Mes ma Yehova Matadil pa Atushalapol End

1. Mulong wak Yesu wamwita Yehova kutal mes mend pad in kwilejend?

UCHUKU wasambela rufu rend, Yesu wita chom cha pakampwil mu malembil mend masalay kud Tatukwend wa mwiur. Wamwita Yehova chakwel atal mes mend pad atushalapol end. (Yoh. 17:15, 20) Chakin kamu, chisu chawonsu mes ma Yehova mading pad atushalapol end—ukat kuyibangin ni kuyiking. Pakwez, Yesu wading wij anch in kwilejend afanyina kuyirishikish kud Satan mu mutapu wakadingayap kal kand kusal. Yesu wading wij kand anch akuswiriken ukwash wa Yehova mulong wa kujijamen kurishikish kwa chisum kwa Satan.

2. Kukwatijan ni Kuseng 33:18-20, mulong wak tufanyidinap kwov wom wa yikokujol?

² Nlel mangand ma Satan makat kuyirishikish chipandakena in Kristu akin. Tukat kurish ni yikokujol ni yakamish yikutwisha kutuziyish ni kupak kushinshaman kwetu mudiay Yehova. Pakwez mud mutapu tukumana mu mutu wa mulong winou, tufanyidinap kumwov Satan wom. Mulong Yehova utadin mes mend pad etu​—umen yikokujol turishina nich, ni ud kwaku mulong wa kutukwash. El tushinshikinany yilakej yaad ya mu Bibil yimekeshina mutapu “mes ma [Yehova matadila] kud awiy akata kumulimish ndiy.”​—Tang Kuseng 33:18-20.

ANCH TWIYOV ANCH TUD AYINETU

3. Chisu ik tukutwisha kwiyov anch tud ayinetu?

³ Ap anch tud mu dijuku dijim dia akadivar nau anambaz, tukutwish kwiyov yisu yimwing anch tud ayinetu. Chilakej, ansand amwing akutwish kwiyov anch ad ayinau chisu chirumburilau yitiyij yau kurutu kwa ambay nau a shikol, ap anch abuukin mu chikumangen chisu. Etu awonsu tukutwish kwov ushon, ap kwikal ni runeng rikash ni kutong anch tukurish ni yovil yiney dia ayinetu. Tukutwish kwidjidjek kuyilej antu akwau mutapu twiyovila mulong pamwing ap twovil wom anch kakututeshap kwetu. Ni yisu yimwing, tukutwish kwiyipul anch kud kamu chakin muntu utubangidina. Kwiyov anch tud ayinetu​—chikalap nchik diyingishin—​kukutwish kutushikij kwiyov anch tukwetap mwin kutukwash ni kwiyakamish nakash. Yehova kakatinap anch twiyov mutapu winou. Mulong wak tukutwisha kulond mwamu?

4. Mulong wak walonday muprofet Elija anch: “Am nashadil kal kwam diam amwinam”?

⁴ Shinshikin chilakej cha ikundj ushinshamena Elija. Jezabel washilamu kumujip, chawiy wachina mu machuku 40 ni kusut mulong wa kupandish mwom wend. (1 Ant 19:1-9) Dinsudien, padingay dia amwinend mu mandam, wamudidina Yehova anch: “Am nashadil kal kwam [muprofet] diam amwinam.” (1 Ant 19:10) Kwading aprofet akwau chisu chinicha; Abidias wasala usu wa kuyipandish aprofet 100 mu makas mwa mwin kujipan Jezabel. (1 Ant 18:7, 13) Chawiy, mulong wak wiyovay Elija anch ud amwinend? Ov, watonga anch aprofet awonsu apandishau kud Abidias ading kwau afil kal? Ov, wiyova anch ud dia amwinend pamwing ap mulong antu akwau alika kwibomb ni ndiy mu kumusadil Yehova kupwa kwa kumekesh ku Mukandu wa Karimel anch Yehova ndiy Nzamb wakin kadiap Bal? Ov, wiyova anch kwikil muntu wading umena anch mwom wend ud mu ubaj nakash, ap kand kwiyipul anch kwading muntu umubangidina? Rusang rend riturumburidinap yom yawonsu piur pa mutapu wading wiyovilay. Pakwez kashinsh tukweta kad anch Yehova wading wij mulong wak Elija wiyova anch ud amwinend, ni wading wij nawamp mutapu wafanyinay kumukwash.

