Yikwasha in Kwilej a Bibil Kukwat Mupak wa Kumusadin Yehova

1-2. (a) Mulong wak in kwilej a Bibil amwing akat kwidjidjek pa kukwat mupak wa kumusadin Yehova? (b) Yom ik tukushinshikina mu mutu wa mulong winou?

OV, widjidjeka kurutu kwa kukwat mupak wa kwikal kaman wa Yehova? Pamwing ap wova wom anch ambay ney a mudimu, aruney ap antu a mu dijuku dey akukukarumukin. Ap wova kand wom anch ukutwishap kushakam kukwatijan ni mbil ja Nzamb. Anch mwawiy, ukutwish kutesh mulong wak in kwilej a Bibil amwing akat kwidjidjek pa kukwat mupak wa kumusadin Yehova.

² Yesu wading wij anch wom mud winou ukutwish kuyikangesh antu kuya kurutu mu spiritu. (Mat. 13:20-22) Pakwez kaziyap kuyikwash antu awonsu ading idjidjekina kumulondul. Wayileja in kwilej end mutapu ukutwishau kuyikwash antu mud inay (1) kujingunin yom yiyikangeshina kuya kurutu, (2) kumukat Yehova nakash, (3) kutek yom ya usey pa ndond ya kusambish, ni (4) kupandakan yikokujol yau. Mutapu ik tukutwisha kusadin yom yalonday Yesu kud in kwilej end pitusadidina buku Sanger Mwom Chikupu! mulong wa kuyikwash in kwilej kukwat mupak wa kumusadin Yehova?

MUKWASHA MWIN KWILEJ WEY KUJINGUNIN YOM YIMUKANGESHINA KUYA KURUTU

3. Yom ik pamwing ap yamukangesha Nikodem kukwat mupak wa kwikal mwin kwilej wa Yesu?

³ Nikodem, ntakel mujim wa in Yuda warisha ni yom yamukangesha kwikal mwin kwilej wa Yesu. Pasuta angond piswimp musamban kupwa kwa Yesu kusambish mudimu wend wa kulejan, Nikodem wajingunina anch Yesu wading Mesiya watumau kud Nzamb. (Yoh. 3:1, 2) Pakwez wakata kwambamb ni Yesu uchuku. Mulong wak? “Mulong wa wom wa in Yuda.” (Yoh. 7:13; 12:42) Pamwing ap watonga anch ukushadish yom yivud nakash anch wikal mwin kwilej wa Yesu.a

4. Yesu wamukwasha nchik Nikodem kutesh yom yading yichingejinay Nzamb anch asal?

⁴ Nikodem wading wij Chijil, pakwez wading ukwet kuswir kwa mwin kumukwash kutesh yom yading yichingejinay Yehova anch asal. Mutapu ik wamukwashau kud Yesu? Yesu wading ukatin kwambamb ni Nikodem ap uchuku. Yesu wamuleja Nikodem patok yom yading yifanyidinay kusal mulong wa kwikal mwin kwilej wend: Wamuleja kukarumuk ku yitil yend, kutambul dibatish mu mem, ni kumwitiyij mwan a Nzamb.​—Yoh. 3:5, 14-21.

5. Mutapu ik tukutwisha kumukwash mwin kwilej wa Bibil kujingunin yom yimukangeshina kuya kurutu?

⁵ Ap anch mwin kwilej wa Bibil ukwetaku ronganyin kanang piur pa yom yida mu Bibil, tufanyidin kumukwash kuman yom yimukangeshina kukwat mupak wa kumusadin Yehova. Mudimu wa ku mujimbu ap rupompat ra mu dijuku yawiy yimukangeshina pamwing ap kukul mu spiritu. Chawiy mud Yesu, ishila chisu cha kumukwash. Ukutwish kumutazuk mulong wa kusutish nend chisu pamwing ap kukutwalaku kwi ndond kanang. Kusal nend yom mu mutapu winou kukutwish kumukwash kukufungwil muchim ni kukulej yom yirishinay nich. Mukasikesha mwin kwilej wey kuswimp yom kanang mu mwom wend kadap mulong wa kukusangaresh ey pakwez mulong wa kumekesh rukat rend kud wa Yehova.

