandikan, ukwikal nich chisambu ni musangar yidiokiling ku kumusangaresh Yehova ni ku kwikal ni urund wa piswimp ni ndiy.​—Jnsw. 23:15, 16.