En Akadivar Ansand​—Mwimburijany Marko ni Timote

1-2. Yom ik yafanyina kumukangesh Marko ni Timote kuyisadin nakash antu akwau?

AKADIVAR ansand, ov, ukwetany impu ya kusal yom yivud mu mudimu wa Nzamb ni kuyikwash antu akwau mu chikumangen? Pakad kwidjidjek. Tukwet musangar nakash wa kuman mutapu wipaninau ansand avud mulong wa kuyisadin antu akwau! (Kus. 110:3) Pakwez, kud yikokujol ukutwishanya kurish nich. Ov, widjidjekin kusal yom yivud mu mudimu wa Nzamb mulong wijap mutapu ukwikala mwom wey ap kwisu kukukutumay Yehova? Ov, widjidjekin kwitiy chisend mulong umen anch ukuchiwanyishap kwey nawamp? Anch mwawiy, ijik anch udap muntu wa kusambish kwiyov mwamu.

² Marko ni Timote niyau arisha ni yikokujol yiney. Pakwez kov wom wa kulik kwijik mutapu ukwikala mwom wau ni kuburen ukaliweny kwayikangeshap kusal yom yivud mu mudimu wa Nzamb. Chimeken anch Marko wading ushich ni makwend mu chikumbu chau chiwamp pamutazukau kud kambuy Paul ni Barnabas mulong wa kuya nau mu weny wau wa kusambish wa umishoner. (Mid. 12:12, 13, 25) Marko wadokala kwol kwau mulong wakata kusal yom yivud mu mudimu wa Yehova. Cha kusambish, wabuukina ku Antiosh. Kupwa wamutwala kand Paul ni Barnabas ku jindond jikwau ja kulemp. (Mid. 13:1-5) Mutapu umwing kand, Timote niyend wading ushich ni anvaj end pamutazukau kud Paul mulong wa kusal nend mudimu wa kulejan. Mulong wading kwend nsand ni wakad ukaliweny, Timote wafanyina kwiyov anch kawanyidinap kuya mu mudimu pamwing ni Paul. (Ilakej ni 1 Korint 16:10, 11 ni 1 Timote 4:12.) Pakwez witiya kutazuk kwa Paul, mud chibudikin, wikala ni yiyukish yivud.​—Mid. 16:3-5.

3. (a) Mutapu ik twija anch Paul wasangera nakash ukwash wa Marko ni Timote? (2 Timote 4:6, 9, 11) (Tal kand yipich.) (b) Yipul ik tukwakula mu mutu wa mulong winou?

³ Marko ni Timote ikala ni ukaliweny wa usey ni ileja kuwanyish yisend ku usand wau. Paul wasangera nakash ukwash wa ansand inay, chawiy mu kusut kwa chisu wakata kwikal nau piswimp pajinguninay anch ud piswimp ni kufa. (Tang 2 Timote 4:6, 9, 11.) Mikadil ik yadingay nich Marko ni Timote yamubachika Paul kuyikat nakash ni kuyichingejin? Mutapu ik ukutwishau akadivar ansand kuyimburij? Ni akadivar ansand akutwish kutaninamu mutapu ik mu chiyul cha rukat cha Paul?

MWIMBURIJA MARKO—IKAL USWAKELA KUMUSADIN NZAMB NI ANTU AKWAU

4-5. Mutapu ik wipanay Marko mulong wa kuyisadin antu akwau?

⁴ Kukwatijan ni referans umwing, mulong wa kuyisadin antu akwau, chitin kwipan mu kuyikwash “nich mushiku ni pakad kuziy.” Marko washa chilakej chiwamp pa mulong winou. Palikay Paul kwitiy anch amusend mu weny wau wa kaad wa umishoner, chimeken anch Marko waziya nakash. (Mid. 15:37, 38) Pakwez chinech chamukangeshap Marko kuyisadin akadivar nau anambaz nend.

⁵ Marko witiya kuya pamwing ni musanyend Barnabas. Kupwa kwa mivu piswimp 11, Marko wading pakach pa antu amukwasha Paul pamutekau mu rukan kapamp ka kusambish mu Rom. (Flm. 23, 24) Paul wasangera ukwash wend nakash, chawiy umulejen Marko mud ‘mwin kumukasikesh nakash.’​—Kol. 4:10, 11.

