MUTU WA MULONG WA KWILEJ WA 36
Send Yiufanyidina Kusend, Yikwau Yidjibula
“Chifanyidin etu kudjibul yom yawonsu yitukangeshina . . . , mwamu tukutwish kuya mau kurutu mwi njil yatutenchikidinau kal.”—HEB. 12:1.
MUMINY 33 Tek Chisend Chey Kudi Yehova
YIDIA MU MUTU WA MULONG WINOUa
1. Kukwatijan ni Hebereu 12:1, yom ik tufanyidina kusal mulong wa kubambil djat ni kwinsudiel mu kubambil kwa mwom?
BIBIL ufanakeshin mashakamin metu ma win Kristu ni masengan ma kubambil. In kubambil akubambila djat ni kwinsudien akutambul mwom wa chikupu. (2 Tim. 4:7, 8) Tufanyidin kusal usu wetu win wawonsu mulong wa kudandamen kubambil, pakampwil mulong mufund wansudien ud piswimp nakash. Kambuy Paul, watwisha kubambil djat ni kwinsudien, wisambina yom yikutwisha kutukwash kuwin mu kubambil kwa mwom. Watuleja anch “Chifanyidin . . . kudjibul yom yawonsu yitukangeshina . . . , mwamu tukutwish kuya mau kurutu mwi njil yatutenchikidinau kal.”—Tang Hebereu 12:1.
2. Chirumburikin ik “kudjibul yom yawonsu yitukangeshina”?
2 Pafunday Paul anch tufanyidin “kudjibul yom yawonsu yitukangeshina,” ov, wakimba kulond anch mwin Kristu kakwetap kwend chisend chifanyidinay kusend? Bwat, kiyawiyap yafilay kulond. Pakwez wading ukimbin kulond anch tufanyidin kudjibul dilim din diawonsu diakad usey. Dilim dia mutapu winou dikutwish kutuziyish nakash. Mulong wa kujijaman, tufanyidin kwishinshikin mulong wa kuman anch tusendin dilim dia mutapu winou ni kudidjibul. Pakwez pa chisu chawiy chimwing, tukimbinap kand kutul kuns yisend tufanyidina kusend. Anch chamwamu tukutwishap kudandamen kubambil. (2 Tim. 2:5) Yisend ik tufanyidina kusend?
3. (a) Kukwatijan ni Galatia 6:5, yom ik tufanyidina kusend? (b) Yom ik tukushinshikina mu mutu wa mulong winou, ni mulong wak?
3 Tang Galatia 6:5. Paul wajimbula chisend chimwing tufanyidina kusend. Wafunda anch “chifanyidin muntu ni muntu kusend chisend chend amwinend.” Pinap Paul wading wisambidin chisend tukweta ku mes ma Nzamb, chisend chifanyidinay muntu ni muntu kwisendinap amwinend. Mu mutu wa mulong winou, tukushinshikin chirumburikina ‘chisend chetu’ ni mutapu tukutwisha kuchisend. Tukujingunin kand yisend yakad usey tukutwisha kusend ni mutapu tukutwisha kuyidjibul. Kusend chisend chetu ni kudjibul yakad usey kukutukwash kubambil nawamp mu kubambil kwetu kwa mwom.
YISEND TUFANYIDINA KUSEND
Kusend chisend chetu kurumburikin kushakam kukwatijan ni machip metu ma kwipan twasala kud Yehova, kuwanyish yisend yetu mu dijuku, ni kwitiyin yibudikin ya mipak yetu (Tal paragraf wa 4-9)
4. Mulong wak machip metu ma kwipan kud Yehova kadiap chisend chilimina? (Tal kand chipich.)
4 Machip metu ma kwipan kud Yehova. Patwipana kud Yehova, twachipa kumwifukwil ndiy ni kusal rusot rend. Tufanyidin kulimish machip minam. Kushakam kukwatijan ni machip metu chid chisend chijim, pakwez chidiap chisend chilimina. Mulong Yehova watutanga chakwel tusal rusot rend. (Kuj. 4:11) patutangay watwinkisha maswir ma mu spiritu ni watutanga kand mu chifu chend. Mud chibudikin, tukutwish kumusejin ni kusanger kusal rusot rend. (Kus. 40:9) Chikwau kand, anch twasal rusot ra Nzamb ni twamulondul Mwanend, tukat ‘kwiswedish.’—Mat. 11:28-30.
