Tukutwish Kushakam Chikupu

1. Kutongijokin pa kushilamu kwa Yehova piur pa mwom wa chikupu kukutwish kwikal mutapu ik ni yibachikin pad etu?

YEHOVA wayishidinamu kal anch antu awonsu amuziyidina, akwikal ni “mwom wa chikupu.” (Rom 6:23) Anch twatongijokin piur pa yom yitwinkishinay Yehova,rukat retu mulong wendendiy rikujimb nakash. Tong bil: Tatukwetu wa mwiur utukatin kamu nakash mu chilik cha kwel anch tukezap kwaurik nend ap pakemp.

2. Mutapu ik ukata kushilamu kwa mwom wa chikupu kutukwash mu mwom wetu?

² Kushilamu kwa Nzamb piur pa mwom wa chikupu kukat kutukwash kujijamen yikokujol yetu ya katat. Ap anch akankuny netu atulej anch akimbin kutujip, tukwimikap kumusadin Yehova. Mulong wak? Chakusambish, mulong twij anch ang twafa ashinshamena kudiay Yehova, ukutuvumbul ni tukushakam chikupu pakad wom wa kufa dichuku dimwing. (Yoh. 5:28, 29; 1 Kor. 15:55-58; Heb. 2:15) Mulong wak tukutwisha kwikal nich kashinsh anch chitwishikin kud etu kushakam chikupu? Tushinshikinany amboku mayingishin malondwilaku am.

YEHOVA UDINGAKU CHIKUPU

3. Mulong wak tukutwish kwikal nich kashinsh anch Yehova ukutwish kutwinkish mwom wa chikupu? (Kuseng 102:12, 24, 27)

³ Twij anch Yehova ukutwish kutwinkish mwom wa chikup mulong ud Musul wa mwom, ni udingaku chikupu. (Kus. 36:9) Tumananyaku kwetu ma verse mamwing matwinkishina kashinsh anch Yehova udingaku ni ukudandamen kwikalaku chikupu. Kuseng 90:2 ulondin anch Yehova udingaku “chikupu ni chikupu.” Kuseng 102 upanin niyend chitongijok cha mutapu winou. (Tang Kuseng 102:12, 24, 27.) Muprofet Abakuk niyend wafunda piur pa Tatukwetu wa mwiur anch: “Ov, udiap wa machuku ma pasak, A Yehova? A Nzamb wam, Utumbila, ukufangap bwat.”​—Aba. 1:12, NWT.

4. Ov, tufanyidin kwiyakamish anch chitukasikedin kwov kurumburik chitongijok cha kulond anch Yehova ud wa chikupu? Rumburil.

⁴ Ov chikukasikedin kwov kurumburik chitongijok cha kulond anch Yehova ud “wa chikupu”? (Isay 40:28) Chid mwamu kud antu avud. Elihu walonda piur pa Nzamb anch: “Kuvul kwa mivu yend kwikil ukutwisha kuyichind.” (Job 36:26) Pakwez anch tuteshinap chom, chirumburikinap anch chidiap chakin. Chilakej, ap anch tukutwishap kwov kurumburik kwa mutapu usadining kasu ka nzembu, ov chinech chirumburikin anch kasu kinak kadingakwap? Bwat kwau, chidiap mwamu! Chilik chimwing chikutwish kutukasiken etu an a antu kwov kurumburik chitongijok cha kulond anch Yehova udingaku ni ukudandamen kwikalaku chikupu. Pakwez chinech chirumburikinap anch Nzamb kadiap wa chikupu. Sakatang wa yom yawonsu kimedinap pa yom tukutwisha ap kukangany kwov kurumburik. (Rom 11:33-36) Ni wadingaku kurutu mangand mikalaku​—kuwejinaku ni yom yikata kulet chimunyik, mud muten ni atutumbu. Tukwet kashinsh anch Yehova “watangila mangand mawonsu ku ukash wend.” Chakin kamu, wadingaku kurutu ‘atanga mangand.’’ (Jer. 51:15; Mid. 17:24) Diyingishin ik dikwau tukweta ditwinkishina kashinsh anch tukutwish kushakam chikupu?

