Muchingejina Yehova, mud Mwasalay Samson

1-2. Mulong wak tufanyidin kwilej rusangu ra Samson?

Yom ik yikata kukwez mu manangu anch watesh dijin dia Samson? Ukat kuvurik pamwing ap ikundj wa usu nakash. Chid kamu chakin. Pakwez Samson wakwata mupak uyimp waleta yibudikin yiyimp. Chikalap nchik mwamu, Yehova washinshikina pa kushinshaman kwa Samson, Kwafundikishay mu Bibil chakwel twilejina ku chilakej chend.

² Yehova wamusadina Samson mulong kusal yom yishimwokishana piur antwend atonday, in Isarel. Mivu yivud, kupwa kwa kufa kwa Samson Yehova wamupepila kambuy Paul chakwel aweja dijin dia Samson pakach pa amakundj amekesha ritiy rikash. (Heb. 11:32-34) Chilakej cha Samson chikutwish kutukasikesh. Wamuchingejina Yehova, ap mu yisu yikash. Mu mutu wa mulong winou, tukwisambin yom tukutwisha kwilejin ku chilakej cha Samson ni mutapu ukutwisha chilakej chend kutukasikesh.

SAMSON WAMUCHINGEJINA YEHOVA

3. Chisend ik chamwinkishau Samson?

³ Chisu chavadikay Samson, in Filistin awiy ading ayiyikedila in Isarel ni ayimesha mar nakash. (Ank. 13:1) In Isarel amana mar nakash mulong in Filistin ading ni chisum nakash. Yehova wamutonda Samson mulong wa “kuyikamunin in Isarel kuyidiosh mu makas mwa in Filistin.” (Ank. 13:5) Chading kamu chisend chikash nakash! Mulong wa kuwanyish chisend chinech chikash, Samson wading ufanyidin kumuchingejin Yehova.

4. Yehova wamukwasha Samson mutapu ik kwikamunin mu makas ma in Filistin? (Ankalansambu 15:14-16)

⁴ Shishinshikin chilakej chimwing chimekeshina anch Samson wamuchingejina Yehova ni mu ukwash wend. Chisu chimwing, amasalay in Filistin aya kumukwat Samson ku Lehi, mwi ngand ya Yuda. Amakundj in Yuda ova wom, chawiy akwata mupak wa kumupan Samson mu makas ma akankuny. Antu adinga ku mutambu wa Samson amukasa nich moj yisu ni amutwal kud in Filistin. (Ank. 15:9-13) Chawiy “spiritu wa Yehova wamuwila nich ukash” Samson ni wakatula moj yamukasau. Kupwa “chamanay rubangu ra chimbur rading rutalela,” warinona, wajipa nich in Filistin 1000!​—Tang Ankalansambu 15:14-16.

5. Mutapu ik wamekeshay Samson anch wading umuchingejidin Yehova?

⁵ Mulong wak Samson wasadina rubangu ra chimbur? Tukutwish kamu kulond anch rading mud ut wachifanakesh! Chakin kamu Samson wading wij anch Yehova ndiy wamukwasha kuyipandakan in Filistin, kadiap ut wasadinay. Inge, ikundj winou ushinshamena wasadina chom chading chikwetay mulong wa kuwanyish rusot ra Yehova. Chakin kamu, Samson wayipandakana amakundj mud inay awonsu mulong wamuchingejina Yehova!

6. Mutapu ik tukutwisha kumwimburij Samson anch atwinkish yisend mu dirijek dia Yehova?

⁶ Niyetu kand, Yehova ukutwish kutwinkish usu tuswirikedina mulong wa kusal chom chin chawonsu chitwitinay, ap anch chisend chetu chamekan mud chikasiken kuwanyish. Ni Nzamb ukutwish kutukwash mu mutapu twakad kutongin. Anch wamuchingejin Yehova, wamwinkisha Samson usu, ukukukwash niyey kusal rusot rend anch wadandamen kuchingejin pa ukwash Wend.​—Jnsw. 16:3.