6. Mutapu ik wataninayamu Marko kusutin kwibomb nau in Kristu aswila mu spiritu? (Tal mazu ma kwinshin.)

⁶ Marko wataninamu nakash kusutin kwibomb nau in Kristu aswila mu spiritu. Kupwa kwa kusutish chisu ni Paul ku Rom, Marko wabombakana ni Pita ku Babilon. Akudisha urund wa piswimp nakash, chawiy Pita wamutazuka anch “Marko, mwanam ikundj.” (1 Pita 5:13) Padandamenau kusal pamwing, chimeken anch Pita wamurumburilang murunend nsand yom yivud piur pa mwom wa Yesu ni mudimu wa kulejan, yom yafunday mu kusut kwa chisu mu Evanjil wend.a

7. Mutapu ik watwishay Mukadivar Seung-Woo kwimburij chilakej cha Marko? (Tal kand chipich.)

⁷ Marko wadandamena kukwatakan nakash mu mudimu wa Yehova ni kushal piswimp ni akadivar aswila. Mutapu ik ukutwisha kumwimburij Marko? Pamwing ap ukatin kusal yom yivud mu mudimu wa Yehova, chilakej kwikal nkwash a mudimu ap mukurump, pakwez uwanyishinap yitinau. Anch chid mwamu, kangal waziy. Pakwez dandamen kushinshikin pa yom ukutwisha kusal mulong wa Yehova ni chikumangen. Yawiy yom yamushikena Seung-Woo uda katat mukurump wa chikumangen. Padingay nsand wiyilakeja ni akadivar akwau ansand. Avud pakach pau ikala ni yisend kurutu kwendendiy. Seung-Woo waziya ni wayilejamu amakurump mutapu wiyovay. Mukurump umwing wamuleja kushinshikin pa yom yasalangay mulong wa kuyikwash antu akwau ap anch yadingap yimekena. Chiyul chinech chamubachika Seung-Woo kwipan mulong wa kuyikwash amapal ni antu akwau akweta kuswir kwa kuyikwash kuya ku yikumangan. Uvurikin anch: “Nashikena kwijik chirumburikina kusal yom yivud mulong wa antu akwau. Nova musangar udokiling ku kuyikwash antu akwau.”

MWIMBURIJA TIMOTE​—YIMEKESHINA ANTU AKWAU ANCH UYIBANGIDIN

8. Mulong wak Paul wamutonda Timote kumutwalaku mu weny? (Filip 2:19-22)

⁸ Paul wading ukwet kuswir kwa akadivar atakamena mulong wa kuchirik nau pamwing mu misumb yamupompatau. Cha kusambish, wamutonda Silas mwin Kristu ukweta ukaliweny mulong wa kumutwalaku. (Mid. 15:22, 40) Mu kusut kwa chisu Paul wamutonda kand Timote mulong wa kwibomb nend. Mulong wak Paul wakata kwibomb ni Timote? Diyingishin dimwing did anch, wading ni ntumb yiwamp. (Mid. 16:1, 2) Wayibanginang kand antu akwau.​—Tang Filip 2:19-22.

9. Mutapu ik wamekeshay Timote anch uyibangidin chakin kamu akadivar nau anambaz nend?

⁹ Pa chisu chasambishay mudimu wend pamwing ni Paul, Timote wamekesha anch wading uyibangidin antu akwau nakash kusutamu amwinend. Mulong wa diyingishin dined, Paul wamusha ku Bereya nich kashinsh anch ukuyikasikesh in kwilej asu a kwinikwa. (Mid. 17:13, 14) Pa chisu chinicha Timote wafanyina kwilej yom yivud kusutin chilakej cha Silas, muntu washala niyend ku Bereya. Mu kusut kwa chisu Paul wamutuma Timote amwinend ku Tesalonik mulong wa kuyikasikesh in Kristu mu musumb winou. (1 Tes. 3:2) Mu mivu piswimp 15 yalondulaku, Timote wileja kwov “ushon pamwing nau antu ovila ushon,” ni kuyanaken antu ading amena mar. (Rom 12:15; 2 Tim. 1:4) Mutapu ik ukutwishau ansand in Kristu kwimburij chilakej cha Timote?

10. Mutapu ik wilejay mukadivar Woo Jae kuyibangin nakash antu akwau?

¹⁰ Mukadivar Woo Jae wileja mutapu wa kuyibangin antu akwau nakash. Chisu chadingay nsand, Woo Jae wamana anch chading chimukasikedin kwambamb ni akadivar nau anambaz amapal. Chawiy, ku Chot cha Want, wimenang kwend kusu pa kuyilangwish, kupwa wasutang kapamp kamwing. Mukurump umwing wamukasikesha Woo Jae kusambish mambamb kusutin kuyilej ambay nend in Kristu yom yisangaredinay kud awiy. Mukurump wamukasikesha kand kutongijokin pa yom yikutwisha kuyisangaresh antu akwau. Woo Jae wasadina chiyul chinech mu mambamb mend nau antu akwau. Nlel Woo Jae ud mukurump wa chikumangen ni ulondin anch: “Katat chinswapedin kwambamb nawamp ni antu akweta mivu kushalijan. Nisanger pa kwijik anch nikat kutesh nawamp yom yirishinau nich antu akwau. Mwamu chinswapedin kuyikwash ambay nam in Kristu.”