5. Yehova wamwinkisha mutapu ik Elija kashinsh anch kadiap amwinend?

⁵ Yehova wamukwasha Elija mu mitapu yivud. Wamukasikesha Elija kulond. Wamwipula tupamp twaad anch: “Ov, Elija, usadil yom ik kunoku?” (1 Ant 19:9, 13) Kapamp kawonsu kamwipulay, Yehova wamutesha Elija chisu chading chimufungwidinay muchim wend. Yehova wamwakula Elija kusutin kumwijikish anch wading nend ni anch ukwet dikand dijim nakash. Wamwinkisha kand Elija kashinsh anch wading ukwet ambay nend avud. (1 Ant 19:11, 12, 18) Pakad kwidjidjek, Elija wiyova pee kupwa kwa kumufungwil Yehova muchim wend ni kuman mutapu wamwakulau. Yehova wamwinkisha Elija yisend yivud. Wamuleja kumuzizil Hazayel many mud mwant wa in Siria, Jehu mud mwant wa Isarel, ni Elisha mud muprofet. (1 Ant 19:15, 16) Kusutin kumwinkish Elisha yisend yiney, Yehova wamukwasha kushinshikin pa yom yiwamp. Nzamb wamwinkisha kand murund muwamp wa piswimp, Elisha. Mutapu ik ukutwishay kukukwash Yehova anch wiyov anch ud amwiney?

6. Piur pa yom ik ufanyidina kulembil chisu wiyovila anch ud amwiney? (Kuseng 62:8)

⁶ Yehova ukwitin chakwel umusejin mu malembil. Umen yikokujol urishina nich, ni ukwinkishin kashinsh anch ukwakul ku malembil mey pa chisu chiwanyidina. (1 Tes. 5:17) Usangaredining kutesh malembil ma atushalapol end. (Jnsw. 15:8) Piur pa yom ik ufanyidina kulembil chisu wiyovila anch ud amwiney? Mufungwila Yehova muchim wey mud mwasalay Elija. (Tang Kuseng 62:8.) Muleja yakamish yey ni mutapu wiyovila mulong wa yakamish yiney. Mwita Yehova chakwel akukwash kurish ni yovil yey. Chilakej, anch wiyov anch ud amwiney ni wov wom wa kupan uman kud ambay ney a ku shikol, mwita Yehova chakwel akwinkish kutakaman uswirikedina mulong wa kulond pakad wom. Ukutwish kand kumwit chakwel akwinkish manangu mulong wa kurumburil nich nkeu yitiyij yey. (Luka 21:14, 15) Anch urishin ni yovil yikuziyishina, mwita Yehova chakwel akukwash kwambamb ni mwin Kristu uswila mu spiritu piur pa yom yiney. Ukutwish kumwit Yehova chakwel amukwash muntu ukuleja yovil yey kukutesh nawamp chisu umurumburidina. Anch wamufungwil Yehova muchim wey, waman mutapu wakwilay ku malembil mey, ni witiy ukwash wa antu akwau; ukwiyovap nakash anch ud amwiney.

