Antu amwing amening anch chikasiken kumukat Nzamb. Kudi awiy, chikasiken kumusejin, udi kulemp, ap mwin chisum. Shinshikin mazu madia kurutu oku:

• Marco, mu Italie walonda anch: “Namulembila Nzamb mulong wa kumwit ukwash, pakwez pa chisu chawiy chimwing, niyova anch wading kulemp nakash, mudi chikasiken kumusejin. Nadingap ni kutong anch Nzamb udi muntu ukweta yovil.”

• Rosa, mu Guatemala walonda anch: “Ap anch nasota chakin kumusadil Nzamb, wamekana kwikal kulemp nakash. Natonga anch wading Nzamb mwin chisum ukata kusu kutupup. Kinitiyijap anch wading ni yovil ya ranaken.”

• Raymonde, mu Canada walonda anch: “Pinadinga mwanikanch, nadinga ni kutong anch Nzamb wanding ni kukimbang yilim yetu, tayad mulong wa kutupup anch chifanyidin. Kupwa, namumana mudi wakad kutwish kuta nend urund. Nzamb wading mudi ntakel mujim ukata kutakel milong ya antu atakedilay​—pakwez wakad kuyibangaku.”

Ov, chom ik utongina? Ov, Nzamb udi wakad rukat? In Kristu alangwisha chipul chinech mu yitot ya mivu. Chawiy lel, mu chirung cha Moyen-Âge, antu avud pakach pa in Kristendom kadingap ni kumulembil Nzamb wa Dikand Diawonsu. Mulong wak mwamu? Mulong antu adinga ni kumwov wom wakad kufanyin. Mwin kwilej jisangu ja pasak Will Durant walonda anch: “Mutapu ik ukutwishay mukayitil kusal anch kulembil kwend kwikala chom chimwakamishin ni kusal anch Nzamb ikala kulemp?”

Mutapu ik washikenau kukumuman Nzamb mudi “wakamishena ni udia kulemp”? Chom ik chilejenay chakin kamu Bibil piur pa Nzamb? Ov, kwilej uyakin piur pa Nzamb kukutwish kukukwash kumukatish?

YITIYIJINAU ANTU AVUD

“Twovijanap piur pa kujimbul dijin dia Nzamb, ni ap anch chidi mwamu, dijin dined dikutwish kwikal nchik.”​—Mulej David Cunningham, Malejan ma Teoloji.

UYAKIN UDIOKILA MU BIBIL

Nzamb walonda anch: “Yam kusu [Yehova] Nzamb wen.” (Isay 42:8) “Yehova” didi dijin dia Hebereu dirumburikina anch “Ndiy Ukata Kwikadish.”​—Disambishil 2:4.

Yehova usotin anch tusadila dijin diend. Bibil ulondin anch “Mutazukany pa dijin diend. Yijikishany antu yisal yend. Lejanany anch dijin diend dizambukin piur.”​—Isay 12:4, NW.

Yesu wasadila dijin dia Nzamb. Mu malembil, Yesu wamuleja Yehova anch: “Am nadijikish kal dijin diey kudi awiy [in kwilej a Yesu], nikez kadijikish kand.” Mulong wak Yesu wadijikisha dijin dia Nzamb kudi in kwilejend? Wadandamena kulond anch: “chakwel rukat riwankatila nich ey [Nzamb] rukwikal mu awiy, ni yam mu awiy.”​—Yohan 17:26.

CHA USEY

Walter Lowrie mwin kwilej teoloji wafunda anch: “Muntu wakad kumwijik Nzamb pa dijin kandikal amwijika chakin kamu mudi muntu wakin, ni kakutwishap kumukat, umwij kusu mudi usu wakad kumekanang.”

Ikundj umwing utazukinau anch Victor wadinga ni kuya ku egliz rubing ni rubing, pakwez kiyovap kwikal umwija chakin kamu Nzamb. Walonda anch: “Kupwa nileja anch dijin dia Nzamb ndiy Yehova, ni kadinga kapamp ka kusambish kudi ndiy kutesh dijin dined. Pakwez niyova mudi nashikena ku kwijik muntu unateshap kal nakash piur pend. Nashikena kumuman mudi muntu wakin ni kukudish urund nend.”

Yehova, niyend, ukat kuyisejin antu asadidila dijin diend. Piur pa in “kutong mulong wa dijin diend,” Nzamb ukanin anch: “Nikez kayovil riy mudi tatuku mukat kumwovilay mwanend riy ukata kumusadil.” (Malakiy 3:16, 17) Nzamb ukat kuyiyukish kand antu akata kumutazuk pa dijin diend. Bibil ulondin anch: “Muntu mwawonsu ukutazuka pa dijin dia Nsalejetu [Yehova] ukez kupand.”​—Rom 10:13.

