Mulong wak Yesu Amutazukin Anch Mwan a Nzamb?

Chakul cha Bibil

Tupamp tuvud, Bibil umutazukin Yesu anch “Mwan a Nzamb!” (Yohan 1:49) Dizu “Mwan a Nzamb” dimekeshin anch Nzamb ndiy udia Sakatang ap Musul wa yom yawonsu yikweta mwom, kuwejaku ni Yesu. (Kuseng 36:9; Kujingunik 4:11) Bibil kafundishinap anch Nzamb wavala mwan mud mutapu ukatau antu kuval an.

Bibil uyitazukin kand angel anch “an a Nzamb wakin.” (Job 1:6, NWT) Ni Bibil ulondin anch muntu wakusambish, Adam, wading niyend “mwan a Nzamb.” (Luka 3:38) Pakwez, mulong Yesu ud chitang chakusambish chatangay Nzamb, ni Nzamb wamutanga amwinend, chawiy chimutazukinay Bibil anch ud Mwan wakusambish wa Nzamb.

• Ov, Yesu wading mwiur kurutu kwa kuvadik panap pansh?

• Yesu wasalang yom ik kurutu kwa kwez panap pa divu?

Ov, Yesu wading mwiur kurutu kwa kuvadik panap pansh?

Mwaning. Yesu wading chitang cha mu spiritu mwiur kurutu kwa kuvadik panap pansh mud muntu. Amwinend walonda anch: “Am nidiokil mwiur.”—Yohan 6:38; 8:23.

Nzamb wamutanga Yesu kurutu kwa kutang yom yin yawonsu. Bibil ulondin piur pa Yesu anch:

• “Ndiy ud . . . Mwan wa kusambish wa yom yawonsu yatangau.”—Kolosay 1:15, NWT.

• Ud ‘disambishil dia yitang ya Nzamb.’—Kujingunik 3:14.

Yesu wawanyisha uprofet ulondina piur pa muntu wafanyina kwikal “wa dijuku dia pakur.”—Mike 5:1; Mateu 2:4-6.

Yesu wasalang yom ik kurutu kwa kwez panap pa divu?

Wading ni ndond ya piur nakash mwiur. Yesu walonda piur pa ndond yiney pamulembilay Tatukwend anch: “Tatuku! . . . nginkisha uyaj kurutu kwey, wawiy kamu uyaj unadinga nich piyading ngand kand kal uyitang.”—Yohan 17:5.

Wamukwasha Tatukwend kutang yom yikwau yawonsu. Yesu wasala pamwing ni Nzamb mud ‘nsalamudimu ukweta ukaliweny.’ (Jinswir 8:30) Bibil ulondin piur pa Yesu anch: “Mwi ndiy Nzamb watanga yom yawonsu yidia mwiur ni yidia pansh.”—Kolosay 1:16.

Nzamb wamusadina Yesu mulong wa kutang yom yawonsu yidiaku. Mu yitang yiney mud kand yitang yawonsu ya mu spiritu ni diur ni divu. (Kujingunik 5:11) Mu mitapu yimwing, Nzamb wasala pamwing ni Yesu mud mutapu ukatay nkaliweny kusal pamwing ni mwin kutung. Nkaliweny ukat kusal maplan; chad mwin kutung ukat kusadin maplan minam mulong wa kutung yom.

Wading Dizu. Pisambidinay piur pa mwom wa Yesu kurutu kwa kwez panap pansh, Bibil umutazukin Yesu anch “Dizu.” (Yohan 1:1) Chinech chirumburikin kamu anch Yehova wamusadina Mwanend mulong wa kupan uruu ni mbil jend ku yitang yikwau ya mu spiritu.

Chimeken kand anch Yesu wading Katum wa Nzamb mulong wa kupan uruu wend kud antu panap pansh. Chimeken anch Nzamb walonda kusutil Yesu mud Dizu chisu chayinkishay Adam ni Ev yijil mu chir cha Eden. (Disambishil 2:16, 17) Pamwing ap Yesu ndiy wading mwangel wayitakela in Isarel mwimpay ni in Isarel afanyina kumuziyin kamu.—Kubudik 23:20-23.a