Yom ik Yilondinay Bibil Piur pa Ujim?

Chakul cha Bibil

Bibil ufundishin anch ujim upandakena udi wa ubaj kudi muntu uukweta ni kudi antu amunyingumukina. (Jinswir 29:22) Ap anch kwikal mu ujim kukutwish kwikal ni mayingishin mawamp chisu chimwing, Bibil ulondin anch antu akata kwikal ni ‘ujim nakash’ kakezap kupand. (Galatia 5:19-21) Bibil ukwet mbil jikutwisha kumukwash muntu kudutish ujim wend.

• Ov, ujim uding uyimp chisu chawonsu?

• Ujim ukutwish kwikal wa ubaj mu yom ik?

• Mutapu ik ukutwisha kuyikel ujim wey?

• Maverse ma Bibil misambidina piur pa ujim

Ov, ujim uding uyimp chisu chawonsu?

Bwat. Yisu yimwing kujiman kukutwish kwikal ni mayingishin. Chilakej, ikundj ushinshamena Nehemiy ‘wova ujim nakash’ chisu chateshay anch anamakwend in Yuda ading ayimeshin mar.​—Nehemiy 5:6.

Yisu yimwing, Nzamb niyend wovang ujim. Chilakej, chisu chalikangau in Isarel kumwifukwil ndiy ni kusambish kusadin anzamb a makasu, “ujim wa [Yehova] walankina padiau” awiy. (Ankalansambu 2:13, 14) Ap mwamu, ujim udiap mwikadil upandakena wa wuntu wa Yehova Nzamb. Chisu chawonsu ujim wend ukweting mayingishin ni ukat kuuyikel.​—Kubudik 34:6; Isay 48:9.

Ujim ukutwish kwikal wa ubaj mu yom ik?

Ujim udi wa ubaj anch ukwetap mayingishin ni wakad kuyikel, chawiy chikata kushiken nakash kudi an a antu akad kuwanyin. Chilakej:

• Kain “wova ujim nakash” palikay Nzamb mulambu wend. Kain walikidil anch ujim wend umuyikela kushik ni mu chilik cha kumujip mwanchend.​—Disambishil 4:3-8.

• Muprofet Yona “wova ujim nakash” chisu chayovilau in Ninive riy kudi Nzamb. Nzamb wamupupa Yona ni kumulej anch kadingap ni mayingishin ma ‘kujiman’ ni anch wafanyina kwikal ni ranaken mulong wa akayitil inay akarumuka.​—Yona 3:10–4:1, 4, 11.a

Yilakej yiney yimekeshin anch kudi antu akad kuwanyin, “anch muntu wajiman kakutwishap kuwanyish yom yitentamina kurutu kwa Nzamb.”​—Jakobu 1:20.

Mutapu ik ukutwisha kuyikel ujim wey?

• Kwijik ubaj ukutwisha kudiokal ku kulik kuyikel ujim. Antu amwing akat kutong anch kujiman chidi chijingidij cha kwikal ni usu. Mu win yakin, muntu wakad kuyikel ujim udi muntu uziyina nakash. “Muntu mwawonsu wakad kwilam mu muchim wend udi mudi musumb uumbwokina wakad jimpwembu.” (Jinswir 25:28; 29:11) Ku mutambu ukwau, anch twakudish ukaliweny wa kuyikel ujim, tumekeshin usu wakin ni manangu. (Jinswir 14:29) Bibil ulondin anch: “Ukweta ujim ukemp umupandakenamu mwin dikand kuwap.”​—Jinswir 16:32.

• Yikel ujim wey kurutu usala yom ukutwisha kunenganan. Kuseng 37:8 ulondin anch: “Ikuchika ku kuswej, ulika ujim; kangal wiswidiosh mulong chawiy chikat kutwal kusu ku kuyip.” Ijik anch chisu twovila ujim, tufanyidin kukwat mupak​—tukutwish kutond kuuyikel kurutu kwa kushiken “ku kuyip.” Mudi mulondinay Efes 4:26 anch “babalany, chakwel kangal ujim wakusadikish chitil.”

• Anch chiswapel, diokal pa ndond udia kurutu ujim upandakan. Bibil ulondin anch: “Disambishil dia matend didi mudi kusambish kujikul mem, chawiy lik piwakadia kal kusambish matend.” (Jinswir 17:14) Ap anch chidi cha manangu kupwish milong mau mau, antu aad akweta milong afanyidin cha kusambish kuchingel anch ujim wau uduta ni kupwa kwisamb chad mu mutapu uwamp.

• Ikal ni uman. Jinswir 19:11 ulondin anch: “Manangu makat kukepish ujim wa muntu.” Tudi in manangu anch twikal ni uman wawonsu kurutu kwa kukwat mupak wa nsudiel. Anch twatesh nawamp uman ukuletay muntu ni muntu, tukwovap ujim wakad mayingishin.​—Jakobu 1:19.

• Lembil mulong wa kwikal ni chisambu mu manangu. Malembil makutwish kukukwash kwikal ni “chisambu cha Nzamb chisutila ronganyin ra antu.” (Filip 4:7) Kulembil yidi njil yimwing yijim tukata kutambwil spiritu utumbila wa Nzamb, spiritu winou ukutwish kukudish mu etu mikadil mudi chisambu, kushimpish muchim ni kwikand.​—Luka 11:13; Galatia 5:22, 23.

• Tond arund ney nich manangu. Yisu yivud tukat kwikal ni yaku mudi ya antu twendina nau. (Jinswir 13:20; 1 Korint 15:33) Chawiy chilondinay Bibil anch: “Kangal wakwat urund nend muntu wa ujim. Kangal kwend nend muntu ukweta ujim wa swa.” Mulong wak? “Mulong ap ey wez wilej yaku yend, ni kwikas amwiney mu mupit.”​—Jinswir 22:24, 25.