Chitil Chom Ik?

Chakul cha Bibil

Chitil chid chisal, chovil ap chitongijok chin chawonsu chakad kukwatijan ni mbil ja Nzamb. Chid kand kujip ap kubwambwil yijil ya Nzamb mu kusal yom yiyimp ap yakad kutentam ku mes ma Nzamb. (1 Yohan 3:4; 5:​17) Bibil ulejen kand anch muntu ukutwish kusal chitil anch walik kusal yom yijay anch yitentamin.​—Jakobu 4:17.

Mu mazu makusambish mafundau Bibil, dizu diakarumunau anch chitil dirumburikin “kukangany kwas,” ap kuburen kuwanyish chom kanang. Chilakej, amasalay a mu Isarel wa pakur ading ni ukaliweny mu kwas ut wa ndundu ‘pakad kurez.’ Anch twakarumun dizu ku dizu, mazu minam marumburikin anch “kasalangap chitil.” (Ankalansambu 20:16) Chawiy, kusal chitil kurumburikin kurez ap kulik kuwanyish yijil yiwanyidina ya Nzamb.

Mulong ud Sakatang wetu, Nzamb ukwet mbil ya kuyitekin antu yijil. (Kujingunik 4:11) Tufanyidin kupan kuchind kud ndiy mulong wa yisal yetu.​—Rom 14:12.

Ov, chitwishikin kulik kusal chitil ap pakemp?

Bwat. Bibil ulond anch “antu awonsu asala yitil, adi kwau kulemp nend Nzamb.” (Rom 3:​23; 1 Ant 8:​46; Mulej 7:​20; 1 Yohan 1:8) Mulong wak mwamu?

Kwinsambishin, antu akusambish, Adam ni Ev, ading akad chitil. Chid mulong ading antu awanyidina, ayitanga mu chifu cha Nzamb. (Disambishil 1:​27) Pakwez ashadisha kuwanyin kwau pamubwambwilau Nzamb. (Disambishil 3:​5, 6, 17-​19) Pavalau an, ayiswanisha chitil ni kuburen kuwanyin. (Rom 5:​12) Mud mwalonday David Mwant wa Isarel anch, “am navadikina mu kuyip.”​—Kuseng 51:7.

Ov, yitil yimwing yid yijim kusutamu yikwau?

Mwaning. Chilakej, Bibil ulondin anch antu a mu Sodom wa pakur ading “ayimp nakash, akayitil [nakash]” ni yitil yau “yaswej[a] . . . kuyip.” (Disambishil 13:13; 18:20) Shinshikin yom yisatu yimekeshina kulim kwa chitil.

1. Kujimb. Bibil utulejin kwipuk yitil yijim mud masandj, kwifukwil akish, wij, kuleu, wimbwitan, kujipan, ni yom ya ayilembil. (1 Korint 6:​9-​11; Kujingunik 21:8) Bibil uletin kushalijan kudia pakach pa yitil yiney ni yitil yikwau yikutwishay muntu kusal pakad kutongin, mud mazu ap yisal yikutwisha kuyinenganesh antu akwau. (Jinswir 12:18; Efes 4:​31, 32) Chikalap nchik mwamu, Bibil utukasikeshin kulik kupipej chitil cha mutapu win wawonsu, mulong chikutwish kutushikij ku yitil yijim.​—Mateu 5:​27, 28.

2. Yibachikin. Antu amwing akat kusal yitil yimwing mulong kijap yitinay Nzamb. (Midimu 17:30; 1 Timote 1:​13) Ap anch Bibil kayiyingishinap nich, pakwez umekeshin anch kud kushalijan pakach pa yitil yiney ni yikutwishay muntu kusal kwa kwisotil mulong wa kujip yijil ya Nzamb. (Kuchind Michid 15:30, 31) Antu akat kusal yitil ya kwisotil mulong wa “muchim uyimp.”​—Jeremiy 16:12.

3. Tupamp. Bibil umekeshin kand kushalijan kudia pakach ap kusal chitil kapamp kamwing ni kwikal ni chaku cha kusal chitil. (1 Yohan 3:​4-8) Antu akata “kusal chitil kwa kwisotil,” ap kupwa kwa kwilej kusal yom yitentamina, akat kuyirumburish kud Nzamb mu mutapu uyimp.​—Hebereu 10:26, 27.

Antu asadina kal yitil yijim akutwish kwifish nich mulong wa kurumbuk kwau. Chilakej, Mwant David wafunda anch: “Niyedil mulong wa yitil yam. . . Kuyip kwam kwimpandakedil kulim.” (Kuseng 38:4, 5) Pakwez Bibil uletin ruchingej er: “Chifanyidin antu ayimp akarumun yaku yau, akarumun kand yitongijok yau. Chifanyidin awiy akarumuk, eza kudi [Yehova] Nzamb wetu. Ndiy udi mwin riy, ukuyilikishin swa.”​—Isay 55:7.