CHITONGIJOK CHA BIBIL

“Ov, Nifanyidin Kusengan​—‘Masengan Ma Ubaj?’”

“NLEL UNOU ANTU AVUND NAKASH KASANGAREDINAP KWAU CHING KUTAL MASENGAN MA UBAJ MUD KUWA MU PARACHUTE, KUKANDAM KU MIKANDU, KUSUKUMUK KU JIMPOL JA ATUWIT AP KWISAY MU ATUWIT MUDIA ANSH AJIM A UBAJ.”​—JURNAL WILLOW GLEN RESIDENT.

MAZU ma jurnal winou mamekeshin yitongijok yikwetau antu avud piur pa masengan. Antu avud nlel akat kusanger masengan matekina mwom mu ubaj mud kwidjibul mu rinkind mu kusadin parachute, kukandam ku mikandu ya neige, kumatik ku mikandu yilempa, ku ma etaj ap ku yilal mu kusadin parachute. Antu akat kusal kand yom yikwau ya ubaj mud masengan ma kusiburikin pa neige mu kusadin mbau, kwendish VTT, rubau ra kwendish rikweta makar ni yilat yikweta makar mulong wa kumatik mikandu yilemp nakash ap mulong wa kumatok mu mutapu ushimokishena nakash. Mud mutapu mulejenau mu gazet Time, mulong antu avud akatin nakash kusengan “masengan ma ubaj”—chinech chimekeshin anch mamiliyom ma antu makat “kusengan nich rufu, mulong mu masengan mwinomu mud ubaj ni wom ni kumekesh ukaliweny wa in masengan amija nakash ni akatina kwisangaresh kwau.”

Pakwez, kuvulijan kwa masengan kuletining ni kwawiy yakamish yikwau kand. Antu avud nakash akat kwisal nayimp mu kusal masengan mamekena anch mawapin pakwez akat kumasengan mu mutapu wa ubaj. Mu muvu wa 1997 mu États-Unis, uvud wa antu atwalau ku opital mau mau mulong isupula mu kusadin rubau ra kusiburik nich pa neige wavula mu chilik cha antu 33 ni kusut pa chitot, wa antu ipusula mu kusadin rubau rikweta makar washika ku antu 31 pa chitot, ni wa antu ipusula mu kukandam ku mikandu washika ku antu 20 pa chitot. Mulong wa masengan makwau yibudikin yid kamu yiyimp nakash, mulong wa avud wa antu afila mu kusal masengan minam ma ubaj. In kusengan masengan minam ij anch atekining mwom yau mu ubaj. Mband umwing ukata kusenganang masengan ma kusiburik mu neige ulondin anch: “Nijing chisu chawonsu anch nendining kwam ni rufu.” Ikundj umwing wija kwendish rubau rikweta makar ulondin anch: “Ang wipuswilap, kwakulond anch wasalangap kwey usu nakash.”

Kukwatijan ni yom yiney, yitongijok ik yifanyidinay mwin Kristu kwikal nich piur pa masengan minam? Mutapu ik ukutwishay Bibil kutukwash kukwat mupak wa kuman anch tukutwish kusengan masengan ma ubaj ap bwat? Kushinshikin nawamp mutapu umenay Nzamb mwom kukutukwash kwakul ku yipul yiney.

Chitongijok cha Nzamb piur pa mwom

Bibil utulejin anch Yehova ndiy “musul wa [mwom].” (Kuseng 36:9) Kimenap kwend ching pa kuyitang antu, pakwez wasala kand usu wa kuyinkish yom yikwetau nich kuswir mulong wa kusanger mwom. (Kuseng 139:14; Midimu 14:16, 17; 17:24-28) Chawiy, choviken kutong anch Nzamb uchingejin anch tulama nawamp yom yatwinkishay. Yijil ni mbil yayinkishay in Isarel yitukwashin kwijik uyakin winou.

