Dandamenany ‘Kukasikeshijan Muntu ni Mukwau’

1. Kukwatijan ni 1 Tesalonik 5:11, mu mudimu ik twipanina etu awonsu?

OV, CHIKUMANGEN chen chatungin kal ap kurijek Chot cha Want? Anch mwawiy, chid chakin anch uvurikin kapamp key ka kusambish wakumangena mu Chot chisu. Wamekesha kujikitish nakash kudiay Yehova. Pakwez, pamwing ap yovil ya musangar yakupandakena ni chinech chasala anch chikukasiken kuwang muminy wa nsambishin. Yot yetu ya Want yitunginau nawamp yikat kumushiman Yehova. Pakwez tukat kumushiman kand chipandakena anch twipan mu mulad ukwau wa mudimu wa kutung. Mulad winou wa kutung urumburikin kusal chom cha usey nakash kusutamu kutung chikumbu. Urumburikin kutung antu akata kwez ku jindond jinej ja difukwil. Kambuy Paul wasadina dizu dikutwisha kand kurumburik anch “kutung” mulong wa kwisambin chitongijok cha kukasikeshijan amwing ni akwau, mud mulejenau mu verse wa mutu wa mulong wa 1 Tesalonik 5:11.—Tang.

2. Yom ik tukumana mu mutu wa mulong winou?

² Kambuy Paul ud chilakej chiwamp nakash cha muntu wading wija mutapu wa kuyikasikesh ambay nend in Kristu. Wading kwitek pa ndond ya antu akwau. Mu mutu wa mulong winou tukuman mutapu wayikwashay akadivar nau anambaz nend (1) kujijamen yikokujol, (2) kusal chisambu nau antu akwau, ni (3) kukasikesh ritiy rau mudiay Yehova. El tumanany mutapu tukutwisha kumwimburij mu kuyikasikesh akadivar nau anambaz netu nlel.—1 Kor. 11:1.

PAUL WAYIKWASHA AKADIVAR NAU ANAMBAZ NEND KUJIJAMEN YIKOKUJOL

3. Chitongijok ik chisikena chadingay nich Paul?

³ Paul wading uyikatin akadivar nend nakash. Amwinend wamana mar nakash; chawiy chafanyina kumuswapel kumekesh ranaken ni kwitek pa ndond ya ambay nend in Kristu chisu chading chirishinau ni yikokujol yikash. Chisu chimwing, Paul waburena nfalang, ni chading chimwitin kwikal ni mudimu mulong wa kwikwash nich amwinend ni ambay nend. (Mid. 20:34) Wadinga mwin kutung minkand. Pashikay ku musumb wa Korint, chakusambish wasambisha kusal pamwing nenday Akila ni Prisil mudimu wa kutung minkand. Pakwez, “machuku mawonsu ma kwiswedish” ap anch sabat, wading kulejan rusangu ruwamp kud in Yuda ni in Grek. Kupwa pashikay Silas ni Timote, “Paul wipana chisu chawonsu mulong wa kurumburil rusangu.” (Mid. 18:2-5) Paul kavuramenap yom yading ya usey nakash mu mwom wend, kumusadin Yehova. Mulong Paul wading chilakej chiwamp piur pa kusal mudimu ukash ni kwiwanishin maswir mend ma ku mujimbu, chamuswapela kuyikasikesh akadivar ni anambaz nend. Wayivurisha kulik kulikidil rupompat rading ririshinau nich ni rusot ra kuwanyish maswir ma dijuku kuyibachik kudiul “yom yipandakena [usey]”​—milad yawonsu ya difukwil dia Yehova.​—Fil. 1:10.

