MUTU WA MULONG WA KWILEJ WA 38
En Ansand—Mwom Wa Mutapu ik Ukatinanya Kwikal Nich?
“Ronganyin rey rikukuchidij.”—JNSW. 2:11.
MUMINY 135 Kutazuk kwa Yehova: “Mwanam Ikundj, Ikal mwin Manangu”
YIDIA MU MUTU WA MULONG WINOUa
1. Chikokujol ik charishau nich Jowas, Ozias, ni Yosias?
TONGIN BIL mud ud mwant mulong wa kutakel antu a Nzamb chisu uchidia kwey mwanikanch! Mutapu ik ukutwisha kusadin ulabu wey? Bibil wisambidin piur pa ansand amwing ikala ant mu Yuda. Chilakej, Jowas wading kwend ni mivu 7, Ozias wading ni mivu 16, ni Yosias wading kwend ni mivu 8. Tongin yikokujol yafanyinau kurish nich! Pakwez ap anch yading kamu yisend yikash, Yehova ni antu akwau ayikwasha kusal yom yivud.
2. Mulong wak chid cha usey kwilejin ku chilakej cha Jowas, Ozias, ni Yosias?
2 Chid cha usey kwilejin ku yilakej yiney yisatu yisambidinay Bibil ap anch tudiap ant. Ant inay akwata mipak yiwamp, pakwez yisu yimwing akwata kand mipak yiyimp. Kusutin yilakej yau, tukuman mulong wak tufanyidin kutond arund awamp, kwashal ikepishina, ni kudandamen kumukimb Yehova.
TOND ARUND AWAMP
Chiswapel nlel kwimburij chilakej cha Jowas anch watesh yiyul ya arund awamp (Tal paragraf wa 3, 7)c
3. Mutapu ik wasalay Jowas pa muyulau kud Mwin Kupesh Mujim jehojada?
3 Imburij mipak ya manangu yakwatay Jowas. Padingay nsand, Mwant Jowas wakwata mupak wa manangu. Pa ndond pakwikal mud tatukwend, ndiy walondula umutakel wa mwin Kupesh Mujim ushinshamena, Jehojada. Mwin kupesh wamufundisha Jowas mud mwanend wa kuval. Mud chibudikin Jowas wakwata mupak wa manangu mulong wa kutakel difukwil diakin ni kumusadin Yehova. Jowas wawapisha kand tempel wa Yehova.—2 Jnsg. 24:1, 2, 4, 13, 14.
4. Mutapu ik tukata kutaninamu anch twalimish mbij ja Yehova? (Jinswir 2:1, 10-12)
4 Anch anvaj ey ap muntu mukwau akufundisha kumukat Yehova ni kulimish mbil jend, chimeken anch akwinkisha chipan cha usey nakash. (Tang Jinswir 2:1, 10-12.) Anvaj akutwish kukufundish mu mitapu yivud. Shinshikin mutapu wamukwashau nambaz Katya kud tatukwend kukwat mipak yiwamp. Dichuku diawonsu damutwalangau kud tatukwend ku shikol, isambinang pa mufund wa pichuku. Ulondin anch “Mambamb minam, mankwashang kusal yom yiwamp anch narish ni milong.” Ov, anvaj ey akat kukwinkish mbil jimedina pa Bibil, pakwez wiyovil anch mbil jinej jikasiken ni jikukishin want ipey? Yom ik yikutwisha kukwash kwitiy umutakel wau? Nambaz Anastasia uvurikin anch anvajend itekina chisu cha kumurumburil mulong wak amutekina mbil jimwing. Ulondin anch, “Chinech chankwasha kwitiy mimbu yiney, ni yadingap yikasikena nakash, pakwez asala mwamu mulong ading ankatin.”
5. Yaku yey yikwikal ni yibudikin ik padau anvaj ey ni Yehova? (Jinswir 22:6; 23:15, 24, 25)
5 Anch wasadin chiyul chidiokila mu Mifund, ukuyisangaresh anvaj ey. Cha usey nakash, ukumusangaresh Nzamb ni urund wey ni ndiy ukukasikan nakash. (Tang Jinswir 22:6; 23:15, 24, 25.) Ov, umenap anch dined did diyingishin diwamp dia kwimburij chilakej cha Jowas padingay nsand?
