Dandamen Kwirijek Mulong wa Dichuku dia Yehova

1. Yom ik tufanyidina kusal mulong wa kupand ku dichuku dia Yehova?

PISAMBIDINAY Bibil piur pa “dichuku dia [Yehova], ukata kufanakesh ni chisu chikurumburishay Yehova akankuny nend ni kuyipandish antwend. Pasak, Yehova wayirumburishang antu yisu yimwing. (Isay 13:1, 6; Ezek. 13:5; Sof. 1:8) Mu chirung chetu, “dichuku dia [Yehova]” dikusambish ni kusheshik kwa Babilon Mujim djat ni kwinjit ja Armagedon. Mulong wa kupand ku “dichuku” dined, tufanyidin kwirijkek kusambish katat. Yesu wafundisha anch tufanyidinap kwetu ching kusu kwirijek mulong wa ‘mar makash’ pakwez tufanyidin kand “kudandamen kwirijek” mulong wa chom chinech.​—Mat. 24:21; Luka 12:40.

2. Mutapu ik tukutwisha kutanyinamu mu 1 Tesalonik?

² Mu mukand wa kusambish upepidilau wayifundinay in Tesalonik, Kambuy Paul wasadina yilakej yivud mulong wa kuyikwaswh in Kristu kudandamen kwirijek mulong wa dichuku dijim dia dirumburish dia Yehova. Paul wading wij anch dichuku dined diafanyinap kushik kamu pa chisu chinicha. (2 Tes. 2:1-3) Pakwez wayikasikesha akadivar nend kwirijek mulong wa dichuku dined mud dikushik diamashik. Katat el tushinshikinany kurumburil kwend piur pa: (1) mutapu ukushika dichuku dia Yehova, (2) antu akulika kupand ku dichuku dined, ni (3) mutapu tukutwisha kwirijek mulong wa dichuku dined.

MUTAPU IK UKUSHIKA DICHUKU DIA YEHOVA?

3. Mutapu ik ukweza dichuku dia Yehova mud mwij wezina uchuku? (Tal kand chipich.)

³ “Mudi mukat kwezay mwij uchuku.” (1 Tes. 5:2) Winou wawiy mutapu wa kusambish wasadinay Paul pakach pa mitapu yisatu yisambinay mulong wa kurumburil kwez kwa dichuku dia Yehova. Yisu yivud ij akat kusalang yom mau mau ni mu mididim, chisu chakadau antu kutongin. Dichuku dia Yehova dikushik pa kapamp kamwing, ni dikuyikashimwish antu avud. Ap in Kristu akin niyau akutwish kukashimuk mutapu ukushikena yom mau mau. Pakwez chinyim ni antu ayimp, etu kitukusheshikap.

4. Mu mutapu ik ukwikala dichuku dia Yehova mud musong wa kuval?

⁴ “Mudi misong yikata kumukashimwish band ukweta divumu.” (1 Tes. 5:3) Mband ukweta madikaj kakutwishap kwijik kamu nawamp chisu chikuvalay. Pakwez ukwet kamu kashinsh anch yom yiney yikushiken. Ni anch chashiken, kuval kukutwish kwikal kwa kukashimwish, kusansena, ni kwakad kutwish kukangesh. Chilik chimwing, twijap dichuku ap chisu chikusambisha dichuku dia Yehova. Pakwez tukwet kamu kashinsh anch dikat kwez ni anch dirumburish dia Nzamb mulong wa antu ayimp dikushik kapamp kamwing ni pakad mutapu wa kukwasinik.

5. Mu mutapu ik udia mar makash mud kucha kwa dichuku?

⁵ Mudi kucha kwa dichuku. Kufanakesh kwa kasatu kwasadinay Paul kwisambidin kand ij akata kwiy uchuku. Pakwez Paul waswimpa chitongijok chend ni chimeken anch wafanakesha nich kucha kwa dichuku. (1 Tes. 5:4) Ij akata kwez uchuku akutwish kukwatakan nakash ni kuvuramen chisu. Chitokish cha dichuku chikutwish kuyikashimwish ni kuyitek mu ubaj. Mar makash ni mawiy ma kuyitek mu ubaj antu adia mud ij adia mu mididim kusutin kusal yom yakad kumusangaresh Nzamb. Chinyim nau antu inay, tukutwish kwirijek kusutin kwipuk mikadil yakad kumusangaresh Yehova ni kudandamen kulondul “yom yiwamp ya mitapu yawonsu, ni kutentam, ni uyakin.” (Efes 5:8-12) Paul wasadina kand yilakej yaad yifanijadina mulong wa kurumburil piur pa antu akulika kupand.

