Mulong Wak Mwimpel Umwing Wadiokala mu Egliz Wend

Tulejaku bil amboku piur pa wanikanch wey.

Navadikina mu Itali mu muvu wa 1943. Am nau anamakwam amakundj ni amband twapamina mu ul ukemp mwadingay tatuku ndim ni nsong a mabay. Anvajetu atulila kwikal in katolik awamp

Mulong wak wakata kwikal mwimpel?

Pinading mwan mukemp, nakatang nakash kuyitesh amimpel ku egliz. Nakatang nakash mutapu wau wa kulond, ni yishankur ya egliz yasalangau. Chawiy nitekina mupak wa kwikal mwimpel. Pinawanyisha mivu 13, maku wantwala ku interna kukatau kuyirijekin ansand chakwel ez ileja mu machuku ma kurutu shikol ya kwikal mwimpel.

Ov, wilejanganya Bibil ku shikol yiney?

Bwat kamu. Pinawanyisha mivu 15, mulej wam umwing wanginkisha chikunku cha Evanjil​—mikand yinying yilejena rusangu ra mwom wa Yesu ni mudimu wend—​ni namutanga buku winou tupamp tuvud nakash. Pinawanyisha mivu 18, naya mu Rom mulong wa kwilej ku iniversite utakedinau kudiay pap. Nileja Latin, Grek, dilejan dia jinsangu ja pakur (histoire), filozofi, dilejan ditadina yisalijok ya antu (psychologie) ni dia yom ni yishankur ya relijon (théologie). Ap anch twachirokinang maverse ma Bibil ni kutesh kutang kwa Bibil mu mafundish ma Diarubing, pakwez twilejangap kamu chakin Bibil .

Washikena kwikal mukurump wa seminer. Ov, chinech chading chikwitin kand kufundish?

Mudimu wam wading wimedin nakash pa kutakel yom. Pakwez nafundishaku malejan mamwing piur pa Mipak ya Chisak cha Kaad cha Vatican

Chad mulong wak wasambisha kwidjidjek piur pa egliz?

Kud yom yisatu yanrumbageshang. Egliz wiyandjikang mu yom ya politik. Kwadingap kwau dipup mulong wa yisalijoj yiyimp ya antakel ni antu a mu egliz. Ni mafundish mamwing ma in Katolik madingap kamu makin. Chilakej, mutapu ik ukutwishay Nzamb mwin rukat kuyipup antu chikupu anch afa? Chikwau kand, ov, Nzamb usotin kamu anch tuchirikina malembil mawiy mamwing mamwing tupamp tuvud mu kusadin shapele?a

Chad yom ik wasala?

Nich mansoj ku mes, namulembila Nzamb chakwel antakela. Nalanda kand Bible de Jérusalem, dichap diabudishau kud in Katolik mu dizu dia Italien ni nasambisha kuditang. Kupwa, Diarubing dimwing pamanch nading nikat kuzezidik mizabu yam kupwa kwa mes, amakundj aad eza ku seminer. Anleja anch ad Atuman a Yehova. Nisamba nau mu saa umwing ni kusut piur pa Bibil ni yom yifundishinay piur pa mutapu wa kujingunin relijon wakin.

Yom ik watonga piur pa antu inay eza kukutal?

Nasangera nakash mutapu wading ulondinau nich kashinsh ni mutapu watanangau pakad kulab maverse mu Bibil wa in Katolik. Kupwa, Kaman mukwau wading utazukinau anch Mario, wasambisha kwez kwintal. Wading mwin kushimpish muchim ni ushinshamena​—Diarubing diawonsu pamanch, mu ruval ap miten yikash, wabulang rupwambu ra chis cha ku seminer pa saa wa chidivu

Ov, amimpel akwau asangerang kuyiman antu ezang kukutal?

Nayitazuka chakwel twisambang etu awonsu pamwing, pakwez kwikil ap umwing wau wakwata dilejan dia Bibil nich usey. Pakwez am nasangerang nakash kwilej. Nading nikat kwilej yom yiwamp nakash, mud mulong wak Nzamb ulikididil uyimp ni mar​—chom chading chinrumbangeshina mu mivu yivud nakash.

Ov, amakurump ey apakisha kukukangesh kwilej Bibil?

Mu muvu wa 1975, naya tupamp tuvud nakash ku Rom mulong wa kuyilej yitongijok yam. Amakurump asala usu nakash wa kuswimp mutapu wam wa kutong, pakwez kwikil ap umwing wasadina Bibil. Kupwa, machuku ma ngond 9 Ngond wa 1 muvu wa 1976, nayifundina mukand wa kuyilej anch am nidiap kand mwin Katolik. Kupwa kwa machuku maad, nadiokala ku seminer ni nasenda train mulong wa kuya kukumangan ku chikumangan cham cha kusambish nau Atuman a Yehova; chading komb chikumangan chijim kweza yikumangen yivud. Yom yawonsu yading yishalijangen nakash ni yom nading nijidina kal! Kaman mwawonsu wading ni Bibil wend ni wading ukat kulondul pamwing nau in kusal madiskur pisambidinau piur pa mitu ya milong kushalijan.

Dijuku diey diatonga yom ik piur pa yom yawonsu yiney?

Avud anrishikisha nakash. Pakwez najingunina anch mwanamakwam umwing wading ukat kwilej nau Atuman a Yehova mu Lombardie, kwiyand kwa Itali. Naya kumutal, ni Atuman a kwinakwa ankwasha kuman mudimu ni ndond ya kushakam. Kwinsudiel kwa muvu winawa, natambula dibatish ni kwikal Kaman wa Yehova

Ov, kud chom kanang chikunenganeshina?

Kwikil ap chimwing! Katat, niyovil kamu anch nid piswimp ni Nzamb, mulong yom nija piur pend yimedin pa Bibil, kadiap pa filozofi ap yishankur ya egliz. Ni nikutwish kuyifundish antu akwau nich kashinsh ni win yakin.