6. Yiyul ya anany yateshay Jowas ni yibudikin ik yikalaku? (2 Jinsangu 24:17, 18)
6 Ilejina ku mipak yiyimp yakwatay Jowas. Pafay Jehojada, Jowas watonda arund ayimp. (Tang 2 Jinsangu 24:17, 18.) Wakwata mupak wa kuyitesh anat a mu Yuda ading akad kumukat Yehova. Ukutwish pamwing ap kwitiy anch Jowas wafanyina kwipuk arund ayimp. (Jnsw. 1:10) Pakwez, ndiy wakwata mupak wa kuyitesh arund inay ayimp. Chawiy, Zakariy musanyend a Jowas pakimbay kumuyul ndiy wamujipa. (2 Jnsg. 24:20, 21; Mat. 23:35) Wading usup nakash! Jowas wasambisha nawamp, cha ushon wikala mwin kupumbok ni mwin kujipan. Kupwa atushalapol end amujipa. (2 Jnsg. 24:22-25) Mwom wend wafanyina kwikal uwamp anch wadandamena kumutesh Yehova ni kuyikat antu adinga amukatina Ndiy! Chilakej chinech cha kufundish kal ik?
7. Anany ufanyidina kutond mud arund? (Tal kand chipich.)
7 Dilejan diakusambish tukutwisha kwilejin ku mupak uyimp wa Jowas did anch tufanyidin kutond arund awamp akutwisha kutukwash,amukatina Yehova ni asadina yom yimusangareshina. Tufanyidinap kutond ching arund akweta mivu yimwing ni yetwetu. Vurik anch, Jehojada wading mukurump kumusutamu Jowas. Tufanyidin kwiyipul piur pa mupak wa kutond arund anch: ‘Ov, ankwashin kukasikesh ritiy ram mudiay Yehova? Ankasikeshin kulimish yijil ya Nzamb? Akat kwisambinang piur pa Yehova ni piur pa uyakin wend? Amekeshining anch akat kulimish yijil ya Nzamb? Akat kwinlej yom nikatina kutesh, ap akat kwinyul ni kutakaman?’ (Jnsw. 27:5, 6, 17) Chakin kamu, anch arund ney kamukatinap Yehova, ufanyidinap kwikat nau. Pakwez ufanyidin kukat arund amukatina Yehova, awiy afanyidina kwikal arund ney.—Jnsw. 13:20.
8. Anch tusadidin, tupend twa kwambambin yom ik tufanyidina kuvurik?
8 Internet utukwashin nakash kwikal piswimp nau anamakwetu ni arund netu. Pakwez antu avud akat kusadin internet mulong wa kwimekesh kud antu akwau, kusutil kutek yipich ni mavideo ma yom yilandinau ap yisadinau. Anch usadidin internet iyipula anch: ‘Ov, pinitekina yipich chid mulong wa kwimekesh kud antu akwau? Chitongijok cham chid cha kuyikasikesh antu akwau bil anch chid mulong wa kwibaz? Ov, nilikidin anch antu asadidina internet ikala ni chitongijok chiyimp pa mutapu wam wa kutong, wa kulond ni yisal yam?’ Mukadivar Nathan Knorr, wadinga mu Chisak Chitakedila, walonda anch: “Kangal wayisangaresh antu. Mulong ukutwishap kuyisangaresh antu awonsu. Pakwez anch wamusangaresh Yehova ukuyisangaresh antu awonsu amukatina.”
USEY WA KWIKAL IKEPISHINA
9. Yehova wamukwasha Ozias kusal ik? (2 Jinsangu 26:1-5)
9 Imburij mipak yiwamp yakwatay Ozias. Padingay nsand, Mwant Ozias wading wikepishin. Wading “umwovil Nzamb [wakin] wom.” Ni Yehova wamuyukisha pawanyishay mivu 68. (Tang 2 Jinsangu 26:1-5.) Ozias wayipandakana akankuny a michid yivud ni wikala ni kashinsh anch Yerusalem ud mu diking. (2 Jnsg. 26:6-15) Ozias wasangera ukwash wawonsu wamwinkishau kud Nzamb mulong wa kusal yom yatwishay.—Mul. 3:12, 13.
10. Yom ik yamushikena Ozias?
10 Ilejina ku mipak yiyimp yakwatay Ozias. Mwant Ozias wayileja antu akwau kulondul umutakel wend. Ov, chinech chimekeshin anch wafanyina kusal chom chawonsu chatongay anch ufanyidin kusal? Chawiy dichuku dimwing Ozias wakwata mupak wa kwandam mu tempel wa Yehova nich kwitutul waya wosh diseng dia malash pa chintamb, chisend chinech chadingap chiyitadina ant. (2 Jnsg. 26:16-18) Mwin Kupesh Mujim Azaria wamupupa, pakwez Ozias wajimana nakash. Cha ushon nakash, Ozias kashalap ushinshamena ni Yehova wamwasa musong wa mak. (2 Jnsg. 26:19-21) Mwom wend wafanyina kwikal uwamp anch wadandamena kwikal wikepishina!