6. Mutapu ik ukutwisha kumukwash mwin kwilej kwikal ni kutakaman kwa kukwat mupak wa kumusadin Yehova? (1 Korint 16:13)

⁶ Anch mwin kwilej wa Bibil wikal ni kashinsh anch Yehova ukumukwash kushakam kukwatijan ni mbil ja Bibil, ukwikal ni kutakaman kwa kusadin yom yilejinay. (Tang 1 Korint 16:13.) Chisend chey tukutwish kuchifanakesh ni cha mulej wa kushikol. Anch wavurik niyey chisu wading ku shikol, ov wading ukatin mulej wa mutapu ik? Pamwing ap ud mulej wakukwashang kwijik anch ukutwish kusal yom utongina kusal. Chilik chimwing kand, mulej muwamp wa Bibil kakatap kwimen kwend pa kumulej mwin kwilej wend piur pa yom yikatinay Nzamb anch asala, pakwez ukat kumwinkish kashinsh anch nich ukwash wa Yehova ukutwish kuswimp yom kanang mu mwom wend. Mutapu ik ukutwisha kusal mwamu?

MUKWASHA MWIN KWILEJ WEY KUMUKAT YEHOVA NAKASH

7. Yesu wayikwasha mutapu ik antu amuteshang kukasikesh rukat rau mulong wa Yehova?

⁷ Yesu wading wij anch rukat mulong wa Nzamb rafanyina kuyibachik in kwilej end kusadin yom yading yilejinau. Yisu yivud wayifundishang yom yafanyina kukasikesh rukat rau mulong wa Tatukwau uda mwiur. Chilakej, wamufanakesha Yehova ni ikuny ukata kuyinkish anend yom yiwamp. (Mat. 7:9-11) Pakach pa antu amuteshang Yesu amwing pakach pau kadingap pamwing ap ni tatuku wa rukat mud winou. Tongin mutapu wafanyinau kwiyov payilejay Yesu rusang ra tatuku ukweta rukat, wamwaka mwanend wachirika ku chikumbu kupwa kwa kusal yom yiyimp. Yesu wayikwasha antu kuman anch Yehova uyikatin nakash ni ukatin chakin kamu kuyikwash.​—Luk. 15:20-24.

8. Mutapu ik ukutwisha kumukwash mwin kwilej wa Bibil kumukat Yehova nakash?

⁸ Niyey ukutwish kumukwash mwin kwilej wa Bibil kumukat Yehova nakash anch wakasikeshin pa mikadil ya Nzamb chisu umufundishina. Chisu wilejinanya, mukwasha kuman kukwatijan kuda pakach pa yom wilejinanya ni rukat ra Yehova. Chisu wisambidinanya piur pa difut mukwasha kuman mutapu dimutadina ndiy pakampwil. (Rom 5:8; 1 Yoh. 4:10) Anch mwin kwilej wajingunin chilik chimukatinau ndiy pakampwil kud Yehova chinech chikumubachik niyend kumukat nakash .​—Gal. 2:20.

9. Yom ik yamukwasha Michael kuswimp?

⁹ Shinshikin chilakej cha Michael, uda mu Indonezi. Amulidina mu uyakin pakwez katambulap dibatish. Padingay ni mivu 18, waya mwi ngand yindj mulong wa kusal mudimu wa ushofer. Mu kusut kwa chisu watana, pakwez wamusha mukajend ni mwanend mulong wa kudandamen kusadin mudimu mwi ngand yindj. Kupwa kwa chisu chikemp, mukajend ni mwanend asambisha kwilej Bibil ni kuya kurutu. Kupwa kwa rufu ra makwend, Michael wachirika mwi ngand yau mulong wa kumulam tatukwend, ni wasambisha kwilej Bibil. Chikunku “Ileja Chikurikina” cha dilejan da 27 mu buku Sanger Mwom Chikupu! chamupukuna Michael nakash. Patonginay piur pa mutapu wafanyinay kwiyov Yehova, ukat kumuman Mwanend waman lel mar, Michael wasambisha kudil. Wasambisha kumekesh kujikitish mulong wa difut ni wakwata mupak wa kuswimp ni kutambul dibatish.