4. Mutapu ik Paul ni Timote wayikwashau ambay nau in Kristu kujijamen rupompat?

⁴ Chisu chikemp kupwa kwa kusal chikumangen mu Tesalonik, in Kristu inay asu arisha nich rupompat rikash. Chisu chakanganya chisak cha akankuny a chisum kumuman Paul ni Silas, chisak chinech chayidadamijana “in kwitiyij amwing, ayitwal kudi amakurump a musumb,” atoya anch: “Awiy awonsu akat kusal yom ya kujip yijil ya mwant wa in Rom.” (Mid. 17:6, 7) Ov, ukutwish kutongijokin piur pa wom wafanyinau kwov in Kristu inay ading achidia kukarumukinap pa kuman anch antu mu musumb ading ayikisin? Afanyina pamwing ap kushadish mushiku wau mu mudimu wa Yehova, pakwez Paul kakatap anch yom mud yiney yishiken. Ap anch ndiy ni Silas ading in kudiokal mu musumb, asala usu wa kwikal nich kashinsh anch chikumangen chinech chisu akudandamen kuchibangin nawamp. Paul wayivurisha in Tesalonik anch: “Twamutumin mwanamakwetu, Timote . . . , mulong wa kukukwashany ni kukukasikeshany mu ritiy, chakwel kangal umwing wenen wachirik kwinyim mulong wa kuzengol kuumenanya katat.” (1 Tes. 3:2, 3) Timote niyend pamwing ap kwinsambishin amuzengola mu musumb wend wa chivadik wa Listre. Pakwez, wamana mutapu Paul wayikasikeshay akadivar kwinikwa. Chawiy, mulong Timote wamana yibudikin yikalaku ku ukwash wa Yehova, wafanyina kuyinkish akadivar ni anambaz nend inay asu kashinsh anch niyau yom yawonsu yafanyina kwau kuwap.​—Mid. 14:8, 19-22; Heb. 12:2.

5. Mutapu ik wataninayamu mukadivar Bryant mu ukwash wa amakurump?

⁵ Mutapu ik ukwau wayikasikeshay Paul ambay nend in Kristu? Pachirikirilau ku Listre, ku Ikon, ni ku Antiosh, Paul ni Barnabas ‘atonda amakurump mu yikumangen yawonsu mulong wa awiy.’ (Mid. 14:21-23) Pakad kwidjidjek, amakundj inay atondau amekesha kwikal musul wa rongoj mu yikumangen yau, mud mutapu usadiningau amakurump nlel. Man yom yalonday mukadivar Bryant. Ulondin anch: “Pinawanyisha mivu 15, tatuku wadiokala ku chikumbu ni maku amwopata mu chikumangen. Niyova anch andjibul kal ni naziya.” Yom ik yamukwasha Bryant kujijamen chisu chinech chikash? Ulondin anch: “Tony, udia mukurump, wambamba nam ku yikumangan ni mu yisu yikwau kand. Wanrumburila piur pa antu akwau arisha niyau ni yikokujol yikash, pakwez ading ni musangar. Wantangina Kuseng 27:10 ni walonda yisu yivud piur pa Ezekias wamusadina Yehova nich kushinshaman ap anch tatukwend kadingap chilakej chiwamp.” Yibachikin ik yadinga nich ukwash winou padiay Bryant? Ulondin anch: “Mulong wa dikasikesh dia Tony, nashikena kwipan mu mudimu wa chisu chawonsu usangareshina.” Amakurump, ikalan nich nkeu ja kuyikwash antu akutwisha kwikal ni maswir mud madingay nich Bryant ma kutesh “dizu diwamp” dia dikasikesh.​—Jnsw. 12:25.

6. Mutapu ik wasadinay Paul nsangu ja mwom mulong wa kuyikasikesh akadivar nau anambaz nend?

⁶ Paul wayivurisha ambay nend in Kristu anch kusutin ukwash wa Yehova, “chisak chijim cha atuman” ajijamena yikokujol yikash. (Heb. 12:1) Paul wamana anch nsangu ja mwom ja antu atwisha kujijamen milad yin yawonsu ya yikokujol jikutwish kuyikwash akadivar ni anambaz nend kutakaman ni kushinshikin pa “musumb wa Nzamb mwom.” (Heb. 12:22) Chid kand mutapu umwing ni nlel. Nany wakadingawap kal kukasikesh kusutin kutang nsangu piur pa mutapu Yehova wamukwashay Gedeyon, Barak, David, Samuel, ni atushalapol end akwau kand? (Heb. 11:32-35) Ni chid nchik piur pa yilakej ya antu amekeshina ritiy katat? Ku biro mujim wa pa mangand mawonsu, tukat kutambulang yisu yivud mikand yidiokila kud akadivar nau anambaz akasikeshau ritiy kupwa kwa kutang rusangu ra mwom ra umwing wa atushalapol ashinshamena a Yehova a mu chirung chetu.