ATUTANGA MULONG WA KUSHAKAM CHIKUPU

5. Ruchingej ik radingau nich ambay a uruw a kusambish?

⁵ Yom yawonsu yikweta mwom yatangay Yehova pa divu yafanyina kufa, kudioshaku antu, mulong wayinkisha ruchingej ra kulik kufa. Pakwez, Yehova wamuleja Adam anch: “Dibuj dia mutond ou wa ronganyin ra kuwap ni kuyip kangal kudidia. Mulong dichuku diukudidia, chakin ukufa.” (Dis. 2:17) Anch Adam ni Ev amuziyina Yehova ing kafanyinap kufa. Chitwishikin kamu kulond anch Yehova wafanyina kuyitiyin pa chisu kanang kudia “mutond wa mwom.” Chinech chirumburikin anch afanyina kwikal ni “mwom wa chikupu.”b​—Dis. 3:22.

6-7. (a) Yom ik yikwau yimekeshina anch antu kayitangap mulong wa kufa? (b) Yom ik utongina kusal mu paradis piswimp ap? (Tal yipich.)

⁶ In siyans amwing atanin anch wong wetu ukwet mutapu wa kulam nsangu jivud nakash kusutamu nsangu tukutwisha kwetu kwilej mu mivu yikemp ya mwom wetu. Mu muvu wa 2010 jurnal umwing walonda anch wong wetu ukutwish kulam nsangu jivud nakash tukutwisha kwilikej ni yom tukutwisha kukwat ku televizion mu asaa amiliyon 3 ni kuyital mu mivu 300. Chinech chirumburikin anch wong wetu ukutwish kulam nsangu jivud jipandakena nakash. Chawiy, chinech chimekeshin anch Yehova watanga wong wetu nich ukaliweny wa kulam yom yivud nakash kusutamu yom tukutwisha kwilej mu mivu 70 ap 80.—Kus. 90:10.

⁷ Yehova watutanga kand ni maswir makash ma kudandamen kwikal aom. Bibil ulondin anch Nzamb ‘wateka mu michim yetu maswir ma kushakam chikupu.’ (Mul. 3:11) Chawiy chisadina anch tumana rufu mud mukankuny netu. (1 Kor. 15:26) Anch twayel nakash ov, tukutwish kwetu kushakam mwamu pakad kusal chom ni kuchingel rufu? Bwat kamu. Pakad kulab tuyiling kwa mwingang ap kand kuna mwon mulong wa kwiyokish. Chikwau kand tukat kusalang yawonsu yitwishikina mulong wa kulik kufa. Ni anch mukatish netu wafa, ikal nsand ap ipal, tukat kwovang kusansan ni runeng mu chisu chilemp. (Yoh. 11:32, 33) Chakin kamu, tukutwish kudandamen kwilej chikupu ni tukwet maswir makash ma kushakam chikupu mulong sakatang wetu watutanga ni maswir minam. Chimeken kamu patok anch ukatin anch tushakam chikupu. Pakwez kud kand mayingishin makwau mamekeshina anch tukutwish kushakam chikupu. El tushinshikinany amboku yom yimwing yasalay Yehova pasak ni ya katat yimekeshina anch Yehova kaswimpinap chitongijok chend cha kusambish.

CHITONGIJOK CHA YEHOVA CHISWIMPINAP

8. Kukwatijan ni chitongijok cha Yehova piur petwetu, kashinsh ik katwinkishinay Isay 55:11?

⁸ Ap anch Adam ni Ev asala chitil chaletisha rufu kud anau, Yehova kaswimpap chitongijok chend chakusambish. (Tang Isay 55:11.) Chitongijok chend chidandamedin kwikal cha kuyinkish antu ashinshamena mwom wa chikupu. Tukutwish kwikal nich kashinsh kinak anch twatongijokin pa yom yalonday ni yasalay Yehova mulong wa kuwanyish chitongijok chend.