ANANY AKULIKA KUPAND KU DICHUKU DIA YEHOVA?

6. Mu mutapu ik ulelau antu avud? (1 Tesalonik 5:6, 7)

⁶ ‘Antu alela tul.’ (Tang 1 Tesalonik 5:6, 7.) Paul wafanakesha antu akulika kupand ku dichuku dia Yehova nau antu alela. Ad antu akad kwijik yom yiyinyingumukina ap mutapu usutina chisu. Chawiy, kijap yom ya usey yisadikina, ni kakutwishap kuyitiy. Antu avud nlel alel tul twa mu spiritu. (Rom 11:8) Kakatap kwitiy uman umekeshina anch tushich mu “machuku ma kwisudiel” ni anch mar makash makwez kamu piswimp ap. Yinship yijim yisadikina pa mangand yikutwish kuyilangwish antu amwing pa tul twa mu spiritu ni kuyibachik kusangeraku mwamu ku uruu wetu wa Want. Pakwez, antu avud akat kuchirik mutul pandond pa kushal achila ku mes. Ap antu amwing itiyijina mu dichuku dia dirumburish atongin anch dichid kwau kulemp nakash. (2 Pita 3:3, 4) Pakwez, twij anch chid cha usey nakash kud etu kushal achila ku mes dichuku diawonsu.

7. Mutapu ik udau antu akusheshau kud Nzamb mud antu akwachikina?

⁷ ‘Antu akwachikina.’ Kambuy Pita wayifanakesha antu akusheshau kud Nzamb nau antu akwachikina maruvu. Antu akata kuna mar ashishaweling pa kukwat mutapu piur pa yom yisadikina, ni anch akimb kusal mwamu akat kukwat mipak yiyimp. Chilik chimwing, antu ayimp kakatap kutesh kubabesh kwa Nzamb. Akat kutond kulondul njil yitwadila ku disheshik. Pakwez in Kristu akat kuyilej kubabal, ni kutong nawamp. (1 Tes. 5:6) Mwin kwilej milong ya Bibil umwing urumburil anch “muntu ubabela ukat kutek manangu mend mwi ndond ni kulik kuzazat. Ukat kutong nawamp ni kukwat mupak udia uwamp.” Mulong wak tufanyidin kutek manangu mwi ndond ni kulik kuzazat? Mwamu yikutukwash kulik kwiyandjik mu milong ya antu ap ya politik ya mangand minam. Payila dichuku dia Yehova kusej piswimp, akutubachik nakash kwiyandjik mu milong yiney. Pakwez tufanyidinap kwiyakamish piur pa mutapu tukusala. Spiritu wa Nzamb ukutwish kutukwash kutek manangu mwi ndond ni kulik kuzazat ni kukwat mipak ya manangu.​—Luka 12:11, 12.

YOM IK TUFANYIDINA KUSAL MULONG WA KWIRIJEK MULONG WA DICHUKU DIA YEHOVA?

8. 1 Tesalonik 5:8 ufanakeshin mutapu ik mikadil yikutwisha kutukwash kushal achila ku mes ni kutek manangu mwi ndond? (Tal kand chipich.)

⁸ ‘Chifanyidin etu kudjal rukibu ni chiful cha utad.’ Paul utufanakeshin ni amasalay ija ni adjadina mulong wa kuya kwi njit. (Tang 1 Tesalonik 5:8.) Antu achingejining anch isalay ikal muntu wirijekina chisu chawonsu mulong wa kuya kurish anch kwalank njit. Chid kand mwamu kud etu. Tukat kushal irijekina mulong wa dichuku dia Yehova kusutin kudjal rukibu ra ritiy, rukat ni chiful cha ruchingej. Mikadil yiney yikutwish kutukwash nakash.

