YIPUL YIKATAU ANSAND KWIYIPUL
Mulong Wak Nifanyidin Kulembil?
Kukwatijan ni dilejan dimwing, ansand 80 pa chitot adia mwi ngand ya Amerik akat kulembil, pakwez chikunku chimwing kwau pakach pa asand inay awiy akata kusalang mwamu dichuku diawonsu. Ansand amwing pakach pau akat kwiyipul anch: ‘Ov, malembil ud kwau mutapu wa kudutish nich manangu anch chid kamu chom cha usey?’
Malembil chom ik?
Malembil mad kamu mambamb makin ni Sakatang wa yom yawonsu. Tongin bil chirumburikina mazu minam! Yehova ud Muntu wa piur nakash kusutamu antu mu mitapu yin yawonsu, pakwez “kadiap kulemp ni muntu mwawonsu.” (Midimu 17:27) Chawiy, Bibil ututazukin nich mazu am anch: “Sejany piswimp kudi Nzamb, chad niyend ukusej piswimp ni yenen.”—Jakobu 4:8.
Mutapu ik ukutwisha kusej piswimp ni Nzamb?
Mutapu umwing ud kusutil malembil—wawiy mutapu ukutwisha kwambamb ni Nzamb.
Mutapu ukwau ud kusutil kwilej Bibil—wawiy mutapu ukatay Nzamb “kwambamb” niyey.
Mutapu winou wa kuswimpijan mambamb—kulembil ni kwilej Bibil—ukukukwash kwikal ni urund uwamp ni Nzamb.
“Kwambamb ni Yehova, udia Muntu wa Piur Nakash did dilau diwamp nakash dikutwishay mwan a muntu kwikal nich.”—Jeremy.
“Kumulej Yehova yovil yam kusutil malembil kukat kwinkwash kwikal kamu piswimp ni ndiy.”—Miranda.
Ov, Nzamb umateshining?
Ap anch umwitiyijin Nzamb ni ap anch ukat kumulembilang—chikutwish pamwing ap kukukasiken kwitiy anch ukat kuteshang kamu malembil. Pakwez, Bibil umutazukin Yehova anch ud “Mwin Kutesh malembil.” (Kuseng 65:2, NWT) Ni ukukasikeshin kulet “yakamish [yey] yawonsu kud ndiy.” Mulong wak? ‘Mulong ukat kukubangin.’—1 Pita 5:7.
Cha kutongijokin: Ov, ukat kwitekinang chisu mulong wa kwambamb ni arund ney a piswimp chisu chawonsu? Ukutwish kand kusal mwamu ni Nzamb. Mutazuka chisu chawonsu mu malembil, ni sadin dijin diend, Yehova. (Kuseng 86:5-7; 88:9) Chawiy, Bibil ukukasikeshin kulembil “kwakad kulik.”—1 Tesalonik 5:17.
“Malembil mad mambamb mam ni Tatukwam wa mwiur, ni kusutil malembil, nikat kumulej yom yawonsu nikweta ku muchim.”—Moises.
“Nikat kumulej Yehova yom yawonsu, mud mutapu nikata kand kumulej maku ap murund nam wa piswimp.”—Karen.
Nikutwish kulembil piur pa yom ik?
Bibil ulondin anch: “Mu yisu yawonsu mu kulembil kwen, ap pa kuyilembidil antu akwau nich kujikitish, mwijikishany Nzamb yom yawonsu umwitilanya”—Filip 4:6.
Ov, chinech chirumburikin anch ufanyidin kumulembil piur pa milong yey? Mwaning! Mulong Bibil ulondin anch: “Pan yakamish yey yawonsu kudi [Yehova], ndiy ukukulam.”—Kuseng 55:23.
Chakin kamu, mu malembil mey kud Nzamb, ufanyidinap kwey ching kumulej piur pa milong yey. Changadim umwing utazukinau anch Chantelle ulondin anch: “Nikutwishap kwikal ni urund uwamp ni Yehova anch nikat kumulembil ching kwau mulong wa kumwit ukwash. Nimen anch nifanyidin bil cha kusambish kumujikitish Yehova ni yom nifanyidina kumujikitishin yid yivud nakash.”
Cha kutongijokin: Yom ik ukweta mu mwom wey ukutwisha kujikitishin? Ov, ukutwish kutonginaku yom yisatu pa dichuku ukutwisha kumujikitishin Yehova?
“Ap yom yikemp kwau, mud kusanger chisalamb chiwamp, kukutwish kutubachik kumulembil Yehova mulong wa kumujikitish.”—Anita.
“Tongijokin pa chom kanang chatangau chikusangareshina ap pa verse umwing wa Bibil ukata kukupukun nakash, ni kupwa mujikitisha Yehova mulong wa chom chinech.”—Brian.