7. Yom ik wilejidina ku chilakej cha Mauricio?

⁷ Yehova watwinkisha kal etu awonsu mudimu uwamp wa kusal. Ukutwish kwikal nich kashinsh anch ukat kuman ni ukwatin nich usey usu wawonsu usadina mulong wa kuwanyish chisend chey mu chikumangen ni mu mudimu wa kulejan. (Kus. 110:3) Kukwatakan nakash mu mudimu winou kukutwish kukukwash mutapu ik anch wiyov anch ud amwiney? Shinshikin chilakej cha mukadivar nsand Mauricio.b Chisu chikemp kupwa kwa Mauricio kutambul dibatish, umwing wa arund nend a piswimp wasambisha kulikap uyakin pakemp pakemp. Ulondin anch: “Pinamumana wamulik Yehova, nashadisha kashinsh kam ka kushal ushinshamena. Niyipula anch nafanyina kutwish kuwanyish kamu machip mam ma kwipan kud Yehova ni kushal mu dijuku diend. Niyova anch nid amwinam ni kwikil muntu ukutwisha kutesh yovil yam.” Yom ik yamukwasha Mauricio? Ulondin anch: “Natandurila mudimu wam wa kulejan. Chinech chankwasha kulik kutongijokin pad am amwinam, ni kulik kushinshikin pa yovil yam yiyimp. Novang musangar ni niyovangap anch nid amwinam chisu nading mu mudimu wa kulejan ni antu akwau.” Chawiy, ap anch tukutwishap kulejan ni ambay netu in Kristu mes ni mes, tukutwish kusal mwam kusutin kufund mikand ap kupan uman ku telefon, ni chinech chikutwish kutukasikesh. Yom ik yikwau yamukwasha Mauricio? Uwejidinaku anch: “Nikala kand ukwatikena nakash mu chikumangen chetu. Nipana ni muchim wam wawonsu mulong wa kurijek yikunku ya chikumangan ya kuyangen ansand a shikol. Yisend yiney yankwasha kwiyov anch ankwatin nich usey kud Yehova ni kud antu akwau.”

ANCH TWIYOV ANCH TUJIYIN MU YIKOKUJOL YIKASH NAKASH

8. Mutapu ik tukutwisha kwiyov anch twarish ni yikokujol yivud?

⁸ Tuchingejin anch tukurish ni yikokujol yikash mu chirung chinech cha machuku ma kwinsudiel. (2 Tim. 3:1) Pakwez kud mar makwau makutwisha kutushiken mu mutapu twakad kutongin ni pa chisu twakad kuchingejin. Tukutwish kuwa manyol mu mutapu wa chikashimwish, kurish ni mayej makash, ap kufish mukatish netu. Mu yirung mud yiney, tukutwish kwov runeng nakash, pakampwil anch chimeken anch turishin ni yakamish yilondulijadina, ap kand yivud pa kapamp kamwing. Pakwez, vurik anch Yehova ukat kututal mes mend, ni kusutin ukwash wend tukutwish kwikal nich kashinsh anch tukupandakan yikokujol yin yawonsu.

9. Rumburil yikokujol yarishay nich Job.

⁹ Shinshikin mutapu Yehova wamukwashay ikundj ushinshamena Job. Warisha ni yikokujol yikash nakash mu kachisu kakemp. Mu dichuku kwau dimwing, amuleja Job nsang jikash ni jitapina ku muchim anch annam end awonsu ayiya, atushalapol end ayijipa, ni cha ushon kupandakan anch anend akatish afa. (Job 1:13-19) Chisu chikemp kupwa kwa yiney, pa divund dia mar mend piweja kand mutond, Job wayela mayej masansena mamuyipisha mujimbu. (Job 2:7) Mashakamin mend mayipa nakash mu chilik chashikenay Job kulond anch: “Nafa kal kwam, kinikupandap kand chikupu.”​—Job 7:16.

10. Mutapu ik Yehova wamwinkishay Job yom yading yiswirikedinay mulong wa kujijamen yikokujol yend? (Tal chipich cha pa chibur.)

