Ov, Nzamb Wasadina Dikarumuk Mulong wa Kutang Milad Kushalijan ya Mwom?

Chakul cha Bibil

Bwat. Bibil ulejen patok anch Nzamb wayitanga antu pamwing ni “mitapu” kushalijan ya annam ni mitond.a (Disambishil 1:12, 21, 25, 27; Kujingunik 4:11) Ulondin kand anch antu awonsu adiokil kud Adam ni Ev, anvajetu a kusambish. (Disambishil 3:20; 4:1) Rusangu ridia mu Bibil rinunginap chikas ku chitongijok cha kwel anch Nzamb wasadina dikarumuk mulong wa kutang mitapu kushalijan ya mwom. Ap mwamu, Bibil kapwitamijadinap nau in siyans alejena anch mitapu ya yitang yikweta mwom yishalijadin.b

• Ov, Nzamb wasadina dikarumuk?

• Ov, mafundish ma dikarumuk matanijadin ni Bibil?

• Chid nchik piur pa ukaliweny ukwetau annam ni mitond wa kwijidin mashakamin masu?

Ov, Nzamb wasadina dikarumuk?

Antu itiyijina anch kuding Nzamb pakwez mwom wadiokala ku dikarumuk akwet yitongijok yivud yishalijadina. Kukwatijan ni buku Encyclopædia Britannica, antu amwing akat kwitiyij anch “kushalijan kwa chivadik kudia mu yom yatangau ud mutapu umwing ukatay Nzamb kusadin mulong wa kusop mangand matangay.”

Kwitiyij anch kuding Nzamb pakwez mwom wadiokala ku dikarumuk kukutwish kand kulet yitongijok yilondwilaku ey:

• Yitang yawonsu yikweta mwom yadiokala kud angakiril amwing adingaku pasak nakash.

• Mutapu umwing wa mwom ukutwish kubudish mutapu ukwau wa mwom ushalijadina nakash kusutil dikarumuk, chitongijok chinech akat kuchitazukang yisu yimwing anch macroevolution.

• Mu mutapu kanang, Nzamb ndiy udia musul wa kushalijan kwinoku kwa yom.

Ov, mafundish ma dikarumuk matanijadin ni Bibil?

Kwitiyij anch kuding Nzamb pakwez mwom wadiokala ku dikarumuk kumekeshin anch rusangu ra Bibil piur pa mutapu watangau yom ridia mu Disambishil ridiap kwau rakin. Pakwez, Yesu wamekesha anch rusangu ridia mu mukand wa Disambishil rid rusangu ra yom yasadika. (Disambishil 1:26, 27; 2:18-24; Mateu 19:4-6) Bibil ulondin anch kurutu kwa kwez pa divu, Yesu wading bil mwiur ni Nzamb, ni wamukwasha Nzamb kutang “yom yawonsu” yidiaku. (Yohan 1:3) Chawiy, chitongijok cha kwel anch Nzamb wasadina dikarumuk mulong wa kutang milad kushalijan ya mwom chikwatijadinap ni mafundish ma Bibil.

Chid nchik piur pa ukaliweny ukwetau annam ni mitond wa kwijidin mashakamin masu?

Bibil karumburilap kushalijan kwa mutapu ik kukutwisha kumekan mu yitang ya mutapu umwing. Ni katadikinap chitongijok cha kwel anch mitapu kushalijan ya mitond ni ya annam yatangau kud Nzamb yikutwish kushalijan payidandamedina kuvulijan ni kushakam mu jindond jisu. Ap anch antu amwing akat kuman kushalijan kwinoku mud mutapu ukwau wa dikarumuk, kwikil mwom usu ukata kuvadik bwat.