PAUL WAYILEJA AKADVIAR NAU ANAMBAZ NEND MUTAPU WA KUSAL CHISAMBU NAU ANTU AKWAU

7. Yom ik wilejidina ku chiyul cha Paul chidia mu Rom 14:19-21?

⁷ Tukat kuyikasikesh akadivar ni anambaz netu anch twasal usu wa kukasikesh chisambu mu chikumangen. Tukatap kulikidil chakwel kushalijan kwa yitongijok kutwauril. Ni tukatap kukasikeshin ching pa yitongijok yetu anch mulong witin kom ka muntu. Shinshikin chilakej. Mu chikumangen cha mu Rom mwading in Kristu in Yuda ni Akamichid. Chisu chafa chijil cha moses, yijidik yawonsu yading yikangeshina kudia chom kanang yadingap kand yitina kuyilimish. (Mar. 7:19) Kudiokal kamu pa chisu chinicha, in Kristu amwing in Yuda amana anch akutwish kwau kudia yakudia yin yawonsu. Pakwez, in Kristu akwau in Yuda kitiyijap kusal chom mud chinech. Chikumangen chaurika pa mulong winou. Paul wamana usey wa kulam chisambu ni walonda anch: “Chom chiwamp chidi kulik kudia mbij, ap kuna maar, ap kusal chom chikwau chikutwisha [kumupwakesh] mwanamakwey mwin Kristu.” (Tang Rom 14:19-21.) Chawiy, Paul wayikwasha ambay nend in Kristu kuman mutapu ukutwisha kupwitamijan kwinoku kwikal ni yibudikin yiyimp kud umwing ni umwing ni pa chikumangen cha kabuj. Wading kand uswakel kuswimp yaku yend mulong wa kwipuk kuyipwakesh antu akwau. (1 Kor. 9:19-22) Tukutwish niyetu kuyikasikesh antu akwau ni kulam chisambu anch twipuk kukasikeshin pa yitongijok yetu pa milong yitina kom ka muntu.

8. Mutapu ik wasalay Paul chisu chasambisha mulong kanang wa usey kuyipish chisambu mu chikumangen?

⁸ Paul washa chilakej chiwamp kusutin kulam chisambu ni antu ading akweta yitongijok yishalijadina pa milong kanang ya usey. Chilakej, antu amwing a mu chikumangen cha mivu chitot yakusambish ajijameshina anch ading afanyidin kuyitwal Akamichid ikala in Kristu ku mukand, pamwing ap mulong wa kwipuk kuyilond nayimp kud in Yuda. (Gal. 6:12) Paul kasangerap ap pakemp chitongijok chinech, pakwez pa ndond pa kujijamesh chakwel alondul chitongijok chend, watwala mulong winou kud atwimbuy ni amakurump ading mu Yerusalem. (Mid. 15:1, 2) Mud chibudikin, mwikadil wend wakwasha in Kristu inay kulam musangar ni chisambu mu chikumangen.​—Mid. 15:30, 31.

9. Mutapu ik tukutwisha kwimburij chilakej cha Paul?

⁹ Anch kwikal kupwitamijan kukash, tukat kukasikesh chisambu kusutin kukimb umutakel wa antu atondau kud Yehova mulong wa kubangin chikumangen. Yisu yivud, umutakel wimedina pa Bibil tukutwish kuutan mu mabuku ap mu mikand yetu yipanina umutakel yibudishinau mu dirijek dietu. Anch twitekin chisu cha kulondul umutakel winou pa ndond pa kukasikeshin pa umutakel wetu ayinetu, tukukasikesh chisambu mu chikumangen.

10. Chom ik chikwau chasalay Paul mulong wa kukasikesh chisambu mu chikumangen?

¹⁰ Paul wakasikesha chisambu kusutin kushinshikin pa mikadil yiwamp ya akadivar ni anambaz nend, pa ndond pa kushinshikin pa kuburen kuwanyin kwau. Chilakej, kwinsudien kwa mukand wayifundinay in Rom, Paul wajimbula antu avud pa majin mau ni yisu yivud wawejaku mazu mawamp ap nsangu ja pakampwil ja muntu. Tukutwish kumwimburij Paul kusutin kujimbul mikadil yiwamp ya akadivar ni anambaz netu. Anch twasal mwamu, tukuyikwash akadivar nau anambaz netu kusejijadin piswimp, ni chinech chikukasikesh rukat mu chikumangen.