9. Yom ik yashilayamu kal Nzamb? (Daniel 12:2, 13)

⁹ Yehova washilamu anch ukuyivumbul afu ni kuyinkish mutapu wa kwikal ni mwom wa chikupu. (Mid. 24:15; Tit. 1:1, 2) Ikundj ushinshamena Job wading nich kashinsh anch Yehova ukwet impu ya kuyivumbul antu afila kal. (Job 14:14, 15) Muprofet Daniel wading wij anch antu akez kayivumbul mulong wa kwikal ni dilau dia kushakam chikupu. (Kus. 37:29; tang Daniel 12:2, 13.) In Yuda a pa chirung cha Yesu ading niyau ij anch Yehova ukuyinkish atushalapol end ashinshamena “mwom wa chikupu.” (Luka 10:25; 18:18) Yesu wachirokina pa kushilamu kwinoku tupamp tuvud, ni ndiy amwinend amuvumbula kud Tatukwend.​—Mat. 19:29; 22:31, 32; Luka 18:30; Yoh. 11:25.

10. Kuvumbuk kwa antu a pasak kutwinkishin kashinsh ik? (Tal chipich.)

¹⁰ Yehova ndiy Sakatang wetu ni ukwet usu wa kuyichirishin antu mwom. Wamwinkisha muprofet Elija usu wa kumuvumbul mwan ikundj wa mwadiamufu wa ku Sarepita. (1 Ant 17:21-23) Kupwa, Nzamb wamukwasha kand Elija kumuvumbul mwan ikundj wa mband mwin Sunem. (2 Ant 4:18-20, 34-37) Kuvumbuk kwinoku ni kwa antu akwau kuletin kashinsh anch Yehova ukwet dikand dia kuyichirishin antu mwom. Padingay pa divu, Yesu wamekesha anch Tatukwend wamwinkisha usu winou. (Yoh. 11:23-25, 43, 44) Nlel Yesu ud mwiur ni amwinkishin kal “ulabu wawonsu wa mwiur ni wa pansh.” Chawiy ukutwish kuwanyish yom yashilayamu anch “afu awonsu adia mwi nzay [ya chivurikish]” akuchirik ku mwom nich ruchingej ra kushakam chikupu.​—Mat. 28:18; Yoh. 5:25-29.

11. Mutapu ik difut ditwinkishina dilau dia kutambul mwom wa chikupu?

¹¹ Mulong wak Yehova witiya anch Mwanend mukatish amana mar ni kufa rufu risansena mwamu? Yesu walejana diyingishin, walonda anch: “mulong Nzamb wakata ngand nakash, ndiy wamupana Mwanend kapokal chakwel muntu mwawonsu ukumwitiyija ndiy kakujiyap, pakwez ukez kikal nich mwom wa chikupu.” (Yoh. 3:16) Kusutin kumupan Mwanend mud difut mulong wa kutukol ku yitil yetu, Nzamb wasala anch twikal ni dilau dia kutambul mwom wa chikupu. (Mat. 20:28) Kambuy Paul warumburila piur pa chikunku chinech cha usey cha chitongijok cha Nzamb pafunday anch: “Mudi murashika rufu mu mangand mulong wa muntu umwing, chawiy kand chimwing, kuvumbuk kwa afu kwikal kand aom kwashik kal mulong wa muntu umwing. Mudi mukat kufau antu awonsu mulong adiokala kudi Adam, chawiy kand chimwing, in Kristu awonsu akez kuvumbuk kwikal kand aom mulong wa Kristu”​—1 Kor. 15:21, 22.

12. Mutapu ik ukukwasha Want wa Nzamb kuwanyish rusot ya Yehova mulong wetwetu?

¹² Yesu wayifundisha in kwilejend kulembil chakwel Want wa Nzamb weza ni chakwel rusot ra Nzamb risadika pa divu. (Mat. 6:9, 10) Chikunku cha rusot ra Nzamb mulong wa antu chid anch antu ashakama chikupu pa divu. Mulong wa kusal mwamu, Yehova wamutondin kal Mwanend kwikal Mwant wa Want wend. Nzamb ukat kukumangej antu 144 000 pa divu dia kabuj, chakwel asal pamwing ni Yesu mulong wa kuwanyish rusot ra Nzamb.​—Kuj. 5:9, 10.

