Nany Udia Mikayel Mukurump wa Angel?

Chakul cha Bibil

Mikayel, utazukiningau mu ma relijon mamwing anch “Mwinsant Mikayel,” chimeken anch did dijin diamwinkau Yesu kurutu ni kupwa kwa kwez pa divu.a Mikayel wapwitamijana ni Satan kupwa kwa rufu ra Moses ni wamukwasha mwangel umwing kutwal uruu wa Nzamb kudiay muprofet Daniel. (Daniel 10:13, 21; Jud 9) Dijin Mikayel dimuwanyidin kamu, mulong dirumburikin anch​—“Nany Udia Mud Nzamb?”​—mulong ukat kulondin Winyikel wa Nzamb ni kuyirishikish akankuny a Nzamb.​—Daniel 12:1; Kujingunik 12:7.

Shinshikin yom yimekeshina anch Yesu ndiy Mikayel mukurump wa angel.

• Mikayel ndiy “mukurump wa [angel].” (Jud 9) Mwaz ‘mukurump wa angel,’ ud kusu kwau mu maverse maad ma Bibil. Ni mu maverse minam mawonsu, wisambidin piur pa muntu umwing, charumburik anch mwaz winou ud kwau wa mwangel umwing. Verse umwing pakach pa maverse minam ulondin anch Nsalejetu Yesu wavumbulau “ukez kashirik mwiur, ukez kabarik ni dizu dikash dia mwangel mujim.” (1 Tesalonik 4:​16) Yesu ukwet “dizu dikash dia mwangel mujim” mulong ndiy udia Mikayel mukurump wa angel.

• Mikayel ukat kutakel chisak cha angel. “Mikayel pamwing nau aruwend a mwiur amurishikish[a] iyazangomb,” Satan. (Kujingunik 12:7) Mikayel ukwet ulabu ujim nakash mwi ndond ya mu spiritu, chawiy chimutazukinau anch “umwing wa amakurump a aruu a mwiur” ni “muruu wa mwiur mujim.” (Daniel 10:13, 21; 12:1) Maz yiney yimekeshin anch Mikayel ud “kalal mujim wa yisak ya angel,” mud mumutazukinau kud David E. Aune, udia mwin kwilej wa Manswik Masu.

  Bibil ulejen kwend dijin dikwau dimwing kusu dia muntu ukweta ulabu piur pa yisak ya angel. Ulejen piur pa chisu chikez “kamekanay Nsalejetu Yesu kudiokal mwiur, pamwing nau aruwend a mwiur akweta dikand. Ukez kezil mu kasu ka muzwizu mulong wa kulejan kadimu.” (2 Tesalonik 1:​7, 8; Mateu 16:27) Yesu “waya mwiur, ni angel ni ulabu ni ukash yamuziyila ndiy.” (1 Pita 3:21, 22) Chovikenap kutong anch Nzamb wamuteka Yesu kwikal ntakel wa angel ni pa chisu chawiy chimwing wamutek kand Mikayel kwikal ntakel wa angel, mud kumekesh anch ad akankuny. Pakwez choviken kutong anch majin minam mawonsu maad, Yesu ni Mikayel, mad ma muntu umwing.

• Mikayel ‘ukez kiman’ pa “chisu cha mar” makad kal kushikenangap. (Daniel 12:1) Mu buku wa Daniel, dizu ‘kwiman’ akat kudisadin yisu yivud mulong wa kumekesh mwant wiminya mulong wa kusal chom cha pakampwil. (Daniel 11:​2-4, 21) Yesu Kristu utazukinau kand anch “Dizu dia Nzamb,” ukusal yom ya pakampwil mud “Mwant wa ant” pakuyisheshay akankuny awonsu a Nzamb ni kuyichidij antu end. (Kujingunik 19:11-​16) Ukusal yom yiney pa chisu cha “mar . . . mayimp, kupandakan mar mamanau antu kudiokal ku disambishil dia mangand.”​—Mateu 24:21, 42.