MUTU WA MULONG WA KWILEJ WA 52

En Anambaz Ayangadim—Ikalany in Kristu Aswila

“Chifanyidin niyau amband ikala . . . akad mboj, pakwez ikal in [win yakin] mu yom yawonsu.”—1 TIM. 3:11.

MUMINY 133 Mwifukwila Yehova Piuchida Nsand

YIDIA MU MUTU WA MULONG WINOUa

1. Yom ik tufanyidina kusal mulong wa kwikal mwi Kristu uswila?

CHIKAT kulet musangar nakash pakuman mutapu upaminay mwan maw maw ni kwikal mukurump. Chimeken kamu patok anch kwikiling usu ukatay mwan kusal mulong wa kupam. Pakwez, mulong wa kwikal mwin Kristu uswila kwitining kusal usu ujim nakash.b (1 Kor. 13:11; Heb. 6:1) Mulong wa kuwanyish rutong riner tufanyidin kwikal ni urund wapiswimp ni Yehova. Tukwet kand kuswir kwa kwikal ni spiritu wend utumbila mulong wa kukudish mikadil ya win Kristu, kukudish ukaliweny nikwirijek mulong wa yisend ya machuku ma kurutu.—Jnsw. 1:5.

2. Yom ik twilejina mu Disambishil 1:27, ni yom ik tukwisambina mu mutu wa mulong winou?

² Yehova watanga ikundj ni mband. (Tang Disambishil 1:27.) Chiswapel kuman kushalijan kudia pakach pa ikundj ni mband, pakwez ashalishadin kand mu mutapu ukwau. Chilakej, Yehova wasala amakundj ni amband mulong wa kuwanyish muntu ni muntu chisend chend, chawiy akwet kuswir kwa kwikal ni mikadil ni ukaliweny ukutwisha kuyikwash kuwanyish yisend yau. (Dis. 2:18) Mu muntu wa mulong winou, tukuman mutapu ukutwishau anambaz ayangadim kusal mulong wa kwikal in Kristu aswila. Mu mutu wa mulong ukwambakenap tukuman mutapu ukutwishau niyau akadivar ansand kusal mwamu.

KUDISH MIKADIL YIMUSANGARESHINA YEHOVA

Yipich: Nambaz changadim utadin pa dikalsh ni utongijokidin pa yom yatangay kal mu chichap chimedina pa Bibil. Yom yiwejidinaku: 1. Rebeka utekin mem mu chidil cha atumel. 2. Ester umwinkin Mardoke ya kudia. 3. Abigayil wasin manungun ni kwilemb mulong wa mwom wend ni wa antu a mu chikumbu chend. — Kwimburij mikadil ya amband ashinshamena mud, Rebeka, Ester, ni Abigayil, yikukukwash kwikal mband mwin Kristu uswila (Tal paragraf wa 3-4)

3-4. Kwisu kukutwishau anambaz ayangadim kutan yilakej yiwamp ya kwimburij? (Tal kand chipich.)

³ Bibil wisambidin piur pa amband avud nakash ading amukatina Yehova ni kumusadin. (Tal mutu wa mulong ulondina anch “Les femmes dans la Bible : que pouvons-nous apprendre d’elles?” pa jw.org) Amekesha mikadil yilejenau mu mifund anch, “akad mboj” ni “in [win yakin] mu yom yawonsu.” Chikwau kand, anambaz akutwish kutan yilakej ya kwimburij ya anambaz aswila adia mu chikumangen.

⁴ Anambaz ayangadim, ov, wijanyaku anambaz umenanya anch ad yilakej yiwamp ukutwishanya kwimburij? Shinshikin mikadil yau yiwamp. Tongijokin mutapu ukutwish niyey kumekesh mikadil yiney. Mu maparagraf malondwilaku am tukwisambin mikadil ya usey yisatu yikutwishau anambaz kukudish.

