1925​—Kwasut Kal Mivu Chitot

ANTU A NZAMB AFANYINA KUDANDAMEN KUCHINGEL

In Kwilej a Bibil avud achingeja anch divu dikwikal Paradis mu muvu wa 1925. Mulong wak? Mukadivar Albert Schroeder, wasadina mu Chisak Chitakedila mu kusut kwa chisu, ulondin anch: “Twatonga kand anch In Kristu azizidilau many ashinshamena ading pansh afanyina niyau kuya mwiur mulong wa kwikal pakach pa antu akuyikela mu Want wa Nzamb, ni anch amakundj ashinshamena a pasak mud Aburaham, David ni akwau, afanyina kuyivumbul ni kwikal anat a Want wa Nzamb pa divu.” Chawiy palika kuwanyin ruchingej riner, akadivar nau anambaz amwing aziya.​—Jnsw. 13:12.

Chikalap nchik kuziy kwinoku, In Kwilej avud adandamena kukwatikan mu mudimu wa kulejan ni akwata nich usey chisend chau cha kwikal Atuman a Yehova. El tushinshikinany mutapu wasadinau radio mulong wa kulejan kud antu avud.

IKALA NI MARADIO MAVUD

Mu muvu wa 1924, antu avud ateshang nakash radio wa WBBR, chawiy mu muvu wa 1925 in Kwilej a Bibil ateka radio mukwau mujim piswimp ni mu Illinois, mu musumb wa Chicago. Radio winou amutazuka anch WORD. Ralph Leffler, wakwasha kutek radio winou uvurikin anch: “Uchuku mu chirung cha mashik, radio WORD amuteshang kulemp ni jindond jivud.” Chilakej, dijuku dimwing dading pa akilometre piswimp 5000 mu Pilot Station, mwi Ngand ya Alaska dakwata program umwing pakach pa maprogram ma kusambish masutishau ku radio winou. Kupwa kwa kumutesh, dijuku dinada dayifundina antu awonsu asalang ku radio winou mulong wa kuyijikitish mulong wa maprogram mau makasikeshina mu spiritu.

Chinong cha Kalam cha 1 Ngond wa 12, 1925 chalonda anch: “Radio WORD ud pakach pa maradio majim nakash ma mu États-Unis makweta usu wa ma wat 5000. Radio winou amuteshang nawamp mitambu yawonsu ya côte atlantique ni côte pacifique, mwi ngand ya Kiba ni chikunku chikwau cha kurul kwa ngand ya Alaska. Antu avud ading akad kuteshap uyakin, asangera kutesh radio winou.”

Chisu chinicha, In Kwilej a Bibil asala usu nakash wa kuvudish maradio mulong wa kulejan rusang ruwamp mu Kanada. Mu muvu wa 1924, ateka radio CHUC mu musumb wa Saskatoon, mu provens wa Saskatchewan. Wading pakach pa maradio ma kusambish malondang yom ya relijon mu Kanada. Mu 1925 kwikala kand maswir ma kutek radio mukwau. Chawiy dirijek dalanda radio winou ni amutwala ku Chikumbu cha Regent, chikumbu chading cha sinema mu Saskatoon, chalandau ni kuchirijek mulong wa rutong riner.

Kusutin radio winou, antu avud ading ashicha mu musumb wa Saskatchewan ni jindond jikwau ja piswimp atesha rusang ruwamp kapamp ka kusambish. Chilakej, kupwa kwa kutesh program, Graham mband umwing wading mu musumb umwing wa palemp wafunda mulong wa kwit mabuku. Mukadivar George Naish uvurikin anch: “Mazu makemp kwau malonday anch ‘Tufundishanaku!’ matubachika kumutumin buku wakabuj wa Études des Écritures.” Pakad kulab, Graham wasambisha kupalangesh uruu wa Want kushik ni kwindond kulemp.

MUTAPU USU WA KUTESH UYAKIN

Chinong cha Kalam cha 1 Ngond wa 3, 1925 chading ni mutu wa mulong wa usey ulondina anch “La naissance de la nation.” Mulong wak mutu wa mulong winou wading wa usey? Chisu chinicha, In Kwilej a Bibil ading ij anch Satan ukwet ditechik dend da mwiur da yitang yiyimp ya mu spiritu, kuwejinaku marelijon, ditenchik da kwisak ni antakel a chipolitik ada pa divu. Pakwez, kusutin mutu wa mulong winou, “kashalapol ushinshamena ni ubabela” wayikwasha akadivar a pa mangand kujingunin anch Yehova niyend ukwet ditenchik dishalijadina ni dakad kutanijan ni ditenchik da Satan. (Mat. 24:45) Chikwau kand, kashalapol warumburila anch Want wa Nzamb wasambisha kuyikel mu muvu wa 1914, ni anch mu muvu winou ‘njit jasadika mwiur,’ chawiy Satan nau ayilembil end ayopata mwiur ni ayidjibwila pansh.​—Kuj. 12:7-9.

Antu amwing chayikasikena kwitiy mutapu usu winou wa kutesh. Kukwatijan ni yom yiney, mutu wa mulong walonda anch: “Ang kud muntu ukata kutang Chinong cha Kalam wakad kwitiyij uyakin winou, tumukasikeshin kushimpish muchim, kumuchingejin Yehova ni kudandamen kumusadin nich kushinshaman.”