(See paragraphs 4-5)
5. Yom ik yikutwisha kukukwash kuwanyish machip mey ma kwipan? (1 Yohan 5:3)
5 Mutapu ukutwisha kusend chisend chinech. Kud yom yaad yikutwisha kukukwash. Chakusambish, dandamen kukasikesh rukat rey mulong wa Yehova. Ukutwish kusal mwamu kusutil kutongijokin pa yom yawonsu yiwamp yakusadidinay kal ni pa yiyukish yikukaninay. Anch wamukat Nzamb nakash, chikukuswapel kand kumuziyin. (Tang 1 Yohan 5:3.) Cha kaad, mwimburija Yesu. Watwisha kusal rusot ra Nzamb mulong wamulembilang Yehova ni washinshikinang pa difut diend. (Heb. 5:7; 12:2) Mud Yesu, mulembila Yehova chakwel akwinkish usu ni dandamen kutongijokin pa ruchingej rey ra mwom wa chikupu. Anch wadandamen kukudish rukat rey mulong wa Nzamb ni kumwimburij Mwanend, ukutwish kuwanyish machip mey wasala ma kwipan kud Yehova.
6. Mulong wak tufanyidin kuwanyish yisend ya mu dijuku? (Tal kand chipich.)
6 Yisend tukweta mu dijuku. Mu kubambil kwetu kwa mwom, tufanyidin kumukat Yehova ni Yesu kusutamu mutapu tuyikatina anamakwetu. (Mat. 10:37) Pakwez chinech chirumburikinap anch tufanyidin kudiul yisend yetu ya mu dijuku, mud ukwova anch yitukangeshin kumusangaresh Nzamb ni Kristu. Chinyim ni chinech, pakwel anch Nzamb ni Kristu atwitiy, tufanyidin kuwanyish chisend chetu cha mu dijuku. (1 Tim. 5:4, 8) Anch twasal mwamu, tukwikal ni musangar. Mulong Yehova wij anch majuku makwikal ni musangar anch ikundj ni mband akatijan ni kulimishijan, anch anvaj ayikat anau ni kuyifumb, ni anch an ayiziyin anvajau.—Efes 5:33; 6:1, 4.
(See paragraphs 6-7)
7. Mutapu ik ukutwisha kuwanyish chisend chey mu dijuku?
7 Mutapu ukutwisha kusend chisend chinech. Chikalap nchik chisend ukweta mu dijuku, chingejin mu manangu madiokila mu Bibil pa ndond pa kuchingejin kwau pa yovil yey, yishankur yen, ap antu afila mu kan anch ad in kuyulan awamp. (Jnsw. 24:3, 4) Sadin nawamp mikand yetu yimedina pa Bibil. Mu mikand yiyey mud yiyul ya ukwash piur pa mutapu wa kusadin mbil ja Bibil. Chilakej, pa jw.org pad yom yiwamp nakash yisambidina yikokujol yirishinau nich ambay a uruw, anvaj, ni ansand nlel.b Kwat mupak wa kusadin yom yilondinay Bibil, ap anch antu akwau mu dijuku alikin kwau. Anch wasal mwamu, dijuku diey dikutaninamu ni ukusanger yiyukish ya Yehova.—1 Pita 3:1, 2.