9. Ritiy rikat kutuchidij mutapu ik?

⁹ Rukibu rachidijang muchim wa isalay. Ritiy ni rukat yikat kuchidij muchim wetu wa chifanakesh. Yikutukwash kudandamen kumusadin Nzamb ni kumulondul Yesu. Ritiy rikat kutwinkish kashinsh anch Yehova ukutufut mulong tukat kumukimb nich muchim wetu wawonsu. (Heb. 11:6) Chinech chikutubachik kushal ashinshamena kuday Ntakel wetu Yesu, ap chikutwit kujijamen yikokujol yikash. Tukutwish kukasikesh ritiy retu mulong wa kurish ni yikokujol kusutin kushinshikin yilakej ya antu a chirung chetu alamina kushinshaman kwau chikalap nchik kuzengol ap kuburen nfalang. Ni tukutwish kwipuk ubaj wa kukat nakash nfalang ni yom ya kumujimbu kusutin kuyimburij antu apipeja mashakamin mau mulong wa kutek yisakin ya Want pa ndond ya kusambish.b

10. Rukat mulong wa Nzamb ni amutej netu rikutukwash mutapu ik kujijaman?

¹⁰ Rukat ni rawiy rid ra usey mulong wa kushal achila ku mes ni kutek manangu mwi ndond. (Mat. 22:37-39) Rukat mulong wa Nzamb rikat kutukwash kudandamen kulejan chikalap nchik yakamish tukutwisha kurish nich anch twasal mwamu. (2 Tim. 1:7, 8) Mulong tuyikatining kand ap antu akad kumusadin Yehova, tukat kudandamen kulejan mu teritwar wetu, ap kusutin kusadin telefon ni kufund mikand. Tukatap kushadish ruchingej anch dichuku dimwing amutej netu akutwish kuswimp ni kusambish kusal yom yidia yiwamp.​—Ezek. 18:27, 28.

11. Kuyikat ambay netu kukat kutukwash mutapu ik? (1 Tesalonik 5:11)

11 Tuyikatin kand akadivar nau anambaz netu. Tukat kumekesh rukat mud riner kusutin ‘kukasikeshijan mu ritiy muntu ni mukwau.’ (Tang 1 Tesalonik 5:11.) Mud amasalay asadina pamwing mulong wa kurish, tukat kukasikeshijan muntu ni mukwau. Chakin, isalay ukutwish kumuloz mukwau pakad kutongin chisu chidiau mwi njit, pakwez kakutwishap kusal mwamu kwa kwisotin. Chisik chimwing niyetu, tukutwishap kumusal nayimp mukadivar ap nambaz netu kwa kwisotin ap kumuchirishin uyimp ku uyimp. (1 Tes. 5:13, 15) Tukat kumesh kand rukat kusutin kuyilimish akadivar atakedina chikumangen. (1 Tes. 5:12) Pafunday Paul mukand winou, chikumangen cha ku Tesalonik chading kandikal chiwanyish muvu ap umwing. Antu ading atakedila chikumangen chinech ading kandikal ikal ni ukaliweny ni afanyina kurumbok nakash. Pakwez, adandamena kuyilimish. Pasejina mar makash, tukwikal ni kuswir nakash kwa umutakel wa amakurump a chikumangen kusutamu nlel. Chikutwish kutukasiken kutambul umutakel udiokila kud akadivar adia ku biro mujim wa pa mangand mawonsu; chawiy chid cha usey kusambish kuyikat ni kuyilimish amakurump etu kusambish katat. Chikalap nchik chom chikutwisha kushiken, el amboku tudandamenany kutek manangu metu mwi ndond, ni kulik kushinshikin pa kuburen kuwanyin kwetu, pakwez tushinshikinany pa kashinsh kamekeshina anch Yehova ukat kuyitakel amakundj inay ashinshamena kusutin Kristu.

12. Ruchingej rikat kuking mutapu ik yitongijok yetu?

¹² Mud mutapu ukata chiful kuchidij mutu wa isalay, ruchingej retu ra dipandish rikat kuchidij manangu metu ni kutukwash kutong nawamp. Anch ruchingej retu rid rikash, tukuman anch yom yawonsu yidia mu mangand minam yid kwau yakad usey. (Fil. 3:8) Ruchingej retu rikat kutukwash kutek manangu mwi ndond ni kulik kuzazat. Yiney yawiy yamushikena Wallace ni Laurinda, asadidina mu Afrik. Mwi mbing jisatu, awonsu aad afisha anvajau. Mulong wa chipupu cha KOVID-19, katwishap kuchirik mu majuku mau. Wallace wafunda anch: “Ruchingej ra divumbuk rankwashin kuyivurik, kadiap mutapu wadingau mu mangand minam kurutu afa, pakwez mutapu ukwikalau mu mangand masu, machuku makemp kupwa kwa kuyivumbul. Ruchingej riner rankwasha kutek manangu mwi ndond chisu nading nirishina nich ushon ni yovil yiyimp yidiokila ku kufish.”

