Yipul ya in Kutang

Patenchikay Yesu Yakuda ya Urel ya Mwant, kwisu kwadingau in kwilej akwau 70 asambelay kutum mu mudimu wa kulejan? Ov, amuchina?

Tufanyidinap kutong anch mulong awiy kadingapaku pa chisu chatenchikay Yesu Yakuda ya Urel ya Mwant, in kwilej 70 kayitiyap kud Yesu ap anch amuchina. Yesu wakata kwikal nau atwimbuy end pa chisu chinicha.

In kwilej 12 ni akwau 70 awonsu Yesu wayitiyija. Chakusambish Yesu watonda in kwilej 12 pakach pa amakundj avud, wayitazuk anch atwimbuy. (Luka 6:12-16) Wading mu Galaliya ‘payikumangejay atwimbuy Dikum ni Yaad’ kupwa ‘wayituma kulejan Want wa Nzamb ni kwokan.’ (Luka 9:1-6) Kupwa, padingay mu Yudeya, Yesu “watonda kand in kwilej akwau makum sambwad.” (Luka 9:51; 10:1) Chawiy, Yesu wading nau in kwilej ku jindond kushalijan alejanang piur pend.

In Yuda ikala in kwilej a Yesu afanyina kusal musambu wa Pasak muvu ni muvu, pamwing ap ni majuku mau. (Kub. 12:6-11, 17-20) Mu chisu chikemp kurutu kwa rufu rend, Yesu nau atwimbuy end aya ku Yerusalem. Pakwez kayitazukap kwend in kwilej end awonsu ading mu Yudeya, mu Galaliya ni mu Pere. Pamwing ap, Yesu wakata kwikal nau atwimbuy end pa chisu chinicha. Wayileja anch: ‘Am nad nisotin nakash kuda yakuda ya Pasak yiney pamwing niyenen kurutu kwa kuman mar.’​—Luka 22:15.

Kwading diyingishin diwamp. Yesu wading piswimp ni kufa mud ‘Mwan a Mukoku wa Nzamb ukudosha chitil mu mangand.’ (Yoh. 1:29) Chom chinech chafanyina kusadikin mu Yerusalem, ndond yapaninangau yakupesh kud Nzamb. Mukoku wa Pasak wayivurishang in Isarel mutapu wayikwolau mu Idjibit kud Yehova. Pakwez kusutin yakupesh yend, Yesu wasala yom yivud nakash. Wafanyina kuyikwol antu awonsu ku chitil ni rufu. (1 Kor. 5:7, 8) Kusutin chakupesh cha Yesu, atwimbuy Dikum ni Yaad afanyina kwikal chikunku cha mufulandal wa chikumangen cha win Kristu. (Efes 2:20-22) Chisangareshin nakash pa kwijik anch Yerusalem musumb utumbila ukwet ‘mufulandal wa mayal 12’ pafundinau ‘majin 12 ma atwimbuy 12 a Mwan a Mukoku.’ (Kuj. 21:10-14) Chakin kamu, atwimbuy ashinshamena afanyina kwikal ni chisend cha usey nakash mulong wa kuwanyish chitongijok cha Nzamb. Chawiy tuteshin mulong wak Yesu wakata kwikal nau pa chisu cha Pasak wa nsuden ni mulong wa chinship chafanyina kulondulap, charumburik anch: Yakuda ya Urel ya Mwant.

In kwilej 70 ni akwau kadingap ku chinship chinech pamwing ni Yesu. Pakwez, in kwilej awonsu amekesha kushinshaman afanyina kutaninamu mu chinship chinech chatenchikay Yesu, charumburik anch: Yakuda ya Urel ya Mwant. In kwilej awonsu inay ikala in Kristu azizidinau many afanyina kwandam mu mansuk ma want, mayilejau atwimbuy kud Yesu uchuku winiwa.​—Luka 22:29, 30.