7. Yilakej ik yimekeshina anch chid cha usey kukimb umutakel wa Yehova?

⁷ Akadivar nau anambaz avud adia mu mudimu wa kutung akat kumuchingejin Yehova. Pakur, ayinkishang akadivar yisend ya kutung Yot ya Want yisu ap kand yikumbu yikwau ya uteokras. Chawiy, mulong antu avud akat kuyibatish, mwamu maswir ma dirijek makat kudandamen kuvul. Akadivar akatedina akat kukimb umutakel wa Yehova ni kupakij kusadin milad yisu, mud kuland ndond ja kutungin ni kurijek yikumbu. “Kwinsambishin, chadingap chiswapela kud antu amwing kwijidin kusal mu yisend yiney yisu,” mwamu mulondinay Robert, wasadina mu mivu ya kwinyim ey nau antu avud mu maproje ma kutung masadikina pa mangand. Ulondin kand anch: “Yading yishalijadin kamu ni yom twasala mu yivud. Pakwez akadivar ading afanyidin kwijidin, ni chameken anch Yehova wayukisha kuswimp kwinoku.” Chinech chid chilakej chimekeshina anch Yehova uyitakedil antwend mulond wa kuwanyish rusot rend. Chisu ni chisu, tukat kusal nawamp etu awonsu mu kwiyipul anch, ‘Ov, nikat kukimb umutakel wa Yehova ap kusal usu wa kwijidin ku mudimu wend?’

SAMSON WATANINAMU NAKASH MU UMUTAKEL WA YEHOVA

8. Yom ik yasalay Samson chisu chovay impu ya mem nakash?

⁸ Ukutwish kand kuvurik yom yikwau yishimokishena yasalay Samson. Wajipa ntambu amwinend ni wajipa kand antu 30 mu musumb wa in Filistin ku Askalon. (Ank. 14:5, 6, 19) Samson wading wij anch kakutwishap kusal yom ya mutapu winou pakad ukwash wa Yehova. Chinech chamekana chisu chovay impu ya mem nakash kupwa kwa kujip in Filistin 1000. Chom ik chasalay? Pa ndond pa kwichingejin mulong wa kupwish impu yend, wamutazuka Yehova chakwel amukwasha.​—Ank. 15:18.

9. Mutapu ik wakulay Yehova ku malembil ma Samson? (Ankalansambu 15:19)

⁹ Yehova wakula ku ma malembil ma Samson kusutin kumwinkish mem mu chilay. Panay Samson mem, “wova usu.” (Tang Ankalansambu 15:19.) Chimeken anch, musul winou usu wa mem wadandamena kwikalaku mivu yivud kushik ni pamupepilau muprofet Samuel kufund buku wa ankalansambu. Pamanangau in Isarel mem minam afanyinang kuvurik anch ang amuchingejin Yehova, ndiy ukuyikwash chisu chidau mu yakamish.

10. Yom ik tufanyidina kusal mulong wa kutambul ukwash wa Yehova? (Tal kand chipich.)

¹⁰ Niyetu tuswirikedin ukwash wa Yehova chikalap nchik ukaliweny tukweta ap yom twasadina kal mu dirijek diend. Nich kwikepish tufanyidin kwitiyin anch tukutwishap kusal chom chitwitinay Yehova anch tumuchingejidinap. Samson wikala ni usu panay mem mamwinkishau kud Yehova. Mud Samson tukukul mu spiritu anch twataninamu mu yakudia yawonsu ya mu spiritu yitwinkishinay Yehova.​—Mat. 11:28.