8. Mutapu ik ukutwisha mipak yetu kwikal ni usu pad etu?
8 Chisend cha mipak tukata kukwat. Yehova watwinkishin kal want ipetu, ni usotin anch tusanger yiyukish yidiokila ku mipak yiwamp tukata kukwat. Pakwez kand kakatap kutuchidij ku yibudikin yidiokiling ku mipak yiyimp tukata kukwat. (Gal. 6:7, 8) Chawiy, tukat kwitiyin yibudikin ya mazu metu mayimp, ya yisal yiyimp, ap ya mipak yetu yiyimp. Kom ketu kakutwish kutufish nich kukwatijan ni yom twasalang. Pakwez, kwijik anch tukwet chisend cha mipak tukwatina kukutwish kutubachik kulejan yitil yetu, kuswimp yaku yetu yiyimp, ni kwipuk kuchirikin yaku yiyimp. Kusal mwamu kukutwish kutukwash kudandamen kubambil mulong wa mwom.
(See paragraphs 8-9)
9. Yom ik ukutwisha kusal anch wakwatin mupak uyimp? (Tal kand chipich.)
9 Mutapu ukutwisha kusend chisend chinech. Anch wakwatin mupak uyimp, yom ik ukutwisha kusal? Itiyin anch ukutwishap kuswimp yom yasadikina. Lik kushesh chisu ni usu wey mu kwiyingish nich ap kwifich nich ey amwiney ap antu akwau mulong wa mupak wey uyimp. Pakwez, itiyin kurumbuk kwey ni sal yawonsu utwishina kukwatijan ni mashakamin mey ma katat. Anch wifishin nich mulong wa yom yiyimp wasadina, mulembila Yehova nich kwikepish, itiyin kurumbuk kwey, ni mwita dilikishin. (Kus. 25:11; 51:5, 6) Anch kud antu warumbukidina, yita dilikishin, ni anch chid cha usey kimb ukwash wa amakurump. (Jak. 5:14, 15) Ilejina ku kurumbuk kwey, ni sal usu wa kulik kuchirikinamu. Anch wasal mwamu, ikal nich kashinsh anch Yehova ukukumekeshin ranaken rend ni kukwinkish ukwash uswirikedina.—Kus. 103:8-13.
YISEND TUFANYIDINA “KUDJIBUL”
10. Mulong wak kuchingej yom twakad kwikal ni mutapu wa kusal chid chisend chilimina? (Galatia 6:4)
10 Kuchingej yom twakad kwikal ni mutapu wa kusal. Tukutwish kwitwik ayinetu chisend chilimina anch twasambish kwiyilakej nau antu akwau. (Tang Galatia 6:4.) Anch tukwet chaku cha kwiyilakej nau akwetu, tukukwish kwikal in ris ni kukimb kwikal wa kusambish. (Gal. 5:26) Mu kukimb kusal yom mud musadinau antu akwau, sot chad ukakalijan yom yawakad kwikal nich ukaliweny wa kusal ap yakad kukwatijan ni mashakamin mey. Ni anch “ruchingej ra kulab labe rukat kuyedish muchim,” chad tongin mutapu ukutwisha kuchingej yom yawakad kutwish kusal kukuziyish! (Jnsw. 13:12) Kusal mwamu kukutwish kutuziyish nakash ni kutukangesh kubambil nawamp.—Jnsw. 24:10.