MUKWASHA MWIN KWILEJ WEY KUTEK YOM YA USEY PA NDOND YA KUSAMBISH

10. Yesu wayikwasha in kwilej end a kusambish mutapu ik kutek mudimu wa kulejan pa ndond ya kusambish? (Luka 5:​5-11) (Tal kand chipich.)

¹⁰ In kwilej a kusambish ajingunina pakad kulab anch Yesu wading Mesiya washilawamu, pakwez ading akwet kuswir kwa ukwash mulong wa kutek mudimu wa kulejan pa ndond ya kusambish. Pita ni Andre ading ikadin kal in kwilej mu chisu kanang kurutu Yesu ayitazuk mulong wa kumulondul chisu chawonsu. (Mat. 4:18, 19) Ading in kuta ansh a usu, pamwing ap kuwejinaku Yakobu ni Yohan. (Mar. 1:16-20) Andre ni Pita “pashau mand mau,” ading pamwing ap itenchikang kal mulong wa kuwanyish maswir ma dijuku dau. Yom ik yayikwasha kutek mudimu wa kulejan pa ndond ya kusambish pa ndond pa kukimb nfalang jivud? Rusang rida mu Luka ritulejin anch Yesu wasala chilay chayinkisha kashinsh anch Yehova ukuwanyish maswir mau.​—Tang Luka 5:5-11.

11. Mutapu ik tukutwisha kusadin yom yatushikena mulong wa kukasikesh ritiy ra muntu twilejina nend?

¹¹ Tukutwishap kusal yilay mud mwasalay Yesu, pakwez tukutwish kumulej muntu twilejina nend Bibil piur pa mutapu ukatay Yehova kuyikwash antu amutekining ndiy pa ndond ya kusambish mu mwom yau. Chilakej, ov uvurikin mutapu wakukwashay kal Yehova chisu wasambisha kukumangan ku yikumangan? Pamwing ap chakwita kumulej mukurump wey wa mudimu anch ukusalap asaa a pa mutu dichuku da yikumangan. Chisu umulejina mwin kwilej wey yom ya kushikena, murumburila mutapu wakasikana ritiy rey piwamana mutapu wayukishay Yehova mupak wey wa kutek difukwil dend pa ndond ya kusambish.

12. (a) Mulong wak tufanyidina kusend antu kushalijan mulong wa kututwalaku ku dilejan da Bibil? (b) Yom ik kand yikwau ukutwisha kusadin mulong wa kumukwash mwin kwilej wey kumutek Yehova pa ndond ya kusambish? Let chilakej.

¹² Mwin kwilej wey ukutwish kand kutaninamu nakash anch watesh yom yasalau in Kristu akwau mulong wa kutek yom ya usey pa ndond ya kusambish. Chawiy send akadivar kushalijan chakwel akutwalaku ku dilejan dey da Bibil. Yita arumburil mutapu wijikau uyakin ni yom yasalau mulong wa kutek mudimu wa Yehova pa ndond ya kusambish. Ishila chisu cha kutal ni mwin kwilej wey mavideo mada mu chikunku “Ileja Chikurikina” ap “Jingunin Kand” mu buku Sanger Mwom Chikupu! Chilakej, mud anch udany mu dilejan da 37, ukutwish kukasikeshin pa mbil jida mu video Yehova Ukuwanyish Maswir Metu.

MUKWASHA MWIN KWILEJ WEY KUPANDAKAN YIKOKUJOL

13. Yesu wayitenchika in kwilej end mutapu ik mulong wa kurish ni rupompat?

¹³ Yesu wayileja in kwilej end tupamp ni tupamp anch akurish ni rupompat ridokila kud antu akwau, ap kand kud anamakwau. (Mat. 5:11; 10:22, 36) Chisu chikemp kurutu kwa rufu rend, Yesu wayileja in kwilej end anch akushiken ni kuyijip mulong akat kumwifukwil Yehova. (Mat. 24:9; Yoh. 15:20; 16:2) Wayikasikesha kwikal ababela padau mu mudimu wa kulejan. Wayileja kand kulik kutadikijan nau antu arishikishina yitiyij yau ni kubabel yom yilondinau ap yisadinau mulong wa kudandamen kulejan.