13. Yom ik yisadinay Yehova nlel, ni yom ik ufanyidina niyey kusal?

¹³ Nlel Yehova ukat kukumangej pamwing “chisak chipandikena kujimb” cha antu ni kuyifumb mulong wa kushakam mwinshin mwa winyikel wa Want wend. (Kuj. 7:9, 10; Jak. 2:8) Ap anch ashich nlel mu mangand maurokina mulong wa rukis ni njit, antu asadina chisak chinech akat kwikasikesh kupandakan rukis pa milong ya wan a ngand, ya muchid, ni ya kukisijan amwing ni akwau. Akat kumekesh kusutin yisal yau anch akat kuchil jimpak jau ja misamun kwikal jinkasu. (Mike 4:3) Pandond pa kwiyandjik mu milong ya njit jikata kushesh antu, akat kuyikwash antu kutan “mwom udia wakin” kusutin kuyifundish piur pa Nzamb udia wakin ni piur pa yitongijok yend. (1 Tim. 6:19) Akutwish kuburen nfalang ap kuyipompat kud antu a mu dijuku mulong akwashin yisakin ya Want wa Nzamb, pakwez Yehova ukat kushinshikin anch ikala ni yom yiswirikedinau. (Mat. 6:25, 30-33; Luka 18:29, 30) Yom yiney yawonsu yitwinkishin kashinsh anch Want wa Nzamb udiaku chakin kamu ni anch ukudandamen kuwanyish rusot ra Yehova.

MWOM USANGARESHINA NAKASH UD KURUTU OKU

14-15. Mutapu ik ukeza kuwanyin kushilamu kwa Yehova kwa kudiosh rufu chikupu?

¹⁴ Yesu ud katat mwant wa Want wa Nzamb mwiur, ni ukuwanyish yom yawonsu yashilayamu Yehova. (2 Kor. 1:20) Yesu uyiyikedil akankuny nend kudiosh muvu wa 1914. (Kus. 110:1, 2) Ndiy ni antu akuyikela nend pamwing akuyishesh piswimp ap antu ayimp.​—Kuj. 6:2.

¹⁵ Mu mivu kanan ya winyikel wend, Yesu ukuyivumbul afu ni kusal anch antu awonsu akumuziyina Yehova ikal awanyidina. Kupwa kwa kupak kwa nsudien, muntu mwawonsu ukumekana ku mes ma Yehova anch utentamin “ukez kaswan ngand, ukez kashakamamu chikupu.” (Kus. 37:10, 11, 29) Chom chisangareshina chid anch, “Mukankuny wa kwisudiel ukez kusheshay udi rufu.”​—1 Kor. 15:26.

16. Diyingishin ik diakusambish difanyidina kutubachik kumusadin Yehova?

¹⁶ Mud mutapu twamana kal, ruchingej retu ra kushakam chikupu rimedin pa Dizu dia Nzamb. Ruchingej riner rikutwish kutukwash kushal ashinshamena mu chirung chinech cha nsudiel turishina ni yikokujol yikash. Pakwez mulong wa kumusangaresh Yehova, yibachikin yetu yifanyidinap kwimen kwau kusu pa ruchingej ra kutambul mwom wa chikupu. Diyingishin dietu dia kushal ashinshamena kud Yehova ni Yesu did anch tuyikatin nakash. (2 Kor. 5:14, 15) Rukat riner rawiy rikata kutubachik kumwimburij Yehova ni Yesu ni kulejan nich ruchingej tukweta kud antu akwau. (Rom 10:13-15) Anch twilej kwikal antu itudishina ni in kupan, tukwikal arund nend a Yehova chikupu.​—Heb. 13:16.

17. Chisend ik tukweta etu awonsu? (Mateu 7:13, 14)

¹⁷ Ov tukwikal pakach pa antu akushakama chikupu? Yehova watufungwidin kal chis cha kwikal ni dilau dined. Chid chad kud etu kutond kudandamen kwendin mwi njil yitwadina ku mwom wa chikupu. (Tang Mateu 7:13, 14.) Mutapu ik ukwikala mwom chisu tukushakama chikupu? Tukwakul ku chipul chinech mu mutu wa mulong wambakedinap.