Ov, Nzamb Udingaku?

Chakul cha Bibil

Mwaning, Bibil upanin uman uvud nakash umekeshina anch Nzamb udingaku. Utukasikeshin kwikal ni ritiy nakash mudiay Nzamb, kadiap kwau kwitiyij mud mputames ku yom yilondinau kud marelijon, pakwez utukasikeshin kusadin “usu wa manangu” ni “ronganyin.” (Rom 12:1; 1 Yohan 5:20) Shinshikin yitongijok yidia kwinshin oku yimedina pa Bibil:

• Kwikalaku kwa mangand mawamp mwamu mudia ni mwom kumekeshin kamu anch kuding Sakatang. Bibil ulondin anch: “Chikumbu ni chikumb chikwet muntu wachitunga, pakwez Nzamb udi mwin kutung wa yom yawonsu.” (Hebereu 3:4) Ap anch chitongijok chinech chiswapel kutesh, antu avud ilejina kal nakash amen anch chid chikash nakash.a

• Chitudia antu, twavadika nich maswir ma kwov kurumburik kwa mwom, ni maswir minam mad mud impu tukata kudandamen kwov ap anch twawanyish maswir metu ma ku mujimbu. Mawiy minam maswir matazukinay Bibil anch “maswir ma mu spiritu,” mitina kumwijik ni kumwifukwil Nzamb. (Mateu 5:3; Kujingunik 4:​11) Maswir ma mu spiritu matwinkishin kashinsh anch Nzamb udingaku, pakwez mamekeshin kand anch ud Sakatang mwin rukat ukatina anch etu tuwanyish maswir metu minam.​—Mateu 4:4.

• Uprofet uvud udia mu Bibil aufunda mivu yivud kurutu kwa chisu ni weza kuwanyin kamu mud mutapu walejenau. Win kashinsh ni kuwanyin kwa uprofet winou kumekeshin kamu patok anch wadiokalap kud an a antu.​—2 Pita 1:​21.

• 

  Antu afunda Bibil ading ij yom ya siyans yakadiau antu a pa chirung chau kwijik. Chilakej, pasak nakash antu atongang anch divu did pa nnam umwing mujim nakash, mud ndjamb, nswind ap ikwal a ngomb. Chinyim ni chinech, Bibil wading walondin kal anch Nzamb watanga divu “wakad kuyizezidik ku chom.” (Job 26:7) Chilik chimwing, Bibil warumburila nawamp nakash anch divu did kwau dia “chinkatang.” (Isay 40:22) Antu avud amen anch choviken kamu kutong anch rusangu riner rafundau kud in kufund Bibil radiokala kud Nzamb.

• Bibil wakwil ku yipul yimwing yikash, ni yipul yiney anch kayakwilap nawamp, yikutwish kumushikij muntu ku kwitiyij anch Nzamb kadingakwap kwend. Chilakej: Anch Nzamb ud mwin rukat ni ukwet usu nakash, ing mulong wak mar ni uyimp yidandamedin mu mangand? Mulong wak yisu yivud marelijon makat kuyibachik antu kusal yom yiyimp pa ndond pa kuyikasikesh kusal yom yiwamp?​—Titus 1:​16.