Chikalap nchik yom twasadina, tufanyidin kumujikitish Yehova mulong ndiy watukwashina kuyisal (Tal paragraf wa 11)d
11. Yom ik yikutwisha kutukwash kushal ikepishina? (Tal kand chipich.)
11 Pikalay Ozias ni usu, wavuramena anch Yehova ndiy wadinga Musul wa usu ni wa yom yasalay. Yom ik twilejidinaku? Tufanyidin kuvurik anch yiyukish ni yisend tukweta Yehova ndiy watwinkishay. Pa ndond pa kwitutul mulong wa yom tusadina, tufanyidin kumujikitish Yehova mulong utukwashin kusal yom nawamp.b (1 Kor. 4:7) Tufanyidin kwikepish ni kwijik anch tud antu akad kuwanyin akweta kuswir kwa dipup. Mukadivar umwing ukweta mivu 60 wafunda anch: “Nileja anch nafanyinap kwikwat nich usey amwinam. Anch ampup mulong wa chom kanang chimekena mud chid cha usup, mu yisu kanang nikat kusal usu wa kumuchingejin Yehova.” Cha usey nakash anch twamuziyin Yehova ni kushal ikepishina, tukwikal ni mashakamin mawamp.—Jnsw. 22:4.
IKAL PISWIMP NI YEHOVA
12. Padingay Yosias nsand, mutapu ik wamukimbay Yehova? (2 Jinsangu 34:1-3)
12 Imburij mipak yiwamp yakwatay Yosias. Yosias wading nsand ukweta mivu 16 pasambishay kumukimb Yehova. Wakata kwilej piur pa Yehova ni piur pa rusot Rend. Pakwez, chidingap chimuswapedina mwant winou nsand. Wakwata mupak mulong wa kushitwish difukwil diakin pantaliken ni difukwil dia makasu. Wafanyina kwikal utakamena! Kurutu Yosias awanyisha mivu 20, wasambisha kushitwish difukwil diakin pantaliken ni difukwil dia makasu diadinga mu muchid.—Tang 2 Jinsangu 34:1-3.
13. Mwom wey ukwikal mutapu ik anch wipan kud Yehova?
13 Ap anch ud mwan mukemp nakash, ukutwish kumwimburij Yosias kusutil kwilej yom yivud piur pa Yehova ni piur pa mikadil yend yipandakena kuwap. Chinech chikukubachik kwipan kud ndiy. Kwipan kwinoku kukwikal ni chibachikin ik pa mwom wey wawonsu? Luke, wabatishau ni mivu 14, walonda anch, “Kusambish kamu nlel, nikutek mudimu wa Yehova pa ndond ya kusambish ni nikusal usu wam wawonsu mulong wa kumusangaresh.” (Mar. 12:30) Anch niyey wasal mwamu ukutambul yiyukish yivud nakash.
14. Let yilakej ya ansand amwing amwimburija Mwant Yosias.
14 Yikokujol ik yimwing yikutwishau kurish nich atushalapol a Yehova achida an akemp? Johan, wabatishau ni mivu 12, ulondin anch ambay nend a ku shikol amushindinang kuna ruwand. Yom ik yamukwasha kujijamen chibachikin chinech? Johan wavurika anch kuna ruwand kukutwish kuyipish ukash wend wa mujimbu ni urund wend ni Yehova. Rachel, wabatishau ni mivu 14 urumburil yom yimukwashina kujijamen yikokujol yirishinay nich ku shikol. Ulondin anch: “Nikat kusal usu wa kutongin pa chom chikutwisha kwinvurish piur pa Bibil ni piur pa Yehova. Chilakej, dilejan dia istwar dikat kwinvurish yisu yimwing rusangu ap uprofet wa Bibil. Ap kand kwisamb ni muntu umwing ku shikol, kukat kwinvurish verse nikutwisha kusadil mulong wa kumukwash nich.” Milong urishina nich yikutwish kushalijan ni yarishay nich Mwant Yosias, Pakwez ukutwish kwikal mwin manangu ni ushinshamena mud ndiy. Yikokujol ukurisha nich piudia mwan mukemp yikukukwash kujijamen milong yikwau ukurisha nich mu machuku ma kurutu.
15. Yom ik yamukwasha Yosias kumusadin Yehova nich kushinshaman? (2 Jinsangu 34:14, 18-21)
15 Pawanyishay mivu 26, Mwant Yosias wasambisha kurijek tempel. Pa chisu chinicha, abudikina “mukand wa Yijil ya [Yehova] yamwinkishau Moses”. Pateshay mwant mazu ma mukand winou, waswimpa yom kapamp kamwing mulong wa kuziyin ku mazu ma mukand winou. (Tang 2 Jinsangu 34:14, 18-21.) Ov, ukutwish kutang Bibil pakad kujing? Pamwing ap wasambishin kal kutang Bibil dichuku diawonsu. Ov, usangaredin kusal mwamu? Ov, walamin kal maverse makutwisha kukukwash? Luke, twisambinang kwiur oku, wafunda mu kaye wend manans ma usey matanay. Anch niyey wasal mwamu, chikukuswapel kuvurik maverse ma Bibil ap malejan udioshina ku maverse minam. Anch wamukat Bibil ni kumwilej nakash, ukukat kamu kumusadin Yehova. Mud Mwant Yosias, Dizu dia Nzamb dikukubachik kusal yom yiwamp.