Tom Eyre wa mwi ngand ya Grande-Bretagne, wading kolporter (nlel anch chibol) ulejen mutapu wiyovau In Kwilej a Bibil patangau mutu wa mulong winou. Ulondin anch: “Akadivar asangara nakash pateshau mutapu warumburilau Kujingunik 12. Pitwajingunina anch Want wa Nzamb wading wasambisha kal kuyikel mwiur, twikala ni musangar wa kulejan rusang ruwamp kud antu akwau. Chatubachika kuvudish mijikit ni chatukwasha kuman anch Yehova ukutukwash kusal yom yishimwokishena mu machuku ma kurutu.”

KULEJAN PIUR PA YEHOVA

Nlel, Atuman a Yehova akat kwisambin piur pa Isay 43:10 ulondina anch: “‘En . . . , udiany atuman am. Nakutondanya kwikal atushalapol am.’” Pakwez kurutu kwa 1925, verse winou kamusadinangap nakash mu mikand yetu. Yom yafanyina kuswimp. Mu muvu wa 1925, maverse ma Isay 43:10, 12 ni 11 mikala mitu ya milong ya Chinong cha Kalam!

Kwinsuden kwa Ngond wa 8, 1925, In Kwilej a Bibil akumangana ku chitentam mu musumb wa Indianapolis, mwi ngand ya Indiana. Mu mazu ma kusambish nich program wa chitentam chinech, mukadivar Joseph Rutherford walonda anch: “Twezang ku chitentam chinech mulong wa . . . kutukasikesh kud Nsalejetu chakwel twikal ni usu wa kwikal atuman end.” Dichuku da chinan da chitentam, in kukumangan awonsu ayikasikesha kusadin chisu chawonsu chikumekana mulong wa kulejan piur pa Yehova.

Dampos, 29 Ngond wa 8, Mukadivar Rutherford wasala diskur dayikasikesha antu kulejan piur pa Yehova. Mu diskur dined, walonda anch: “Yehova uyilejin antwend anch . . . : ‘En, udany atuman am . . . Am nid Nzamb.’ Wayikasikesha kand ni dizu da piur anch: “Budikany mu musumb.” Kwikil kand antu akwau pa divu akutwisha kubudik mu musumb ni kuyifundish antu, ching kusu [antwend], akweta spiritu wa Nsalejetu, ni ada atuman end.”​—Isay 43:12; 62:10.

Papwishay Mukadivar Rutherford kusal diskur, watanga mukand umwing utazukinau anch “Message d’espérance,” wading umekeshina anch Want wa Nzamb wawiy ukweta ruchingej rakin rikuleta “yiyukish ya chisambu, kuvul kwa yom, ukash wa mujimbu, mwom, want ipau ni musangar wa chipuku.” Mukand winou aukarumuna mu mazu kushalijan ni kuubudish mulong wa kuusadin mu mudimu wa kulejan. Makopi piswimp amiliyon 40 amapana kud antu.

In Kwilej a Bibil ikala Atuman a Yehova, pakwez kijikishap dijin dined patok mu mivu yivud. Pakwez asambisha kujingunin anch chid cha usey kulejan piur pa Yehova.

KUYICHIRIKIN ANTU ASANGERA

Mulong In Kwilej a Bibil avulijana pa mangand, akadivar ayikasikesha kulik kwimen kwau pa kupan mikand, pakwez kuyichirikin kand antu asangerang. Kupwa kwa kampany wa kupan trakt Message d’espérance, Bulletina walonda anch: “Irijekany mulong wa kuyichirikin antu atambwila trakt Message d’espérance.”

Bulletin wa Ngond wa 1, 1925 wisambina kand piur pa Mwin Kwilej wa Bibil umwing wa mu musumb wa Plano, mwi ngand ya Texas, wading ulondin anch: “Twashimwoka nakash mulong pitwachirika jindond twalejena, kwikala yibudikin yiwamp kusutamu chisu twalejenang mu jindond jisu. Ka musumb kakemp kading mu teritwar wetu, ading alejenamu kal tupamp tutan mu mivu dikum yasutina. . . . Nambaz Hendrix ni makwam aya kulejanamu kand ni apana mikand yivud kusutamu pakur.”

Mwi ngand ya Panama, kolporter umwing wafunda anch: “Antu avud alika kwintesh kapamp ka kusambish aswimpa mwikadil wau pinayichirikina kapamp ka kaad. Mu muvu winiwa wansuden nasutisha chisu chivud mu mudimu wa kulejan kusutin kuyichirikin antu ni twasutisha chisu chiwamp ni avud a pakach pau.”

KUSHINSHIKIN PA MACHUKU MA KURUTU

Kwinsuden kwa muvu wa 1925, Mukadivar Rutherford wayifundina ayibol piur pa mudimu wa kulejan wasalau muvu winiwa ni yom yafanyinau kand kusal. Walonda anch: “Muvu wasutang ou wadany ni dilau da kuyikasikesh antu ada iyovila nawimp. Mudimu winou wakusangareshinany nakash . . . Muvu ukwezap ou ukwikalany ni mitapu yivud ya kulejan piur pa Nzamb, want wend ni kumekesh anany ada chakin kamu atushalapol end. . . . El tudandamenany kumutumbish Nzamb wetu ni Mwant wetu.”

Kwinsuden kwa muvu wa 1925, akadivar atenchika kutung Betel mu Brooklyn mujim. Mu muvu wa 1926 asambisha proje mujim wa kutung wading wakad kal kusadikangap mu dirijek.