Kamushet Kakemp Kapanina Yakudia ya mu Spiritu

Nlel Atuman a Yehova atambwil yakudia ya mu spiritu yivud nakash kusutil Internet kusutamu pakur. Pakwez mu jindond jivud pa mangand, akadivar netu kakwetap mutapu wa kwandam pa Internet. Akwau ashich mu jindond mwakad kwikal kasu ka nzembu kawamp (courant), internet usutina kwa mar ap kand kwamwamu kwau Internet.

Pakwez akadivar nau anambaz avud akutwish katat kupwit (télécharger) mikand pa matelefon ap matablet mau pakad ap kwandam pa Internet! Chitwishikin mutapu ik?

JW Box kad kamushet kakemp kapaninau ku yikumangen yidia mu jindond jiburedina Internet muwamp. Kamushet kinak kakwet routeur ulandishinau kud in kwisak, program warijekinau kal ku Departema wa Informatik wa ku Betel ni kakwet kand mikand ya elektronik ni mavideo madia pa jw.org. Kamushet kinak kamwing kakwet usey wa adolar piswimp 75.

Ku Chot cha Want, akadivar nau anambaz akutwish kukwatikesh matelefon ap matablet mau ku réseau wa wifi wa JW Box ni kupwit mikand ni mavideo. Ap antu akweta matelefon ni matablet makur ap makad kwikal ni usey nakash akutwish kupwit yom. Chawiy anch chikumangen chikatap kwandam pa Internet, JW Box ukwikal mutapu ik ni mikand ap mavideo masu? Biro wa mutiy ukat kutum chisu ni chisu maflash makweta mikand ni mavideo masu madia pa jw.org makutekau chad mu JW Box. Flash umwing ukwet usey wa adolar piswimp 4.

JW Box wayikwashin akadivar nau anambaz mutapu ik? Nathan Adruandra, tatuku wa dijuku ushicha mwi ngand ya République Démocratique du Congo urumburil anch: “Napakisha tupamp tuvud kupwit dram ulondina anch ‘Yehova, . . . Nikuchingejidin Ey’ ni dram wa Vurikany Rusangu ra Mband wa Lot. Pakwez nakanganya ni yanziyisha nakash. Katat nitwishin kupwitin mavideo minam mu telefon wam ni chinech chitukwashin etu anvaj kuyifundish nawamp anetu.”

Mukadivar umwing ukwashina yikumangen ya mu Nigeria kutek JW Box ulondin anch: “Akadivar nau anambaz akat kuman JW Box mud chipan cha pakampwil chidiokila kud Yehova. Akwet chad musangar mulong atwishin kupwit swa mikand ni mavideo yidia mu Mushet wa Yom ya Kufundish Nich.”

Atumin tumishet twinetu 1 700 ni kusut ku yikumangen ya mu Afrik, ya mu Oseyani ni ya mu Amerik wa Kurul, ni atenchikin kutum kand tukwau tuvud nakash ku yikumangen yivud. Nfalang ja kuland nich yom yin yawonsu yiney jidiokil kwisu? Jidiokil ku yipan yipaninau pa mangand mawonsu ni yikwau akat kuyipan kusutil donate.jw.org. Wajikitany nakash mulong wa yipan yen ya kwikatin.