11. Mutapu ik ukutwishau akadivar ansand kwilej mutapu wa kuyibangin antu akwau mu chikumangen? (Tal kand chipich.)

¹¹ En akadivar ansand ukutwishany niyen kwilej mutapu wa kuyibangin antu akwau. Chisu udanya ku yikumangan, ambambany nau antu a mivu kushalijan ni adokila ku jindond kushalijan. Yipulap mutapu wiyovilau ni yitesha. Anch wasal mwamu, ukutwish kwijik mutapu wa kuyikwash. Pamwing ap ukutwish kujingunin anch ambay a uruw amwing ada amapal akwet kuswir kwa kwijik mutapu wa kusadin application JW Library^®. Ap kand ukutwish kuman anch akwet kuswir kwa muntu wa kuya nend mu mudimu wa kulejan. Ov, ukutwish kand kuyikwash kwijik mutapu wa kusadin telefon wau ap kuya nau mu mudimu wa kulejan? Anch wayikwash akadivar nau anambaz mu mitapu yiney ukutwish kwikal chilakej chiwamp nakash mu chikumangen.

CHIYUL CHA PAUL CHIKUTWISH KUKUKWASH

12. Mutapu ik ukutwishau akadivar ansand kutaninamu mu chiyul chamwinkishau Timote kud Paul?

¹² Paul wamwinkisha Timote chiyul cha usey chafanyina kumukwash mu mwom ni mu mudimu wend. (1 Tim. 1:18; 2 Tim. 4:5) Niyen akadivar ansand, chiyul cha Paul chikutwish kukukwashany. Mutapu ik? Chisu utangina mikand yaad yafunday Paul kud Timote, sal mud wakufundinay ey, ni man chiyul ik ukutwisha kusadin mu mwom wey. El tumananyaku yilakej yikemp.

13. Yom ik yitina kusal mulong wa kulamat kud Yehova?

¹³ ‘Ifumba amwiney nich chitongijok cha kulamat kud Nzamb.’ (1 Tim. 4:7b) Kulamat kud Nzamb chirumburikin ik? Chirumburikin kwikal ushinshamena kud Yehova ni kusal yom yimusangareshina. Twavadikap ni mwikadil winou, chawiy tufanyidin kuukudish. Mutapu ik? Mazu ma Grek makarumwinau anch “ifumba amwiney” amasadinang nakash mulong wa kwisambin piur pa in kubambil iyijidishang kurutu kwa kubambil. In kubambil inay ading afanyidin kukudish yaku yiwamp mulong wa kuwin. Niyetu tukwet kuswir kwa mikadil yiney mulong wa kusej piswimp ni Yehova.

14. Rutong ik tufanyidina kwikal nich chisu tutangina Bibil? Let chilakej.

¹⁴ Chid cha usey kwikal ni chaku cha kutang Bibil dichuku dawonsu. Ni chid kand cha usey kuvurik anch chisu tutangina Bibil, rutong retu rid ra kusej piswimp ni Yehova. Chilakej, chisu utangina rusang ra Yesu ni nsand ntakel wadinga mpich, yom ik ukutwisha kwilej piur pa Yehova? (Mar. 10:17-22) Nsand winou wading ukwet kamu kashinsh anch Yesu ndiy Mesiya, pakwez kadingap ni ritiy mulong wa kumulondul. Chikalap nchik mwamu, Yesu ‘wamukata.’ Ov, mutapu wambambay Yesu ni nsand winou ukupukwinap? Chakin kamu, Yesu wakata anch akwata mupak uwamp. Yesu wamekesha kand rukat ra Yehova mulong wa nsand winou. (Yoh. 14:9) Piutongidina pa rusang riner ni mashakamin mey, iyipula anch: ‘Yom ik nifanyidina kusal mulong wa kumusejin Yehova piswimp ni kuyisadin antu akwau nakash?’