11. Mutapu ik tukutwisha kuchingejin mu ukwash wa Yehova? Let chilakej.

¹¹ Shinshikin chilakej cha Aleksey, mukadivar umwing urishina ni rupompat rikash mwi ngand ya Risi. Chom ik chimukwashina kujijamen yikokujol yiney yikash? Ndiy ni mukajend akat kutang ni kwilej Bibil ni kumwifukwil Yehova pakad kujing. Ulondin anch: “Nikat kusal usu wa kulam chaku cham cha kutang Bibil dichuku diawonsu ni kumwilej pakampwiI. Pamanch pawonsu, am ni mukajam tukat kushinshikin mufund wa dichuku ni kumulembil Yehova pamwing.” Chinech chitufundishin ik? Pa ndond pa kwichingejin ayinetu, tufanyidin kumuchingejin Yehova. Mutapu ik tukutwisha kusal mwamu? Kusutil kukasikesh ritiy retu mu kwilej Bibil dichuku diawonsu, kulembil, kukumangan ni kuya mu mudimu wa kulejan. Ni Yehova, ukutwinkish ukwash tuswirikedina mulong wa kudandamen kumusadin. Mud mutapu wamukasikeshay Samson, Nzamb ukutwinkish niyetu chakin kamu usu.

SAMSON KAZIYAP

12. Mupak ik uyimp wakwatay Samson, ni mulong wak chafanyinap kwikal mwamu anch wading mu urund nend Delila?

¹² Samson wading muntu wakad kuwanyin mud etu, ni yisu yivud wakwatang mipak yiyimp. Mupak umwing wakwatay waleta yibudikin yiyimp kamu nakash. Kupwa kwa kusal mud nkalansambu mu chisu kanang, Samson “wamukata kand mband mukwau wadinga mwi Nkurubuk mwa Sorek, dijin diend Delila.” (Ank. 16:4) Kwisambishin, Samson wakimba kumwat mband umwing mwin Filistin. “Yehova ndiy” wamubachika Samson “kusal mwamu mulong chinech chafanyina kumukwash kuyirishikish in Filistin.” Kupwa, Samson washakama mu musumb wa Gaza mu chikumbu cha mband mwin kusochik umwing mwin Filistin. Pa chisu chimwing, Nzamb wamwinkisha Samson usu mulong wa kupandakan musumb winou. (Ank. 14:1-4; 16:1-3) Pakwez chafanyinap kwikal mwamu anch Samson wadinga ni Delila, mulong chimeken anch mband winou wading mwin Isarel.

13. Delila wamwandjikisha Samson mu ubaj mutapu ik?

¹³ Delila watambula uvud wa nfalang kanang kud in Filistin mulong wa kumupan Samson. Pamwingap mulong wading umukatin nakash, kafanyinap kamu kujingunin yom yading yisotinay Delila kusal. Chikalap nchik usu wasalay, Delila wadandamena kumushindin Samson chakwel amuleja kwading kudiokila usu wend ni disudien washikena kumujingunin ujindj. Cha ushon, chinech chamushikija Samson kushadish usu wend ni dilau dia Yehova mu chisu kanang.​—Ank. 16:16-20.

14. Yom ik yamushikena Samson mulong wamuchingejina Delila?

¹⁴ Samson wamana mar nakash mulong wamuchingejina Delila pa ndond pa kumuchingejin Yehova. In Filistin amwalikesha Samson ni amujipa mes. Amuteka mu rukan mu musumb wa Gaza. Kwinsambishin wapola yis ya musumb winou ni mwawiy chad mwinomu mwamutekau kwikal kabindj mwin kutwa wung. Kupwa in Filistin aya ni Samson ku musambu wau umwing mulong wa kumusip. Alambula yakupesh yivud kud nzamb wau wa makasu Dagon, mulong ading atongin anch ndiy wayikwasha kumukwat Samson. Aya ni Samson ku musambu mulong “akayisangareshap”​—charumburik anch kumusip.​—Ank. 16:21-25.

15. Mutapu ik wamekeshay Samson anch wamuchingejina kand Yehova (Ankalansambu 16:28-30) (Tal chipich cha pa chibur.)

¹⁵ Samson wasala kamu chom chiyimp nakash, pakwez kaziyap. Wakimba mutapu wa kuwanyish chisend chamwinkishau kud Nzamb cha kuyirishikish in Filistin. (Tang Ankalansambu 16:28-30.) Samson wamwilembina Yehova anch: nkwashaku amboku chakwel “niyifundakeshin in Filistin.” Nzamb wakin wakula ku malembil ma Samson ni wamuchirishina kand usu upandakena. Mud chibudikin, Samson watwisha kuyijip in Filistin avud pa chisu chinech kusutamu ajipay pakur.

