Ukutwish Kwikal ni Chisambu mu Yirung Yikash

1. “Chisambu cha Nzamb” chom ik, ni mutapu ik tukata kutaninamu mu kuchikal nich? (Filip 4:6, 7)

KUD chisambu chakadau antu mu mangand minam kwijik. Chid “chisambu cha Nzamb,” yovil yikata kusal anch twiyov pee ku muchim kusutin kwikal mu urund wa piswimp ni Tatukwetu wa mwiur. Anch tukwet chisambu cha Nzamb, tukutwish kwiyov anch tud mu diking. (Tang Filip 4:6, 7.) Tukat kusanger urund wa piswimp ni antu amukatina ndiy. Ni tukat kusanger urund wa piswimp ni “Nzamb wa chisambu.” (1 Tes. 5:23) Anch twamwijik, twamuchingejin, ni twamuziyin Tatukwetu,chisambu cha Nzamb chikutwish kupizurish muchim wetu chisu turishina ni yikokujol yikash yitunenganeshina.

2. Mulong wak tukutwisha kwikal ni kashinsh anch chitwishikin kutan chisambu cha Nzamb?

² Ov, chid kamu chiswapela kutan chisambu cha Nzamb chisu turishina ni milong yikash mud mayej makash, yinship yikash, kupwitamijan kwa antu, ap anch atuzengol? Milong yiney yikash yikutwish kutwovish wom nakash. Pakwez Yesu wayiyula in kwilejend anch: “Kangal wovany ushon ni kunenganan nakash. Kangal wovany wom.” (Yoh. 14:27) Cha musangar mulong akadivar nau anambaz akat kulondul chiyul chinech cha Yesu. Nich ukwash wa Yehova, akat kutan chisambu ap chisu chirishinau ni milong yikash.

MUTAPU TUKUTWISHA KWIKAL NI CHISAMBU MU CHIRUNG CHINECH CHIKASH

3. Mutapu ik ukutwisha chipupu kushadish chisambu chetu?

³ Chipupu chikutwish kuswimp yom yivud nakash mu mwom wetu. Tal mutapu wadia ukweta chipupu cha KOVID-19 yibachikin padiau antu avud. Mu yipul yayipwodinau antu amwing, avud pakach pau alondin anch kadingap kutwish kulal tul nawamp pa chirung chinech cha chipupu. Chipupu chakasikeshin kuvulijan kwa yakamish, runeng, kuna mar, kuna yom yileushena,chisum ku yikumbu, ni antu in kupakish kwijip ayinau. Anch kwi ndond ushicha kud chipupu, mutapu ik ukutwisha kulik kwiyakamish nakash ni kwikal ni chisambu cha Nzamb?

4. Mulong wak kwijik uprofet wa Yesu piur pa machuku ma nsudiel kukat kutuletin chisambu?

⁴ Yesu watakela kulejan anch mu machuku ma nsudiel, kukwikal yipupu, ap anch mayej min kusamburok “kwawonsu.” (Luka 21:11) Kwijik yom yiney kukutwish kutuletin chisambu mutapu ik? Tukatap kukashimuk anch twaman kwashiken yipupu. Tukat kujingunin anch yom yiney yisadikin kamu mud mwalonday Yesu. Chawiy tukwet mayingishin ma kulondul chiyul chapanay Yesu kud antu akushakama mu machuku ma nsudiel chilondina anch: “kangal wakamany.”​—Mat. 24:6.

5. (a) Kukwatijan ni Filip 4:8, 9, yom ik tufanyidina kwit mu malembil anch kwashiken chipupu? (b) Mutapu ik ukutwisha kutaninamu mu kutesh Bibil wakwatinau kal?

⁵ Chipupu chikutwish kusal anch twiyakamisha ni kwov wom. Yawiy yom yamushikena nambaz Desi.b Kupwa kwa kufish tatukwend mwanikanch, mwan wakusambish wa tatukwend mukurump, ni dokter ku chipupu cha KOVID-19, wova wom anch chipupu chinech chikutwish kumukwat niyend ni kumusamburishinach makwend wading wananapina kal. Wova kand wom anch ukutwish kushadish mudimu wend mulong wa chipupu, chawiy wiyipula mutapu wafanyinay kuland yakudia ni kufutin chikumbu. Wova wom nakash mu chilik cha kukangany kulal uchuku. Pakwez Desi watanirila kand chisambu. Mutapu ik? Walembilang pakampwil chakwel Yehova amukwash kulik kuzazat ni kwikal ni yitongijok yiwamp. (Tang Filip 4:8, 9.) Wamutesha Yehova ukat “kulond” nend kusutin kutesh Bibil wakwatinau kal. Ulondin anch, “Mazu madutina ma in kutang makepisha yakamish yam ni kwinvurish anch Yehova ukat kwimbangin.”​—Kus. 94:19.