14. Mutapu ik tukutwisha kumukwash mwin kwilej kwirijek mulong wa kurish ni rupompat? (2 Timote 3:12)

¹⁴ Tukutwish kumukwash mwin kwilej kurish nich rupompat kusutin kumulej piur pa yom yikutwishay kwov kud ambay nend a mudimu, arunend ni anamakwend. (Tang 2 Timote 3:12.) Ambay nend a mudimu amwing akutwish kusambish kumusip mulong wa mashakamin mend masu. Antu akwau ap anamakwend akutwish kulik kusanger yom yilejinay mu Bibil. Anch twayikwash in kwilej kurish nich rupompat kurutu kwa chisu chikuyiswapel kujijaman anch yashiken.

15. Yom ik yikutwisha kumukwash mwin kwilej wa Bibil kurish ni rupompat ra mu dijuku?

¹⁵ Piur pa rupompat ra mu dijuku, mukasikesha mwin kwilej wey kutongin piur pa mayingishin makutwisha kuyibachik anamakwend kumujimen. Pamwing ap akweting yitongijok yiyimp piur pa Atuman a Yehova, ap akutwish kuman anch amushadish kal mwanamakwau. Ap antu amwing a mu dijuku da Yesu kasangarap piur pa yom yading yisadinay. (Mar. 3:21; Yoh. 7:5) Mufundisha mwin kwilej wey kwikal ni nkeu ni kuyishimpishin antu akwau muchim, kuwejinaku antu a mu dijuku dend.

16. Mutapu ik tukutwisha kumukwash mwin kwilej kwikal ni nkeu chisu chilejenay piur pa yitiyij yend?

¹⁶ Ap anch antu a mu dijuku asangaredin yom yilejinay, mwin kwilej ufanyidin kwikal ni manang mulong wa kulik kuyirumburil yom yawonsu kapamp kamwing. Mulong anch wasal mwamu, ukutwish kuyiziyish anamakwend mud chibudikin, akutwish kulik kumushil chisu mulong wa kwambamb nend kapamp kakwau piur pa yitiyij yend. Chawiy mukasikesha mwin kwilej wey kulond mu wiswimp, mwamu anamakwend akusanger kand kumutesh kapamp kakwau. (Kol. 4:6) Pamwing ap ukutwish kwend kuyilej kwandam pa jw.org. Mwamu akutwish kwilej yom yivud piur pa Atuman a Yehova mu mutapu ukatinau ayinau.

17. Mutapu ik ukutwisha kumukwash mwin kwilej wey kwakul ku yipul yikutwishau kwikal nich antu piur pa Atuman a Yehova? (Tal kand chipich.)

¹⁷ Ukutwish kusadin mitu ya milong “Yipul Yipwilingau Nakash” yida pa jw.org mulong wa kumukwash mwin kwilej wey kurijek mutapu ukutwishay kwakul mu mutapu uswapela ku yipul yikutwishau kumwipul kud ambay nend a mudimu ap anamakwend. (2 Tm. 2:24, 25) Kwinsuden kwa dilejan dawonsu mu buku Sanger Mwom Chikupu!, sadin chikunku “Anch Muntu Wakwel Anch.” Mukasikesha mwin kwilej wey kwiyijidish mutapu ukuyakulay antu amwipwila piur pa yitiyij yend. Mukwasha kuman mutapu ukutwishay kuswimp mutapu wend wa kwakul. Kwiyijidish nend mu mutapu winou kukumukwash kulondin ritiy rend pakad kwidjidjek.