YITIYIJINAU ANTU AVUD

Relijon wa win Kristu “mu kujimb kwend kwa Katolik wa Rom, Ortodoks wa Kwingangel, ni Uminshon (protestantisme) itiyijin Nzamb umwing mu antu asatu: Nzamb Tatuku, Nzamb Mwan, ni Nzamb Mwiku Utumbila. Kulondulijan ni teoloji wa win Kristu, kwitiyij kwinoku kudiap kwitiyij kwa anzamb asatu pakwez antu inay asatu adi pakampwil muntu umwing.”​—The New Encyclopædia Britannica.

UYAKIN UDIOKILA MU BIBIL

Yesus, Mwan wa Nzamb, kalondap ap pakemp anch udi chilik chimwing ni Tatukwend. Pakwez, walonda anch: “Niyil kudi Tatuku, mulong ndiy udi mujim kwimpandakanamu am.” (Yohan 14:28) Wamuleja kand umwing wa in kumulondul end anch: “Am nachirik kal kudi Tatukwam, ndiy kamu Tatukwau, ndiy Nzamb wam, udi kand Nzamb wau.”​—Yohan 20:17.

Mwiku utumbila kadiap muntu. In Kristu a kusambish ‘izula ni mwiku utumbila,’ ni Yehova walonda anch: ‘Nikez kupan mwiku wam kudi antu awonsu.’ (Midimu 2:1-4, 17) Mwiku utumbila kadiap chikunku cha Usatu. Udi usu wa kusadish wa Nzamb.

CHA USEY

In kwilej in Katolik Karl Rahner ni Herbert Vorgrimler arumburila piur pa Usatu, “kakutwishap kuwijik pakad kuburik ni ap kupwa kwa kuburik kwinoku kakutwishap kuutesh nawamp.” Ov, ukutwish chakin kumukat muntu ukasikena kwijik ap kutesh? Chawiy lel, malejan ma Usatu, madi chikangesh ku kumwijik ni kumukatish Nzamb mwin rukat.

Marco, wajimbulangau mu mutu wa mulong udia kwinsambishil, wamana Usatu mudi chikangesh. Walonda anch: “Nadi nitongin anch Nzamb wading ujindjikin untu wend kudi am, ni chinech chasadil anch ikala kulemp nakash, wakad kwovakan, ni ukasikena kuta nend urund.” Pakwez, “Nzamb kadiap Nzamb wa kanvundangesh.” (1 Korint 14:33, Mukand wa Nzamb) Katujindjikap untu wend. Usotin tumwijika. Yesu walonda anch: “Tumwij utukata kwifukwil.”​—Yohan 4:22.

Marco walonda anch: “Panileja anch Nzamb kadiap chikunku cha Usatu, natwisha kushiken ku kuta urund nend.” Anch twamuman Yehova mudi muntu panrend pa ndond pa kumuman mudi ngendj wakad kwovakan, chikuswapal kumukat. Bibil ulondin anch: “Ndiy wakad kukatan kamwijip Nzamb; mulong Nzamb udi rukat.”​—1 Yohan 4:8.

YITIYIJINAU ANTU AVUD

Mu (Catéchisme de l’Église catholique) alondin anch: “Kapamp kamwing kupwa kwa rufu mipim ya antu afila mu yitil ya rufu yiyiling kamu mu karung ka misiny, mwawiy mukatau kuyipupin mu karung ka misiny, ‘mu kutem kasu ka chikupu.’” Antakel amwing a relijon alandin anch karungu ka misiny udi mwikadil wa kwaurik rawonsu ni Nzamb.

UYAKIN UDIOKILA MU BIBIL

Ezekiel 18:4 ulondin anch: ‘Mupim ukata kusal chitil—wawiy ukez kufa.’ Afu “kijap chom.” (Mulej 9:5) Anch mupim ukat kufa ni wijap chom, ov, mutapu ik muukutwisha kuman mar ‘mu kasu ka chikupu’ ap mar ma mwikadil wa kwaurik rawonsu ni Nzamb?

Mu Bibil, dizu dia Heberew ni dia Grek diakurumunau chisu chivud anch “karung ka misiny” dilondidil nakash nzay ya antu awonsu. Chilakej, pamanay Job mar ma mayej makash, walembila anch: ‘Ing njindjika kwam mu sheol [‘mu karung ka misiny’].’ (Job 14:13) Job wasota kwiswedish, kangal mwi ndond ya mar ap ya kwaurik ni Nzamb, pakwez mwi nzay.

CHA USEY

Chisum chisadining anch Nzamb alika kutukat ni twikala kulemp nend. Rocío, ushicha mu Mexico walonda anch: “Kudiosh ku wanikanch anleja malejan ma karung ka kasu, nova wom anch natwisha kutong anch Nzamb ukwet ngikadil yiwamp ap yimwing. Natonga anch wading mwin ujim ni wakad kulikishinang.”