5. Mulong wak kwikepish kud kwa usey kud mwin Kristu mband uswila?

⁵ Kwikepish ud mwikadil wa usey mulong wa kwikal mwin Kristu wakin. Anch muntu mband wikepishin ukusanger urund uwamp ni Yehova ni pamwing ni antu akwau. (Jak. 4:6) Chilakej mband umukatina Yehova ukat kulimish ni kwikepish umutakel upaninay Yehova piur pa antu atakedina chikumangen ni ntakel wa dijuku. (1 Kor. 11:3) Mbil yiney akutwish kuyisadin pakampwil mu chikumangen ap mu ditenchik dia dijuku.c

6. Yom ik yikutwishau anambaz ayangadim kwilej piur pa kwikepish kwa Rebeka?

⁶ Shinshikin chilakej cha Rebeka. Wading mband wa manangu ni wakwata mipak ni kutakaman mu mwom wend wawonsu ni wading wij chisu ni mutapu wa kusal yom. (Dis. 24:58; 27:5-17) Pakwez wading ukwet kalimish ni walimishang umutakel. (Dis. 24:17, 18, 65) Anch walimish nich kwikepish yitenchik ya Yehova mud mwasalay Rebeka, ukwikal ni yibachikin yiwamp mu dijuku ni mu chikumangen chey.

7. Mutapu ik ukutwishau anambaz ayangadim ku mwimburij Ester mu ku mekesh anch ij mimbu yau?

⁷ Kwijik mimbu ud mwikadil ukwau ufanyidinau in Kristu awonsu aswila kwikal nich. Bibil ulondin anch “in kwitudish akwet manangu.” (Jnsw. 11:2) Ester wading mband wija mimbu yend. Mulong wading wij mimbu yend, kikalap ni chibud pikalay mwant mwad. Watesha chiyul cha musanyend Maridoke ni wachisadina. (Est. 2:10, 20, 22) Ukutwish kumekesh mwikadil winou anch wayit antu akwau chiyul ni kuchisadin.—Tit. 2:3-5.

8. Ku kwatijan ni 1 Timote 2:9, 10, kwijik mimbu kukuyikwash mutapu ik anambaz kutond yidjal ni mutapu wa kwileng?

⁸ Ester wamekesha anch wij mimbu yend mu mutapu ukwau. Wading “changadim wa chimbu ni chifu chiwamp” pakwez, kipwitinap nkeu pad amwinend. (Est. 2:7, 15) Mutapu ik ukutwishau amband in Kristu kutaninamu mu chilakej cha Ester? Mutapu umwing a ulejen mu 1 Timote 2:9, 10. (Tang.) Kambuy Paul wayileja in Kristu amband kudjal mutapu uwamp ni chitongijok chiwamp. Mazu ma Grek masadinau pinap mamekishin anch yidjal ya in Kristu amband yifanyidin kwikal ya kalimish ni yimekeshina anch alimishin yovil ni yitongijok ya antu akwau. Tukat kusangar nakash mulong wa anambaz in Kristu akata kudjal mu mutapu uwamp.

9. Yom ik twilejidina ku chilakej cha Abigayil?

⁹ Ukaliweny wa kujingunin yom ud mwikadil ukwau ufanyidinau anambaz in Kristu awonsu aswila kwikal nich. Ukaliweny wa kujingunin yom chom ik? Ud ukaliweny wa kujingunin yom yiwamp ni yiyimp ni kutond kusal yom yiwamp. Shinshikin chilakej cha Abigayil. Nfumwend wakwata mupak uyimp wafanyina kwikal ni yibudikin yiyimp nakash kud antu awonsu a mu chikumbu chend. Abigayil watumbuka kapamp kamwing. Wapandisha mipim mulong wasadina ukaliweny wa kujingunin yom. (1 Sam. 25:14-23, 32-35) Ukaliweny wa kujingunin yom ukutwish kutukwash kand chisu tufanyidina kulond ni cha kuninet. Ni ukutukwash kand kuyibangin antu akwau pa chisu chikwetau yakamish.—1 Tes. 4:11.

KUDISH UKALIWENY UKUTWISHA KUKUKWASH

Nambaz changadim ushich ni utangin broshir “Yaku ku Yipul 10 Yikatau Ansand Kwiyipul.” Pa ribau pad Bibil waburilangay kal, pad kand karne ni bik. — Kwilej kutang ni kufund kukukukwash mutapu ik? (Tal paragraf wa 11)

10-11. Mutapu ik ukutwisha kutaninamu ey ni antu akwau anch wij kutang ni kufund nawamp? (Tal kand chipich.)

