Njit ja Ikren Jipandakeshin Nzal pa Mangand

Machuku ma ngond 19 Ngond wa 5, 2022, antakel a piur 75 ni kusut alejen ku Chisak cha Diking dia Uumwing wa Michid anch “nzal yidia pa mangand mawonsu yadiokila ku chipupu cha Covid-19 ni mulong wa kuswimp kwa yirung, yiyil mu kupandakan nakash pa mangand mawonsu mulong wa njit jidia mu Ikren, ni yikutwish kuletish kamungun ku jindond jimwing.” Kupwa The Economist, jurnal ukatau kubudish rubing ni rubing walondin anch “Mulong wa njit, mangand minam machikweta kal milong yivud mukwikal antu avud nakash akufa nzal.” Bibil wasambela kulejan anch nzal mud yiney yikushiken pa chirung chetu, pakwez utukwashin kand kurish ni chakamish chinech.

Bibil wasambela kulejan anch kukwikal nzal

• Yesu wasambela kulejan anch: “Muchid ukez karish ni muchid ukwau, want ukez karish ni want ukwau. Kukez kikal kamungun.”​—Mateu 24:7.

• Mukand wa Bibil wa Kujingunik wisambidin in kukandam atubar anying a chifanakesh. Mwin kukandam kabar umwing umekeshin njit. Amwambakedin kud mukwau umekeshina kamungun, chisu chikukasikana nakash pa kuman yakudia ni yikukaninik usey nakash. “Natala, chad naman kabar mujal. Mwin kukandamap wading ukwet chilik cha kulim mu chikas chend. Natesha mudi dizu . . . Dialond anch: ‘Kilo umwing wa tidiku diawiy difut dia mudimu wa dichuku diakabuj, akilo asatu a masangu diawiy difut dia dichuku diakabuj.’”​—Kujingunik 6:5, 6.

Mauprofet minam ma Bibil piur pa kukep kwa yakudia mawanyidin nlel pa chirung chitazukinay Bibil anch “machuku ma kwisudiel.” (2 Timote 3:1) Mulong wa kwijik yom yivud piur pa ‘machuku ma kwinsudiel’ ni kwend kwa atubar akandaminau kud amakundj anying alejenau mu Kujingunik, tal video Mangand Maswimpa Kudiosh Muvu wa 1914 ni tang mutu wa mulong “Les cavaliers de l’Apocalypse : qui sont-ils ?”

Mutapu ukutwishay Bibil kutukwash

• Mu Bibil mud yiyul ya ukwash yikutwisha kutukwash kurish ni yisu yikash, mud kukaninik kwa usey wa yakudia ap kand kamungun. Tal yilakej yimwing mu mutu wa mulong “Comment vivre avec moins.”

• Kupwa, Bibil utwinkishin ruchingej anch yom yikuwap. Ukanin chisu “ngand yi[ku]songa tidiku djat ni ku misong ya mikandu” ni muntu mwawonsu ukwikal ni yakudia yivud. (Kuseng 72:16) Mulong wa kwijik yom yivud piur pa yom yikaninay Bibil mulong wa machuku ma kurutu ni mulong wak ukutwish kumuchingejin, tang mutu wa mulong “Une espérance réelle pour des jours meilleurs.”