1 | Malembil—“Letany Yakamish Yen Yawonsu Kudi Ndiy”

BIBIL ULONDIN ANCH: “Letany yakamish yen yawonsu kudi [Nzamb], mulong ukat kukulamany.”—1 PITA 5:7.

Chirumburikina Mazu Minam

Yehova Nzamb utwitin kumulej chom chin chawonsu turishina nich mu manangu ap chitwakamishina. (Kuseng 55:22) Tukutwish kumulembil piur pa mulong win wawonsu wikala ujim ap ukemp. Anch mulong ud wa usey kud etu ud kand wa usey kud Yehova ni chid mwamu mulong Yehova ukat kutubangin ni ukat kwiyov mutapu twiyoviling. Kumulembil ndiy rid rizau ra usey rikutuletina chisambu cha mu manangu.—Filip 4:6, 7.

Mutapu Ukutwisha Malembil Kutukwash

Anch turishin ni ukash wa mu manangu, tukutwish kamu kwiyov anch tud kwetu ayinetu. Antu akwau kakwitwishap kamu kwiyov mutapu twiyovila. (Jinswir 14:10) Pakwez anch twamulej kamu Nzamb patok mutapu twiyovila kusutil malembil ukututesh kamu nawamp. Yehova utubangidin, wij nawamp mar turishina nich ni utwitin chakwel tumulembila piur pa chom chin chawonsu turishina nich.—2 Jinsangu 6:29, 30.

Kumulej Yehova mu malembil milong yetu kukat kukasikesh ruchingej retu anch ukat kutubangin. Tukutwish kwiyov mud mwiyovilay nfund a kusend walembila anch: “Mulong ey wamana kal mar mam, ey wij kand yakamish ya muchim wam.” (Kuseng 31:8) Kwijik anch Yehova umen patok milong turishina nich, kukutwish kwatukwash tujijaman mu yisu yikash. Pakwez, ukat kusal yom yivud kusutamu kwau kuman milong yetu. Wij nawamp milong turishina nich ni ukat kutwongoj ni kutukasikesh kusutil dizu diend Bibil kusutamu muntu mwin mwawonsu.

Mutapu Ukwashinay Bibil Julian

Mutapu Ukweta Yovil Yiyimp Usu Pad Am

“Nirishin ni yakamish ni yitongijok yiyimp yimeshikishina mar nakash. Yakamish yikat kwimesh mar pa chisu chakad kuchingejin. Pa chisu kanang niyova nawamp pakwez chisu chikwau yakamish yampandikena nakash. Pa yisu yimwing kand niyovang nayimp anch nid ni antu akwau. Nading kutong mutapu wading wimenau.

“Arund nam ading ija nawamp yakamish yam asala usu mulong wa kwinkwash. Yisu yimwing yom yalondau yadingap ya ukwash. Pakwez, nisanger mulong asala usu wau mulong wa kwinkwash.

“Pa yisu yimwing yakamish ni yitongijok yam yiyimp yikat kwikangesh kulembil. Chingitin kusal usu nakash mulong wa kutek manangu mam ndond yimwing chakwel nitwisha kumulembil Yehova. Nikat kutong yom yivud kapamp kamwing ni chinech chikat kwinrumbangaresh mu manangu. Anch nitwishinap kushinshikin pa yitongijok yam, chikat kwinkasiken kumulej Yehova mu malembil yitongijok ni yovil yam.”

Mutapu Winkwashinay Bibil

“Nilejin mu Bibil anch chakwel anch Nzamb atesha, malembil mitinap kwau ching mikala malemp ap makurikina nakash. Yisu yimwing anch nitwishinap kumulej Nzamb mutapu niyovila nikat kumulembil anch: ‘Nkwashaku amboku Yehova.’ Ap mwamu niyoviling anch Yehova ukat kutesh malembil mam ni ukat kuwanyish maswir mam pa chisu chinicha. Kupwa kwa malembil, nikat kwiyokish. Nisanger kamu nakash mulong yom yiney yaad yikat kwinkwash niyova nawamp chikalap nchik mashakamin mam. Ap anch chikat kwingit kusal usu nakash mulong wa kumwit Tatukwam udia mwiur ukwash, nikat kumulembil mulong nikwet kashinsh anch winkatin ni ukatin kwinkwash.”