Mutapu ik Chakupesh cha Yesu Chidia ‘Difut Mulong wa Antu Avud’?
Chakul cha Bibil
Chakupesh cha Yesu ud mutapu wasadinay Nzamb mulong wa kuyipandish antu ku chitil ni rufu. Bibil ulejen anch mash ma Yesu michika mawiy difut. (Efes 1:7; 1 Pita 1:18, 19) Chawiy Yesu walonda anch weza mulong wa “kupan . . . mwom wend mulong wa kuyikwol antu avud.”—Mateu 20:28.
Mulong wak ‘difut mulong wa antu avud’ diading dia usey?
Muntu wakusambish, Adam, wading uwanyidina pamutangau, charumburik anch wakad chitil. Wafanyina kushakam chikupu, pakwez washadisha ruchingej riner pamubwambwilay Nzamb. (Disambishil 3:17-19) Pavalay an, wayiswanisha chitil chinech, ap kuburen kuwanyin. (Rom 5:12) Chawiy chilondinay Bibil anch Adam ‘wilandisha’ amwinend ni anend mu uswik wa chitil ni rufu. (Rom 7:14) Mulong ikala akad kuwanyin, kwikil ap umwing wa pakach pau wafanyina kufut difut mulong wa kuchirish yom yashadishay Adam.—Kuseng 49:7, 8.
Nzamb wayovila an a Adam riy mulong kadingap ni ruchingej. (Yohan 3:16) Pakwez yijil ya Nzamb ya kutentam yamukangesha kubwik mes pa yitil ap kuyilikishin pakad dishin diakin. (Kuseng 89:14; Rom 3:23-26) Mulong Nzamb uyikatin antu, chawiy wapana yading yitina yijil yend yitentamina mulong wa kuyilikishin antu yitil yau ni kudiosh kamu yiitil yin. (Rom 5:6-8) Difut diawiy dishin dined.
Difut ditin yom ik?
Mu Bibil, dizu “difut” dirumburikin yom yisatu yilondwilaku ey:
Ud usey ufutilau.—Kuchind Michid 3:46, 47.
Dikat kukwol, ap kupandish.—Kubudik 21:30.
Diliken ni usey wa yom yifanyidina kufut.a
Shinshikin mutapu yom yiney yisatu yikwatijadina ni difut dia Yesu.
Usey ufutilau. Bibil ulondin anch in Kristu ayilanda “nich usey ukash.” (1 Korint 6:20; 7:23) Usey winou mawiy mash ma Yesu, ni kusutil mash mend ‘wayikwola antu kwikal antu a Nzamb, antu a michid yawosnu, a jindim jawonsu, a majuku mawonsu ni a mangand mawonsu.’—Kujingunik 5:8, 9.
Kukwol. Chakupesh cha Yesu ‘chayikwola antu kusutil difut’ ku chitil.—1 Korint 1:30; Kolosay 1:14; Hebereu 9:15.
Kwilikan. Chakupesh cha Yesu chiliken kamu ni yom yashadishay Adam—mwom uwanyidina. (1 Korint 15:21, 22, 45, 46) Bibil ulondin anch: “Antu avud ikala in yitil mulong wa kubwambul kwa muntu umwing [Adam], chawiy chimwing kand, antu avud akez kikal atentamina mulong wa kuziyil kwa muntu umwing [Yesu Kristu].” (Rom 5:19) Verse winou urumburil mutapu rufu ra muntu umwing rikutwisha kufut difut mulong wa akayitil avud. Chawiy, chakupesh cha Yesu chid ‘difut dilikena mulong wa antu awonsu,’ kwa kulond anch mulong wa antu asadina usu wau wawonsu mulong wa kutaninamu.—1 Timote 2:5, 6.
a Mu Bibil, mazu makarumwinau anch “difut” makwet chitongijok cha usey, chom cha usey chifutinau. Chilakej, dizu dia Hebereu ka·pharʹ dirumburikin anch “kubwik.” (Disambishil 6:14) Yisu yivud akat kudisadin mulong wa kwisambin piur pa kubwik chitil. (Kuseng 65:3) Dijin dikwau difanakena ni dined did koʹpher, dirumburikin usey ufutinau mulong wa kubwik nich, ap kukwol nich. (Kubudik 21:30) Chilik chimwing, dizu dia Grek lyʹtron, dikarumwiningau yisu yivud anch “difut,” akutwish kand kudikarumun anch “usey wa kukwol nich.” (Mateu 20:28; The New Testament in Modern Speech, wa R. F. Weymouth) In kufund a dizu dia Grek asadina dizu dined mulong wa kwisambin usey kampand wapanangau mulong wa kumukwol nich muntu wa rukan ap muswik.