¹⁰ Mes ma Yehova mading padiay Job. Mulong Yehova wading umukatin Job, wamwinkisha yawonsu yading yiswirikedinay mulong wa kujijamen yikokujol yend. Yehova wambamba ni Job, wamuvurisha manangu mend makad musul ni rukat rikwetay mulong wa yitangil yend. Wamujimbwila annam avud akwamushena. (Job 38:1, 2; 39:9, 13, 19, 27; 40:15; 41:1, 2) Yehova wamusadina kand ikundj ushinshamena Elihu mulong wa kumukasikesh ni kumwongoj Job. Elihu wamwinkisha kashinsh anch Yehova udandamedining kuyifut atushalapol end mulong wa kujijaman kwau. Pakwez Yehova wamubachika kand Elihu kumwinkish Job yiyul ya rukat. Elihu wamukwasha Job kulik kushinshikin nakash ching kusu pa milong yimutadina ndiy kusutin kumuvurish anch tud akemp nakash mu kutwilakej ni Yehova, Sakatang wa diur ni divu. (Job 37:14) Yehova wamwinkisha kand Job chisend cha kuyilembil arund nend asatu asala chitil. (Job 42:8-10) Mutapu ik ukatay kutukwash Yehova nlel anch twarish ni yikokujol yikash?

11. Mutapu ik ukutwishay Bibil kutwongoj chisu turishina ni yakamish?

¹¹ Yehova kakatap kwambamb netu mud mutapu wasalay ni Job, pakwez ukat kwambamb netu kusutin Dizu diend, Bibil. (Rom 15:4) Ukat kutukasikesh kusutin kutwinkish ruchingej mulong wa machuku ma kurutu. Tushinshikinanaku kwetu yitongijok yimwing yidia mu Bibil yikutwisha kutwongoj chisu tudia mu yakamish. Mu Mifund, Yehova utwinkishin kashinsh anch kwikil chom—​yikal yikokujol yikash​—“chikutwisha kutwauril etu ku rukat ra [rend].” (Rom 8:38, 39) Utwinkishin kand kashinsh anch ud “piswimp kudi awonsu akata kumutazuk ndiy” mu malembil. (Kus. 145:18) Yehova utulejin anch ang twakungamen mwi ndiy, tukutwish kujijamen chikokujol chawonsu ni kutan musangar mu chilik kanang pa chisu tumena mar. (1 Kor. 10:13; Jak. 1:2, 12) Dizu dia Nzamb dituvurishin kand anch yikokujol turishina nich yid kwau ya mu kachisu kakemp ni yikemp nakash mu kuyilakej ni yiyukish ya chikupu tukutambula. (2 Kor. 4:16-18) Yehova utwinkishin ruchingej rakin anch ukupwish misul yawonsu yikata kuletish mar​—Satan Djabul ni awonsu akata kulondul njil yend yiyimp ya wintombwij. (Kus. 37:10) Ov, walaminaku kal mu manangu mifund yimwing yikasikeshina yikutwisha kukukwash kujijamen yikokujol ya machuku ma kurutu?

12. Yom ik yikatinay Yehova anch tusala mulong wa kutaninamu mu Dizu diend?

¹² Yehova ukatin anch twishilang chisu pichuku pichuku mulong wa kwilej Bibil ni kutongijokin chikurikina pa yom tutangina. Anch twasadin yom twilejina, ritiy retu rikukasikan ni tukusej piswimp ni Tatukwetu wa mwiur. Mud chibudikin, tukwikal ni yawonsu tuswirikedina mulong wa kujijamen yikokujol. Yehova ukat kupanang kand spiritu wend utumbila kud awonsu akata kuchingejin mu Dizu diend. Ni spiritu winou ukutwish kutwinkish “ukash upandakena ukash wawonsu” mulong wa kujijamen chikokujol chawonsu.​—2 Kor. 4:7-10.

13. Yakudia ya mu spiritu yibudishinau kud ‘kashalapol ushinshamena ni kubabal’ yitukwashining mutapu ik kujijamen yikokujol yetu?