Chijil cha Moses chading chilejen anch chading chitin kusal yom kanang mulong wa kuchidij mwom ya antu akwau. Anch muntu kasadinap mwamu ni kwafa muntu, muntu walika kukangesh yom yiney afanyina kumufish nich. Chilakej, anch muntu watung chikumbu cha piur, wafanyina kand kusutishaku jinkwatish ku chikumbu chawonsu cha kabuj. Anch walik kusal mwamu ni anch muntu wawa ku chikumbu chinech, mwin Isarel wafanyina kwikal nich chitil cha mash. (Kuvurik Yijil 22:8) Anch ngomb wamubub muntu pakad kuchingejin ni wamujip, mwin ngomb kafanyinap kwikal nich mulong. Pakwez anch antu ading ij anch ngomb winou uding wa ubaj, amubabeshinamu kal mwin ngomb ni ndiy kasadinap kwend chom ap chimwing mulong wa kumulam nawamp, chad anch ngomb winou wamubub muntu ni muntu wafa, mwin ngomb wafanyina kwikal nich chitil cha mash ni afanyina kumujip. (Kubudik 21:28, 29) Mulong mwom ud wa usey kud Yehova, Chijil chend chayinkay in Isarel chamekesha anch afanyina kukwat mwom nich usey nakash ni kuuchidij.

Atushalapol ashinshamena a Nzamb ading ij anch mbil yiney yading yiyikangeshin kutek mwom yau ni ya antu akwau mu ubaj. Mu rusangu rumwing rilejenau mu Bibil, David walonda anch “nisotil muntu umwing ing wanginkishangap mem ma kuna ma mu dijiy dia ku chis cha Betlehem.” Pa chisu chinicha Betlehem ading amuyikedin kud in Filistin. Pateshau kwit kwa David, amasalay end asatu andama ku usu mu chibeng cha in Filistin, avita mem mu dijiy dia ku Betlehem, ni amuletinam David. Mutapu ik wasalay David? Walika kuna mem minama, pakwez wamichila panch. Walonda anch: “Chakapul chaya mwa kudi am kurutu kwa [Yehova] kinikunap mem minam. Ov, nikutwish nchik kuna mash ma mom ma antu inay ipanyina kushadish mom yau mulong wa kwinletil mem minam?” (1 Jinsangu 11:17-19) Kud David, chading chiyipin nakash kutek mwom ya antu akwau mu ubaj mulong wa kuwanyish maswir mend.

Yesu niyend mwawiy mwasalay chisu chamupakau kud Djabul ni kumulej anch idjibula pansh kudiokal ku musong wa tempel mulong wa kuman anch angel akumuchidij chakwel kangal isupula. Yesu wamwakula anch: “Kangal wamupak [Yehova] Nzamb wey.” (Mateu 4:5-7) Inge, David ni Yesu ading ij anch Nzamb ukisin kutek kwau chamwamu mu ubaj mwom wa muntu.

Yilakej yiney yaad yikutwish kututongish anch: ‘Yom ik yikutwisha kutukwash kwijik anch masengan kanang masutin chipim ap mad ma ubaj? Mulong ap kwipuwangej kwakad kwau kwikal kwau ubaj, kukutwish kwikal kwa ubaj nakash, mutapu ik tukutwisha kwijik anch twaya kal kulemp nakash?’

Ov, Chid Kamu cha Usey Kutek Mwom wey mu Ubaj?

Kushinshikin nawamp masengan tukimbina kusal, kukutwish kutukwash kwakul ku chipul chinech. Chilakej, tukutwish kwiyipul anch: ‘Ov, masengan minam masadining anch antu ipusula nakash? Ov, nikwet yom ya kwifumb nich ap ya kwichidij nich chakwel kangal nipusula ap nisala nayimp? Yibudikin ik yikwikalaku anch nawa, anch nakangany kusal yinikimbina ap anch yom ya kwinchidij nich yalik kwau kusal nawamp? Ov, nikwipusul kwam pakemp, nikwipusul kamu nakash ap ov, nikutwish kufa?’

Kutek kwau chamwamu mwom mu ubaj mulong wa kwisangaresh kukutwish kuyipish urund wetu ni Yehova ni kukutwish kusal anch tulika kutambul yisend kanang ya pakampwil mu chikumangen. (1 Timote 3:2, 8-10; 4:12; Titus 2:6-8) Chakin kamu, ap chisu chipuwangejinau, in Kristu afanyidin kuvurik anch Sakatang wau umen anch mwom ud utumbila.

[Mazu ma kwinshin]