11. Yom ik yikutwisha kukukwash kwipuk kuchingej yom yiwakad kwikal ni mutapu wa kusal?
11 Mutapu ukutwisha kudjibul chisend chinech. Lik kukimb kusal yom yivud nakash kusutamu yikwitinay Yehova. Kakuchingejangap ap pakemp anch umwinkish yom yawakad kwikal nich. (2 Kor. 8:12) Ikal nich kashinsh anch Yehova kakwilikejangap yom usadina ni yisadinau antu akwau. (Mat. 25:20-23) Ukat kusanger mudimu wey umusadidining nich muchim wawonsu, kushinshaman kwey, ni kujijaman kwey. Nich kwikepish itiyin anch mivu yey, ukash wa mujimbu, ni mashakamin ukweta yikutwish kukukangesh kusal yom yimwing. Mud Barizilay, itiyin kutul yisend anch utwishinap kuyiwanyish mulong wa ukash wa mujimbu ap upal. (2 Sam. 19:36, 37) Mud Moses, itiy ukwash ni pan yisend kud antu akwau anch chitin kusal mwamu. (Kub. 18:21, 22) Kwijik mimbu yey kukukukwash kwipuk kuchingej yom yawakad kutwish kusal mulong yikutwish kukuziyish mu kubambil kwa mwom.
12. Ov, yetu tukweta chisend cha mipak yiyimp yikatau antu akwau kukwat? Rumburil.
12 Kwitwik chisend cha mipak yiyimp ya antu akwau. Tukutwishap kuyikwatin antu akwau mipak; ni tukutwishap chisu chawonsu kuyichidij ku yibudikin ya mipak yau yiyimp yikatau kukwat. Chilakej, mwanetu ukutwish kukwat mupak wa kulik kumusadin Yehova. Mupak winou ukutwish kuyinenganesh anvaj nakash. Pakwez anvaj ifishina nich mulong wa mupak uyimp wa mwanau itwikin chisend chilimina nakash. Yehova kayichingejidinap awiy kusend chisend chinech.—Rom 14:12.
13. Yom ik yifanyidinay nvaj kusal anch mwanend wakwat mupak uyimp?
13 Mutapu ukutwisha kudjibul chisend chinech. Vurik anch Yehova watwinkishin kal etu awonsu want ipetu. Umulikin muntu ni muntu atond amwinend anch ukumusadin ap bwat. Yehova wij anch udiap nvaj uwanyidina; usotin kusu anch usal yiukutwisha kusal. Mupak ukwatinay mwaney chidiap chisend chey, chid chisend chend amwinend. (Jnsw. 20:11) Ap mwamu, ukutwish kudandamen kwiyakamish mulong wa kurumbuk kwey mud nvaj. Anch chidi mwamu, muleja Yehova mutapu wiyovila ni mwita dilikishin. Wij anch ukutwishap kuchirik kwinyim mulong wa kuswimp yom wasala. Pa chisu chawiy chimwing, kachingejinap anch umuchidij mwaney ku yibudikin ya mipak yend yiyimp. Lam mu manangu anch ang mwaney wasal usu wa kumuchirikin Yehova, Ndiy ukumwak kand nich musangar.—Luka 15:18-20.
14. Mulong wak kwifish nich kusutina chipim did dilim tufanyidina kudjibul?
14 Kwifish nich kusutina chipim. Anch twasal chitil, chovaken kwifish nich. Pakwez, Yehova kakatinap anch twifisha nich kusut chipim. Did dilim tufanyidina kudjibul. Mutapu ik tukutwisha kwijik anch twifishin nich kusut chipim? Anch twalejen chitil chetu, twakarumukin, ni anch tusadin usu wa kulik kuchirikin yitil yetu, tukutwish kwikal nich kashinsh anch Yehova watulikishidin kal. (Mid. 3:19) Kupwa kwa kusal yom yiney, Yehova kakatinap anch tudandamen kand kwifish nich. Wij anch chikutwish kutusal nayimp anch twadandamen kwifish nich. (Kus. 31:10) Anch twanenganan kusut chipim, tukutwish kulikap kubambil kwa mwom.—2 Kor. 2:7.