16. Yom ik twilejidina ku kurumbuk kwa Samson?

¹⁶ Ap anch Samson wamana mar nakash mulong wa kurumbuk kwend, kaziyap kusal rusot ra Yehova. Niyetu tufanyidinap kwimik kusal rusot ra Yehova anch twarumbuk ni anch atupup ap twashadish yisend. Tuvurikany anch Yehova ukatin kamu kutulikishin. (Kus. 103:8-10) Chikalap nchik kurumbuk kwetu, Yehova ukutwish kutwinkish usu mulong wa kusal rusot rend, mud mwasalay kud Samson.

17-18. Mutapu ik ukukasikeshina chilakej cha Michael? (Tal kand chipich.)

¹⁷ Shinshikin chilakej cha mukadivar nsand umwing utazukinau anch Michael. Wading ukwataken nakash mu mudimu wa Yehova, mulong wading nkwash wa mudimu ni chibol wa rawonsu. Pakwez cha ushon, wasala chitil ni chinech chamushikija kushadish yisend yend mu chikumangen. Ulondin anch, “pa chisu chinicha nading nikwataken nakash mu mudimu wa Yehova. Pakad kuchingejin, niyova anch nikutwishap kand kusal chom ap chimwing mu mudimu wa Yehova. Kandikal nitongangap anch Yehova ukutwish kwindjibul. Pakwez niyipulang anch urund wam ni Yehova ukudandamen kand kwikal ukash, ap anch nikwikal kand ni mutapu wa kumusadin nakash mud nasalang pakur.”

¹⁸ Cha musangar nakash, Michael kaziyap. Uwejidinaku anch: “Nashinshikina pa kuchirish urund wam ni Yehova kusutil kumwazuril muchim wam chisu chawonsu mu malembil, kwilej ni kutongijokin.” Mu kusut kwa chisu, Michael amuchirishina yisend mu chikumangen. Nlel ud kand chibol ni mukurump wa chikumangen. Ulondin kand anch “Ukwash ni kukasikesh kwa amakurump, kwankwasha kwijik anch Yehova udandamedin kwinkat. Nikutwish kand kukwash chikumangen nich kom kadia zwaang. Yom yiney yanshikena yanfudisha anch Yehova ukat kumulikishin muntu mwawonsu ukata kukarumuk chakin.” Tukutwish kwikal nich kashinsh anch Yehova ukutwish kutusadin ni kutuyukish chikalap nchik kurumbuk kwetu, ching anch twasal yawonsu tukutwisha kusal mulong wa kuswimp ni kudandamen kand kumuchingejin.​—Kus. 86:5; Jnsw. 28:13.

19. Chilakej cha Samson chakukukasikesh kal mutapu ik?

¹⁹ Mu mutu wa mulong winou, twamanaku kal yom yikemp yashikena mu mwom wa Samson. Ap anch kandinap muntu uwanyidina, pakwez kaziyap kumusadin Yehova, ap kupwa kwa kumulej Delila ujindj piur pa usu wend. Ni Yehova wadandamena kumusadin Samson. Nzamb wamusadina kand Samson chipandakena. Yehova wadandamena kumuman mud muntu wadinga ni ritiy rikash, ni wamuteka pakach pa antu ashinshamena afundinau mu Hebereu shapitre wa 11. Chitukasikeshin nakash pa kwijik anch tumusadidin Tatuku wa rukat udia mwiur ukweta impu ya kutwinkish usu, pakampwil chisu tuziyina! Chawiy mud Samson, el tumwilembinany Yehova anch: “Nsalejam nvurikap, ngikishap kand ukash.”​—Ank. 16:28.