11. Mutapu ik tukutwisha kuchirish chisambu anch kwalank kupwitamijan?

¹¹ Yisu yimwing, ap in Kristu aswila kal mu spiritu akutwish kwikal ni yitongijok yishalijadina ap kupwitamijan. Yom yiney yamushikena Paul ni murund nend wa piswimp Barnabas. Amakundj inay aad apwitamijana nakash piur pa kumusend Marko chakwel ayitwalaku mu mudimu wau wa umishoner. “Atadikijana nakash” ni aurika. (Mid. 15:37-39) Pakwez Paul, Barnabas, ni Marko achirisha chisambu, ni kusutin kusal mwamu amekesha anch akwatin nich usey chisambu ni uumwing mu chikumangen. Mu kusut kwa chisu, Paul walonda yom yiwamp piur pa Barnabas ni Marko. (1 Kor. 9:6; Kol. 4:10) Niyetu tufanyidin kukimb mutapu wa kupwish kupwitamijan kwawonsu kukutwisha kwikal pakach petu mu chikumangen, ni kudandamen kushinshikin pa mikadil yiwamp ya akwetu. Kusutin kusal mwamu, tukukasikesh chisambu ni uumwing.​—Efes 4:3.

PAUL WAKASIKESHA RITIY RA AKADIVAR NI ANAMBAZ NEND

12. Yikokujol ik yimwing yirishinau nich akadivar ni anambaz netu?

¹² Tukat kuyikasikesh akadivar ni anambaz netu anch twayikwash kukasikesh ritiy rau mudiay Yehova. Amwing akat kuyisip kud antu a mu dijuku diau akad kwikal Atuman, ap kand kud ambay nau a mudimu ap a shikol. Akwau arishin ni mayej makash, ap chiyikasikedin kupandakan yovil yau yiyimp. Akwau kand ayibatishin kal mud in Kristu pasutin kal mivu yivud, ni achingedin kal chisu chilemp chakwel disudiel dia mangand dishika. Yom mud yiney yikutwish kupak ritiy ra in Kristu nlel. In Kristu a mu chikumangen cha mu mivu chitot yakusambish arisha niyau ni yikokujol mud yiney. Yom ik yasalay Paul mulong wa kuyikasikesh akadivar ni anambaz nend?

13. Mutapu ik Paul wayikwashay antu ading asipinau mulong wa yitiyij yau?

¹³ Paul wasadina Mifund mulong wa kuyikasikesh akadivar ni anambaz nend. Chilakej, chading chiyikasikedin pamwing ap in Kristu in Yuda kuman mutapu wa kumwakul muntu wa mu dijuku ulondina anch relijon wa in Yuda wading wa piur nakash kusutamu win Kristu. Pakad kwidjidjek, mukand wafunday Paul kud in Hebereu wayikasikesha nakash in Kristu inay. (Heb. 1:5, 6; 2:2, 3; 9:24, 25) Chafanyina kuyiswapel kusadin yitongijok ya usu ya Paul mulong wa kuyininetish nich akankuny nau. Nlel tukutwish kuyikwash ambay netu in Kristu arishina pa kusadin mikand yetu yimedina pa Bibil mulong wa kurumburil yitiyij yau. Ni anch ayisip ansand anch mulong itiyijin anch yom ayitang, tukutwish kuyikwash kutan nsangu jivud mu broshir La vie a-t-elle été créée ? ni Cinq questions à se poser sur l’origine de la vie chakwel ijik mutapu wa kurumburil mayingishin mayibachikina kwitiyij anch mwom autanga.

14. Ap anch Paul wading ukwatiken nakash ni mudimu wa kulejan ni kufundish, yom ik yasalay?

¹⁴ Paul wayikasikesha akadivar ni anambaz nend kumekesh rukat kusutin “yisalijok yiwamp.” (Heb. 10:24) Wayikwasha akadivar ni anambaz nend kadiap ching kusu kusutin yom yalondangay, pakwez kand kusutin yom yasalangay. Chilakej, pafau ambay nend a mu Yudeya nzal, Paul wakwasha kuyangen yom yading yiswirikedinau. (Mid. 11:27-30) Chawiy, ap anch Paul wading ukwatiken nakash mu kulejan ni kufundish, wakimbang mitapu ya kuyikwash ambay nend adinga mu maswir ma ukwash wa ku mujimbu. (Gal. 2:10) Kusutin kusal mwamu, wayikasikesha ambay nend in Kristu, ni wading nich kashinsh anch Yehova wafanyina kuyibangin. Nlel, niyetu tukukasikesh ritiy ra akadivar ni anambaz netu anch twipan mu kusadin chisu, usu, ni ukaliweny wetu mulong wa kukwash pa chisu cha mar madiokila ku yom yatangau. Tukutwish kand kusal mwamu kusutin kwikal ni chaku cha kupanang yipan mulong wa kukwash mudimu wa pa mangand mawonsu. Kusutin mitapu yiney ap yikwau kand, tukutwish kuyikwash akadivar nau anambaz netu kulam ruchingej anch Yehova kakuyilikap ap pakemp.