Anch wakarumuk chakin kamu, Yehova kakudandamenangap kuvurik yitil yey, chawiy niyey ufanyidinap kudandamen kuyitongin (Tal paragraf wa 15)
15. Yom ik yikutwisha kukukwash kurish ni kwifich nich kusutina chipim? (1 Yoh. 3:19, 20) (Tal kand chipich.)
15 Mutapu ukutwisha kudjibul chisend chinech. Anch wadandamen kwifish nich, shinshikin pa “dilikishin [diakin]” dia Nzamb. (Kus. 130:4) Ukanin piur pa antu akatay kulikishin akarumukining chakin kamu anch: “Nikez [kavurikap] kand kuyip kwau.” (Jer. 31:34) Chirumburikin anch Yehova kakezap kand kakuchindin yitil wasala pakur. Chawiy, kangal watong anch yakamish urishina nich mulong wa yitil wasala yimekeshin anch Yehova kakukulikishinap. Ni kangal wijimen amwiney anch washadisha yisend mu chikumangen mulong wa kurumbuk wasala. Yehova kavurikinap kand yitil yey, chawiy niyey ufanyidinap kudandamen kuyitongin.—Tang 1 Yohan 3:19, 20.
BAMBIL MU MUTAPU WA KUWIN
16. Mud in kubambil, yom ik tufanyidina kwijik?
16 Patubambidina mulong wa mwom, tufanyidin ‘kubambil mu mutapu wa kuwin.’ (1 Kor. 9:24) Tukutwish kusal mwamu anch twijik kwauril yisend tufanyidina kusend ni yitufanyidina kudjibul. Mu mutu wa mulong winou, twisambinaku kal yilakej yikemp ya yom tufanyidina kusend ni yitufanyidina kudjibul. Pakwez kud kand yikwau. Yesu walonda anch “kwifund kudia, ap kukwachik maar, ap . . . yakamish ya mwom” yikutwish kwikal chisend chilimina (Luka 21:34) Mifund yiney ni yikwau kand yikutwish kutukwash kujingunin yom tufanyidina kuswimp patudia mu kubambil kwa mwom.
17. Mulong wak tukwet kashinsh anch tukuwin mu kubambil kwa mwom?
17 Tukwet kashinsh anch tukuwin mu kubambil kwa mwom mulong Yehova ukutwinkish usu tuswirikedina. (Isay 40:29-31) Chawiy, kangal waziy! Mwimburija kambuy Paul, wasala usu wend win wawonsu mulong wa kutambul difut diading kurutu kwend. (Fil. 3:13, 14) Kwikil muntu ukutwisha kubambil pa ndond yey, pakwez nich ukwash wa Yehova ukutwish kuwin. Yehova ukutwish kukukwash kusend yisend yey ni kudjibul yakad usey. (Kus. 68:20) Nich ukwash wend, ukutwish kubambil nich kujijaman ni kuwin!
MUMINY 65 Yang Kurutu!
a Mutu wa mulong winou ukutukwash kubambil mulong wa mwom. Mud in kubambil, kud yisend yimwing tufanyidina kusend. Mu yisend yiney mud machip metu ma kwipan kud Yehova, yisend ya dijuku, ni chisend cha mipak tukata kukwat. Pakwez tufanyidin kudjibul dilim diawonsu diakad usey dikutwisha kutukangesh kubambil nawamp. Dilim dined dirumburikin ik? Mutu wa mulong winou ukwakul ku chipul chinech.
b Ukutwish kutan jinsangu mu yikunku “Uruw ni Dijuku” ni “Ukwash Mulong wa Ansand” yidia pa jw.org. ey yawiy yilakej ya mitu ya milong yidiaku yiyitadina ambay a uruw: “Mutapu ik tukutwisha kwikal ni musangar mu uruw?” ni “Anch Mbay wa Uruw Waburen Kushinshaman”; yiyitadina anvaj, “Yifundisha Aney Kusadin Telefon kwa Manangu” ni “Mutapu wa Kumulil Mwaney”; ni yiyitadina ansand, “Yom ik Nikusala Anch Anvajam Alikijan?” ni “Yom ik Nikutwisha Kusal anch Nikwet Yovil ya Kwikal Amwinam?”