13. Yom ik tukutwisha kusal mulong wa kutambul spiritu utumbila?

¹³ “Kangal wamukangeshany [spiritu] utumbila.” (1 Tes. 5:19) Paul wamekesha anch spiritu utumbila ukat kusal mudimu mu etu. Anch twalik kumukangesh, tukwikal ni mushiku nakash ni chirungul cha kusal yom yitentamina ni kwikal ni usu wa kusal mudimu wa Yehova. (Rom 12:11) Yom ik tukutwisha kusal mulong wa kutambul spiritu utumbila? Tufanyidin kumwit mu malembil, kwilej dizu dia Nzamb diapepilau kud spiritu winou, ni kukumangan pamwing mu dirijek ditakedilau kud spiritu. Kusal mwamu kukutukwash kukudish ‘dibuj dia spiritu.’​—Gal. 5:22, 23.

14. Yom ik tufanyidina kwipuk mulong wa kudandamen kutambul spiritu wa Nzamb? (Tal kand chipich.)

14 Kupwa kwa kutambul spiritu udiokila kud Nzamb, tufanyidin kubabal nakash ni kulondul chiyul chilondina anch “kangal wamukangeshany [spiritu utumbila].” Nzamb ukat kupan spiritu utumbila ching kusu kud antu adandamedina kulam yitongijok ni mwikadil wishitwila. Kakudandamenap kutwinkish spiritu wend anch twadandamen kutongijokin pa yom yijondila ap kuyisal. (1 Tes. 4:7, 8) Mulong wa kudandamen kutambul spiritu utumbila, tufanyidin kand kulik kudiul “mazu malondilau aruu a Nzamb.” (1 Tes. 5:20) “Uruu” winou wadiokalang ku spiritu wa Nzamb, wisambidin kand dichuku dia Yehova, ni chirung chetu chidia cha kuswapej. Tufanyidinap kudiosh dichuku dined mu manangu metu, ap kutong anch Armagedon kakushikap kwend pa chirungu tuchidia aom. Pakwez, tukat kumekesh anch tuchingejin anch dikushik kamu piswimp ap , ap anch tudilamin mu manangu kusutin kwikal “in kudandamen kudi Nzamb” dichuku diawonsu.​—2 Pita 3:11, 12.

“SHINSHIKINANY YOM YAWONSU”

15. Mutapu ik tukutwisha kwipuk kutudimb nich nsangu ja makasu ja ayilembil? (1 Tesalonik 5:21)

¹⁵ Piswimp ap, akankuny a Nzamb akulond mu mutapu kanang anch: “Chisambu ni kwikang!” (1 Tes. 5:3) Makasu ma ayilembil makupalangan pa divu diawonsu, akudimb antu avud nakash. (Kuj. 16:13, 14) Chid nchik piur petu? Etu kakutudimbap anch ‘twashinshikin [ap twapim] yom yawonsu.’ (Tang 1 Tesalonik 5:21.) Mazu ma Grek makarumwinau anch “Shinshikinany” amasadidin mulong wa kufanakesh nich mutapu ukatau kupim yom mud or ap argent mulong wa kwikal nich kashinsh anch yid yiwamp. Chinech chading cha usey kud in Tesalonik, ni chikwikal kand cha usey nakash kud etu payila mar makash kusej piswimp. Pa ndond pa kwitiy mud ayisup yom yilondinau antu akwau, tukat kusadin ukaliweny wetu wa kutong mulong wa kufanakesh yom tukata kutang ap kutesh nich yom yifundishinay Bibil ni dirijek dia Yehova. Kusal mwamu, kukutukwash kwez kulik kutudimb ku makasu ma ayilembil.​—Jnsw. 14:15; 1 Tim. 4:1.

16. Ruchingej ik rakin tukweta, ni mupak ik tukwatina?

¹⁶ Twij anch tukupand ku mar makash, mulong tud atushalapol a Yehova. Pakwez, twijap kamu yom yikushikena diamashik. (Jak. 4:14) Uyakin ud anch, ap anch twafa kurutu ap kupwa kwa mar makash, akutufut mwom wa chikupu anch twashal ashinshamena. In Kristu azizidilau many akwikal pamwing ni Kristu mwiur. Amikoku akwau akushakam pa divu dikwikala paradis. Tusalany amboku etu awonsu usu wa kudandamen kushinshikin pa ruchingej retu ripandakena kuwap ni kushal irijekina mulong wa dichuku dia Yehova!