Mazu ma patok ma Bibil piur pa dirumburish ni mwikadil wa afu makarumuna mutapu wadingay Rocío ni kumuman Nzamb. Walonda kand anch: “Niyova zwang​—anch yovil yikash yilimina yinadinga nich yandiokal, nasambisha kuchingejin anch Nzamb utusotidil yom yiwamp nakash, anch utukatishin ni tukutwish kumukat. Udi mudi tatuku uyikwatina anend ku chikas ni kuyisotil yom yiwamp nakash.”​—Isay 41:13.

Antu avud asadil usu chakwel kangal ikala nich wom wa karung ka kasu, pakwez Nzamb kasotinap umusadila mulong ukwovishin wom. Pakwez, Yesu walonda anch: “Mukatany [Yehova] Nzamb wen.” (Marko 12:29, 30) Chikwau kand, anch twajingunin anch Nzamb kakatap kusal nich kasolikany nlel, tukutwish kuchingejin kand mu dirumburish diend didia kurutu. Mudi Elihu murunend a Job, tukutwish kulond nich kashinsh anch: “Nzamb udi kulemp ni kuyip, Mwin Dikand Diawonsu kakutwishap kupengam.”​—Job 34:10.

Dichuku dimwing, mu Yerusalem, Yesu wanding wisambidin piur pa Tatukwend, Yehova, ni kuyimekesh patok antakel a ma relijon ma makasu a pa chirung chend. (Yohan 8:12-30) Yalonday pa chisu chinicha yitufundishin mutapu wa kushinshikin yitiyij ya antu avud piur pa Nzamb lel unou. Yesu walonda anch: “Anch en waziyilany malejan mam, en udiany in kwilejam chakin. Ukez kwijikany uyakin, chad uyakin ukez kukukwolany.”​—Yohan 8:31, 32.

“Anch waziyilany malejan mam.” Pinap Yesu washa chilakej mulong wa kujingunin anch malejan ma marelijon madi ‘makin.’ Piuteshina rusangu piur pa Nzamb, iyipula amwiney anch, ‘Rikwatijadin ni mazu ma Yesu ni makwau mawonsu madia mu Mifund Yitumbila?’ Imburij antu amutesha kambuy Paul padingay ni kulond ni adinga “kwilej pichuku pichuku Mukand wa Nzamb chakwel ijika anch, yom yilondilay Paul yidi yakin.”​—Midimu 17:11.

Marco, Rosa, nenday Raymonde, awonsu ajimbwilau mu mutu wa mulong wakusambish wa gazet winou, pakampwil ashinshikina piur pa yitiyij yau kusutil ku kwilej Bibil ni Atuman a Yehova. Yom ik yilejau?

Marco: “Muntu utwading kwilej nend Bibil wasadilanga Mifund mulong wa kwakul ku yipul yawonsu yadingay ni kwiyipul mukajam. Rukat retu mulong wa Yehova rasambisha kukul, ni urund wetu mudi ambay a uruw wikala wa piswimp nakash!”

Rosa: “Chakusambish, Nading nikutong anch Bibil wading kusu mukand wa chamwamu wa manangu ma antu upakishina kurumburil piur pa Nzamb kusutil ku ukwash wa manangu ma antu. Pakwez, pakemp pakemp, natana yakul ya Bibil ku yipul yam. Katat, Yehova udi wakin kudi am. Udi muntu unikutwisha kuchingejin.”

Raymonde: “Namulembila Nzamb chakwel ankwasha nileja kumwijik. Kwinyim kwa machuku, nfumwam niyamam twasambisha kwilej Bibil. Kupwa, twileja uyakin piur pa Yehova! Twasangara nakash pa kujingunin uyakin piur pa Nzamb.”

Bibil kalejenap kwend makasu piur pa Nzamb; pakwez umekeshin uyakin piur pa ngikadil yend yishimwokishina. Didi Dizu diend diapepilau, ni ditukwashina “kwijik yom yawonsu yiwamp yatwinkishay Nzamb.” (1 Korint 2:12) Ov, ukushinshikinap amwiney pa mutapu ukutwishay Bibil kwakul ku yipul yijikena ni ya usey piur pa Nzamb, pa rutong rend ni pa machuku metu ma kurutu? Tang yakul ku yipul yimwing pakach pa yipul yiney mu buku “Chifundishinay Bibil > Yakul ku Yipul ya Bibil” pa www.jw.org. Ukutwish kand kwit dilejan dia Bibil pa kapend ka Web ap kudi umwing wa Atuman a Yehova. Tuchingejin anch, ang wasal mwamu, ukez kaman anch chiswapel kumukat Nzamb kupandakanamu muutongina.