15-16. Mutapu ik tufanyidina kuyisadin antu aziyina mu ritiy?

¹⁵ Paul kaziyap kuyikwash antu ading aziyina mu ritiy. Wayanakenang ni wambambang nau kwa chirungul ni mu mutapu uwamp. (Heb. 6:9; 10:39) Chilakej, mu mukand wayifundinay in Hebereu, wasadina yisu yivud mazu “etu” ni ‘tu,’ mulong wa kumekesh anch ni ndiy wading ufanyidin kusadin yiyul yapanangay. (Heb. 2:1, 3) Mud Paul, niyetu tufanyidinap kuziy kuyikasikesh antu aziyina mu ritiy. Pakwez tukat kuyikasikesh kusutin kuyibangin chakin. Mu mutapu winou, tukat kumekesh chakin kamu anch tuyikatin. Anch twalond mu mutapu uwamp ni wa chirungul, yom tukulonda yikutwish kuyikasikesh antu akwau.

¹⁶ Paul wayinkisha akadivar ni anambaz nend kashinsh anch Yehova wading umen yisal yau yiwamp. (Heb. 10:32-34) Niyetu tukutwish kusal mwamu chisu tumukwashina mbay netu mwin Kristu uziyina mu ritiy. Tukutwish kumwipul mutapu washikenay kujingunin uyakin, ap kumukasikesh kutongijokin pa yisu yamanay ukwash wa Yehova. Tukutwish kusadin chisu mud chinech mulong wa kumwinkish kashinsh anch Yehova kavuramedinap yisal yend ya rukat yamumekeshinay pasak, ni anch kakumudjibulap mu machuku ma kurutu. (Heb. 6:10; 13:6) Mambamb mud minam makutwish kulangwish impu mudiay mbay netu mukatish ya kudandamen ni mudimu Wend.

DANDAMENANY “[KUKASIKESHIJAN] MU RITIY MUNTU NI MUKWAU.”

17. Ukaliweny ik tukutwisha kudandamen kukudish?

¹⁷ Mud mutapu mwin kusal mudimu wa kutung mukatay kuwapish ukaliweny wend mu kusut kwa chisu, niyetu tukutwish kukudish ukaliweny wa kutungijan ap kukasikeshijan umwing ni mukwau. Tukutwish kuyikwash akwetu kwikal ni usu wa kujijamen yikokujol kusutin kwisamb nau yilakej ya antu ajijamana pasak. Tukutwish kukasikesh chisambu kusutin kujimbul mikadil yiwamp tumena kud antu akwau, kulam chisambu anch kwikal milong yikimbina kuchipwish, ni kusal usu wa kuchichirish anch kwikal kupwitamijan. Ni tukutwish kudandamen kukasikesh ritiy ra akadivar ni anambaz netu kusutin kwisamb nau uyakin wa usey udia mu Bibil, kuyikwash ku mujimbu, ni kumukwash muntu mwawonsu ukutwisha kuziy mu ritiy.

18. Mupak ik wakwata kal?

¹⁸ Antu akata kwipan mu mudimu wa kutung yikumbu ya Want akat kwov musangar nakash. Tukutwish niyetu kwov musangar nakash anch twipan mu kukwash mudimu wa kutung wa mu spiritu mu chikumangen, charumburik anch kuyikasikesh ambay netu mu ritiy. Chinyim ni kutung yikumbu yikutwisha kuya kuyip pakemp pakemp, yibudikin ya mudimu wetu yikutwish kushal chikupu! Chawiy, tukwatany amboku mupak wa kudandamen “[kukasikeshijan] mu ritiy muntu ni mukwau.”​—1 Tes. 5:11.