Yom ik Yilondinay Bibil Piur pa Kupan?
Chakul cha Bibil
Bibil utulejin kwikal in kupan yom kanang kudi akwetu ni kusal nich mayingishin mawamp. Umekeshin anch kupan kukat kumusangaresh mwin kupan ni mwin kutambul. (Jinswir 11:25; Luka 6:38) Yesu walonda anch: “Chiyukish cha mwin kupan chipandakenamu cha mwin kutambul.”—Midimu 20:35.
Yipan ik yimusangareshina Nzamb?
Kupan kukat kulet musangar anch twapan kwa kwikatin. Bibil ulondin anch: “Chifanyidin muntu mwawonsu kupan mudi mutongilay amwinend wakad kupan nich ushon ap kupan kwa kumubachik nich usu. Mulong Nzamb ukatil muntu ukata kupan nich musangar.”—2 Korint 9:7.
Mu “relijon” witiyinay Nzamb, kupan nich muchim uwamp kudi kwa usey. (Jakobu 1:27) Muntu ukata kuyikwash antu adia mu maswir ukat kusal mu kwovijan ni Nzamb, mulong wa yisal yend yiwamp yidi mudi ukat kumusondjik Nzamb. (Jinswir 19:17) Bibil ufundishin anch Nzamb amwinend ukez kumuchirishin ni kumufut muntu ukata kupan.—Luka 14:12-14.
Yipan ik yakad kumusangaresh Nzamb?
Yipan yipaniningau nich mayingishin ma choy. Chilakej:
Mulong wa kwimekesh kudi antu.—Mateu 6:2.
Mulong wa kuchingej anch akukuchirishin.—Luka 14:12-14.
Mulong wa kuland dipandish.—Kuseng 49:6, 7.
Yipan yikasikeshina midimu ap yisal yifishinay nich Nzamb. Chilakej, chikwikal chiyimp kumwinkish muntu nfalang mulong wa kuya kusengan masengan ma nfalang, kuna yom yilewishena ap kukwachik maar mudi rupuch. (1 Korint 6:9, 10; 2 Korint 7:1) Chilik chimwing, chiwanyidinap kwau kupan nfalang kudi muntu ukweta usu wa kusal mudimu mulong wa kuwapish mashakamin mend pakwez ndiy ulikin kusal mudimu.—2 Tesalonik 3:10.
Yipan yitukangeshina kuwanyish yisend yitwinkinay Nzamb. Bibil ufundishin anch ntakel wa dijuku ufanyidin kusal mudimu mulong wa kulam dijuku diend. (1 Timote 5:8) Chikwikalap chiwamp kuyinkish antu akwau yom yivud, pakwez ndiy waburen yom ya kupan mu dijuku diend. Chawiy, Yesu wayifisha nich antu alikina kuyikwash anvaj au apamina kal nich nfalang ni chitongijok chakwel anch “nachipang kuchipan kudi Nzamb.”—Marko 7:9-13.