16. Yosias warumbuka mutapu ik, ni dilejan ik twilejidinaku?
16 Ilejina ku mipak yiyimp yakwatay Yosias. Pawanyishay piswimp mivu 39, Yosias wasala chom chimwing chamushikija ku rufu. Wichingejina amwinend pa ndond pa kukimb umutakel wa Yehova. (2 Jnsg. 35:20-25) Kud dilejan dia usey tudioshidinaku. Chikalap nchik uvud wa mivu tukweta, ap twasutishina kal mu kwilej Bibil, tufanyidin kudandamen kukimb umutakel wa Yehova. Chinech chirumburikin kumulembil chisu chawonsu mulong wa kwit umutakel, kwilej Dizu diend ni kwitiy yiyul yitwinkishinau kud in Kristu aswila. Mwamu ukutwish kwipuk kukwat mipak yiyimp ni kwikal ni musangar mu mwom.—Jak. 1:25.
ANSAND—UKUTWISH KWIKALANY NI MWOMU USANGARESHINA
17. Yom ik twilejina kal kwi nsangu ja ant asatu a mu Yuda?
17 Anch ud nsand ukutwish kusal yom yiwamp yivud nakash. Nsangu piur pa Jowas, Ozias, ni Yosias jimekeshin anch ansand akutwish kukwat mipak ya manangu ni kumusangaresh Yehova mu mwom yau. Chakin kamu, ansand inay akwata mipak yikala ni yibudikin yiyimp. Pakwez anch twimburij yom yiwamp yasalau ni kwipuk mipak yiyimp yakwatau, tukutwish kwikal ni mwom usangareshina.
David wamusejina Yehova padingay nsand. Wikala ni dilau dia Nzamb, ni wikala ni musangar mu mwom wend (Tal paragraf wa 18)
18. Yilakej ik ya mu Bibil yimekeshina anch ukutwish kwikal ni musangar mu machuku ma kurutu? (Tal kand chipich.)
18 Mu Bibil mud nsangu ja ansand akwau adinga piswimp ni Yehova, ading ni dilau diend ni ikala ni mwom yisangareshina. David niyend ud pakach pa ansand inay. Padingay nsand, watonda kwikal murund wa Yehova ni kupwa wikala mwant ushinshamena. Chakin kamu, yisu yimwing wakwata mipak yiyimp, pakwez Nzamb wadandamena kumuman mud muntu ushinshamena. (1 Ant. 3:6; 9:4, 5; 14:8) Anch wilej rusangu ra David, chilakej chend chikukubachik kumusadin Yehova nich kushinshaman. Ukutwish kwitekin chisu cha kwilej yom yivud kusutil chilakej cha Marko ni Timote. Ukuman anch asambisha kumusadin Yehova padingau anikanch ni adandamena kumusadin nich kushinshaman. Mipak yau ya kumusadin Yehova yamusangaresha ni ikala ni musangar nakash.
19. Mwom wa mutapu ik ukatina kwikal nich?
19 Mutapu usadidina mwom wey kusambish nlel wawiy ukusala anch wikala ni musangar mu machuku ma kurutu. Anch wamuchingejin Yehova pa ndond pa kwichingejin amwiney, ndiy ukukukwash kukwat mipak ya manangu. (Jnsw. 20:24) Ukwikal ni mwom uwamp ni usangareshina. Vurik anch, Yehova ukwatin nich usey nakash yom usadina mulong wendendiy. Ov, umenap anch chid cha usey nakash kusadin mwom wey mulong wa kumusadin Tatukwetu wa rukat Yehova?
MUMINY 144 Tutalany Mes pa Difut!
a Asand, Yehova wij anch urishinany ni yikokujol yikutwisha kupak urund wen ni ndiy. Mutapu ik ukutwishanya kukwat mipak ya manangu yikumusangaresha Tatukwen wa mwiur? Tukwisambin yilakej ya ansand asatu ikala ant mu Yuda. El tushinshikinany mutapu ukutwisha kwilejin ku mipak yau.
b Tal mushet “Babel ‘Kwikepish kwa Rubabek’” udia pa jw.org mutu wa mulong “Ov, Kwijikan Nakash pa Tupend twa Internet Kud kwa Usey?”
c KURUMBURIL YIPICH: Nambaz mukurump uswila ukat kumwinkish nambaz changadim yiyul ya manangu.
d KURUMBURIL CHIPICH: Nambaz ukweta chikunku umuchingejidin Yehova ni kumutumbish kand ndiy.