6. Mutapu ik ukutwisha dilejan diey dia pakampwil ni yikumangan kukukwash?

⁶ Chipupu chikutwish kutukangesh kusal yom yimwing yitwasalang pasak, pakwez kangal walikidil chakwel chikukangesh kusal dilejan diey dia pakampwil ni kuya ku yikumangan. Nsangu jakin ja yom yayishikena antu jidia mu mikand yetu ni mavideo yikukuvurish anch akadivar nau anambaz ney ashala ashinshamena chikalap nchik yikokujol mud yiney yarishau nich. (1 Pita 5:9) Yikumangan yikukukwash kutongijokin pa yom yikasikeshina yidia mu Bibil. Yikukwinkish kand mitapu yivud ya kuyikasikesh antu akwau pamwing ni kukukasikesh kand niyey amwiney. (Rom 1:11, 12) Anch watongijokin mutapu Yehova wayikwashay in kumwifukwil end chisu chadingau ayej, ovil wom, ni iyovil anch ad kwau ayinau, ritiy rey rikukasikan ni ukwikal ni kashinsh anch ukukukwash niyey.

7. Yom ik ukutwisha kwilejin ku chilakej cha kambuy Yohan?

⁷ Sal usu wa kwambambang ni akadivar nau anambaz ney. Chipupu chikutwish kusal anch tulama chintamp kanang ap anch tud ni ambay netu in Kristu. Mu chisu mud chinech, ukutwish kwiyov mud mwiyovay kambuy Yohan. Wading ukatin kumanijan ni murund nend Gayus mes ni mes. (3 Yoh. 13, 14) Pakwez, Yohan wading wij anch pa chisu chinacha kakutwishap kumanijan ni Gayus. Chawiy Yohan wasala yom yading yitwishinay kusal; wamufundina Gayus mukand. Anch chitwishikinap kuyendin akadivar nau anambaz ney, pakish kuyitazuk ku telefon, apel video, ap kuyitumin mesaj. Anch witekin chisu cha kwambambang nau ambay ney in Kristu, ukutwish kwiyov anch ud mu diking ni mu chisambu. Sal usu wa kwambamb nau amakurump anch wiyakamishin nakash, ni itiy ukwash wau wa rukat.​—Isay 32:1, 2.

MUTAPU UKUTWISHA KUTAN CHISAMBU ANCH WARISH NI YINSHIP YIKASH

8. Mutapu ik ukutwisha yishiken yikash kushadish chisambu chey?

⁸ Anch warish ni yishiken yikash yidiokila ku kwizul kwa mem, kuzal kwa divu, ap kasu kakash ukutwish kunenganan nakash mu chisu chilemp. Anch wafish antu ukatina ap anch yom yey yasheshik, ukutwish kwov kusansan nakash ku muchim, kwiyov anch ukwetap kwey ruchingej, ap kujiman nakash. Chinech chirumburikinap anch ukatin yom ya kumujimbu nakash, ap anch ukwet ritiy rikemp. Chid kamu chirung chikash, ni antu amwing akutwish kuchingejin anch ukutwishap kand kusal yom yiwamp. (Job 1:11) Pakwez chikalap nchik yishiken yiyimp, ukutwish kutan chisambu. Mutapu ik?

9. Yom ik yalonday Yesu mulong wa kutubabesh piur pa yinship yikash yikutwisha kutushiken?

⁹ Vurik mazu ma uprofet wa Yesu. Antu amwing akat kutong anch yishiken yikash yikutwishap kuyishiken awiy. Pakwez etu twij anch kukwikal yinship yikash mu chirung chetu chinech, ni yimwing yikutwish kutushiken. Yesu wayileja in kwilejend anch kukez kikal “kunyikek kwa ngand kuyimp” ni yinship yikwau yikash yikwikalaku kurutu disudiel dieza. (Luka 21:11) Wasambela kand kulond anch “Kuyip kukez kuvulijan,” yom tumena kamu nlel unou. Chilakej, tumen kuvulijan kwa chisum ni kwa yisal ya kujipan. (Mat. 24:12) Yesu kalondap anch yom yiney yikuyishiken kwau ching kusu antu alikinau kal kud Yehova. Pakwez yom yiney yikat kuyishiken kand ap atushalapol ashinshamena a Yehova. (Isay 57:1; 2 Kor. 11:25) Yehova kakutwishap kusal yilay mulong wa kutuchidij ku yinship yawonsu yikash, pakwez ukutwish kutwinkish yawonsu tuswirikedina mulong wa kulam chisambu.