¹³ Nich umutakel wa Yehova, ‘kashalapol ushinshamena ni kubabal’ ukat kubudish mikand, mavideo, ni mizik yivud nakash yikutwisha kutukwash kukasikesh ritiy retu ni kushal achila ku mes mu spiritu. (Mat. 24:45) Tufanyidin kusal usu wa kutaninamu mu yom yiney yawonsu. Kwasut kal chisu chikemp, nambaz umwing wa mu États-Unis wamekeshin kujikitish kwend mulong wa yakudia yiney yawonsu ya mu spiritu. Ulondin anch: “Mu mivu 40 nasadina mu mudimu wa Yehova, kushinshaman kwam akupaka tupamp tuvud.” Warisha ni yikokujol yivud​—ngakend ikundj amujipa kud shofer umwing wading walewang kal mar, anvajend afa ku mayej makash, ni amwinend wayela mayej ma kanser tupamp twaad. Yom ik yamukwasha kujijaman? Urumburil anch: “Yehova wambanginang chisu chawonsu. Yakudia ya mu spiritu yatwinkishangay kusutin kashalapol ushinshamena ni kubabal yankwasha kujijaman. Mulong wa yom yiney, nikat kwiyov mud mwiyovay Job walonda anch: ‘Djat ni ku rufu ram nikudandamen kamu kulam kushinshaman kwam!’”​—Job 27:5.

14. Mutapu ik ukatay Yehova kusadin ambay netu in Kristu mulong wa kutukwash pa yirung ya mar? (1 Tesalonik 4:9)

¹⁴ Yehova wayifundishin kal atushalapol end kwongojijan umwing ni mukwau pa yirung yikash. (2 Kor. 1:3, 4; tang 1 Tesalonik 4:9.) Akadivar ni anambaz netu akat kwimburij chilakej cha Elihu kusutin kutukwash kushal ashinshamena chisu turishina ni yakamish. (Mid. 14:22) Chilakej, tal mutapu chikumangen mwadingay Diane chamukasikesha ni kumukwash kushal wiminya dang mu spiritu chisu chayelay nfumwend mayej makash. Ulondin anch: “Chading chom chikash nakash. Pakwez twamana chikas cha usu ni cha rukat cha Yehova mu angond inay a yakamish yikash. Chikumangen chetu chasala yom yivud mulong wa kutukwash. Atwendinang, atutazukang ku telefon, ni atubwikatang, ni yawiy yom twading tuswirikedina kamu mulong wa kujijaman. Mulong nadingap ni mutapu wa kwendish motak, akadivar ni anambaz ankwashang kuya ku yikumangan ni mu mudimu wa kulejan chisu nading niswiridina kusal mwamu.” Chid chiyukish mud ik cha kwikal mu dijuku dia mu spiritu mud dined dikweta rukat!

TUJIKITISHIN MULONG WA KUBANGIN KWA RUKAT KWA YEHOVA

15. Mulong wak tukweta kashinsh anch tukutwish kupandakan yikokujol yetu?

¹⁵ Etu awonsu tukurish ni yikokujol mu mutapu kanang. Pakwez mud mutapu twileja kal, tukuyirishap nich ayinetu. Mud tatuku wa rukat, yisu yawonsu Yehova utadining mes mend pad etu. Ud netu piswimp ni ukatin kutesh malembil tukata kusal mulong wa kumwit ukwash, ni ud kwaku mulong wa kutukwash. (Isay 43:2) Tukwet kashinsh anch tukutwish kupandakan yikokujol yawonsu mulong watwinkishin kal yom yawonsu tuswirikedina mulong wa kujijaman. Watwinkishin kal chipan cha malembil, Bibil, yakudia yivud ya mu spiritu, ni akadivar nau anambaz a rukat mulong wa kutukwash mu yisu ya maswir.

16. Mutapu ik tukutwisha kushal mu kubangin kwa rukat kwa Yehova?

¹⁶ Musangar mud ik tukweta wa kwikal ni Tatuku wa mwiur ukata kutal mes mend pad etu! “Michim yetu yikat kusanger mwi ndiy.” (Kus. 33:21) Tukutwish kumekesh kud Yehova anch tukwatin nich usey kubangin kwend kwa rukat kusutin kusal usu wa kutaninamu mu yom yawonsu yitwinkishinay mulong wa kutukwash. Ku mutambu wetu niyetu tufanyidin kusal usu wa kushal mu diking diend. Mu kulond kukwau, anch twadandamen kusal usu wetu wawonsu mulong wa kumuziyin Yehova ni kusal yom yitentamina ku mes mend, mes mend makwikal pad etu chikupu!​—1 Pita 3:12.