18. Mutapu ik ukutwisha kumukwash mwin kwilej wey kwikal mwin kulejan wakadau kubatish? (Mateu 10:27)

¹⁸ Yesu wayikasikesha in kwilej end kulejan rusang ruwamp patok. (Tang Mateu 10:27.) Anch mwin kwilej wasambish kulejan piur pa yitiyij yend kurutu kwa chisu, chikumuswapel kumuchingejin Yehova. Mutapu ik ukutwisha kumukwash mwin kwilej kwitekin mupak winou? Anch alejan mu chikumangen chen piur pa kampany wa mudimu wa kulejan, mukasikesha mwin kwilej wey chakwel atongin piur pa yom yikutwishay kusal yikumukwasha kuwanyish yitinau mulong wa kwikal mwin kulejan wakadau kubatish. Murumburila mulong wak chikat kuyiswapel antu avud kusambish kulejan pa chirung cha kampany. Ukutwish kand kutaninamu ku kufumb tukata kutambul ku yikumangan ya mukach mwa rubing. Ukwilej mutapu wa kulond kurutu kwa antu ni kurumburil yitiyij yend pakad kwidjidjek, chawiy mukasikesha kwitekin mipak ya kusutish yikunku kurutu.

MEKESH ANCH UMUCHINGEJIDIN MWIN KWILEJ WEY

19. Mutapu ik wamekeshay Yesu anch wading uyichingejidin in kwilej end, ni mutapu ik tukutwisha kumwimburij?

¹⁹ Kurutu kwa Yesu kuchirik mwiur wayileja in kwilej end anch akwikal kand nend pamwing. Kateshap anch Yesu wading uyilejin anch akuya mwiur. Chikalap nchik mwamu, Yesu kashinshikinap pa kwidjidjek kwau, pakwez washinshikina pa kushinshaman kwau. (Yoh. 14:1-5, 8) Wading wij anch ading akwet kuswir kwa chisu mulong wa kutesh yom yimwing, mud ruchingej ra kuya mwiur. (Yoh. 16:12) Niyetu tufanyidin kuyimekeshin in kwilej anch tukwet kashinsh anch akatin kamu kumusangaresh Yehova.

20. Nambaz umwing wa mu Malawi wamekesha mutapu ik anch umuchingejidin mwin kwilej wend?

²⁰ Tulamany ruchingej anch in kwilej etu akatin kusal yom yitentamina. Shinshikin chilakej cha nambaz Chifundo uda mu Malawi. Wasambisha kwilej Bibil kusutin buku Sanger Mwom Chikupu! ni Alinafe changadim mwin Katolik. Papwishau kwilej dilejan da 14, Chifundo wamwipula mwin kwilej wend yom yitonginay piur pa kusadin yifatul mu difukwil. Chipul chinech chamusangareshap Alinafe ni wamwakula anch, “ud mupak umutadina muntu amwinend!” Chifundo watonga anch pamwing ap Alinafe ukimbin kwimik kwilej Bibil. Pakwez nich kushimpish muchim, wadandamena kwilej Bibil ni Alinafe, ni kuchingej anch mu kusut kwa chisu ukutesh yom kurumburik. Kupwa kwa angond akemp, Chifundo wamwipula Alinafe chipul chida mu dilejan da 34 anch: “Kwilej Bibil ni kumwijik Yehova kwakukwashin mutapu ik?” Chifundo ulejen mutapu wakulay Alinafe, “wajimbula yom yivud nakash, walonda kand anch Atuman a Yehova kakatap kwiyandjik mu mikadil yijidikinay Bibil.” Kupwa kwa chisu chikemp, Alinafe walikap kusadin yifatul ni amubatisha.

21. Mutapu ik tukutwisha kuyikwash in kwilej kukwat mupak wa kumusadin Yehova?

²¹ Ap anch Yehova ndiy “ukata kukudish,” tukwet chisend cha kuyikwash in kwilej a Bibil kuya kurutu. (1 Ko. 3:7) Tufanyidin kusal yom yivud kusutamu kwimen pa kuyilej in kwilej yom yikatinay Nzamb anch asal. Tufanyidin kuyikwash in kwilej kumukat nakash Yehova. Ni kuyikasikesh kand kumekesh rukat rau mulong wa Yehova kusutin kutek yom ya usey pa ndond ya kusambish. Ni tuyifundishany kumuchingejin Yehova chisu chirishinau ni yikokujol. Kusutin kuyichingejin, tukukasikesh kashinsh kau anch niyau akutwish kushakam kukwatijan ni mbil ja Yehova, ni kukwat mupak wa kumusadin.