15. Mulong wak chid cha usey kud mukadivar nsand kwikal chilakej chiwamp? Let chilakej. (1 Timote 4:12, 13)

¹⁵ ‘Ikal chilakej kud antu ashinshamena.’ (Tang 1 Timote 4:12, 13.) Paul wamukasikesha Timote kulik kwau kwimen ching pa kukudish ukaliweny—mud kutang ni kufundish—pakwez kand—kukudish mikadil mud rukat, ritiy, ni kwishitul. Mulong wak? Mulong yom yisadinay muntu yid ya usey nakash kusutamu yom yilondinay. Tong bil anch akulej kusal diskur disambidina piur pa mushiku wetu mu mudimu wa kulejan. Chikukuswapel nakash kwisambin mutu wa mulong winou anch wipanining nakash mu mudimu wa kulejan. Chikuyiswapel kand antu ufundishina kusadin yom ulondina anch aman ang niyey uyisadidining.—1 Tim. 3:13.

16. (a) Mu mitapu ik yitan yikutwishay nsand mwin Kristu kusha chilakej chiwamp? (b) Mutapu ik ukutwishay mukadivar nsand kusha chilakej chiwamp mu “kulond”?

¹⁶ Mud mulejenau mu 1 Timote 4:12, Paul wajimbula mitapu yitan yikutwishay nsand kusha chilakej chiwamp. Umen nchik anch watongijokin pa mitapu yiney yawonsu mu dilejan dey da pakampwil? Chilakej, tong bil mud anch ukimbin kusha chilakej chiwamp piur pa mutapu wey wa “kulond.” Tongin mutapu ukutwisha kusadin mazu mulong wa kuyikasikesh antu akwau. Anch uchid kal ku chikumbu cha anvaj ey, ufanyidin kuyijikitish chisu chawonsu mulong wa yom yikusadidinau. Kupwa kwa yikumangan, ukutwish kumulej mukadivar ap nambaz yom wasangerang nakash mu chikunku chasalangay. Ukutwish kand kwikasikesh kupan yakul ku yikumangan mu mazu mey. Usu usadina mulong wa kusha chilakej chiwamp mu mutapu wey wa kulond ukumekesh anch ukat kupam mu spiritu.​—1 Tim. 4:15.

17. Yom ik yikumukwasha mukadivar nsand kuwanyish mipak yend ya mu spiritu? (2 Timote 2:22)

¹⁷ “Chin maku mayimp ma . . . ku usand wey. Surab kutentam.” (Tang 2 Timote 2:22.) Paul wamukasikesha Timote kurishikish maku mafanyina kumukangesh kusal yom yivud mulong wa Yehova ni kuziyish urund wend ni ndiy. Ukutwish niyey kujingunin anch ap yom yimwing yakad kwau kwikal yiyimp, yikutwish kukushil chisu chikemp cha kwipan mu mijikit ya mu spiritu. Chilakej, tongijokin pa chisu ukata kusutish mu milong ya masengan, kwandam pa kapend, ap masengan ma video. Ov, umen nchik anch wasadin chisu chinech chakwel usal yom yivud mulong wa Yehova ni antu akwau? Pamwing ap ukutwish kwipan mulong wa kurijek Chot cha Want ap kulejan ku prezantwar. Anch wipan mu mijikit mud yiney, ukutwish kwikal nau arund akutwisha kukukwash kwitekin mipak ya mu spiritu ni kuyiwanyish.

KUYISADIN ANTU AKWAU KUKAT KULET YIYUKISH

18. Mulong wak tukutwisha kulond anch Marko ni Timote ikala ni mwom uwamp ni usangareshina?

¹⁸ Marko ni Timote ipana mulong wa kuyisadin antu akwau nakash, ni ikala ni mwom uwamp ni usangareshina. (Mid. 20:35) Marko wendangana ku jindond ja kulemp mulong wa kuyikwash akadivar nau anambaz. Wafunda kand rusang risangareshina piur pa mwom ni mudimu wa Yesu. Timote niyend wamukwasha Paul kusal yikumangen yisu ni kuyikasikesh akadivar nau anambaz. Chakin kamu, Yehova wasangera muchim wa kwipan wamekeshay Marko ni Timote.

19. Mulong wak akadivar ansand afanyidin kushinshikin chiyul cha Paul chamwinkishay Timote, ni chibudikin ik chikwikalaku?

¹⁹ Rukat radingay ni Paul mulong wa Timote rimeken patok mu yom yamufundinay nsand winou mu mikand yend. Mikand yiney yapepilau yimekeshin kand anch Yehova ukukatinany nakash en ansand. Ukatin anch utwishany mu mwom. Chawiy lamany mu manang chiyul cha rukat cha Paul ni kudishany impu ya kuyisadin antu akwau nakash. Anch wasalany mwamu ukwikalany ni mwom uwamp nakash ni ukushikenany “kutambul mwom udia wakin” mu machuku ma kurutu.​—1 Tim. 6:18, 19.