¹⁰ Amband in Kristu afanyidin kukudish ukaliweny ukutwisha kuyikwash. Ukaliweny umwing ukutwishay changadim kwilej ku wanikanch ukutwish kumukwash mu mwom. Shinshikin yilakej yikemp ey.

¹¹ Kwilej kufund ni kutang nawamp. Mu jindond jimwing, kutang ni kufund akat kuman mud kukwetap kwau usey kud muntu mband. Pakwez, yid yom ya usey nakash kud mwin Kristu mwawonsu.d (1 Tim. 4:13) Chawiy kangal kulik chom ap chimwing chikukangesh kwijik kutang ni kufund nawamp. Yikukukwash nchik? Ukaliweny umwing ukukukwash kuman mudimu. Ukwikal mwin kwilej ni mulej muwamp wa Dizu dia Nzamb. Kusutamu yom yiney yawonsu, ukwikal piswimp ni Yehova piutangina Dizu dend ni kuditongijokin.—Yos. 1:8; 1 Tim. 4:15.

12. Mutapu ik ukutwishay Jinswir 31:26 kukukwash kwijik mutapu wa kulond?

¹² Ileja mutapu wa kwambamb nau antu nawamp. In Kristu afanyidin kwij mutapu wa kwambamb nawamp. Piur pa mulong winou, mwin kwilej Jakobu uletin chiyul palondinay anch: “muntu mwawonsu ufanyidin kuswakal kutesh, pakwez ashimpish muchim pa kulond.” (Jak. 1:19) Anch watesh nawamp yom yilondinau antu akwau, umekeshin ranaken, ap “kwitek pa ndond ya antu” akwau. (1 Pita 3:8) Anch waman anch uteshinap yom yilondinay muntu ap wijap mutapu wiyovilay, mwipula yipul yiwanyidina. Itekina chisu cha kutongijok kurutu kwa kumwipul. (Jnsw. 15:28) Iyipula anch: ‘Yom nikimbina kulond yiwapin kamu ni yikasikeshin? Yid ya kalimish ni ya ranaken?’ Ilejina ku chilakej chiwamp cha anambaz aswila ni ija mutapu wa kwambamb nawamp. (Tang Jinswir 31:26.) Tesh mutapu ulondinau yom ni mutapu uyilondinau. Anch wijik yom yiney nawamp, chikukuswapel kwikal mu urund ni antu akwau ni kwikal kand nau mu chisambu.

Nambaz changadim ni makwend, akat kwambamb ni mwin kulandish yom pa chiku. — Amband ileja midimu ya ku chikumbu akat kukwash majuku mau ni chikumangen (Tal paragraf wa 13)

13. Mutapu ik ukutwisha kwijik midimu ya ku chikumbu? (Tal kand chipich.)

¹³ Ileja midimu ya ku chikumbu. Jindond jivud, amband akwatakening nakash ni midimu ya ku chikumbu. Makwey ap anambaz akweta ukaliweny akutwish kukukwash kwikal ni ukaliweny ukweta nich kuswir. Nambaz Cindy ulondin anch: “Chipan chimwing changinkay maku wanfudinasha kusanger midimu ya usu. Nileja kwisuk, kukomb, kuchim ni kwilej yom yiney kwakwasha kwikal ni mwom uswapela mulong wa kumusadin Yehova. Maku wanfudisha kand kwikal mwin kwakan ni kwakwasha kand kwijikijan ni akadivar nau anambaz adinga ni mikadil yiwamp nakash nafanyina kwimburij.” (Jnsw. 31:15, 21, 22) Mband wija midimu ni mwin kwakan, ukwikal chiyukish kud muntu mwawonsu mu dijuku ni mu chikumangen.—Jnsw. 31:13, 17, 27; Mid. 16:15.