10. Mulong wak kwirijek katat piur pa yinship yikash yikutwisha kushiken kumekeshin anch tukwet ritiy? (Jinswir 22:3)

¹⁰ Anch twirijek kurutu kwa chisu, chikutwish kutukwash kulik kuzazat anch kwashiken yinship yitwitina kusal yom swa swa. Pakwez, ov, kwirijek kurutu kwa chisu kumekeshin anch tumuchingejidinap Yehova? Bwat kwau. Pakwez kwirijek mulong wa yinship yikash yikutwisha kushiken kumekeshin anch tukwet kashinsh anch ukutubangin. Mutapu ik? Dizu dia Nzamb dikat kutukasikesh kwirijek kurutu kwa yinship yikash kushiken. (Tang Jinswir 22:3.) Ni kusutin mitu ya milong ya magazet, yikumangan, ni yijikish, dirijek dia Nzamb dikat kutukasikesh chisu ni chisu mulong wa kwirijek kurutu kwa yinship yikash yitwitina kusal yom swa swa kushiken.c Ov, tumuchingejidin kamu Yehova? Anch mwawiy, tufanyidin kulondul chiyul chinech kusambish katat​—kurutu yinship yikash yitushiken.

11. Yom ik wilejidina ku chilakej cha Margaret?

¹¹ Shinshikin yom yamushikena nambaz Margaret. Amakurump a ngand amuleja kudiokal ku chikumbu chend mulong kwindond kwading kushichay kwafanyina kulank kasu kakash. Mulong antu avud asala usu wa kuchin kapamp kamwing, ma motak majika mu jinjil ni chayikasikena antu kusut. Mwi njil mwizula mish ni chamukasikena Margaret kubudik mu motak. Pakwez, wapanda mulong wading wirijekin kal kurutu kwa chisu. Wading walamin kal kart wafanyina kumukwash kutan njil yikwau ya kuchinin. Wading kand wasambedin kal kusut mwi njil yinaya mulong wa kuyonganyin nawamp, chakwel chimuswapel kuyilamu chisu chafanyina kulank kasu. Margaret wapanda ku chinship chinech chikash mulong wading wirijekin kal kurutu kwa chisu.

12. Mulong wak tufanyidina kulondul umutakel utwinkishinau mulong wa kutuchidij?

¹² Mulong wa kutulam ni kutuchidij, antakel akutwish kutwit chakwel tuziyina kwi mbil ja kudiokal ap kulik kudiokal ku chikumbu mu chisu kanang chitekinau, ap kand kulondul umutakel ukwau. Antu amwing chiyikasikedining kuziyin kwi mbil kapamp kamwing mulong kakatiningap kusha yom yau. Mutapu ik ufanyidinau in Kristu kusal? Bibil utulejin anch: “Ziyilany kudi in kutakel awonsu a antu, mulong wa kumwambat Nsalejetu. Ziyilany kudi mwant mujim wa ngand, ni kudi anyikel atuminay.” (1 Pita 2:13, 14) Dirijek dia Nzamb nidiawiy ditwinkin umutakel tufanyidina kulondul mulong wa kutuking. Atukasikeshining chisu chawonsu kuyilej amakurump ma nimero metu ap nsangu kanang piur petu chakwel atwish kutukimb anch kwashiken milong yitina kutambul ukwash wa mau mau. Ov, mwawiy wasadina kal? Tukutwish kand kutambul umutakel piur pa ndond tufanyidina kuchinin, chisu cha kuchin, ni mutapu wakutambul ukwash ap wa kuyikwash antu akwau, ni chisu tufanyidina kusal mwamu. Anch twalik kuziyin, tukutwish kutek mwom wetu ni mwom wa amakurump mu ubaj. Vurik anch amakundj inay ashinshamena akat kuker mulong wetwetu. (Heb. 13:17) Margaret ulondin anch, “Nitiyija kamu anch kulondul umutakel wa amakurump ni wa dirijek kwapandisha mwom wam.”

13. Yom ik yayiletina in Kristu avud ashemunika chisambu ni musangar?

¹³ Akadivar nau anambaz avud achina mulong wa yinship yikash ap mulong wa kupwitamijan kwa antu, asala usu wa kwijidin mashakamin masu ni kusal yivud mu mudimu wa Yehova. Chilik chimwing ni in Kristu a mu mivu chitot ya kusambish apalangeshau mulong wa rupompat, adandamena “kurumburil mazu ma nzamb.” (Mid. 8:4) Kulejan kwayikwasha kushinshikin pa yisakin ya Want chikalap nchik yikokujol yarishau nich. Mud chibudikin, alama chisambu ni musangar wau.

