Spiritu Utumbila Chom Ik?
Chakul cha Bibil
Spiritu utumbila ud usu ukatay Nzamb kusadin. (Mike 3:8; Luka 1:35) Nzamb ukat kutum spiritu wend kwi ndond kwawonsu kukatinay mulong wa kuwanyish rusot rend.—Kuseng 104:30; 139:7.
Mu Bibil, dizu “spiritu” adikarumwin ku dizu dia Hebereu ruʹach ni dia Grek pneuʹma. Yisu yivud, mazu minam makat kumekesh usu wa Nzamb, charumburik anch spiritu utumbila. (Disambishil 1:2) Pakwez, Bibil ukat kusadin kand mazu minam mulong wa kwisambin yom yikwau, mud:
Mwiku wa mwom.—Abakuk 2:19; Kujingunik 13:15.
Rinkind.—Disambishil 8:1; Yohan 3:8.
Usu udia mu yitang yikweta mwom, usu ukata kuyikwash kwikal mwom ni kusal yom.—Job 34:14, 15.
Mutapu wa kutong ap manangu ma muntu.—Kuchind Michid 14:24.
Aspiritu, mud Nzamb ni angel.—1 Ant 22:21; Yohan 4:24.
Kurumburik kwawonsu kwinoku kumekeshin anch spiritu chid chom chakadiau an a antu kuman ni mes pakwez chikwet yibudikin yimekena kamu patok. Chilik chimwing, spiritu wa Nzamb, “mud rinkind, kakumekanangap ku mes, kakwetap mujimbu mud wa antu ni ukwet dikand nakash.” (An Expository Dictionary of New Testament Words, W. Vine.)
Bibil ulejen kand anch spiritu wa Nzamb ud mud “makas” ap “miny” yend (Kuseng 8:3; 19:1; Luka 11:20; ilikej ni Mateu 12:28.) Mud mutapu mukatay nkaliweny kusadin makas ni miny yend mulong wa kusal mudimu wend, Nzamb wasadina niyend spiritu wend mulong wa kusal nich yom mud yilondwilaku ey:
Diur ni divu.—Kuseng 33:6; Isay 66:1, 2.
Bibil.—2 Pita 1:20, 21.
Yilay yasalau kud atushalapol end a pasak ni mudimu wa kulejan rusangu ruwamp wasalau nich mushiku.—Luka 4:18; Midimu 1:8; 1 Korint 12:4-11.
Mikadil yiwamp yimekeshinau antu amuziyidina.—Galatia 5:22, 23.
Spiritu utumbila kadiap muntu
Palondinay Bibil anch spiritu utumbila ud mud “makas,” “miny,” ap “mwiku wa mwom,” chinech chimekeshin anch spiritu utumbila kadiap muntu. (Kubudik 15:8, 10) Makas ma nkaliweny makutwishap kusal pakad manangu ni mujimbu wend; chilik chimwing, spiritu utumbila wa Nzamb ukat kusal ching anch Nzamb wamutakel. (Luka 11:13) Bibil wilikejin kand spiritu wa Nzamb ni mem ni umwisambidin pamwing ni yom mud ritiy ni ronganyin. Kwilikej kwawonsu kwinoku kumekeshin anch spiritu utumbila kadiap muntu.—Isay 44:3; Midimu 6:5; 2 Korint 6:6.
Bibil ulejen anch dijin dia Nzamb did Yehova ni dia Mwanend, Yesu Kristu; pakwez kwikil ndond ap yimwing yilejenay dijin dia spiritu utumbila. (Isay 42:8; Luka 1:31) Mu chishimushimu cha mwiur chamanay kusutil chilay, mwin Kristu Stefan wamanamu kwend antu aad kusu, kadiap asatu. Bibil ulondin anch: ‘Stefan wizula ni spiritu utumbila, watal mes mwiur, waman uyaj wa Nzamb ni Yesu wiminy ku chikas cha katatuku cha Nzamb.’ (Midimu 7:55) Spiritu utumbila ud usu ukatay Nzamb kusal nich yom, ni wawiy wamukwasha Stefan kuman chishimushimu chinech.
Yitongijok ya makasu yikwetau antu amwing piur pa spiritu utumbila
Chitongijok cha makasu: Spiritu utumbila ud muntu ni ud niyend mu Usatu, mud mulejenau mu mukand wa 1 Yohan 5:7, 8 kukwatijan ni Bibil wa Crampon.
Win yakin: Bibil wa Crampon uwejidin mu mukand wa 1 Yohan 5:7, 8 mazu “mwiur, Tatuku, Dizu ni Spiritu Utumbila: awonsu asatu inay ad umwing. Ni kud asatu aletina uman pa divu.” Pakwez, in kukimbijol amen anch mazu minam kamafundap kud kambuy Yohan ni madiap kwau ma mu Bibil. Chawiy, profeser Bruce Metzger wafunda anch: “Chid kamu chakin anch mazu minam mad ma makasu ni mafanyidinap kwikal mu Mansuk Masu.”(A Textual Commentary on the Greek New Testament).
Chitongijok cha makasu: Bibil ukat kwisambin spiritu utumbila mud muntu, ni chinech chimekeshin anch ud muntu.
Win yakin: Mifund yikat kwisambin yisu yimwing piur pa spiritu utumbila mud muntu. Chilakej, Yesu wisambina spiritu utumbila mud muntu, pamulejenay anch ud “nkwash” ukata kulet uman, kutakel, kulond, kutesh, kulejan, kutumbish ni kutambul. (Yohan 16:7-15) Pakwez chinech chirumburikinap anch ud muntu. Bibil wisambidin kand manangu, rufu ni chitil mud antu (Jinswir 1:20; Rom 5:17, 21) Chilakej, manangu amalejen anch makwet “yisalijok” ni “an,” ni chitil achilejen anch chikwet usu wa kudimban, kujipan ni kubachikan kwov ris.—Mateu 11:19; Luka 7:35; Rom 7:8, 11.
Chitongijok cha makasu: Kubatishan mu dijin dia spiritu utumbila kumekeshin anch spiritu winou ud muntu.
Win yakin: Yisu yimwing Bibil ukat kusadin dizu “dijin” mulong wa kumekesh usu ap ulabu. (Kuvurik Yijil 18:5, 19-22; Ester 8:10) Chid mud mu Uruund anch alond anch “mu dijin dia chijil,” chinech chirumburikinap anch chijil ud muntu. Muntu ubatishinau “mu dijin dia” spiritu utumbila ud muntu wija ni witiyijina usu ni mudimu wa spiritu winou mu kuwanyish rusot ra Nzamb.—Mateu 28:19.
Chitongijok cha makasu: Atwimbuy a Yesu nau in kwilej akwau a kusambish itiyijang anch spiritu utumbila uding muntu.
Win yakin: Bibil kalondinap mwamu ni rusangu rin rilejenap kwau yom ya mutapu winou. Buku Encyclopædia Britannica urumburil anch: “Chitongijok cha kwel anch Spiritu Utumbila ud Muntu wa winzamb . . . chadiokala ku Chikumangan cha Constantinople mu muvu wa 381.” Pading pasutin kal mivu 250 kudiosh kwafilay kambuy wa nsudiel.