14. Yom ik wilejidina ku chilakej cha Crystel, ni yom ik ufanyidina kulam mu manangu?

¹⁴ Ileja kwisadinap yom amwiney. Kwijik kwisadinap yom kud kwa usey nakash kud in Kristu awonsu aswila. (Fil. 4:11) Nambaz Crystel ulondin anch: “Anvaj am ankwasha kutond nawamp yom nafanyina kwilej ku shikol mulong wa kwikal ni ukaliweny wa kusal midimu ya makas. Tatuku wankasikesha kwilej shikol ya kuchim, ni yamekana anch yid ya usey nakash.” Kuwejaku ukaliweny wa kwilej mulong wa kwikal ni mudimu uwamp, chid cha usey kwijik mutapu wa kusadin nfalang nawamp ni kujilam. (Jnsw. 31:16, 18) Anch wadandamen kwikal ni yom yikemp ni kwipuk kuland yom yakad usey chinech chikukwash kusal yom yivud mu mudimu wa Yehova.—1 Tim. 6:8.

KWIRIJEK MULONG WA YISEND YA MACHUKU MA KURUTU

15-16. Mulong wak anambaz ayangadim ad a usey? (Marko 10:29, 30)

¹⁵ Anch wakudish mikadil ya mu spiritu ni ukaliweny, ukwikal wirijekina mulong wa yisend ya machuku ma kurutu. Shinshikin yilakej yikemp ya yom ufanyidina kusal.

¹⁶ Ukutwish kukwat mupak wa kushal mujich mu chisu kanang. Kukwatijan ni mazu malonday Yesu amband amwing akat kutond kulik kwachik, ap anch kushal mujich chid chom chakad kukasikeshau ndond jimwing. (Mat. 19:10-12) Antu amwing akutwish kushal ajich mulong wa mayingishin kushalijan. Ikal ni kashinsh anch Yehova ni Yesu kakatap kuyipipej in Kristu ajich. Pa mangand mawonsu anambaz ajich ashil chilakej chiwamp mu yikumangen. Rukat rau ni kuyibangin antu akwau rikat kuyibachik anambaz in Kristu kwikal anambaz a mu spiritu ni a maku aswila mu spiritu.—Tang Marko 10:29, 30; 1 Tim. 5:2.

17. Mutapu ik ukutwishau anambaz ayangadim kwirijek katat mulong wa mudimu wa chisu chawonsu?

¹⁷ Ukutwish kwikal kashalapol wa chisu chawonsu. In Kristu amband akwet chibachikin chiwamp piur pa mudimu wa kulejan usadikina pa mangand mawonsu. (Kus. 68:11) Ov, ukutwish kwirijek kusambish katat mulong wa kusal mudimu wa chisu chawonsu? Ukutwish kusal mud chibol, kwipan ku mudimu wa kutung, ap kusadin ku Betel. Lembil mulong wa ntong jey. Isamba ni antu akwau akweta niyau ntong jinej ni kimb mutapu ukutwisha kusal mulong wa kuwanyish yitina. Tenchik mutapu ukutwisha kuwanyish rutong riner. Anch wikal kashalapol wa chisu cha wonsu, chikukuswapel kusal yom yivud mu mudimu wa Yehova.

Nambaz changadim wambambin ni chisak cha anambaz. Umutadin mukadivar mujich ukwashina kurijek mu Chot cha Want. — Anch utongin kwachik, ufanyidin kutond mbay ney nich kubabal nakash (Tal paragraf wa 18)

18. Mulong wak nambaz ufanyidin kutond mbay wa uruw ni kubabal? (Tal kand chipich.)

¹⁸ Ukutwish kutond kwachik. Mikadil ni ukaliweny twisambina kal ey yikukukwash kwikal mband chifuv. Chakin kamu, anch utongin kwachik ukutwish kutond mbay wa uruw ni kubabal. Ud mupak umwing wa usey nakash pakach pa mipak ukutwisha kukwat. Vurik anch ukwikal mwishin mwa umutakel wa ikundj ukukwata. (Rom 7:2; Efes 5:23, 33) Chawiy iyipula anch: ‘Ov, ud mwin Kristu uswila? Ov, utekin yisakin ya mu spiritu pa ndond ya kusambish? Ov, ukat kukwat mipak ya manangu? Ov, ukat kwitiyin kurumbuk wend? Ov, ukat kulimish amband? Ov, ukwet ukaliweny wa kwimbangin mu spiritu, ku mujimbu, ni mu manangu? Ukat kuwanyish yisend yend nawamp? Chilakej, yisend yikwetay mu chikumangen ov, ukat kuyiwanyish?’ (Luka 16:10; 1 Tim. 5:8) Chakin kamu, anch ukimbin kutan ikundj muwamp, ni yey ufanyidin kwikal mband muwamp.