MUTAPU UKUTWISHA KUTAN CHISAMBU ANCH AKUZENGOL

14. Mutapu ik tukutwisha kushadish chisambu anch atuzengol?

¹⁴ Anch atuzengol tukutwish kushadish yom yivud yikata kutukwash kwikal ni chisambu. Twoviling musangar nakash anch twatanijan pamwing nau ambay netu, twasal mudimu wakulejan wa patok, ni anch twasal yom tukweting chaku cha kusal dichuku diawonsu pakad wom wa kutukas. Anch atukangesh kusal yom yiney yawonsu, tukutwish kwiyakamish ni kwiyipul piur pa yom yikusadika kand. Chiyipinap kwau kwiyov mwamu. Pakwez tufanyidin kubabal. Yesu walonda anch rupompat rikutwish kuyishikij in kwilejend kukushadish ritiy. (Yoh. 16:1, 2) Chawiy mutapu ik tukutwisha kulam chisambu anch atuzengol?

15. Mulong wak tufanyidinap kwov wom wa kutuzengol? (Yohan 15:20; 16:33)

¹⁵ Dizu dia Nzamb ditulejin anch: “antu awonsu asotila kwikal nich mwom utumbila mu Kristu Yesu akez kuyizengol.” (2 Tim. 3:12) Mukadivar utazukinau anch Andrei chamukasikena kwitiy uyakin winou kupwa kwa kukangesh mudimu wa kulejan mwi ngand yau. Watonga anch: ‘Kud atuman avud nakash. Mutapu ik ukutwishau antakel a ngand kutukas etu awonsu?’ Pakwez pa ndond pa kwikal ni chisambu, yitongijok yiney yamwakamisha nakash. Akadivar akwau amuchingejina Yehova ni kadingap katongina anch kakutwishap kuyikas bwat. Ading ij anch akuyikas kamu, pakwez kiyakamishap nakash mud Andrei. Chawiy Andrei wakwata mupak wa kuyimburij ni wamuchingejina Nzamb. Pakad kulab, chisambu chend chachirika, ni ukwet katat musangar ap anch uchidandamedin kurish ni milong yikwau yivud. Niyetu yom mud yiney yikutwish kutushiken. Patulejay Yesu anch akutuzengol, watwinkisha kand kashinsh anch tukutwish kushal ashinshamena.​—Tang Yohan 15:20; 16:33.

16. Umutakel ik tufanyidina kuziyin chisu chituzengodinau?

¹⁶ Anch mudimu wetu awimik ap aukangesh, tukutwish kutambul umutakel udiokila ku mutiy ap kud amakurump. Chikutwish kwikal mwamu mulong wa kutuking, kwikal ni kashinsh anch tudandamedin kutambul yakudia ya mu spiritu, ni mulong wa kutukwash kulejan anch chitwishikin. Sal usu wa kuziyin ku umutakel utambwila, ap anch uteshinap kurumburik kwa umutakel winou. (Jak. 3:17) Chikwau kand, kangal kulejan nsangu ja ujindj ja akadivar nau anambaz ap ja mijikit ya chikumangen kud antu akad kuwanyin kulej.​—Mul. 3:7.

17. Mud atwimbuy a mu mivu chitot ya kusambish, mupak ik tufanyidina kukwat?

¹⁷ Diyingishin dia kusambish dimubachikina Satan kuyirishikish atushalapol a Nzamb did anch akat ‘kulejan uman piur pa Kristu.’ (Kuj. 12:17) Kangal walikidil chakwel Satan ni mangand mend akwovish wom. Kulejan ni kufundish chikalap nchik rupompat kukat kutuletin chisambu ni musangar. Chisu chayikangeshau atwimbuy kulejan kud antakel in Yuda mu mivu chitot ya kusambish, amakundj inay ashinshamena atonda kumuziyin Nzamb. Adandamena kulejan, ni mudimu winou wayiletina musangar nakash. (Mid. 5:27-29, 41, 42) Chakin kamu, anch mudimu wetu aukangesh, chitwitin kubabal chisu tulejena. (Mat. 10:16) Pakwez anch twasal usu wetu wawonsu, tukwikal ni chisambu chidiokila ku kumusangaresh Yehova ni ku kulejan uruu wa dipandish.

“NZAMB UKATA KUTWINKISH CHISAMBU UKWIKAL NI YENEN”

18. Kwisu tukutwisha kutan chisambu chakin?

¹⁸ Ikal ni kashinsh anch ap anch yirung yikash yatushiken, tukutwish kwikal ni chisambu. Mu yirung mud yiney, tufanyidin kuvurik anch chisambu tuswirikedina chid chisambu chidiokila kud Nzamb, chisambu chipaniningay ching kusu Yehova. Muchingejina ndiy chisu urishina ni mayej makash, yinship yikash, ap kuzengol. Shal piswimp ni dirijek diend. Shinshikin mes mey pa yiyukish yipandakena kuwamp yikuchingedina kurutu oku. Anch wasal mwamu, “Nzamb ukata kutwinkish chisambu ukwikal ni [yey].” (Fil. 4:9) Mutu wa mulong wambakedinap ou ukwisambin mutapu tukutwisha kuyikwash ambay netu in Kristu amena mar kwikal ni chisambu cha Nzamb.