19. Mulong wak mband ufanyidin kusangar pamutazukinau anch “nkwash” wa nfumwend?

¹⁹ Bibil ulondin anch mband muwamp ud “mwin kumukwash” nfumwend ni ‘ukushakamay’ nend. (Dis. 2:18) Mazu minam mamupwishin muntu mband kalimish? Bwat kwau! Chisend cha mband mud nkwash chikat kumulimish. Vurik anch ap mu Bibil Yehova amutazukin anch “nkwash.” (Kus. 54:4; Heb. 13:6) Mband ud nkwash wakin kud nfumwend anch wamunung chikas ni kumukwash ku mipak yikwatinay mulong wa kukwash dijiku. Mulong umukatin Yehova, ukat kusal yom mulong wa kuyikwash antu akwau kuman mikadil yiwamp ya nfumwend. (Jnsw. 31:11, 12; 1 Tim. 3:11) Ukutwish kwirijek mulong wa chisend chinech cha machuku ma kurutu kusutin kumukat Yehova nakash ni mu kuyikwash antu akwau pa uchidia kol kwen ni mu chikumangen.

20. Yom ik yiwamp yifanyidinay maku kusal mulong wa dijiku dend?

²⁰ Ukutwish kwikal maku. Kupwa kwa kwachik ey ni nfumwey ukutwish kwikalany nau an. (Kus. 127:3) Chid cha usey kutongijokin pa yom yikutwisha kukukwash kwikal maku muwamp. Mikadil ni ukaliweny twisambina kal ey yikukukwash kwikal mband ni maku. Rukat, ranaken ni kushimpish muchim kwey yikutwish kukwash dijuku dey kwikal ni musangar ni an ey akwiyov anch ad mu diking.—Jnsw. 24:3.

Yipich: Anambaz ayangadim alejanangau kwiur oku ipanin mu mijikit ya uteokras. 1. Nambaz utongijokidina pa yom yatangangay waburilang kal Bibil ni ukat kusip nich ruchingej. 2. Nambaz wading wambambina ni mwin kulandish ushich ku tebur mu chikumbu cha kudil ku Betel. 3. Nambaz wading utangina broshir umutangidin maku umwing mufund mu mudimu wa kulejan. 4. Nambaz wading umutadina mukadivar mujich ku chot cha Want ulejen pa prezantwar ni nambaz ipal. — Ayangadim avud ileja mifund ni kuyisadin ikala in Kristu aswila (Tal paragraf wa 21)

21. Wiyovil nchik piur pa anambaz etu, ni mulong wak? (Tal chipich cha pa chibur.)

²¹ Tukukatinany en anambaz, mulong wa yom yawonsu usadinanya mulong wa Yehova ni antu end. (Heb. 6:10) Usadinany usu wa kukudish mikadil ya mu spiritu kukudish ukaliweny mulong wa kuwapish mwom wen ni wa antu ushichanya nau, ni kwirijek mulong wa yisend ya machuku ma kurutu. Ukwetany usey nakash mu dirijek dia Yehova!

MUMINY 137 Amband Ashinshamena, Anambaz in Kristu

a En anambaz ayangadim akatish ukwetany usey nakash mu chikumangen. Ukutwish kwikalany in Kristu aswila kusutil kukudish mikadil ya win Kristu, kukudish ukaliweny ukutwisha kukukwashany, ni kwirijek mulong wa yisend ya machuku ma kurutu. Anch wasalany mwamu ukusangerany yiyukish yivud mu mudimu wa Yehova.

b KURUMBURIL KWA MAZU: Mwin Kristu uswila amutakedining kud spiritu wa Nzamb, kulik manangu ma mangand. Ukat kwimburij chilakej cha Yesu, ukat kusal usu wakulam urund wa piswimp ni Yehova, ni ukat kwipan mulong wa kuyikwash antu akwau.

c Tal Chinong cha Kalam, cha Ngond wa 2, 2021, paj. 14-19.

d Mulong wa kwisambin piur pa usey wa kutang tal mutu wa mulong “Pourquoi est-il important que les enfants lisent? 1re partie: Lire un livre ou regarder un film?” pa jw.org.